ʻAMOSA 1
1
MOKUNA I.
1 No ke kāula, a no ka manawa i wānana ai ʻo ia. 3 No ka hoʻopaʻi ʻana a ke Akua i ko Suria, 6 i ko Pilisetia, 9 i ko Turo, 11 i ko ʻEdoma; 13 a me kā ʻAmona.
1¶ ʻO nā ʻōlelo a ʻAmosa, ka mea i waena o nā kahu bipi o Tekoa, nā mea āna i ʻike ai no kā ʻIseraʻela, i nā lā o ʻUzia, ke aliʻi o kā Iuda, a i nā lā o Ieroboama, ke keiki a Ioasa, ke aliʻi o kā ʻIseraʻela, ʻelua makahiki ma mua o ke ōlaʻi.
2A ʻī akula ia,
“E uō mai ʻo Iēhova mai Ziona mai,
A e hoʻopuka mai i kona leo mai Ierusalema mai;
E uē nō nā wahi noho o nā kahu hipa,
A e maloʻo ka piko o Karemela.”
3¶ Penei kā Iēhova i ʻōlelo ai,
“No nā hala ʻekolu o Damaseko, a me ka hā, ʻaʻole au e hoʻololi aʻe i kona hoʻopaʻi ʻia;
No ka mea, ua hehi lākou i ko Gileada me ka mea hao e hehi palaoa ai.
4“A e hoʻouna aku ai i ke ahi i loko o ka hale o Hazaʻela,
Ka mea e hoʻopau ai i nā hale aliʻi o Bene-Hadada.
5“A e haki nō iaʻu ke kaola o Damaseko,
A e hōʻoki aku au i nā kānaka mai ke awāwa ʻo ʻAvena aku,
A me ka mea e hoʻopaʻa ana i ke koʻokoʻo aliʻi, mai ka hale o ʻEdena aku;
A e hele pio akula nā kānaka o Suria i Kira,” wahi a Iēhova.
6¶ Ke ʻōlelo mai nei ʻo Iēhova, penei,
“No nā hala ʻekolu o Gaza, a me ka hā, ʻaʻole au e hoʻololi aʻe i kona hoʻopaʻi ʻia;
No ko lākou lawe pio ʻana i ka poʻe pio a pau,
A hāʻawi aku iā lākou i kā ʻEdoma.
7“Akā, e hoʻolei aku au i ke ahi ma loko o ka pā pōhaku o Gaza,
A e hoʻopau aku ia i kona mau hale aliʻi;
8“A e hōʻoki aku au i kānaka mai ʻAsedoda aku,
A me ka mea e hoʻopaʻa ana i ka hōʻailona mōʻī mai ʻAsekelona aku;
A e hoʻokūʻē aku au i kuʻu lima i ʻEkerona;
A e make ke koena o ko Pilisetia,” wahi a Iēhova ka Haku.
9¶ Ke ʻōlelo mai nei ʻo Iēhova, pēnēia:
“No nā hala ʻekolu, o Turo, a me ka hā, ʻaʻole au e hoʻololi aʻe i kona hoʻopaʻi ʻia;
No ka mea, ua hoʻolilo lākou i ka poʻe pio a pau i ko ʻEdoma,
ʻAʻole hoʻi i hoʻomanaʻo i ka berita o nā hoahānau.
10“Akā, e hoʻolei aku au i ke ahi i loko o ka pā pōhaku o Turo,
Ka mea e hoʻopau ai i kona mau hale aliʻi.”
11¶ Ke ʻōlelo mai nei ʻo Iēhova, penei:
“No nā hala ʻekolu o kā ʻEdoma, a me ka hā, ʻaʻole au e hoʻololi aʻe i kona hoʻopaʻi ʻia:
No ka mea, ua hahai aku ia i kona hoahānau me ka pahi kaua,
A ua haʻalele aku i kona aloha,
A ua haehae mau loa kona inaina,
A ua hoʻomau loa ia i kona huhū.
12“A e hoʻolei aku au i ke ahi i loko o Temana,
A e hoʻopau aku ia i nā hale aliʻi o Bozera.”
13¶ Ke ʻōlelo mai nei ʻo Iēhova, penei:
“No nā hala ʻekolu o nā mamo a ʻAmona, a me ka hā, ʻaʻole au e hoʻololi aʻe i kona hoʻopaʻi ʻia;
No ka mea, ua kaha aku lākou i nā wāhine hāpai o Gileada,
I hoʻopālahalaha aku ai lākou i ko lākou palena.
14“Akā, e hoʻā aku au i ke ahi i loko o ka pā pōhaku o Raba,
A e hoʻopau aku ia i nā hale aliʻi ona,
Me ka hoʻōho i ka lā o ke kaua,
Me ka ʻino i ka lā o ka puahiohio.
15“A e hele aku nō ko lākou aliʻi i loko o ke pio,
ʻO ia a me kāna mau kaukaualiʻi kekahi,” wahi a Iēhova.
Currently Selected:
ʻAMOSA 1: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
