KA ʻEUANELIO I KĀKAU ʻIA AI E MATAIO 26
26
MOKUNA XXVI.
3 Ka manaʻo o nā aliʻi e make ʻo Kristo. 6 Ka poni ʻana a ka wahine i kona poʻo. 14 Ka ʻōlelo a Iuda me nā luna.
1¶ A pau aʻela kēia mau ʻōlelo a pau a Iesū, ʻī maila ia i kāna poʻe haumāna;
2“Ua ʻike ʻoukou, ʻelua lā i koe, a hiki mai ka ʻAhaʻaina Mōliaola; a e kumakaia ʻia ke Keiki a ke Kanaka e kaulia ai ma ke keʻa.”
3A laila, hoʻākoakoa aʻela ka poʻe kāhuna nui a me ka poʻe kākau ʻōlelo, a me ka poʻe lunakahiko o nā kānaka, ma ka hale o ke kahuna nui, ʻo Kaiapa kona inoa,
4kūkākūkā aʻela lākou, e lālau aku iā Iesū me ka hoʻopunipuni, a e pepehi iā ia a make.
5ʻŌlelo aʻela lākou, “ʻAʻole i ka wā ʻahaʻaina, o haunaele nā kānaka.”
6¶ Aia ma Betania ʻo Iesū ma ka hale o Simona ka lēpero;
7hele maila kekahi wahine i ona lā, me ka ipu ʻalabatero, ua piha i ka mea poni makamae, a ninini ihola ia ma luna o kona poʻo i kona noho ʻana e ʻai.
8ʻIke aʻela kāna poʻe haumāna, ukiuki ihola lākou, ʻī akula, “No ke aha lā kēia hoʻomaunauna?
9“E hiki nō ke kūʻai lilo aku i kēia mea poni i kumu nui, a e hāʻawi ʻia aku ia na ka poʻe ʻilihune.”
10A ʻike ihola ʻo Iesū, ʻī maila ʻo ia iā lākou, “No ke aha lā ʻoukou e hoʻopilikia mai ai i ka wahine? He mea maikaʻi kāna i hana mai ai iaʻu.
11“Ua mau loa ka poʻe ʻilihune me ʻoukou, ʻaʻole au e mau loa ana me ʻoukou.
12“No ka mea, ua ninini mai kēlā i kēia mea poni ma luna iho o koʻu kino, e hoʻomākaukau iaʻu no ke kanu ʻana.
13“He ʻoiaʻiʻo kaʻu e ʻōlelo aku nei iā ʻoukou, ma nā wahi a pau loa o ke ao nei, e haʻi ʻia aku ai kēia ʻeuanelio, i laila e haʻi ʻia aku ai kā ia nei hana ʻana, i mea e kaulana ai ʻo ia.”
14¶ A laila, hele akula kekahi o ka poʻe ʻumikumamālua, ʻo Iuda ʻIsekariota kona inoa, i ka poʻe kāhuna nui,
15ʻī akula, “He aha kā ʻoukou e hāʻawi mai ai iaʻu, a naʻu ia e kumakaia aku iā ʻoukou?” A kaupaona maila lākou nāna i nā wahi moni he kanakolu.
16Ma ia hope iho, ʻimi ihola ia i ka wā pono e kumakaia aku ai iā ia.
17¶ I ka lā mua o ka ʻAhaʻaina Berena Hū ʻOle, hele akula ka poʻe haumāna i o Iesū lā, ʻī akula iā ia, “Ma hea lā kahi āu e makemake ai e hoʻomākaukau mākou nāu e ʻai i ka Mōliaola?”
18ʻĪ maila kēlā, “E haele aku i loko o ke kūlanakauhale i kekahi kanaka, e ʻōlelo aku iā ia, ‘Ke ʻī mai nei ke Kumu, “Ua kokoke mai nei kuʻu manawa; he pono e mālama au me kaʻu mau haumāna i ka Mōliaola ma kou hale.”’”
19Hana akula ka poʻe haumāna e like me kā Iesū kauoha ʻana mai iā lākou, a hoʻomākaukau ihola i ka Mōliaola.
20¶ Ahiahi aʻela, noho ihola ia e ʻai me ka ʻumikumamālua.
21A i ka ʻai ʻana a lākou, ʻī maila kēlā, “He ʻoiaʻiʻo kaʻu e ʻōlelo aku nei iā ʻoukou, e kumakaia auaneʻi kekahi o ʻoukou nei iaʻu.”
