NĀ ʻŌLELO AKAMAI A SOLOMONA 18
18
MOKUNA XVIII.
1¶ No ka makemake wale e ʻimi ai ke kanaka manaʻo kūʻē,
A pale aku nō i nā manaʻo pono a pau.
2ʻAʻole i hāliu mai ka mea lapuwale i ka ʻike,
Akā, ma ka hōʻike ʻana i kona naʻau.
3A hiki mai ka hewa, hiki mai nō hoʻi ka hoʻowahāwahā;
A ʻo ka hilahila pū kekahi me ka hoʻomāʻewaʻewa.
4He wai hohonu nā ʻōlelo o ko ke kanaka waha;
He pūnāwai e hū ana, ke kumu o ka naʻauao.
5ʻO ka hōʻoluʻolu aku i ka mea hewa, ʻaʻole ia he maikaʻi;
ʻAʻole hoʻi ka ʻōpeʻa aku i ka mea pono ma ka hoʻokolokolo ʻana.
6ʻO nā lehelehe o ka mea lapuwale, aia nō ma ka hoʻopaʻapaʻa;
Ua maopopo kona waha e pono ke hahau ʻia.
7ʻO ka waha o ka mea lapuwale, ʻo ia kona mea e make ai;
A ʻo kona mau lehelehe hoʻi, ʻo ia ke pahele o kona ʻuhane.
8ʻO nā ʻōlelo ʻahiʻahi, ua like me nā ʻōlelo pāʻani,
A komo nō naʻe i loko loa o ka ʻōpū.
9ʻO ka mea hoʻomoloā ma kāna hana ʻana,
He kaikaina ʻo ia o ka mea hoʻomāunauna wale.
10He pā kaua ikaika ka inoa ʻo Iēhova;
Ma laila e holo ai ka mea pono a maluhia ihola.
11ʻO ka waiwai o ka mea waiwai, ʻo ia kona kūlanakauhale paʻa i ka pā,
Ua like hoʻi me ka pā kiʻekiʻe i kona manaʻo.
12Ma mua o ka make, ua haʻaheo ka naʻau o ke kanaka,
Ma mua hoʻi o ka hoʻokiʻekiʻe ʻia mai, he akahai.
13ʻO ka mea hoʻopuka i kona manaʻo ma mua o kona lohe ʻana,
He lapuwale ia, a he mea ia nona e hilahila ai.
14ʻO ka ʻuhane o ke kanaka, hoʻomanawanui nō ia i ka nāwaliwali;
Akā, ʻo ka ʻuhane e ʻeha ana, ʻo wai lā e hiki ai ke hoʻomanawanui?
15ʻO ka naʻau o ka mea naʻauao e loaʻa iā ia ka ʻike;
ʻO ka pepeiao hoʻi o ka poʻe akamai, e ʻimi nō i ka naʻauao.
16ʻO ko ke kanaka makana, he mea ia e hoʻokaʻawale ai i wahi nona;
A e kaʻi aku hoʻi iā ia i mua o nā kānaka koʻikoʻi.
17Ua pono ka mea i hoʻopiʻi ʻia i kāna ʻōlelo mua ʻana;
Akā, hele mai kona hoa noho a ʻimi aʻe i kona ʻano.
18ʻO ka hailona ʻana ka mea e pau ai ka hoʻopaʻapaʻa;
He mea hoʻi e ʻuao ai i waena o ka ikaika.
19ʻAʻole ikaika ke kūlanakauhale paʻa i ka pā e like me ka hoahānau i hoʻonāukiuki ʻia;
A ʻo ko lāua hoʻopaʻapaʻa ʻana, ua like me nā kaola hao o ka hale aliʻi.
20Ma nā hua o ko ke kanaka waha, e māʻona ai kona ʻōpū;
A ma ka waiwai o kona mau lehelehe e piha ai ʻo ia.
21Ma ke elelo ka make a me ke ola;
ʻO ka mea makemake ma laila, e ʻai ʻo ia i kona hua.
22ʻO ka mea loaʻa iā ia ka wahine, loaʻa nō ka mea maikaʻi,
Ua loaʻa hoʻi iā ia ka lokomaikaʻi no Iēhova mai.
23He noi ko ke kanaka ʻilihune;
A ʻo ka mea waiwai, ua ʻōlelo kalakala ʻo ia.
24ʻO ke kanaka i nui nā hoalauna, e pōʻino ʻo ia ma laila;
Akā, ʻo kekahi hoaaloha ua ʻoi aku kona pipili ʻana ma mua o ko ka hoahānau.
Ka Baibala Hemolele © Partners Development Foundation, 2018.