KA WĀNANA A ʻISAIA 7
7
MOKUNA VII.
1 Hoʻomaha mai ʻo ʻIsaia iā ʻAhaza. 14 Haʻi mai ʻo ia iā Kristo. 17 Ka ʻino e hiki mai ana ma luna o kā Iuda, no Suria mai.
1¶ I ke kau iā ʻAhaza, ke keiki a Iotama, ke keiki a ʻUzia, ke aliʻi o kā Iuda, hele mai ʻo Rezina, ke aliʻi o Suria, a me Peka, ke keiki a Remalia, ke aliʻi o kā ʻIseraʻela, e kūʻē iā Ierusalema, kaua mai, ʻaʻole naʻe i hiki iā lākou ke lanakila ma luna o ia wahi.
2A haʻi ʻia maila i ko ka hale o Dāvida, i ka ʻī ʻana mai, “Ke hoʻomoana nei ko Suria ma loko o ko ʻEperaima.” A laila, haʻalulu ka naʻau o ke aliʻi, a me ka naʻau o kona poʻe kānaka, e like me ka haʻalulu ʻana o nā lāʻau o ka ulu lāʻau i mua o ka makani.
3¶ ʻĪ maila ʻo Iēhova iā ʻIsaia, “Ō hele, ʻānō, e hālāwai me ʻAhaza, ʻo ʻoe, a me Seara-Iasuba, kāu keiki, ma ka wēlau o ka ʻauwai o ka wai puna luna, ma ke ala e hiki aku ai i ke Kula Holoi Lole;
4a e ʻī aku ʻoe iā ia, e ao ʻoe, ‘E noho mālie; mai makaʻu hoʻi, mai maʻule kou naʻau, no nā welowelo ʻalua o kēia mau momoku ahi, ʻo ka huhū o Rezina, a me ko Suria, a me ke keiki a Remalia.
5‘No ka ʻimi hala o ko Suria iā ʻoe, a me ʻEperaima, a me ke keiki a Remalia, i ka ʻī ʻana aʻe,
6“E piʻi kūʻē kākou i kā Iuda, e hoʻopilikia aku hoʻi, a e mahele ia wahi no kākou, a e hoʻonoho i ke keiki a Tabeala, i aliʻi ma loko ona.”
7‘Ke ʻī mai nei ka Haku, ʻo Iēhova penei, “ʻAʻole e kū kēia, ʻaʻole ia e hana ʻia.
8“ʻO ke poʻo o Suria, ʻo Damaseko ia, a ʻo ke poʻo o Damaseko, ʻo Rezina nō; he kanaonokumamālima makahiki i koe, a laila, kahuli ʻo ʻEperaima, a lilo i aupuni ʻole.
9“ʻO Samaria nō ke poʻo o ʻEperaima, a ʻo ke poʻo hoʻi o Samaria, ʻo ia ke keiki a Remalia. I ʻole ʻoukou e manaʻoʻiʻo i kēia, ʻaʻole ʻoukou e malu.”’”
10¶ ʻŌlelo hou mai ʻo Iēhova iā ʻAhaza, ʻī maila,
11“E nonoi ʻoe i hōʻailona nou, mai Iēhova, mai kou Akua mai; e nonoi ma ka hohonu, a ma kahi kiʻekiʻe paha.”
12ʻĪ akula ʻo ʻAhaza, “ʻAʻole au e nonoi, ʻaʻole hoʻi au e ʻaʻa aku iā Iēhova!”
13A laila, ʻī maila ia, “E hoʻolohe ʻoukou, e ka ʻohana a Dāvida, he mea ʻuʻuku anei iā ʻoukou ke hoʻopaupauaho i kānaka? E hoʻopaupauaho pū anei ʻoukou i koʻu Akua?
14“No laila, na ka Haku ponoʻī nō e hāʻawi mai iā ʻoukou i hōʻailona; aia hoʻi! E hāpai ana nō kekahi wahine puʻupaʻa, a e hānau mai hoʻi ia i keiki, a e kapa aku nō ʻo ia i kona inoa, ʻo ʻImanuʻela.
15“ʻO ka waiūpaʻa a me ka mele kāna e ʻai ai, a ʻike ʻo ia i ka hōʻole i ka hewa, a e koho hoʻi i ka pono.
16“No ka mea, ma mua o ka ʻike ʻana o ke keiki e hōʻole i ka hewa, a e koho hoʻi i ka pono, e neoneo ʻē nō ka ʻāina o ua mau aliʻi lā ʻelua āu e makaʻu nei.
17“Na Iēhova nō e hoʻopuka mai ma luna ou, a ma luna hoʻi o kou poʻe kānaka, a ma luna o ka hale o kou makua kāne, i nā lā i hiki ʻole mai ai ma mua, mai ka wā mai o ko ʻEperaima haʻalele ʻana i kā Iuda; i ke aliʻi no ʻAsuria.”
18A hiki aku i kēlā lā, na Iēhova nō e pio aku i ka nalo, e noho ana ma nā wēlau o nā muliwai o ʻAigupita, a i ka nalo hope ʻeha, ma ka ʻāina ʻo ʻAsuria;
19A e hele mai hoʻi lākou, a e kau mai lākou a pau, ma nā kahawai ʻōlohelohe, a ma nā lua o nā pōhaku, a ma ka nahele ʻoʻoi a pau, a ma nā kula holoholona a pau.
20¶ Ia lā lā, na ka Haku nō e kahi, me ka pahi kahi i hoʻolimalima ʻia, ma kēlā ʻaoʻao o ka Muliwai, me ke aliʻi hoʻi o ʻAsuria, i ke poʻo, a me ke oho o nā kapuaʻi; a e kahi ʻia nō hoʻi ka ʻumiʻumi.
21¶ A hiki aku i kēlā lā, e hānai nō ke kanaka i ka bipi ohi, a me nā hipa ʻelua;
22a no ka nui loa mai o ka waiū, e ʻai nō ia i ka waiūpaʻa; e ʻai ʻiʻo nō i ka waiūpaʻa a me ka meli, ʻo ka poʻe a pau i koe ma ka ʻāina.
23A hiki aku i kēlā lā, ʻo kahi a pau i ulu ai nā kumu waina, he tausani, i kūʻai ʻia nō nā hapalua he tausani, e paʻapū ia wahi i ka nahele ʻoʻoi, a me ka lāʻau kalakala.
24Me nā pua a me nā kakaka lākou e hele ai i laila; no ka mea, e nāhelehele ana nō ka ʻāina a pau, i ka lāʻau kalakala a me ka nahele ʻoʻoi.
25Ma nā mauna a pau i ʻōlaʻolaʻo ʻia i ka ʻōʻō, ʻaʻohe mea hele i laila, no ka makaʻu i ka lāʻau kalakala, a me ka nahele ʻoʻoi; he wahi ia e hoʻouna aku ai i ka bipi, he wahi hoʻi e hahi ai nā hipa.
Ka Baibala Hemolele © Partners Development Foundation, 2018.