KA BUKE ʻAHĀ A MOSE, I KAPA ʻIA NĀ HELU 5
5
MOKUNA V.
1 No ke kipaku ʻana i nā lēpero i waho o kahi hoʻomoana. 5 Ke kānāwai no ka lawehala ʻana. 11 Ke kānāwai no ka lili.
1¶ ʻŌlelo maila ʻo Iēhova iā Mose, ʻī maila,
2“E kauoha aku ʻoe i nā mamo a ʻIseraʻela, e hoʻokuke aku i nā lēpero a pau i waho o kahi hoʻomoana, a me nā mea maʻi pūhā a pau, a me nā mea a pau i haumia i ke kupapaʻu.
3“ʻO nā kāne a me nā wāhine kā ʻoukou e hoʻokuke aku ai i waho o kahi hoʻomoana, i hoʻohaumia ʻole ai lākou i ko lākou mau wahi hoʻomoana, kahi aʻu e noho nei i waenakonu.”
4Pēlā nō i hana ai ka poʻe mamo a ʻIseraʻela, a hoʻokuke akula iā lākou i waho o kahi hoʻomoana; me kā Iēhova i ʻōlelo mai ai iā Mose, pēlā nō nā mamo a ʻIseraʻela i hana ai.
5¶ ʻŌlelo maila ʻo Iēhova iā Mose, ʻī maila,
6“E ʻōlelo aku ʻoe i nā mamo a ʻIseraʻela, ‘Inā he kāne paha he wahine paha, e hana i kekahi hewa, i ka mea a kānaka e hana ai, e lawehala ai iā Iēhova, a i hewa ua kanaka lā;
7a laila, e haʻi mai lākou i ka hewa a lākou i hana ai; a e uku aku nō ia i kāna mea i lawehala ai, ma ke kumu o ia mea, a e hui pū me ia i ka hapalima hou aku o ia mea, a e hāʻawi aku ia na ka mea iā ia kona lawehala ʻana.
8‘Inā paha ʻaʻohe hoahānau no ua kanaka lā, i uku ʻia aku ai nona ka uku o ka hewa, a laila e uku ʻia aku ka hewa iā Iēhova, i ke kahuna hoʻi; he ʻokoʻa ka hipa kāne kalahala, nāna e kala ʻia ai ka hala nona.
9‘A ʻo nā mōhai a pau no nā mea laʻa a pau a ka poʻe mamo a ʻIseraʻela, nā mea a lākou e lawe mai ai i ke kahuna, e lilo ia nāna.
10‘Nāna nō hoʻi nā mea laʻa a pau a kēlā kanaka kēia kanaka; nā mea a kekahi kanaka e hāʻawi mai ai i ke kahuna, e lilo ia nāna.’”
11¶ ʻŌlelo maila ʻo Iēhova iā Mose, ʻī maila,
12“E ʻōlelo aku ʻoe i nā mamo a ʻIseraʻela, e ʻī aku iā lākou, ‘A i lalau ka wahine a kekahi kanaka, a e hana aku i ka mea e hewa ai iā ia,
13a moekolohe kekahi kanaka me ia, a ua hūnā ʻia ua mea lā mai nā maka aku o kāna kāne, a ua uhi ʻia ia, a ua haumia ʻo ia; ʻaʻohe mea hōʻike e kūʻē iā ia, ʻaʻole hoʻi i loaʻa paka ʻo ia;
14a i kau mai ka manaʻo lili ma luna o ke kāne, a lili aku paha ia i kāna wahine, a ua haumia kēlā; inā hoʻi e kau ka manaʻo lili iā ia, a lili aku nō ia i kāna wahine, a ua haumia ʻole paha kēlā;
15a laila, e alakaʻi aku ke kāne i kāna wahine i ke kahuna, a e lawe aku ia i kāna mōhai nona, i ka hapaʻumi o ka ʻepa palaoa bale; ʻaʻole ia e ninini i ka ʻaila ma luna, ʻaʻole hoʻi e kau iho i ka libano ma luna; no ka mea, he mōhai ia no ka lili, he mōhai hoʻomanaʻo, e paipai ana e hoʻomanaʻo i ka hewa.
16¶ ‘A e alakaʻi mai ke kahuna i ka wahine a kokoke, a e hoʻonoho iā ia i mua o Iēhova.
17‘E lawe hoʻi ke kahuna i wahi wai laʻa i loko o ka ipu lepo; a e lawe ke kahuna i kekahi lepo o ka papa lalo o ka halelewa, a e hahao iho i loko o ua wai lā.
