KA BUKE ʻAHĀ A MOSE, I KAPA ʻIA NĀ HELU 31
31
MOKUNA XXXI.
1 No ke kaua me ka Midiana. 7 Pepehi kā ʻIseraʻela i nā kāne a pau me nā aliʻi, a lawe pio i nā wāhine a me nā kamaliʻi, a me ko lākou waiwai. 13 Ka huhū o Mose me nā luna kaua, no ka hoʻōla ʻana i nā wāhine a me nā keiki kāne. 19 Ka huikala ʻana o ka poʻe kaua, 25 a me ka māhele ʻana i ka waiwai pio.
1¶ ʻŌlelo maila ʻo Iēhova iā Mose, ʻī maila,
2“E hoʻopaʻi i ka hana ʻino ʻia mai o nā mamo a ʻIseraʻela ma luna o kā Midiana; a ma hope e hui ʻia aku ʻoe me ou poʻe kānaka.”
3ʻŌlelo akula ʻo Mose i nā kānaka, ʻī akula, “E hoʻomākaukau i kekahi poʻe o ʻoukou no ke kaua, a e kuʻu aku iā lākou e hele kūʻē i kā Midiana, a e hoʻopaʻi aku i ko Iēhova ma luna o kā Midiana.
4“I hoʻokahi tausani no kēlā ʻohana, kēia ʻohana ma nā ʻohana a pau a ʻIseraʻela, kā ʻoukou e hoʻouna aku ai i ke kaua.”
5A ua hāʻawi ʻia mai no loko mai o nā tausani o kā ʻIseraʻela, he tausani hoʻokahi no kēlā ʻohana no kēia ʻohana, he ʻumikumamālua nā tausani i mākaukau no ke kaua.
6Hoʻouna akula ʻo Mose iā lākou i ke kaua, i hoʻokahi tausani o ka ʻohana hoʻokahi, iā lākou a me Pinehasa ke keiki a ʻEleazara ke kahuna, me nā mea hoʻāno, a me nā pū e puhi aku ai ma kona lima, i ke kaua.
7A kaua akula lākou i kā Midiana, e like me kā Iēhova i kauoha mai ai iā Mose; a pepehi ihola lākou i nā kāne a pau.
8Pepehi ihola hoʻi lākou i nā aliʻi o Midiana, he ʻokoʻa kēlā poʻe o lākou i pepehi ʻia, ʻo ʻEvi, ʻo Rekema, ʻo Zura, ʻo Hura, a me Reba, nā aliʻi ʻelima o Midiana; pepehi ihola hoʻi lākou iā Balaʻama ke keiki a Beora me ka pahi kaua.
9Lawe pio akula nā mamo a ʻIseraʻela i nā wāhine a me kā lākou poʻe keiki liʻiliʻi, a hao aʻela lākou i nā bipi o lākou a pau, me nā holoholona a pau o lākou, a me ko lākou waiwai a pau.
10Puhi akula lākou i nā kūlanakauhale a pau kahi a lākou i noho ai, a me nā pā holoholona a pau o lākou, i ke ahi.
11Lālau aʻela lākou i ka waiwai pio a pau, a me ka mea a pau i hao ʻia, ʻo nā kānaka a me nā holoholona.
12Lawe maila lākou i nā pio a me ka waiwai pio, a me nā holoholona, i o Mose lā lāua ʻo ʻEleazara ke kahuna, a i ke anaina kanaka o nā mamo a ʻIseraʻela, i kahi hoʻomoana ma nā pāpū o Moaba ma Ioredane o Ieriko.
13¶ Hele akula ʻo Mose me ʻEleazara ke kahuna, a me nā luna a pau o ke anaina kanaka e hālāwai me lākou ma waho o kahi hoʻomoana.
14Huhū akula ʻo Mose i nā luna kaua, i nā luna tausani a me nā luna haneri, i hele mai, mai ke kaua mai.
15ʻĪ akula ʻo Mose iā lākou, “Ua hoʻōla mai nō anei ʻoukou i nā wāhine a pau?