22A kaumaha loa ihola lākou, nīnau pākahi akula lākou iā ia, “E ka Haku, ʻo wau anei?”
23ʻŌlelo maila ia, ʻī maila, “ʻO ka mea e lālau pū ana me aʻu i ka lima ma ke pā, ʻo ia ke kumakaia iaʻu.
24“E hele aku ana ke Keiki a ke Kanaka, e like me ka mea i palapala ʻia nona; auē hoʻi ke kanaka nāna e kumakaia ke Keiki a ke Kanaka! Pōmaikaʻi ua kanaka lā, inā ʻaʻole i hānau ʻia mai ia.”
25A laila, ʻōlelo akula ʻo Iuda nāna ia i kumakaia aku, ʻī akula, “E Rabi, ʻo wau anei ia?” ʻĪ maila kēlā iā ia, “ʻO ia kāu i ʻōlelo mai.”
26¶ I kā lākou ʻai ʻana, lālau ihola ʻo Iesū i ka berena, hoʻoalohaloha akula ia, wāwahi ihola, a hāʻawi maila na ka poʻe haumāna, ʻī maila, “E lawe ʻoukou, e ʻai; ʻo koʻu kino kēia.”
27Lālau ihola hoʻi ʻo ia i ke kīʻaha, hoʻoalohaloha akula, hāʻawi maila iā lākou, ʻī maila, “E inu ʻoukou a pau i kēia;
28no ka mea, ʻo koʻu koko kēia no ke kauoha hou, i hoʻokahe ʻia no nā mea he nui loa, i mea e kala ʻia ai nā hala.
29“Ke ʻōlelo aku nei au iā ʻoukou, ʻaʻole au e inu hou i ko ka hua waina, a hiki aku i ka lā e inu pū ai au me ʻoukou he waina hou i loko o ke aupuni o koʻu Makua.”
30¶ Hīmeni aʻela lākou, a laila hele akula lākou ma ka Mauna ʻOliveta.
31¶ A laila, ʻōlelo maila ʻo Iesū iā lākou, “I kēia pō, e hihia auaneʻi ʻoukou a pau noʻu; no ka mea, ua palapala ʻia, ‘«E hahau ana au i ke Kahu Hipa, a e pau hoʻi ka ʻohana hipa i ka puehu».’
32“Akā, ma hope iho o kuʻu ala hou ʻana, e hele aku nō au ma mua o ʻoukou i Galilaia.”
33ʻŌlelo akula ʻo Petero iā ia, ʻī akula, “Inā e hihia lākou nei a pau nou, ʻaʻole loa au e hihia.”
34ʻĪ maila ʻo Iesū iā ia, “He ʻoiaʻiʻo kaʻu e ʻōlelo aku nei iā ʻoe, i kēia pō, ma mua mai o ke ʻoʻoʻō ʻana o ka moa, e pākolu kāu hōʻole ʻana mai iaʻu.”
35ʻĪ akula ʻo Petero, “Inā e make pū au me ʻoe, ʻaʻole loa au e hōʻole aku iā ʻoe.” Pēlā hoʻi i ʻōlelo aku ai nā haumāna a pau.
36¶ A laila, hele akula ʻo Iesū me lākou ma kekahi wahi ʻo Getesemane ka inoa; ʻī maila ia i ka poʻe haumāna, “E noho iho ʻoukou ma ʻaneʻi, a hele aku au e pule ma ʻō.”
37Lawe akula ʻo ia iā Petero a me nā keiki ʻelua a Zebedaio, hoʻomaka ihola ia e luʻuluʻu iho, a me ke kaumaha.
38A laila, ʻī maila ʻo ia iā lākou, “Ua kaumaha loa kuʻu ʻuhane e like me ka make; e noho iho ʻoukou ma ʻaneʻi, a e kiaʻi pū me aʻu.”
39Hele iki akula ia, moe ihola kona alo i lalo, pule akula ia, ʻī akula, “E koʻu Makua ē, inā paha he mea hiki ia, e lawe aku ʻoe i kēia kīʻaha mai oʻu aku nei; akā hoʻi, aia i kou makemake, ʻaʻole i koʻu.”
