HOSEA 7
7
MOKUNA VII.
1 Hōʻike mai i nā hewa nui o nā aliʻi a me nā kānaka. Hoʻākāka mai i ka mea a ke Akua i hana mai ai iā lākou.
1¶ I ka wā aʻu e hoʻihoʻi aku ai i ke pio ʻana o kuʻu poʻe kānaka,
I kuʻu hoʻōla ʻana i kā ʻIseraʻela, a laila hōʻike ʻia mai ka hewa o ʻEperaima,
A me nā mea ʻino o ko Samaria;
No ka mea, ua hana lākou i ka wahaheʻe;
A komo mai ka ʻaihue ma loko,
A hao wale ka poʻe pōā ma waho.
2ʻAʻole noʻonoʻo ko lākou naʻau i kuʻu hoʻomanaʻo ʻana i ko lākou hewa a pau;
ʻĀnō, ua hoʻopuni kā lākou mau hana iā lākou;
Eia nō lākou i mua o koʻu maka.
3Ma ko lākou hewa hoʻoleʻaleʻa aku lākou i ke aliʻi,
A i nā haku hoʻi ma ko lākou mau hoʻopunipuni.
4He poʻe moekolohe lākou a pau, e like me ka umu i hōʻenaʻena ʻia e ka mea pūlehu palaoa,
Hoʻopaneʻe ʻo ia i ka pūlehu ʻana, ma hope o ke kāwili ʻana i ka palaoa a hiki i ka wā e hū ai.
5A i ka lā o ko kākou aliʻi loʻohia iho nā haku e ka maʻi i ka wela o ka waina,
A ʻō akula ʻo ia i kona lima me ka poʻe haʻakei.
6No ka mea, ua hoʻomākaukau lākou i ko lākou naʻau,
E like me ka umu ma ko lākou hoʻohālua ʻana;
Ua hiamoe ko lākou mau mea pūlehu palaoa, a ao ka pō;
A i kakahiaka, ua wela ia mea e like me ke ahi lapalapa.
7Ua wela lākou a pau e like me ka umu,
Ua ʻai lākou i ko lākou mau luna kānāwai;
Ua hāʻule ko lākou poʻe aliʻi a pau;
ʻAʻohe mea e kāhea mai iaʻu i waena o lākou.
8¶ ʻO ʻEperaima, ua hui pū ʻia me nā kānaka ʻē;
ʻO ʻEperaima, he pōpō palaoa nō ia, ʻaʻole i huli ʻia.
9Ua ʻai nā malihini i kona ikaika, ʻaʻole naʻe ia i ʻike;
Ua kau mai nō hoʻi ke oho hina ma luna ona, ʻaʻole naʻe ia i ʻike.
10Ke hōʻike mai nei ka haʻaheo o kā ʻIseraʻela ma kona maka;
ʻAʻole lākou e hoʻi hou iā Iēhova i ko lākou Akua,
ʻAʻole ʻimi aku iā ia no kēia mea a pau.
11Ua like hoʻi ʻo ʻEperaima me he manu nūnū lā i hāwāwā, ʻaʻohe ona manaʻo;
Kāhea aku lākou i ko ʻAigupita,
A hele lākou i ko ʻAsuria.
12A i ka wā e hele ai lākou, e hohola aku au i kaʻu ʻupena ma luna o lākou;
A e lawe mai au iā lākou i lalo, e like me nā manu o ka lewa;
A e hahau aku au iā lākou, e like me ka mea a ko lākou ʻaha kanaka i lohe ai.
13E auē lākou! No ka mea, ua ʻauana lākou mai oʻu aku lā;
ʻO ka make ko lākou! No ka mea, ua kipi mai lākou iaʻu;
ʻO wau kai hoʻōla iā lākou,
A ʻo lākou kai ʻōlelo wahaheʻe mai iaʻu.
14ʻAʻole lākou i auē mai iaʻu me ko lākou naʻau, i ka wā a lākou i auē ai ma luna o ko lākou wahi moe:
Ua hoʻākoakoa lākou iā lākou iho no ka ʻai, a no ka waina hou, a ua kipi mai lākou iaʻu.
15Iaʻu i aʻo ai iā lākou, a hoʻoikaika aku ai i ko lākou mau lima,
Akā, ke manaʻo hewa mai nei lākou iaʻu.
16Ua hoʻi hou lākou, ʻaʻole naʻe i ka Mea Kiʻekiʻe Loa;
Ua like lākou me he kakaka hewa lā;
E hāʻule nā aliʻi o lākou me ka pahi kaua, no ka hoʻokano o ko lākou alelo;
ʻO kēia ko lākou hōʻino ma ka ʻāina ʻo ʻAigupita.
Currently Selected:
HOSEA 7: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.