MIKA 1
1
MOKUNA I.
1 ʻO ka ʻino e hiki mai ana ma luna o Samaria, a me Ierusalema no ko lākou hewa. ʻO ka auē a me ke kanikau no ka ʻino.
1¶ Ka ʻōlelo a Iēhova ka mea i hiki mai iā Mika no Moreseta, i nā lā o Iotama, ʻAhaza, a ʻo Hezekia, nā aliʻi o kā Iuda, ka mea āna i ʻike ai no Samaria, a no Ierusalema.
2E hoʻolohe, e nā kānaka a pau;
E hāliu mai, e ka honua, a me kona mea i piha ai;
A e lilo ʻo Iēhova ka Haku i mea hōʻike kūʻē iā ʻoukou,
ʻO ka Haku mai kona luakini hoʻāno mai.
3No ka mea, aia hoʻi, e hele mai ʻo Iēhova mai kona wahi mai,
A e iho i lalo, a e hehi ma luna o nā wahi kiʻekiʻe o ka honua.
4A heheʻe nā mauna ma lalo iho ona,
A e wāhi ʻia nā awāwa,
E like me ke kēpau i mua o ke ahi,
A me ka wai i ninini ʻia ma kahi pali.
5No ka lawehala ʻana o kā Iakoba kēia mea a pau, a no nā hewa o ko ka hale o ʻIseraʻela.
He aha ka hala o kā Iakoba? ʻAʻole anei ʻo Samaria?
A ʻo wai nā wahi kiʻekiʻe o Iuda? ʻAʻole anei ʻo Ierusalema?
6“A e hoʻohālike au iā Samaria me he puʻu lā o ke kula,
A me he wahi kanu lā no ka pā waina;
A e hoʻolei iho au i nā pōhaku ona ma ke awāwa,
A e hōʻike aku au i kona mau kahua.
7“A e ʻulupā ʻia kona mau kiʻi kālai a pau,
A ʻo kona waiwai moekolohe e puhi ʻia i ke ahi,
A e luku aku au i kona mau kiʻi a pau;
No ka mea, ua loaʻa iā ia ua mea lā no ka uku o ka wahine moekolohe,
A e hoʻihoʻi ʻia aku ia i ka uku o ka wahine moekolohe.”
8¶ No kēia mea, e auwē iho au, a e ʻaoa,
A e hele wale au, me ke kapa ʻaʻahu ʻole;
E hoʻohālike au i ka auē ʻana me ko ka ʻīlio hihiu,
A i ka ʻalalā ʻana me ko ka iana wahine.
9No ka mea, ʻo kona ʻeha he ʻeha make ia, a ua hiki mai ia i kā Iuda;
Ua hiki mai i ka puka pā o koʻu poʻe kānaka, a i Ierusalema.
10Mai haʻi aku ʻoukou ia ma Gata,
Mai auē ʻoukou i ka auē ʻana;
Ma ka Hale o ʻApera e kau i ka lepo ma luna iho ou.
11E hele aku ʻoe, e ka mea e noho ana ma Sapira, me kou hilahila uhi ʻole;
ʻAʻole i hele mai i waho ka mea e noho ana ma Zaʻanana,
Ma ka auē ʻana o Bete ʻEzela:
E lawe nō ia i kona noho ʻana mai o ʻoukou aku.
12No ka mea, ʻo ka mea e noho ana ma Marota,
Ua nāwaliwali ia no ka ʻiʻini i ka maikaʻi;
Akā, iho maila ka ʻino mai Iēhova
Mai ma ka puka pā o Ierusalema.
13E ka mea e noho lā ma Lakisa,
E hoʻopaʻa i ka hale kaʻa i ka lio māmā;
ʻO ia ke poʻo o ka hewa no ke kaikamahine o Ziona;
No ka mea, ua loaʻa nā lawehala o kā ʻIseraʻela i loko ou.
14No ia mea, e hāʻawi aku ʻoe i nā makana
No Moreseta Gata;
E lilo nā hale o ʻAkeziba i mea hoʻopunipuni
No nā aliʻi o kā ʻIseraʻela.
15Akā hoʻi, e lawe mai nō au i hoʻoilina nou,
E ka mea e noho ana ma Maresa;
A e hele mai ka nani o kā ʻIseraʻela i ʻAdulama.
16E hoʻoʻōhule ʻoe, a e ʻako i ke oho
No nā keiki o kou makemake;
E hoʻomāhuahua ʻoe i kou ʻōhule ʻana, e like me ka ʻaeto;
No ka mea, ua hele pio akula lākou mai ou aku lā.
Currently Selected:
MIKA 1: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