40Hoʻi maila ia i ua mau haumāna lā, a loaʻa ihola lākou e hiamoe ana; ʻī maila iā Petero, “Pēlā nō anei, ʻaʻole e hiki iā ʻoukou ke kiaʻi pū me aʻu i hoʻokahi hora?
41“E kiaʻi ʻoukou, e pule hoʻi, o lilo ʻoukou i ka hoʻowalewale ʻia mai; ua ʻoluʻolu naʻe ka naʻau; akā, ʻo ke kino, ua nāwaliwali ia.”
42Hele hou akula ia, ka lua ia o ka hele ʻana; pule akula ia, ʻī akula, “E koʻu Makua, inā paha ʻaʻole ia he mea hiki ke lawe ʻia aku kēia kīʻaha mai oʻu aku nei, i inu ʻole au, inā nō e hana ʻia kou makemake.”
43Hoʻi hou maila ia, a loaʻa hou ihola lākou e hiamoe ana; no ka mea, ua luluhi iho ko lākou mau maka.
44Waiho maila ia iā lākou, hele hou akula, ʻo ke kolu kēia o ka pule ʻana, ma kēlā ʻōlelo hoʻokahi nō.
45A laila, hele maila ia i kāna poʻe haumāna, ʻī maila iā lākou, “E hiamoe nui aku ʻoukou, a e hoʻomaha iho: aia hoʻi, ke kokoke mai nei ka hora, a e kumakaia ʻia ana ke Keiki a ke Kanaka a lilo i nā lima o ka poʻe hewa.
46“E ala mai, e haele kākou; eia aʻe ua kokoke mai nei ka mea nāna au i kumakaia!”
47¶ A i kāna ʻōlelo ʻana, aia hoʻi, hele maila ʻo Iuda, kekahi o ka poʻe ʻumikumamālua, me ia pū ka poʻe kānaka he nui, me nā pahi kaua a me nā newa, i hoʻouna ʻia mai e nā kāhuna nui a me nā lunakahiko.
48ʻO ka mea nāna ia i kumakaia, hāʻawi akula ia i hōʻailona iā lākou, ʻī akula, “ʻO ka mea aʻu e honi aku ai, ʻo ia nō ia, e hoʻopaʻa ʻoukou iā ia.”
49A hele pololei akula ia i o Iesū lā, ʻī akula, “Aloha ʻoe, e Rabi,” a honi akula iā ia.
50ʻĪ maila ʻo Iesū iā ia, “E ka hoalauna, he aha kāu i hele mai nei?” A laila hele akula lākou, a kau akula i nā lima ma luna o Iesū, a hoʻopaʻa ihola iā ia.
51Aia hoʻi, ʻo kekahi o ka poʻe me Iesū, lālau ihola kona lima i kāna pahi kaua, unuhi aʻela, a hahau akula i ke kauā a ke kahuna nui, a ʻoki akula i kona pepeiao.
52A laila, ʻī maila ʻo Iesū iā ia, “E hoʻihoʻi ʻoe i ka pahi kaua i kona wahī; no ka mea, ʻo ka poʻe lālau i ka pahi kaua, e make nō lākou i ka pahi kaua.
53“Ke manaʻo nei anei ʻoe, e hiki ʻole iaʻu ʻānō ke kāhea aku i koʻu Makua, a e hoʻouna mai nō ia i oʻu nei i nā legeona ʻānela he ʻumikumamālua a keu aku?
54“Akā, pehea lā hoʻi e hoʻokō ʻia ai ka Palapala, e ʻī mai ana, e hana ʻia kēia mau mea?”
55Ia hora nō, ʻōlelo akula Iesū i ka poʻe kānaka, “Ke hele mai nei anei ʻoukou i waho nei me nā pahi kaua a me nā newa e lālau mai iaʻu, e like me ka lālau ʻana i ka pōā? Ua noho pū au me ʻoukou i kēlā lā i kēia lā e aʻo ana i loko o ka luakini, ʻaʻole naʻe ʻoukou i lālau mai iaʻu.
56“Ua hana ʻia kēia mau mea a pau i kō ai nā Palapala a ka poʻe kāula.” A laila, haʻalele ihola nā haumāna a pau iā ia, a holo akula.
57¶ A ʻo ka poʻe nāna Iesū i lālau aku, alakaʻi akula lākou iā ia i o Kaiapa lā ke kahuna nui, kahi i hoʻākoakoa ʻia ai ka poʻe kākau ʻōlelo a me nā lunakahiko.
