KA WĀNANA A ʻISAIA 45
45
MOKUNA XLV.
1 Kā Iēhova kauoha iā Kuro, no ka ʻekalesia. 5 Haʻi mai nō ʻo ia i kona mana loa. 22 Hiki nō ko ke Akua ola i nā ʻāina a pau.
1¶ Penei ʻo Iēhova i ʻōlelo mai ai no kona mea i poni ʻia,
No Kuro, nona ka lima ʻākau aʻu i hoʻoikaika ai,
E hoʻopio i nā lāhui kanaka i mua ona;
A e kala nō hoʻi au i ko nā pūhaka o nā aliʻi,
I hāmama nā puka i mua ona,
ʻAʻole hoʻi e pani ʻia nā puka pā.
2“E hele nō wau i mua ou, a e hoʻolaumania i nā wahi ʻāpuʻupuʻu,
E wāwahi nō au i nā pani puka keleawe,
A e uhaki iaʻu nā kaola hao.
3“E hāʻawi aku nō au iā ʻoe i ka waiwai o ka pouli,
A me ka ukana i hūnā ʻia ma kahi nalowale,
I ʻike ai ʻoe, ʻo wau nō Iēhova, ka Mea i hea aku iā ʻoe ma ka inoa,
Ke Akua hoʻi o kā ʻIseraʻela.
4“No kaʻu kauā, no Iakoba,
No kā ʻIseraʻela hoʻi, ka mea aʻu i wae ai,
Ua hea aku nō au iā ʻoe;
Ma kou inoa ua hea aku au iā ʻoe,
ʻAʻole naʻe ʻoe i ʻike mai iaʻu.
5“ʻO wau nō Iēhova, ʻaʻohe mea ʻē aʻe,
ʻAʻohe Akua ʻē aʻe, ke kaʻawale au;
Naʻu nō e kāʻei aku iā ʻoe, ʻaʻole naʻe ʻoe i ʻike mai iaʻu;
6“I ʻike lākou, mai ka puka ʻana a ka lā mai,
A mai ke komohana mai hoʻi,
ʻAʻohe mea ʻē aʻe, ke kaʻawale au;
ʻO wau nō ʻo Iēhova, ʻaʻohe mea ʻē aʻe.
7“Ka Mea nāna i hana ka mālamalama,
A nāna hoʻi i hana ka pouli,
Nāna i hana ka pōmaikaʻi,
Nāna hoʻi i hana ka pōʻino,
ʻO wau nō Iēhova, ka Mea nāna e hana kēia mau mea a pau.
8¶ “E hoʻonākulukulu ʻoukou, e nā lani, mai luna mai,
E hanini hoʻi nā aouli i ka pono;
E hāmama hoʻi ka honua, a e hua mai i ke ola,
E ulu pū mai nō me ka pono;
Naʻu, na Iēhova ia i hana.
9¶ “Auē ke kanaka paio aku i kona mea nāna ia i hana!
Nā mea lepo me nā mea lepo o ka honua!
E ʻōlelo anei ka lepo kīʻaha, i ka mea nāna ia e hoʻoponopono,
‘He aha kāu e hana nei?’
A ʻo ka mea āu i hana ai, ‘ʻAʻole ona lima?’
10“Auē ka mea ʻōlelo i ka makua kāne, ‘He aha kāu e hoʻohānau ai?’
A i ka makuahine hoʻi, ‘Ua hānau ʻoe i ke aha?’”
11¶ Ke ʻōlelo mai nei ʻo Iēhova, ka Mea Hemolele o kā ʻIseraʻela, penei, ʻo ka Mea hoʻi nāna ia i hana,
“E nīnau mai ʻoukou iaʻu i nā mea e hiki mai ana no kaʻu mau keiki,
A e kauoha mai ʻoukou iaʻu ma ka hana a kuʻu mau lima.
12“Naʻu nō i hana ka honua nei,
A hana nō hoʻi au i nā kānaka ma luna iho;
Na kuʻu mau lima nō i hohola aku i nā lani,
A naʻu hoʻi i kauoha aku i ko lākou lehulehu a pau.
13“Ua hoʻāla nō au iā ia, no ka pono,
Naʻu nō e hoʻopololei i kona mau ʻaoʻao,
Nāna nō e hana i koʻu kūlanakauhale,
A nāna nō e hoʻokuʻu aku i koʻu poʻe pio;
ʻAʻole no ka uku, a me ka waiwai kīpē,”
Wahi a Iēhova o nā kaua.
