NĀ ʻŌLELO AKAMAI A SOLOMONA 26
26
MOKUNA XXVI.
1¶ E like me ka hau i ke kau,
E like me ka ua i ka wā e ʻohi ai,
Pēlā i kū ʻole ai ka hanohano i ka mea lapuwale.
2E like me ka zepora e ʻauana ana,
E like me ka derora e lele ana,
Pēlā ka pōʻino, ʻaʻole ia e hiki wale mai.
3I mea hahau no ka lio, i kaula waha no ka hoki,
I lāʻau hahau hoʻi no ke kua o nā mea lapuwale.
4Mai ʻōlelo aku i ka mea lapuwale e like me kona naʻaupō ʻana,
O like ʻoe me ia.
5E ʻōlelo nō i ka mea lapuwale e like me kona naʻaupō ʻana,
O naʻauao ʻo ia i kona maka iho.
6ʻO ka mea ʻoki aʻe i nā wāwae a loaʻa iā ia ka pōʻino,
ʻO ia kai kauoha aku i nā manaʻo ma ka lima o ka mea lapuwale.
7E lawe aku i nā wāwae o ka mea ʻoʻopa,
A me ka ʻōlelo nane mai loko aʻe o ka waha o ka poʻe lapuwale.
8E like me ka nākiʻi ʻana i ka ʻiliʻili ma ka maʻa a paʻa,
Pēlā ka hāʻawi ʻana i ka hanohano no ka mea lapuwale.
9ʻO ka mea ʻoiʻoi e ʻō ana i ka lima o ka mea ʻona,
ʻO ia ka ʻōlelo nane ma ka waha o ka poʻe lapuwale.
10ʻO ka mea nui nāna i hana nā mea a pau,
ʻO ia ka mea nāna e hoʻopaʻi i ka mea lapuwale a e hoʻopaʻi hoʻi i ka poʻe lawehala.
11E like me ka ʻīlio i hoʻi hou aku i kona luaʻi,
Pēlā ka mea naʻaupō e hoʻi hou ana i kona lapuwale.
12Ua ʻike anei ʻoe i ke kanaka naʻauao i kona manaʻo iho?
He lana ka manaʻo no ka mea naʻaupō ʻaʻole nona.
13ʻĪ aʻela ka mea palaualelo, “He liona ma ke ala!
He liona i waena o ke kuamoʻo!”
14ʻO ka luli ʻana o ke pani ma kona ʻami,
ʻO ia ka mea palaualelo ma kona moena.
15Hoʻokomo ka mea palaualelo i kona lima i loko o ke pā,
A he mea kaumaha iā ia ke hāpai hou aʻe ia i kona waha,
16He naʻauao loa ka mea palaualelo i kona manaʻo iho,
Ma mua o nā kānaka ʻehiku e hōʻike ana i ka ʻoiaʻiʻo.
17ʻO ka mea lālau i ka ʻīlio ma nā pepeiao,
Ola ka mea e māʻalo ana, a lawe pū i ka hakakā pili ʻole iā ia.
18E like me ka mea e hoʻoleilei ana i nā ihe wela, a me nā pua a me ka make;
19Pēlā ke kanaka e hoʻopunipuni ana i kona hoa noho,
ʻĪ aʻela hoʻi, “ʻAʻole anei he pāʻani koʻu?”
20I ʻole ka wahie, e pio nō ke ahi,
I ʻole ka mea holoholo ʻōlelo, pau ka hakakā.
21ʻO ka nānahu i nā nānahu wela, a me ka wahie i ke ahi,
ʻO ia ke kanaka huhū e hoʻokonokono ana i ka hakakā.
22ʻO nā ʻōlelo a ka mea holoholo ʻōlelo,
Ua like nō ia me nā ʻōlelo pāʻani,
Komo i lalo naʻe ia a i loko lilo o ka ʻōpū.
23ʻO ke kālā maʻemaʻe ʻole i hoʻopili ʻia me kahi pōhue,
ʻO ia nā lehelehe e alohaloha ana me ka naʻau ʻino.
24ʻO ka mea inaina, hūnā ʻo ia ma kona mau lehelehe,
A i loko ona iho i waiho ai ʻo ia i ka hoʻopunipuni.
25Inā i ʻoluʻolu kāna ʻōlelo, mai manaʻoʻiʻo aku iā ia;
No ka mea, ʻehiku mau mea ʻino i loko o kona naʻau.
26ʻO ka mea i hūnā ʻia kona inaina i ka hoʻopunipuni,
E hōʻike ʻia kona hewa i mua o ke anaina kanaka.
27ʻO ka mea ʻeli i ka lua, ʻo ia ke hāʻule i laila;
ʻO ka mea ʻolokaʻa i ka pōhaku, e hoʻi hou mai ia ma luna ona.
28ʻO ke elelo wahaheʻe, ʻo ia ke inaina aku i ka mea pōʻino ma laila;
ʻO ka waha malimali, ʻo ia ke hana i ka mea e make ai.
Currently Selected:
NĀ ʻŌLELO AKAMAI A SOLOMONA 26: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.