58Ukali mamao akula ʻo Petero iā ia, a hiki i ka pā hale o ke kahuna nui; a komo akula ia i loko, noho pū ihola me ka poʻe ilāmuku e ʻike i ka hope.
59ʻImi akula ka poʻe kāhuna nui, me nā lunakahiko, a me ka ʻaha lunakānāwai a pau i mea hōʻike wahaheʻe no Iesū i make ai ʻo ia.
60ʻAʻole naʻe i loaʻa. He nui nō hoʻi nā mea hōʻike wahaheʻe i hele mai, ʻaʻole hoʻi i loaʻa. Ma hope iho hele maila ʻelua mau mea hōʻike wahaheʻe,
61ʻĪ maila, “Ua ʻōlelo mai ʻo ia nei, ‘E hiki nō iaʻu ke wāwahi iho i ka luakini o ke Akua, a e hana hou au ia a paʻa i nā lā ʻekolu.’”
62Kū aʻela ke kahuna nui, ʻī maila iā ia, “ʻAʻole anei ʻoe e ʻōlelo iki mai? He aha kā lāua nei i hōʻike mai ai nou?”
63ʻAʻole ʻo Iesū i ʻekemu aʻe. ʻŌlelo maila ke kahuna nui iā ia, ʻī maila, “Ke nīnau pono aku nei au iā ʻoe ma ke Akua ola, e haʻi mai ʻoe iā mākou, ʻo ʻoe anei ka Mesia, ke Keiki a ke Akua?”
64ʻŌlelo akula ʻo Iesū, “ʻO ia kāu i ʻōlelo mai. A ke ʻōlelo aku nei hoʻi au iā ʻoukou, ma hope aku nei, e ʻike nō ʻoukou i «ke Keiki a ke Kanaka e noho ana ma ka lima ʻākau o ka Mea Mana, a e hele mai ana ma luna o nā ao o ka lani».”
65A laila haehae ihola ke kahuna nui i kona ʻaʻahu, ʻī aʻela, “Ke ʻōlelo hōʻino wale nei ʻo ia nei; pehea lā e pono ai kākou i nā mea ʻike maka hou? Aia hoʻi, ua lohe iho nei ʻoukou i kāna ʻōlelo hōʻino ʻana.
66“He aha ko ʻoukou manaʻo?” ʻĪ maila lākou, “Ua hewa ia e make!”
67A laila, kuha akula lākou i kona maka, a kuʻi akula iā ia, a papaʻi akula kekahi poʻe iā ia me ka poho lima,
68ʻī akula, “E ka Mesia, e koho mai ʻoe iā mākou, na wai ʻoe i papaʻi aku?”
69¶ Noho ihola ʻo Petero i waho ma ka pā hale; a hele maila kekahi kaikamahine i ona lā, ʻī maila, “ʻO ʻoe nō hoʻi kekahi me Iesū no Galilaia.”
70Hōʻole akula ia i mua o lākou a pau, ʻī akula, “ʻAʻole au ʻike i kāu mea e ʻōlelo mai nei.”
71Hele akula ia i waho ma ka ʻīpuka, ʻike maila kekahi kaikamahine ʻē aʻe iā ia, a haʻi akula iā lākou i laila, “ʻO ia nei nō hoʻi kekahi me Iesū no Nazareta.”
72Hōʻole hou akula ia me ka hoʻohiki ʻino, “ʻAʻole au ʻike i ua kanaka lā.”
73Ma hope iho, hele maila ka poʻe e kū ana i laila, ʻī maila iā Petero, “ʻOiaʻiʻo nō, ʻo ʻoe kekahi o lākou; no ka mea, ke hōʻike mai nei kāu ʻōlelo iā ʻoe iho.”
74A laila, hoʻomaka ihola ia e hāʻiliʻili a me ka hoʻohiki ʻino, ʻī akula, “ʻAʻole au i ʻike ia kanaka!” A ʻoʻoʻō koke ihola ka moa.
75A hoʻomanaʻo ihola ʻo Petero i ka mea a Iesū i ʻōlelo mai ai iā ia, “Ma mua mai o ke ʻoʻoʻō ʻana o ka moa, e pākolu nō kāu hōʻole ʻana mai iaʻu.” Hele akula ia i waho, a uē walania ihola ia.
Currently Selected:
KA ʻEUANELIO I KĀKAU ʻIA AI E MATAIO 26: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
