NĀ ʻŌLELO AKAMAI A SOLOMONA 28
28
MOKUNA XXVIII.
1¶ Hoʻoheʻe wale ka mea hewa, ʻaʻohe mea e hahai ana;
ʻO ka poʻe pono hoʻi, wiwo ʻole lākou me he liona lā.
2No ka hewa o ka ʻāina, nui nō ko laila poʻe aliʻi;
A ma ke kanaka noʻonoʻo a ʻike hoʻi e paʻa lōʻihi ana nō ia.
3ʻO ke kanaka ʻilihune e hoʻokaumaha ana i ka poʻe ʻilihune,
ʻO ia ka ua e hoʻopau ana i ka ʻai a pau.
4ʻO ka poʻe haʻalele i ke kānāwai, hoʻomaikaʻi nō lākou i ka mea hewa;
ʻO ka poʻe mālama hoʻi i ke kānāwai, kūʻē aku nō i ua poʻe lā.
5ʻAʻole i ʻike ka poʻe ʻaiā i ka hoʻopono;
A ʻo ka poʻe ʻimi iā Iēhova, ʻike nō i nā mea a pau.
6E aho ka mea ʻilihune ke hele ʻo ia ma ka pololei,
I ka mea waiwai i hoʻokekeʻe i kona ʻaoʻao.
7ʻO ka mea mālama i ke kānāwai, he keiki naʻauao ia;
ʻO ka hoa no ka poʻe hoʻokai wale, ʻo ia kai hoʻohilahila i kona makua kāne.
8ʻO ka mea hoʻonui i kona waiwai ma ka uku kuala a me ke kāʻili wale,
E hoʻoʻiliʻili ʻo ia ia mea na ka mea e aloha aku i ka poʻe ʻilihune.
9ʻO ka mea hāliu aku i kona pepeiao ʻaʻole hoʻolono i ke kānāwai,
E hoʻopailua ʻia kāna pule.
10ʻO ka mea kaʻi hewa aku i ka poʻe pololei ma ka ʻaoʻao hewa,
Ma kona lua iho ʻo ia e hāʻule ai;
A ʻo ka poʻe pololei hoʻi, e ili mai ka maikaʻi no lākou.
11Ua naʻauao nō ke kanaka waiwai i kona manaʻo iho;
Akā, ʻo ka mea ʻilihune a naʻauao hoʻi, ʻo ia kai ʻike aku iā ia.
12I ka hauʻoli ʻana o ka poʻe pono, nui ka hanohano;
A i ke kū ʻana aʻe o ka poʻe hewa, ua hūnā ʻia ke kanaka.
13ʻO ka mea hūnā i kona hewa iho, ʻaʻole ʻo ia e pōmaikaʻi;
Akā, ʻo ka mea hōʻoia a haʻalele hoʻi, e aloha ʻia mai ʻo ia.
14Pōmaikaʻi ke kanaka ke mau aku kona makaʻu;
ʻO ka mea hoʻopaʻakikī i kona naʻau, e hāʻule ʻo ia i ka pōpilikia.
15ʻO ka liona uō a me ka bea holoholo,
ʻO ia ke aliʻi hewa ma luna o nā kānaka ʻilihune.
16ʻO ke aliʻi naʻauao ʻole, nui kona hoʻokaumaha ʻana;
ʻO ka mea hoʻowahāwahā i ka makeʻe waiwai, e lōʻihi nō kona mau lā.
17ʻO ke kanaka hewa i ke koko o kekahi,
E holo ʻo ia i ka lua; mai keʻakeʻa kekahi iā ia.
18ʻO ka mea hele pololei e ola ʻo ia;
ʻO ka mea hoʻokekeʻe i kona ʻaoʻao, e hāʻule koke nō ia.
19ʻO ka mea mahi i ka ʻāina e māʻona ʻo ia i ka ʻai;
ʻO ka mea hoʻopili mea ʻai ma hope o ka poʻe lapuwale e piha ʻo ia i ka ʻilihune.
20ʻO ke kanaka hōʻoiaʻiʻo, nui wale kona mau mea e pōmaikaʻi ai;
ʻO ka mea holo kikī ma hope o ka waiwai, ʻaʻole e ʻole kona hala.
21ʻO ka manaʻo ʻana i ko ke kanaka kino, ʻaʻole ia he maikaʻi;
No kahi ʻāpana ʻai e lawehala nō ua kanaka lā.
22ʻO ka mea hoʻoikaika ma ka waiwai, he maka ʻino kona,
ʻAʻole ʻo ia e ʻike ʻo ka ʻilihune kāna mea e loaʻa ai.
23ʻO ka mea aʻo aku i ke kanaka, ma hope iho e loaʻa iā ia ka lokomaikaʻi ʻia mai,
Ma mua o ka mea malimali me kona alelo.
24ʻO ka mea kāʻili wale i kā kona makua kāne a me kā kona makuahine,
Me ka ʻī ʻana aʻe, “ʻAʻole ia he hewa,”
ʻO ia ka hoa no ka pepehi kanaka.
25ʻO ka mea i haʻaheo ka naʻau, ʻo ia kai hoʻokonokono i ka hakakā;
ʻO ka mea paulele iā Iēhova e lako loa ʻo ia.
26ʻO ka mea paulele i kona naʻau iho, ʻo ia ka mea naʻaupō;
ʻO ka mea hele ma ka naʻauao, e hoʻopakele ʻia ʻo ia.
27ʻO ka mea hāʻawi wale na ka mea ʻilihune, ʻaʻole ʻo ia e nele;
A ʻo ka mea i uhi aʻe i kona mau maka, e nui kona hōʻino ʻia mai.
28I ke kū ʻana o ka poʻe hewa, ua hūnā ke kanaka iā ia iho;
A make lākou, a laila māhuahua ka poʻe pono.
Ka Baibala Hemolele © Partners Development Foundation, 2018.