HOSEA 6
6
MOKUNA VI.
1 ʻO ke aʻo ʻana e mihi, a e manaʻolana ma ke Akua.
1¶ “Inā kākou e hoʻi hou aku iā Iēhova;
No ka mea, ua haehae mai kēlā, a e hoʻōla mai ia iā kākou;
Ua hahau mai ia, a e hoʻōla mai nō ʻo ia iā kākou.
2“Ma hope o nā lā ʻelua e hoʻōla mai ia iā kākou;
I ke kolu o ka lā e hoʻokū mai ia iā kākou i luna,
A e ola kākou i mua ona.
3“A laila e ʻike kākou, ke hahai kākou e ʻike iā Iēhova;
Ua mākaukau kona hele ʻana aku, e like me ka wanaʻao;
A e hele mai ia iā kākou e like me ka ua;
E like me ke kuāua mua, a me ke kuāua hope ma luna o ka honua.”
4¶ E ʻEperaima, he aha kaʻu e hana aku ai iā ʻoe?
E Iuda, he aha kaʻu e hana aku ai iā ʻoe?
No ka mea, ʻo kā ʻoukou pono, ua like me ke ao kakahiaka,
A ua like me ka hau e nalo koke ana.
5No ia mea, ua kālai aku au iā lākou ma nā kāula;
Ua pepehi aku au iā lākou ma nā ʻōlelo a kuʻu waha;
A e puka aku kou hoʻohewa ʻia e like me ka mālamalama.
6No ka mea, ʻo ke aloha koʻu makemake, ʻaʻole ka mōhai;
A ʻo ka ʻike i ke Akua ma mua o nā mōhai kuni.
7Akā, e like me kānaka, ua haʻi iā lākou ka berita;
I laila ua hana hoʻopunipuni mai lākou iaʻu.
8ʻO Gileada ke kūlanakauhale o ka poʻe hana hewa,
I hahi ʻia i nā kapuaʻi koko.
9E like me ka poʻe hao wale e hoʻohālua ana i ke kanaka;
Pēlā nō ka poʻe kāhuna i pepehi wale ma ke ala o Sekema;
No ka mea, ke hana nei lākou i ka mea ʻino.
10Ma loko o ka ʻohana a ʻIseraʻela ua ʻike au i ka mea weliweli;
Ma laila ka moekolohe o ʻEperaima,
Ua haumia kā ʻIseraʻela.
11Nou hoʻi, e kā Iuda, ua mākaukau ka ʻohi ʻai ʻana.
Ka Baibala Hemolele © Partners Development Foundation, 2018.