14¶ Ke ʻī mai nei ʻo Iēhova penei,
“E hele mai nō i ʻaneʻi, i ou lā,
Ka waiwai o ʻAigupita, a me ka mea kūʻai o ʻAitiopa,
A me ko Seba, ka poʻe kānaka nunui, a e lilo lākou nou.
E hahai nō lākou iā ʻoe; me ka paʻa ʻana i nā kaula hao lākou e hele mai ai,
A e moe nō lākou i lalo i mua ou,
E nonoi aku nō lākou iā ʻoe, me ka ʻōlelo iho,
‘He ʻoiaʻiʻo nō, me ʻoe nō ke Akua, ʻaʻohe Akua ʻē aʻe.’”
15He ʻoiaʻiʻo nō, ʻo ke Akua nō ʻoe nāna i hūnā iā ʻoe iho,
E ke Akua o kā ʻIseraʻela, ka Mea e ola ai.
16Ua hilahila, a ua hoʻopalai maka lākou a pau;
Holo pū nō i loko o ka hilahila, ka poʻe hana akua kiʻi.
17E hoʻōla ʻia nō ʻo kā ʻIseraʻela ma loko o Iēhova, me ke ola mau loa;
ʻAʻole ʻoukou e hilahila, ʻaʻole hoʻi e hoʻopalai maka, ia ao aku, ia ao aku.
18¶ No ka mea, penei ka ʻōlelo ʻana mai a Iēhova,
Ka Mea nāna i hana nā lani;
ʻO ia ke Akua, ka Mea nāna i hana ka honua, a kūkulu hoʻi,
Ka mea nāna ia i hoʻopaʻa, ʻaʻole hoʻi ia i hana makehewa ia mea,
Hana nō ʻo ia ia i wahi e noho ʻia ai;
“ʻO wau nō Iēhova, ʻaʻohe mea ʻē aʻe.
19“ʻAʻole au i ʻōlelo ma kahi malū, ma kahi pouli o ka honua;
ʻAʻole au i ʻōlelo aku i nā pua a Iakoba,
‘E ʻimi makehewa ʻoukou iaʻu’;
ʻO wau ʻo Iēhova, ka Mea e ʻōlelo ana ma ka pono,
Ka Mea e haʻi aku ana i nā mea pololei.
20¶ “E hoʻākoakoa ʻoukou, a hele mai,
E hōʻuluʻulu pū ʻoukou, e ka poʻe i pakele o nā ʻāina.
He poʻe ʻike ʻole ka poʻe kūkulu i ka lāʻau o ko lākou akua kālai ʻia,
A pule aku i ke akua hiki ʻole ke hoʻōla.
21“E haʻi aku, e lawe mai hoʻi iā lākou;
ʻO ia, e kūkākūkā pū lākou.
Na wai i haʻi i kēia, mai kahiko mai,
A hōʻikeʻike hoʻi ia, mai kēlā wā mai?
ʻAʻole anei ʻo wau, ʻo Iēhova?
ʻAʻole hoʻi he Akua ʻē aʻe, ke kaʻawale au;
ʻO ke Akua pono, ka Mea e ola ai, ʻaʻohe mea ʻē aʻe.
22“E hāliu mai ʻoukou iaʻu a e hoʻōla ʻia nō ʻoukou,
E nā kūkulu o ka honua;
No ka mea, ʻo wau nō ke Akua, ʻaʻohe mea ʻē aʻe.
23“Ua hoʻohiki au iaʻu iho,
Ua puka aku hoʻi ka ʻōlelo, mai koʻu waha aku ma ka pono,
ʻAʻole ia i hoʻi hou; no ka mea,
Iaʻu nō e kukuli ai nā kuli a pau, a e hoʻohiki nō hoʻi nā elelo a pau.
24“He ʻoiaʻiʻo, e ʻōlelo mai iaʻu, ‘Ma loko o Iēhova nā mea pono, a me ka ikaika,’
Iā ia nō lākou e hele mai ai;
A e hilahila auaneʻi ka poʻe a pau i inaina aku iā ia.
25“Ma loko o Iēhova e hoʻāpono ʻia ai nā pua a pau o kā ʻIseraʻela,
A ma laila hoʻi e hoʻonani ai.”
Ka Baibala Hemolele © Partners Development Foundation, 2018.