KA BUKE ʻAHĀ A MOSE, I KAPA ʻIA NĀ HELU 34
34
MOKUNA XXXIV.
1 Nā mokuna ʻāina o Kanaʻana. 16 Nā inoa o nā kānaka nāna e hoʻopuʻunaue i ka ʻāina.
1¶ ʻŌlelo maila ʻo Iēhova iā Mose, ʻī maila,
2“E kauoha aku ʻoe i nā mamo a ʻIseraʻela, a e ʻī aku iā lākou, ‘Aia hiki aku ʻoukou i loko o ka ʻāina ʻo Kanaʻana; (ʻo ia ka ʻāina e lilo ana no ʻoukou i noho ana, ʻo ka ʻāina ʻo Kanaʻana, a me kona mau mokuna).
3‘A laila, ʻo ko ʻoukou ʻaoʻao hema, aia nō ia mai ka wao nahele ʻo Zina, e pili ana i ka palena ʻo ʻEdoma; a ʻo ko ʻoukou mokuna hema ma ke kihi loa o ka Moana Kai, a moe aku i ka hikina;
4a e huli aʻe ko ʻoukou palena mai ka ʻaoʻao hema aʻe i ka puʻu ʻo ʻAkerabima, a hele aku i Zina; a ʻo ka hele ʻana aku o ia mai ka ʻaoʻao hema aku a Kadesa Banea, a e hele hou aku ia i Hazara ‘Adara, a hiki aku i ʻAzemona;
5a hele pōʻai aku no ka palena mai ʻAzemona aku a ke kahawai ʻo ʻAigupita, a e puka aku nō ia i ke Kai.
6¶ ‘A ʻo ka palena komohana, ʻo ke Kai Nui ko ʻoukou palena; ʻo ia ko ʻoukou palena komohana.
7¶ ‘Eia hoʻi ko ʻoukou palena ʻākau; mai ke Kai Nui aku, e hōʻailona ʻoukou i ka Mauna Hora no ʻoukou.
8‘Mai ka Mauna Hora aku, e hōʻailona ʻoukou a hiki i ke komo ʻana o Hamata; a e hele aku no ka palena a hiki i Zedada;
9a e hele hou aku nō ka palena i Ziperona, a e puka aku nō ia i Hazara ‘Enana: ʻo ia ko ʻoukou palena ʻākau.
10¶ ‘A e hōʻailona ʻoukou i ko ʻoukou palena hikina, mai Hazara ʻEnana a Sepama.
11‘A e hele aku ka palena mai Sepama a Ribela, ma ka ʻaoʻao hikina o ʻAina; a e iho aku ka palena, a hiki aku ma ka ʻaoʻao o ka loko ‘o Kinerota ma ka hikina.
12‘A e iho aku ka palena i Ioredane, a ʻo kona puka ʻana aku ma ka Moana Paʻakai; ʻo ia ko ʻoukou ʻāina me nā mokuna a puni.’”
13¶ Kauoha akula ʻo Mose i nā mamo a ʻIseraʻela, ʻī akula, “Eia nō ka ʻāina e ili mai ana na ʻoukou ma ka hailona ʻana, ka ʻāina a Iēhova i kauoha mai ai e hāʻawi aku no nā ʻohana ʻeiwa, a no ka ʻohana hapa.
14“No ka mea, ua loaʻa i ka ʻohana mamo a Reubena ma ka hale o ko lākou poʻe mākua, a i ka ʻohana mamo a Gada, ma ka hale o ko lākou poʻe mākua, a i ka ʻohana hapa a Manase, ko lākou ʻāina hoʻoili.
15“Ua loaʻa i nā ʻohana ʻelua a me ka ʻohana hapa ko lākou ʻāina hoʻoili ma kēia ʻaoʻao o Ioredane, ma Ieriko a ka hikina aku, ma ka puka ʻana o ka lā.”
16¶ ʻŌlelo maila ʻo Iēhova iā Mose, ʻī maila,
17“Eia nā inoa o nā kānaka nāna e puʻunaue i ka ʻāina no ʻoukou: ʻo ʻEleazara ke kahuna, a me Iosua ke keiki a Nuna.
18“A e lawe hoʻi ʻoukou i kekahi luna o kēlā ʻohana o kēia ʻohana e puʻunaue i ka ʻāina, ma nā puʻu e ili ana.
19“Eia hoʻi nā inoa o nā kānaka: no ka ʻohana a Iuda, ʻo Kaleba ke keiki a Iepune;
20a no ka ʻohana mamo a Simeona, ʻo Semuʻela ke keiki a ʻAmihuda;
21no ka ʻohana a Beniamina, ʻo ʻElidada ke keiki a Kiselona;
22a ʻo ka luna ʻohana o nā mamo a Dana, ʻo Buki ke keiki a Iogeli;
23ʻo ka luna o nā mamo a Iosepa: no ka ʻohana mamo a Manase, ʻo Haniʻela ke keiki a ʻEpoda;
24a ʻo ka luna ʻohana o nā mamo a ʻEperaima, ʻo Kemuʻela ke keiki a Sipetana;
25a ʻo ka luna ʻohana o nā mamo a Zebuluna, ʻo ʻElizapana ke keiki a Parenaka;
26a ʻo ka luna ʻohana o nā mamo a ʻIsakara, ʻo Paletiʻela ke keiki a ʻAzana;
27a ʻo ka luna ʻohana o nā mamo a ʻAsera, ʻo ʻAhihuda ke keiki a Selomi;
28a ʻo ka luna ʻohana o nā mamo a Napetali, ʻo Pedahela ke keiki a ʻAmihuda.”
29ʻO lākou ka poʻe a Iēhova i kauoha mai ai e puʻunaue i ka ʻāina e ili mai ana ma luna o nā mamo a ʻIseraʻela ma ka ʻāina ʻo Kanaʻana.
Currently Selected:
KA BUKE ʻAHĀ A MOSE, I KAPA ʻIA NĀ HELU 34: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.