NĀ ʻŌLELO AKAMAI A SOLOMONA 22
22
MOKUNA XXII.
1¶ He mea makemake ʻia ke kaulana ma mua o ka waiwai he nui;
A ma mua hoʻi o ke kālā a me ke gula ka lokomaikaʻi ʻiʻo.
2Hālāwai pū ka poʻe waiwai a me ka poʻe ʻilihune;
Na Iēhova lākou a pau i hana.
3Nānā aʻela ka mea noʻonoʻo i ka ʻino, a hūnā iā ia iho;
Hele wale aku hoʻi ka mea naʻaupō a hihia ʻo ia.
4No ka naʻau haʻahaʻa, ka makaʻu iā Iēhova,
Ka waiwai hoʻi a me ka hanohano a me ke ola.
5Aia nā kākalaioa a me nā mea hihia ma ke ala o ka mea hele kekeʻe;
ʻO ka mea mālama i kona ʻuhane, kaʻawale nō ʻo ia ia mau mea.
6E aʻo aku i ke kamaliʻi i kona ʻaoʻao,
A ʻelemakule ʻo ia, ʻaʻole ia e huli aʻe mai laila aku.
7Noho aliʻi ka mea waiwai ma luna o ka poʻe ʻilihune,
He kauā hoʻi ka mea hoʻopili wale na ke kanaka hāʻawi wale.
8ʻO ka mea lūlū aku i ka hewa, e ʻohi ia i ka pōpilikia;
Ua hoʻopau ʻia ka lāʻau hahau o kona huhū.
9ʻO ka mea maka lokomaikaʻi, e hoʻomaikaʻi ʻia ʻo ia;
No ka mea, ua hāʻawi wale ia i kekahi o kāna berena i ka mea nele.
10E hoʻokuke aku i ka mea hoʻowahāwahā, a e kaʻawale aku hoʻi ka hoʻopaʻapaʻa;
E pau hoʻi ka hakakā a me ka hoʻomāʻewaʻewa.
11ʻO ka mea makemake aku i ka naʻau maʻemaʻe,
No ka lokomaikaʻi o kona mau lehelehe, e lilo ke aliʻi i hoaaloha nona.
12ʻO nā maka o Iēhova, mālama aku nō i ka ʻike,
Hoʻohiolo ʻo ia i nā ʻōlelo a ka mea ʻaiā.
13ʻŌlelo aʻela ka mea palaualelo, “He liona ma waho,
E make auaneʻi au ma ke alanui!”
14He lua hohonu ka waha o ka wahine hoʻokamakama,
ʻO ka mea inaina ʻia e Iēhova, e hāʻule nō ia ma laila.
15Ua paʻa ke kolohe i loko o ka naʻau o ke kamaliʻi,
ʻO ka lāʻau hahau, ʻo ia ke hoʻohemo aʻe ia mea mai ona aku.
16ʻO ka mea hoʻokaumaha i ka mea ʻilihune i mea e hoʻomāhuahua ai i kāna iho,
A ʻo ka mea hāʻawi no ka mea waiwai, e nele ʻiʻo nō lāua a ʻelua.
17¶ E hāliu mai kou pepeiao a e hoʻolohe i nā ʻōlelo a ka poʻe naʻauao,
A e ʻimi iho kou naʻau i koʻu ʻike.
18No ka mea, he ʻoluʻolu nō ke mālama ʻoe ia mau mea i loko ou,
E kūpono nō hoʻi i kou mau lehelehe;
19I paulele ʻoe iā Iēhova,
ʻO ia kaʻu i hōʻike ai iā ʻoe, iā ʻoe nō i kēia lā.
20ʻAʻole anei i palapala aku au iā ʻoe i nā maikaʻi,
Ma nā ʻōlelo aʻo a me ka ʻike?
21I hōʻike aku ai au iā ʻoe i ka ʻoiaʻiʻo o ka ʻōlelo pololei,
I haʻi pololei aku ʻoe i ka poʻe i hoʻouna ʻia mai iā ʻoe.
22¶ Mai kāʻili wale ʻoe i kā ka mea ʻilihune no kona ʻilihune ʻana;
ʻAʻole hoʻi e hoʻokaumaha i ka mea nele ma kahi o ka ʻīpuka;
23No ka mea, na Iēhova e hoʻoponopono no lākou,
E hao mai ʻo ia i ka ʻuhane o ka poʻe i hao aku iā lākou.
24¶ Mai hoʻolauna aku ʻoe me ka mea huhū,
A me ke kanaka inaina hoʻi, mai hele pū ʻoe;
25O aʻo iho ʻoe i kona mau ʻaoʻao,
A loaʻa i kou ʻuhane ka hihia.
26¶ Mai hui aʻe ʻoe me ka poʻe paʻi aku i ka lima;
ʻAʻole hoʻi me ka poʻe pānaʻi no ka ʻaiʻē.
27Inā ʻaʻole āu mea e hoʻokaʻa aku ai,
No ke aha lā e lawe ʻia aku ai kou wahi moe mai lalo aku ou?
28¶ Mai hōneʻeneʻe ʻoe i nā mokuna ʻāina kahiko,
Nā mea a kou poʻe kūpuna i hoʻonoho ai.
29¶ Ua ʻike anei ʻoe i ke kanaka miki ma kāna hana?
E kū nō ia i mua o nā aliʻi,
ʻAʻole ʻo ia e kū i mua o ka poʻe naʻaupō.
Currently Selected:
NĀ ʻŌLELO AKAMAI A SOLOMONA 22: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.