18‘A e hoʻonoho ke kahuna i ka wahine i mua o Iēhova, a e wehe i ka pale o ke poʻo o ua wahine lā, a e waiho i ka mōhai hoʻomanaʻo i loko o kona lima, ʻo ia ka mōhai no ka lili; a e paʻa ke kahuna i ka wai ʻawaʻawa e hoʻopōʻino ai ma kona lima iho.
19‘A e kauoha aku ke kahuna iā ia ma ka hoʻohiki ʻana, a e ʻōlelo aku ia i ka wahine, “Inā i moe pū ʻole kekahi kanaka me ʻoe, inā hoʻi i lalau ʻole aʻe ʻoe i ka haumia me ka mea ʻaʻole ʻo kāu kāne iho, a laila ua kaʻawale ʻoe i kēia wai ʻawaʻawa e hoʻopōʻino ai.
20“Akā, inā he ʻoiaʻiʻo kou lalau ʻana aʻe i ka haumia me ka mea ʻaʻole ʻo kāu kāne iho, a inā i haumia ʻiʻo ʻoe, a ua moe kekahi kanaka ʻaʻole ʻo kāu kāne me ʻoe;”
21a laila, e kauoha aku ke kahuna i ka wahine ma ka ʻōlelo hoʻohiki no ka hōʻino ʻana; a e ʻī aku ke kahuna i ua wahine lā, “E hoʻolilo auaneʻi ʻo Iēhova iā ʻoe i mea pōʻino, a i mea hoʻohiki ʻino ia i waena o kou poʻe kānaka, i ka manawa a Iēhova e hoʻowīwī iho ai i kou ʻūhā, a e hoʻopehu ai i kou ʻōpū;
22a ʻo kēia wai hoʻopōʻino, e komo nō ia i loko o kou ʻōpū, i mea e pehu ai ka ʻōpū, a e wīwī ai ka ʻūhā.” A laila e ʻōlelo mai ka wahine, “ʻĀmene, ʻāmene.”
23¶ ‘A e palapala ke kahuna i kēia mau hōʻino ʻana i loko o ka buke, a e holoi iho ia mea i ka wai ʻawaʻawa.
24A e hoʻoinu ʻo ia i ka wahine i ka wai ʻawaʻawa, i ka mea e hoʻopōʻino ai; a ʻo ka wai e hoʻopōʻino ai, e komo ia i loko ona, he mea ʻawaʻawa.
25‘A laila e lawe ke kahuna i ka mōhai no ka lili, mai loko mai o ka lima o ka wahine, a e hoʻāli aʻe ia i ua mōhai lā i mua o Iēhova, a e kaumaha aku ma luna o ke kuahu;
26e lawe hoʻi ke kahuna i kauwahi o ka mōhai a piha kona lima, i ka mea paipai manaʻo, a e kuni ia i ke ahi ma luna o ke kuahu; a ma hope iho, e hoʻoinu ʻo ia i ka wahine i ka wai.
27‘A pau kona hoʻoinu ʻana iā ia i ka wai, a laila, inā ua haumia ka wahine, a i hana ʻo ia i ka mea e hewa ai i kāna kāne, e komo nō ua wai lā ka mea e hoʻopōʻino ai i loko ona, he mea ʻawaʻawa; a e pehu mai kona ʻōpū, a e wīwī iho kona ʻūhā; a e lilo ua wahine lā i mea e hōʻino ʻia ai i waena o kona hanauna kanaka.
28‘Inā hoʻi ua haumia ʻole ka wahine, he maʻemaʻe nō; a laila ua ola ia, a e hāpai ia i nā keiki.
29¶ ‘ʻO ia ke kānāwai no nā lili ʻana, i ka manawa i huli ai ka wahine i ka mea ʻaʻole ʻo kāna kāne, a ua haumia ʻo ia;
30a i ka manawa paha e kau ai ka manaʻo lili ma luna ona, a e lili aku ia i kāna wahine, a e hoʻonoho aku iā ia i mua o Iēhova, a e hoʻopili aku ke kahuna i kēia kānāwai a pau iā ia.
31‘A laila e kaʻawale ua kanaka lā i ka hewa, a e lawe hoʻi ka wahine i kona hewa iho.’”
Currently Selected:
KA BUKE ʻAHĀ A MOSE, I KAPA ʻIA NĀ HELU 5: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.