KA BUKE ʻAHĀ A MOSE, I KAPA ʻIA NĀ HELU 24
24
MOKUNA XXIV.
1 Ka hoʻomaikaʻi hou ʻana o Balaʻama i kā ʻIseraʻela. 10 Huhū loa ihola ʻo Balaka a hoʻokuʻu aku nō iā Balaʻama. 15 Ka wānana a Balaʻama no kā ʻIseraʻela.
1¶ A ʻike ihola ʻo Balaʻama, ua leʻaleʻa ʻo Iēhova i ka hoʻomaikaʻi aku i kā ʻIseraʻela, ʻaʻole ia i hele hou aku e like ma mua e ʻimi i nā kilokilo ʻana; akā, hāliu aʻela ia i kona maka ma ka wao nahele.
2ʻAlawa aʻela nā maka o Balaʻama i luna, ʻike aʻela i kā ʻIseraʻela e hoʻomoana ana ma ko lākou mau ʻohana; a kau maila ka ʻUhane o ke Akua ma luna ona.
3Hāpai aʻela ia i kāna ʻōlelo nane, ʻī akula,
“ʻO ka wānana a Balaʻama a ke keiki a Beora,
ʻO ka wānana a ke kanaka i hoʻokaʻakaʻa ʻia kona mau maka,
4“Ka wānana a ka mea i lohe i nā ʻōlelo a ke Akua,
A ka mea i ʻike i ka Mea Mana ma ka hihiʻo,
E moe ana i lalo, a e kaʻakaʻa ana kona mau maka;
5“Nani ka maikaʻi o nā hale lole ou, e Iakoba!
ʻO kou mau halelewa hoʻi, e ʻIseraʻela!
6“E like me nā awāwa ko lākou pālahalaha ʻana,
E like hoʻi me nā mahina ʻai ma kapa muliwai,
Me nā lāʻau ʻaloe hoʻi a Iēhova i kanu ai,
A me nā lāʻau kedera ma kapa o nā wai.
7“E kahe ana ka wai mai loko aʻe o kona mau bākeke,
A ma nā wai he nui kona hua kanu.
E kiʻekiʻe aʻe hoʻi kona aliʻi ma luna o ʻAgaga,
A e hoʻokiʻekiʻe ʻia aʻe kona aupuni.
8“Na ke Akua ia i kaʻi mai nei, mai ʻAigupita mai;
Iā ia hoʻi ka ikaika me he reʻema lā;
E ʻai iho ʻo ia i nā lāhui kanaka i kona poʻe ʻenemi,
A e uhaʻi ia i ko lākou mau iwi,
E hou ʻia hoʻi lākou i kāna mau pua.
9‘Ua kukuli iho ia, ua moe iho me he liona kāne lā;
A me ka liona wahine; na wai lā ia e hoʻāla aʻe?’
“E pōmaikaʻi ka mea hoʻomaikaʻi iā ʻoe,
A e pōʻino ka mea hōʻino aku iā ʻoe.”
10¶ Ua hoʻā ʻia ka inaina o Balaka iā Balaʻama, a paʻi pū nā lima ona; ʻī maila ʻo Balaka iā Balaʻama, “Ua kiʻi aku nō wau iā ʻoe no ka hōʻino aku i kuʻu poʻe ʻenemi; aia hoʻi, eia ke kolu o kou hoʻomaikaʻi wale ʻana aku!
11“No laila, e holo aku ʻoe i kou wahi; i manaʻo ihola au e hoʻohanohano loa aku iā ʻoe; akā hoʻi, ʻo Iēhova kai keʻakeʻa mai iā ʻoe i loaʻa ʻole ai ka hanohano.”
12ʻŌlelo maila ʻo Balaʻama iā Balaka, “ʻAʻole anei au i ʻōlelo aku i ka poʻe ʻelele āu i hoʻouna ai i oʻu lā, i ka ʻī ʻana aku,
13‘Inā e hāʻawi mai ʻo Balaka i ke kālā a me ke gula a piha kona hale, inā ʻaʻole e hiki iaʻu ke hoʻohala i ka ʻōlelo a Iēhova, e hana i ka maikaʻi, ʻaʻole hoʻi i ka hewa ma kuʻu manaʻo iho: ʻo kā Iēhova e ʻōlelo mai ai, ʻo ia kaʻu e haʻi aku ai’?
14“ʻĀnō hoʻi, ke hoʻi aku nei au i koʻu poʻe kānaka; ʻeā, e haʻi ʻē aku nō au iā ʻoe i ka mea a kēia poʻe kānaka e hana mai ai i kou poʻe kānaka i nā lā ma hope.”
15Hāpai aʻela ia i kāna ʻōlelo nane, ʻī akula,
“ʻO ka wānana a Balaʻama ke keiki a Beora,
Ka wānana a ke kanaka i hoʻokaʻakaʻa ʻia aʻe kona maka;
16“Ka wānana a ka mea i lohe i ka ʻōlelo a ke Akua,
A ka mea ʻike i ka mea ʻikea o ka Mea Kiʻekiʻe,
A ka mea nānā i ka mea ʻikea o ka Mea Mana Loa,
E moe iho ana, a e kaʻakaʻa ana kona mau maka.
17“E ʻike auaneʻi au iā ia, ʻaʻole hoʻi ʻānō;
E nānā auaneʻi au iā ia, ʻaʻole hoʻi e kokoke;
E puka mai auaneʻi he Hōkū mai o Iakoba mai;
E kū mai ana nō hoʻi he Koʻokoʻo mai o ʻIseraʻela mai,
A e luku aku nō ia i nā kihi o Moaba,
A e pepehi iho ia i nā keiki hoʻohaunaele a pau.
18“E lilo ʻo ʻEdoma i wahi e noho ai;
A e lilo ʻo Seira i wahi e noho ai no kona poʻe ʻenemi,
A e hana ikaika nō ʻo kā ʻIseraʻela.
19“Na Iakoba e puka mai auaneʻi ka mea e aliʻi ana,
A e luku iho ʻo ia i ke koena o ke kūlanakauhale.”
20Nānā akula hoʻi ʻo ia i kā ʻAmeleka, haʻi maila ia i kāna ʻōlelo nane, ʻī maila,
“ʻO ʻAmeleka, ke poʻokela o nā lāhui kanaka,
Akā ʻo kona hope, e make mau loa nō ʻo ia.”
21Nānā akula hoʻi ia i kā Keni, hāpai aʻela ia i kāna ʻōlelo nane, ʻī maila,
“Ua paʻa kou wahi i noho ai,
Ua kau aku ʻoe i kou pūnana ma luna o ka pōhaku;
22“Akā, e lawe ʻia aku ka Keni, āhea lā
E lawe pio aku ʻo ʻAsuria iā ʻoe?”
23Haʻi akula ia i kāna ʻōlelo nane, ʻī akula,
“Auē! ʻO wai lā uaneʻi ke ola i ka wā e hana mai ai ke Akua i kēia?
24“Mai kauwahi mai o Kitima mai, nā moku,
A e hoʻopilikia lākou i ko ʻAsuria a e hoʻopilikia hoʻi i kā ‘Ebera,
A e luku loa ʻia aku ʻo ia.”
25Kū aʻela ʻo Balaʻama, hele akula ia, a hoʻi akula i kona wahi; a hele akula hoʻi ʻo Balaka i kona ʻaoʻao.
Ka Baibala Hemolele © Partners Development Foundation, 2018.