HOSEA 4
4
MOKUNA IV.
1 Hoʻohewa mai ke Akua i kā ʻIseraʻela no ko lākou hewa.
1¶ E hoʻolohe ʻoukou, e nā mamo a ʻIseraʻela, i ka ʻōlelo a Iēhova;
No ka mea, he hakakā ko Iēhova me nā kānaka o ka ʻāina;
No ka mea, ʻaʻohe ʻoiaʻiʻo, ʻaʻohe aloha,
ʻAʻohe ʻike i ke Akua ma ka ʻāina.
2ʻO ka hoʻohiki ʻino, ka hoʻopunipuni, ka pepehi kanaka, ka ʻaihue, a me ka moekolohe,
Kā lākou i hoʻomāhuahua aʻe ai, a pili aku nō ke koko i ke koko.
3No ia mea, e kanikau auaneʻi ka ʻāina,
A e nāwaliwali nā mea a pau e noho ana ma luna ona,
Me nā holoholona o ke kula, a me nā manu o ka lewa;
ʻO ia, e lawe ʻia aku hoʻi nā iʻa o ke kai.
4¶ Akā, mai hakakā kekahi kanaka, ʻaʻole hoʻi e pāpā aku iā haʻi;
No ka mea, ʻo kou poʻe kānaka, ua like lākou me ka poʻe e hakakā ana me ke kahuna.
5No laila e hina ʻoe i ke ao,
ʻO ke kāula hoʻi, e hina pū ia me ʻoe i ka pō;
A e luku aku au i kou makuahine.
6Ua luku ʻia koʻu poʻe kānaka no ka ʻike ʻole;
No ka mea, ua hoʻowahāwahā ʻoe i ka ʻike,
E hoʻowahāwahā aku hoʻi au iā ʻoe,
ʻAʻole ʻoe e mālama i ka ʻoihana kahuna naʻu:
A no kou hoʻopoina ʻana i ke kānāwai o kou Akua,
ʻO wau hoʻi kekahi e hoʻopoina i kāu poʻe keiki.
7¶ E like me ko lākou nui ʻana, pēlā lākou i hana hewa mai ai iaʻu;
A e hoʻololi au i ko lākou nani i mea hilahila.
8Ua ʻai lākou i ka hewa o kuʻu poʻe kānaka,
A ua kau i ko lākou mau naʻau ma ko lākou lā hala.
9A e like auaneʻi me nā kānaka, pēlā nō me ke kahuna;
A e hoʻopaʻi aku au iā lākou e like me ko lākou mau ʻaoʻao,
A e hoʻouku aku au iā lākou e like me kā lākou hana ʻana.
10A e ʻai lākou, ʻaʻole naʻe e māʻona,
A e moekolohe lākou, ʻaʻole naʻe e māhuahua aʻe;
No ka mea, ua hoʻōki lākou i ka mālama iā Iēhova.
11¶ ʻO ka moekolohe, ʻo ka waina, a me ka waina hou, ʻo ia ke lawe aku i ka naʻau.
12Ke nīnau nei kuʻu poʻe kānaka i ko lākou kiʻi lāʻau,
A ua hōʻike mai ko lākou koʻokoʻo iā lākou;
No ka mea, ua hoʻoʻauana ka naʻau moekolohe iā lākou;
Ua hele moekolohe lākou mai lalo aʻe o ko lākou Akua.
13Kaumaha akula lākou ma kahi kiʻekiʻe o nā mauna,
A kuni i ka mea ʻala ma luna o nā puʻu,
Ma lalo o ka lāʻau ʻoka, a me ka lāʻau popela, a me ka lāʻau kaʻa;
No ka mea, ua ʻoluʻolu kona malumalu;
No ia mea, e moekolohe kā ʻoukou poʻe kaikamāhine,
A e moekolohe kā ʻoukou poʻe hūnōna wahine.
14ʻAʻole au e hoʻopaʻi aku i kā ʻoukou poʻe kaikamāhine no ko lākou moekolohe ʻana,
A i kā ʻoukou poʻe hūnōna wahine no ko lākou moekolohe ʻana;
No ka mea, ua hoʻokaʻawale pū lākou iā lākou iho me nā wāhine hoʻokamakama,
A ua mōhai pū lākou me nā wāhine moekolohe;
A ʻo ka poʻe kānaka ʻike ʻole, e make nō lākou.
15¶ Inā ʻo ʻoe, e kā ʻIseraʻela, i moekolohe,
Mai hana hewa ʻo kā Iuda;
A mai hele ʻoukou i Gilegala,
Mai piʻi aʻe ʻoukou i Beta ʻAvena,
Mai hoʻohiki, “E ola ʻo Iēhova!”
16No ka mea, ua paʻakikī ʻo kā ʻIseraʻela,
E like me ka paʻakikī o ka bipi wahine hou;
ʻĀnō e hānai ʻo Iēhova iā lākou,
E like me ke keiki hipa ma kahi ākea.
17Ua hui pū ʻo ʻEperaima me nā kiʻi,
E waiho aku iā ia.
18Ua hewa kā lākou ʻaha inu,
Ua mau ko lākou moekolohe ʻana;
A ake kona poʻe aliʻi i ka hilahila.
19Ua hoʻopaʻa ka makani iā ia i loko o kona mau ʻēheu,
A e hilahila auaneʻi lākou i kā lākou mau mōhai.
Currently Selected:
HOSEA 4: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.