16“Aia hoʻi, ʻo kēia ka poʻe i hoʻowalewale i nā mamo a ʻIseraʻela, ma muli o ka manaʻo o Balaʻama, e lawehala iā Iēhova ma ka mea a Peora, a hiki mai nō ke ahulau i waena o ke anaina kanaka o Iēhova.
17“No ia hoʻi, e pepehi ʻoukou i nā kāne a pau i waena o nā kamaliʻi, a e pepehi i nā wāhine a pau i ʻike i ke kāne ma ka moe me ia.
18“Akā, ʻo ka poʻe kaikamāhine a pau i ʻike ʻole i ke kāne ma ka moe me ia, ʻo ia kā ʻoukou e hoʻōla ai.
19“A e noho ʻoukou ma waho o kahi hoʻomoana i nā lā ʻehiku; ʻo ka mea i pepehi i kekahi kanaka, a ʻo ka mea i hoʻopā aku i ke kupapaʻu, e huikala ʻoukou iā ʻoukou iho a me ko ʻoukou poʻe pio, i ke kolu o ka lā, a i ka hiku o ka lā.
20“E huikala hoʻi ʻoukou i nā ʻaʻahu a pau, a me nā mea ʻili a pau, a me nā mea hulu kao a pau, a me nā mea lāʻau a pau.”
21¶ ʻŌlelo akula hoʻi ʻo ʻEleazara ke kahuna i nā koa i hele aku i ke kaua, “Eia ka ʻoihana o ke kānāwai a Iēhova i kauoha mai ai iā Mose:
22ʻo ke gula wale nō, ʻo ke kālā, ʻo ke keleawe, ʻo ka hao, ʻo ka piuta, a me ke kēpau,
23ʻo kēlā mea kēia mea e pono ma ke ahi, ʻo ia kā ʻoukou e hoʻohele ma waena o ke ahi, a e huikala ʻia ʻo ia; a e hoʻomaʻemaʻe ʻia nō naʻe ia i ka wai huikala; a ʻo nā mea a pau e pono ʻole ma ke ahi, ʻo ia kā ʻoukou e hoʻohele ma waena o ka wai;
24a i ka hiku o ka lā, e holoi ʻoukou i ko ʻoukou mau ʻaʻahu, a e maʻemaʻe ʻoukou; a ma hope iho e hele mai auaneʻi ʻoukou ma loko o kahi hoʻomoana.”
25¶ ʻŌlelo maila ʻo Iēhova iā Mose, ʻī maila,
26“E helu i ka waiwai pio o ka poʻe i lawe pio, o kānaka a me nā holoholona, ʻo ʻoe a me ʻEleazara ke kahuna, a me nā lunakahiko o ke anaina kanaka.
27“A e puʻunaue i ka waiwai pio i nā puʻu ʻelua; no ka poʻe i lawe i ke kaua ma luna o lākou iho, ka poʻe i hele aku i ke kaua kekahi, a no ke anaina kanaka a pau kekahi.
28“A e ʻauhau ʻoe no Iēhova i nā kānaka kaua, i ka poʻe i hele aku i ke kaua: i hoʻokahi kino no loko mai o nā haneri ʻelima, o nā kānaka, ʻo nā bipi, ʻo nā hoki, a ʻo nā hipa.
29“E lawe ia no loko mai o kā lākou hapalua, a e hāʻawi aku na ʻEleazara ke kahuna, i mōhai kaʻikaʻi no Iēhova.
30“A no loko mai o ka hapalua no nā mamo a ʻIseraʻela, kāu e lawe aku ai i hoʻokahi hapa kanalima o nā kānaka, ʻo nā bipi, ʻo nā hoki, ʻo nā hipa, a ʻo nā holoholona a pau, a e hāʻawi aku ia mau mea na nā Levi, na ka poʻe e mālama ana i ka ukana o ka halelewa no Iēhova.”
31A hana akula ʻo Mose lāua ʻo ʻEleazara ke kahuna, e like me kā Iēhova i kauoha mai ai iā Mose.
