MIKA 3
3
MOKUNA III.
1 ʻO ke aʻo ʻana i nā aliʻi no kā lākou hana ʻino, a i nā kaula no ko lākou wahaheʻe. 8 Ua uluhia ʻo ia e ka ʻUhane e ʻōlelo aku i nā aliʻi, i nā kāhuna, a me nā kāula, no ko lākou hewa; a hōʻike mai hoʻi i ka luku ʻana i ke kūlanakauhale, a me ka luakini.
1¶ A ʻōlelo akula au,
“Ke noi aku nei au, e hoʻolohe ʻoukou, e nā luna o kā Iakoba,
A, e nā luna kānāwai o ka hale o kā ʻIseraʻela,
ʻAʻole anei no ʻoukou ka ʻike i ka hoʻopono?
2“Ke inaina nei ʻoukou i ka maikaʻi, a makemake i ka hewa;
Ke lole nei i ko lākou ʻili mai o lākou aku,
A me ka haehae i ko lākou ʻiʻo mai ko lākou mau iwi aku;
3“Ka poʻe e ʻai ana i ka ʻiʻo o kuʻu poʻe kānaka,
A hoʻolole i ko lākou ʻili mai o lākou aku,
A haʻi iho i ko lākou mau iwi,
A ʻoki liʻiliʻi iā lākou e like me ka mea no ka ipu hao,
A e like hoʻi me ka ʻiʻo i loko o ka ipu keleawe.”
4A laila, e kāhea aku lākou iā Iēhova,
Akā, ʻaʻole ia e hoʻolohe mai iā lākou;
A e hūnā nō ia i kona maka mai o lākou aku i kēlā manawa;
No ka mea, ua hana hewa lākou ma ko lākou noʻonoʻo ʻana.
5¶ Pēnēia i ʻōlelo mai ai ʻo Iēhova no nā kāula,
Ka poʻe i hoʻoʻauana i kuʻu poʻe kānaka,
Ka poʻe i nahu me ko lākou niho,
A kāhea aku, “Ua maluhia”;
A ʻo ka mea hāʻawi ʻole aku no ko lākou waha,
Hoʻomākaukau nō lākou i ke kaua iā ia.
6No ia hoʻi, e hiki mai ai ka pō iā ʻoukou, ʻaʻohe hihiʻo;
A iā ʻoukou ka pouli, ʻaʻohe wānana;
A e napoʻo ana ka lā ma luna o nā kāula,
A he pouli ke ao ma luna o lākou.
7A laila, e hilahila nā mea ʻike,
A e pilihua ka poʻe wānana;
A e uhi lākou a pau i ko lākou lehelehe;
No ka mea, ʻaʻole ke Akua i hōʻike mai.
8Akā hoʻi, ua piha wau i ka mana
Ma ka ʻUhane o Iēhova,
A me ka pono, a me ka ikaika,
E haʻi aku iā Iakoba i kona hala,
A i kā ʻIseraʻela i kona hewa.
9Ke noi aku nei au iā ʻoukou, e hoʻolohe i kēia, e nā luna o kā Iakoba,
A me nā luna kānāwai o kā ʻIseraʻela,
Ka poʻe e hoʻowahāwahā ana i ka pono,
A e hoʻololi ana i ka pololei a pau.
10Ua kūkulu lākou iā Ziona me ke koko,
A iā Ierusalema me ka hewa.
11Ua hoʻoponopono ka luna ona no ka uku,
A ua aʻo aku kāna mau kāhuna no ke kumu,
A ua wānana kāna mau kāula no ke kālā;
Akā, e hilinaʻi lākou ma luna o Iēhova, i ka ʻī ʻana aʻe,
“ʻAʻole anei ʻo Iēhova i waena o kākou?
ʻAʻole e hiki mai ka ʻino ma luna o kākou.”
12No laila, no ʻoukou
E hoʻōʻō palau ʻia ʻo Ziona me he kīhāpai lā,
A e lilo ʻo Ierusalema i mau puʻu,
A ʻo ka mauna o ka hale e like me nā wahi kiʻekiʻe o ka ulu lāʻau.
Currently Selected:
MIKA 3: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
