KA ʻEUANELIO I KĀKAU ʻIA AI E MATAIO 14
14
MOKUNA XIV.
1 Ka manaʻo o Herode no Kristo. 3 Ka hala i make ai ʻo Ioane. 15 Hānai aku ʻo Iesū i ʻelima tausani. 22 Hele ia ma luna o ka wai. 34 Hoʻōla ʻia ka poʻe maʻi o Genesareta.
1¶ Ia wā lā, lohe aʻela ʻo Herode ke aliʻi kiaʻāina i ke kaulana o Iesū,
2ʻī akula ia i kāna poʻe kauā, “ʻO Ioane Bapetite kēia; ua ala mai ia mai ka make mai; no laila i hana ʻia ai nā hana mana e ia.”
3No ka mea, hopu akula ʻo Herode iā Ioane a paʻa, a hahao akula iā ia i loko o ka hale paʻahao, no Herodia ka wahine a Pilipo a kona hoahānau.
4No ka mea, i ʻōlelo aku ʻo Ioane iā Herode, “ʻAʻole ou pono ke lawe iā ia nāu.”
5Manaʻo ihola ia e pepehi iā ia, a makaʻu aʻela ia i nā kānaka; no ka mea, manaʻo ihola lākou, he kāula ia.
6Aia mālama ʻia ai ka lā hānau o Herode, haʻa maila ke kaikamahine a Herodia i waena o lākou, a leʻaleʻa ihola ʻo Herode.
7No laila, hoʻohiki maila ia, e hāʻawi mai iā ia i kāna mea e noi aku ai.
8A hōʻeuʻeu ʻia mai ʻo ia e kona makuahine, ʻī akula ia, “ʻO ke poʻo o Ioane Bapetite kāu e hāʻawi mai ai iaʻu ma luna o ke pā.”
9Minamina ihola ke aliʻi; akā, no kona hoʻohiki ʻana, a no ka poʻe hoa ʻai e noho pū ana me ia, kēnā akula ia e hāʻawi ʻia mai.
10Hoʻouna akula ia, a ʻoki ihola i ke poʻo o Ioane i loko o ka hale paʻahao.
11A lawe ʻia maila kona poʻo ma luna o ke pā, a hāʻawi ʻia mai ia i ua kaikamahine lā, a nāna ia i lawe aku i kona makuahine.
12Kiʻi akula kāna poʻe haumāna i ke kino, a kanu ihola; a hele maila lākou a haʻi maila iā Iesū.
13¶ A lohe aʻela ʻo Iesū, holo kaʻawale akula ia ma ka moku i kahi nāhelehele, a lohe aʻela nā kānaka, hahai wāwae akula lākou iā ia, mai loko mai o nā kūlanakauhale.
14A pae akula Iesū, ʻike akula ia i nā kānaka he nui loa, haʻehaʻe ke aloha iā lākou, a hoʻōla ihola ia i ko lākou poʻe maʻi.
15A ahiahi aʻela, hele maila kāna poʻe haumāna i ona lā, ʻī akula, “He wahi wao nahele kēia, a ua hala aʻe nei ka hora; e hoʻihoʻi aku ʻoe i ua poʻe kānaka nei, i hele lākou i nā kauhale, e kūʻai i ʻai na lākou.”
16ʻĪ maila ʻo Iesū iā lākou, “ʻAʻole e pono no lākou ke hele aku, na ʻoukou e hāʻawi aku i ʻai na lākou!”
17ʻĪ akula lākou iā ia, “ʻElima wale nō pōpō berena a mākou, a me nā iʻa ʻelua.”
18ʻĪ maila ʻo Iesū, “E lawe mai ʻoukou ia mau mea i oʻu nei.”
19Kauoha akula ia i nā kānaka e noho iho i lalo ma ka weuweu, lālau akula ia i nā pōpō berena ʻelima, a me nā iʻa ʻelua, nānā aʻela ia i ka lani, hoʻomaikaʻi akula, wāwahi ihola; hāʻawi akula i ka berena i nā haumāna, na nā haumāna hoʻi i hāʻawi aku ia mau mea i ka poʻe kānaka.
20ʻAi ihola lākou a pau, a māʻona; a hōʻiliʻili maila lākou i nā hakina i koe a piha aʻela nā hīnaʻi he ʻumikumamālua.
21ʻO ka poʻe i ʻai, ʻelima paha tausani kānaka lākou, he ʻokoʻa nā wāhine a me nā kamaliʻi.
22¶ A koi koke akula Iesū i kāna mau haumāna e eʻe i luna o ka moku, a e holo ʻē ma mua ma kēlā kapa, iā ia e hoʻihoʻi aku ai i ka poʻe kānaka.
23A pau ka poʻe kānaka i ka hoʻihoʻi ʻia aku e ia, piʻi akula ia, ʻo ia wale nō, i kekahi mauna e pule ai; a hiki mai ke ahiahi, ʻo ia wale nō ma laila.
24A ʻo ua moku lā, ma waena ia o ka loko e luli ʻia ana e nā ʻale; no ka mea, ma mua mai ka makani.
25I ka hā o ka wati o ka pō, hele maila Iesū i o lākou lā, e hele ana ma luna o ka loko.
26ʻIke akula nā haumāna iā ia e hele ana ma luna o ka loko, hopohopo ihola lākou, ʻī aʻela, “He ʻuhane ia!” A hoʻōho akula lākou i ka makaʻu.
27ʻŌlelo koke maila ʻo Iesū iā lākou, “E hoʻolana ʻoukou, ʻo wau nō kēia, mai makaʻu.”
28ʻŌlelo akula ʻo Petero iā ia, “E ka Haku, a ʻo ʻoe nō ia, e ʻōlelo mai ʻoe iaʻu e hele aku i ou lā ma luna o ka wai.”
29ʻĪ maila kēlā, “E hele mai!” Iho ihola ʻo Petero mai luna o ka moku, a hele akula ia ma luna o ka wai e hālāwai me Iesū.
30A ʻike akula ia i ka makani ikaika, makaʻu ihola ia; a i ka hoʻomaka ʻana e pohō iho, kāhea akula ia, ʻī akula, “E ka Haku, e hoʻōla mai iaʻu!”
31Kīkoʻo koke maila Iesū i kona lima, paʻa maila iā ia, ʻī maila, “E ka mea paulele kāpekepeke, he aha kāu mea i kānalua ai?”
32A eʻe maila lāua ma luna o ka moku, mālie ihola ka makani.
33Hele maila ka poʻe ma luna o ka moku, moe ihola lākou i mua ona, ʻī akula, “He ʻoiaʻiʻo ʻo ʻoe nō ke Keiki a ke Akua!”
34¶ Holo akula lākou, a hiki akula i ka ʻāina ʻo Genesareta.
35A ʻike maila iā ia nā kānaka o ia wahi, kiʻi akula lākou ma ia ʻāina a puni, a lawe maila i ka poʻe maʻi a pau i ona lā;
36nonoi maila lākou iā ia e hoʻopā wale mai i ka lepa o kona ʻaʻahu; a ʻo ka poʻe a pau i hoʻopā mai, ua ola lākou.
Currently Selected:
KA ʻEUANELIO I KĀKAU ʻIA AI E MATAIO 14: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