32¶ A ʻo ka waiwai pio, ʻo ke koena o ka waiwai pio a nā kānaka kaua i lawe pio ai, he ʻaono haneri me kanahikukumamālima nā tausani hipa,
33a he kanahikukumamālua nā tausani bipi,
34a he kanaonokumamākahi nā tausani hoki,
35a he kanakolukumamālua nā tausani wāhine a pau i ʻike ʻole i ke kāne ma ka moe ʻana me ia.
36A ʻo ka hapalua, ka puʻu a ka poʻe i hele aku i ke kaua, ma ka helu ʻana, he ʻakolu haneri me kanakolukumamāhiku nā tausani hipa, a me nā haneri keu ʻelima;
37a ʻo nā hipa ʻauhau na Iēhova, he ʻaono haneri me kanahikukumamālima.
38A he kanakolukumamāono nā tausani bipi; a ʻo ka ʻauhau na Iēhova no loko mai o ia poʻe, he kanahikukumamālua.
39A ʻo nā hoki, he kanakolu nā tausani, a me nā haneri keu ʻelima; a ʻo ka ʻauhau na Iēhova no loko mai o ia poʻe, he kanaonokumamākahi.
40A ʻo nā wāhine, he ʻumikumamāono nā tausani; a he kanakolukumamālua o lākou ke ʻauhau no Iēhova.
41A hāʻawi akula ʻo Mose i ka ʻauhau, i ka mea mōhai kaʻikaʻi a Iēhova, na ʻEleazara ke kahuna, e like me kā Iēhova i kauoha mai ai iā Mose.
42¶ A ʻo ka hapalua a nā mamo a ʻIseraʻela, ka mea a Mose i puʻunaue ai mai nā kānaka kaua mai,
43(ʻo kā ke anaina kanaka hapalua, he ʻakolu haneri me ke kanakolukumamāhiku nā tausani hipa, a me nā haneri keu ʻelima,
44a he kanakolukumamāono nā tausani bipi,
45a he kanakolu tausani nā hoki me nā haneri keu ʻelima,
46a he ʻumikumamāono tausani nā wāhine)
47a lawe akula ʻo Mose i hoʻokahi hapa kanalima, no loko mai o ka hapalua a nā mamo a ʻIseraʻela, i nā kānaka a me nā holoholona, a hāʻawi aku iā lākou na ka poʻe Levi, ka poʻe i mālama i ka ukana o ka halelewa o Iēhova; e like me kā Iēhova i kauoha mai iā Mose.
48¶ Hele maila nā luna o nā tausani o ke kaua, a kokoke i o Mose lā, ʻo nā luna tausani a me nā luna haneri;
49ʻī akula lākou iā Mose, “Ua helu iho nei kāu poʻe kauā i nā kānaka kaua ma lalo iho o mākou, ʻaʻole hoʻi i nalowale kekahi kanaka o mākou.
50“No laila mākou i lawe mai nei i ʻālana no Iēhova, i ka mea a kēlā kanaka a kēia kanaka i loaʻa ai: ʻo nā mea gula, nā kūpeʻe, nā apo, nā komo lima, nā apo pepeiao, nā lei ʻāʻī, i mea hoʻokalahala iā mākou iho i mua o Iēhova.”
51A lawe akula ʻo Mose a me ʻEleazara i ke gula, i nā mea i hana ʻia a pau, mai o lākou aku.
52ʻO ke gula a pau o ka mōhai, ka mea a nā luna tausani a me nā luna haneri i kaumaha aku ai no Iēhova, he ʻumikumamāono tausani ʻehiku haneri a me kanalima nā sekela.
53(No ka mea, ua lawe nā kānaka kaua i ka waiwai pio, ʻo kēlā kanaka kēia kanaka nona iho.)
54Lawe akula ʻo Mose lāua ʻo ʻEleazara ke kahuna i ke gula o nā luna tausani a me nā luna haneri, a halihali akula ia mea i loko o ka halelewa o ke anaina, i mea hoʻomanaʻo no nā mamo a ʻIseraʻela i mua o Iēhova.
Ka Baibala Hemolele © Partners Development Foundation, 2018.