KA BUKE ʻAHĀ A MOSE, I KAPA ʻIA NĀ HELU 12
12
MOKUNA XII.
1 Ka ʻōhumu ʻana o ʻAʻarona lāua ʻo Miriama. 3 Ke akahai o Mose. 4 Ua hoʻopaʻi ke Akua i ka hewa o Miriama i ka maʻi lēpera. 13 Pule aku ʻo Mose, a ola aʻela ʻo Miriama.
1¶ ʻŌhumu aʻela ʻo Miriama lāua ʻo ʻAʻarona i ke kūʻē iā Mose, no ka wahine ʻAitiopa āna i lawe ai; no ka mea, ua lawe ia i wahine no ʻAitiopa nāna.
2ʻĪ aʻela lāua, “Ma o Mose lā wale nō anei kā Iēhova ʻōlelo ʻana mai? ʻAʻole anei ia i ʻōlelo ma o kāua nei kekahi?” A lohe maila ʻo Iēhova.
3(A ʻo ua kanaka lā ʻo Mose, ua ʻoi aku kona akahai ma mua o ko nā kānaka a pau ma luna o ka honua.)
4ʻŌlelo koke maila ʻo Iēhova iā Mose me ʻAʻarona a me Miriama, “E hele mai ʻoukou a ʻekolu i ka halelewa anaina!” A hele akula lākou a ʻekolu.
5Iho ihola ʻo Iēhova ma loko o ke kia ao, kū maila ia ma ka puka o ka halelewa, kāhea maila iā ʻAʻarona lāua ʻo Miriama; a hele akula lāua.
6ʻŌlelo maila ia,
“E hoʻolohe mai ʻolua i kaʻu ʻōlelo:
A i noho kekahi kāula i waena o ʻoukou,
ʻO wau ʻo Iēhova e hōʻike aku iaʻu iho iā ia ma ka hihiʻo;
A e ʻōlelo aku nō wau iā ia ma ka moeʻuhane.
7“ʻAʻole naʻe pēlā kaʻu kauā ʻo Mose;
Ka mea mālama pono ma koʻu hale a pau.
8“E ʻōlelo aku ana au me ia he waha nō he waha,
Ma ka mea akāka, ʻaʻole ma ka ʻōlelo nane;
A e ʻike mai nō ia i ke aka o Iēhova.
No ke aha lā hoʻi i makaʻu ʻole ai ʻolua
I ka ʻōhumu aku i kuʻu kauā iā Mose?”
9¶ Hoʻā ʻia maila ka inaina o Iēhova iā lāua, a hoʻi akula ia.
10A hoʻi hou akula ke ao ma luna aku o ka halelewa; aia hoʻi, ua lēpera ʻo Miriama me he hau lā; nānā akula ʻo ʻAʻarona iā Miriama, aia hoʻi, ua lēpera ia.
11ʻĪ akula ʻo ʻAʻarona iā Mose, “Auē! e kuʻu haku, ke nonoi aku nei au iā ʻoe, mai kau mai ʻoe i kēia hewa ma luna o māua, i kahi a māua i hana lapuwale ai, a ua hana hewa ma laila.
12“Mai waiho wale iā ia me he mea make lā, me he mea lā i pala kona ʻiʻo i ka wā o kona puka ʻana mai i waho o ka ʻōpū o kona makuahine!”
13Kāhea akula ʻo Mose iā Iēhova, ʻī akula, “E ke Akua ē, ke noi aku nei au iā ʻoe, e hoʻōla mai ʻoe iā ia!”
14ʻĪ maila ʻo Iēhova iā Mose, “Inā paha i kuha wale aku kona makua kāne i kona maka, ʻaʻole anei i hoʻohilahila ʻia ʻo ia i nā lā ʻehiku? E kipaku ʻia ʻo ia i waho o kahi hoʻomoana i nā lā ʻehiku, a ma hope iho e hoʻokipa ʻia mai ia i loko.”
15A ua kipaku ʻia ʻo Miriama i waho o kahi hoʻomoana i nā lā ʻehiku; ʻaʻole ka poʻe kānaka i hele, a hoʻi hou mai ʻo Miriama ma loko.
16¶ A ma hope iho, neʻeneʻe akula ka poʻe kānaka mai Hazerota aku, a kūkulu hou ihola ma ka wao nahele ʻo Parana.
Ka Baibala Hemolele © Partners Development Foundation, 2018.