ʻO KA ʻEPISETOLE A PAULO KA LUNAʻŌLELO I KO GALATIA 1
1
MOKUNA I.
1 Ua aʻo maila ʻo Paulo i ko Galatia i ko lākou haʻalele ʻana i ka ʻoiaʻiʻo o ka ʻeuanelio.
1¶ ʻO Paulo, he lunaʻōlelo, ʻaʻole na kānaka mai, ʻaʻole hoʻi ma ke kanaka; akā, ma o Iesū Kristo lā, a na ke Akua ka Makua nāna ia i hoʻāla aʻe mai ka make mai;
2ʻo ka poʻe hoahānau nō hoʻi me aʻu, na nā ʻekalesia o Galatia:
3E aloha iā ʻoukou, e maluhia hoʻi i ke Akua ka Makua, a i ko kākou Haku iā Iesū Kristo,
4nāna i hāʻawi mai iā ia iho no ko kākou hala, i hoʻopakele aʻe ʻo ia iā kākou i kēia ao ʻino nei, e like me ka makemake o ke Akua, ko kākou Makua;
5ʻo ia ka hoʻonani mau loa ʻia aku. ʻĀmene.
6¶ Ua kāhāhā iho nō wau i ka ʻemo ʻole o ko ʻoukou haʻalele ʻana mai i ka mea i kono aku iā ʻoukou i loko o ka ʻeuanelio a Kristo, a lilo i ka ʻeuanelio ʻokoʻa;
7ʻaʻole hoʻi he ʻeuanelio ʻokoʻa ia; akā, ke hoʻohihia nei kekahi poʻe iā ʻoukou, me ka manaʻo e hoʻokahuli i ka ʻeuanelio a Kristo.
8Inā paha ʻo mākou, a he ʻānela paha mai ka lani mai, e haʻi aku i ka ʻeuanelio i kūʻē i kā mākou i haʻi aku ai iā ʻoukou, e hoʻomāinoino ʻia ʻo ia!
9Me kā mākou i ʻōlelo ai ma mua, pēlā hoʻi au e ʻōlelo hou aku nei, a i haʻi aku kekahi iā ʻoukou i ka ʻōlelo kūʻē i ka mea a ʻoukou i loaʻa ai, e hoʻomāinoino ʻia ʻo ia!
10Ke hoʻolauleʻa nei anei au i kānaka, a i ke Akua anei? Ke ʻimi nei anei hoʻi au e hoʻoleʻaleʻa i kānaka? No ka mea, a i hoʻoleʻaleʻa aku au i kānaka, ʻaʻole au he kauā na Kristo.
11¶ Ke hōʻike aku nei au iā ʻoukou, e nā hoahānau, ʻo ka ʻeuanelio aʻu i haʻi aku ai, ʻaʻole ia ma kā ke kanaka.
12No ka mea, ʻaʻole i loaʻa iaʻu ia na ke kanaka mai, ʻaʻole hoʻi au i aʻo ʻia mai; akā, ma ka hōʻike ʻia mai nō e Iesū Kristo.
13Ua lohe ʻoukou i kuʻu noho ʻana ma mua ma ko kā Iudaio manaʻo, he nui loa kuʻu hoʻomaʻau ʻana aku i ka ʻekalesia o ke Akua, me ka luku aku.
14Ua ʻoi aku au ma ko kā Iudaio manaʻo, ma mua o ka nui o ka poʻe hoa hanauna oʻu, a he nui loa koʻu ikaika ma nā moʻoʻōlelo a oʻu mau kūpuna.
15I ka manawa i manaʻo ai ke Akua nāna au i hoʻokaʻawale aʻe mai ka ʻōpū mai o koʻu makuahine, a koho maila iaʻu ma kona lokomaikaʻi,
16e hōʻike mai i kāna Keiki iaʻu, i haʻi aku ai au iā ia i nā kānaka ʻē; wikiwiki ihola au, ʻaʻole au i kūkā me ka mea ʻiʻo a me ka mea koko;
17ʻaʻole hoʻi au i piʻi aku i Ierusalema, i ka poʻe lunaʻōlelo ma mua oʻu; akā, hele akula au i ʻArabia, a hoʻi hou maila i Damaseko.
18¶ A hala nā makahiki ʻekolu, piʻi akula au i Ierusalema e ʻike iā Petero, a noho pū ihola au me ia i nā lā he ʻumikumamālima.
19ʻO Iakobo hoʻi ka hoahānau o ka Haku kaʻu i ʻike, ʻaʻole ka lunaʻōlelo ʻē aʻe.
20Aia hoʻi, i mua o ke Akua, ʻaʻole oʻu hoʻopunipuni i nā mea aʻu e palapala aku nei iā ʻoukou.
21Ma ia hope mai, hele akula au i nā moku o Suria a me Kilikia.
22A ua ʻike maka ʻole ʻia au e nā ʻekalesia o Kristo ma Iudea.
23He lohe wale nō ko lākou, ʻO ka mea nāna kākou i hoʻomaʻau mai ma mua, i nēia manawa ke haʻi akula ia i ka manaʻo ʻoiaʻiʻo āna i hōʻino ai ma mua.
24A hoʻonani akula lākou i ke Akua noʻu.
Currently Selected:
ʻO KA ʻEPISETOLE A PAULO KA LUNAʻŌLELO I KO GALATIA 1: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
