KA BUKE ʻALUA A SAMUʻELA 3
3
MOKUNA III.
1 Ko Dāvida ikaika i ke kaua ʻana. Ua huhū ʻo ʻAbenera iā ʻIse-Boseta, a ua huli aʻe i o Dāvida lā. 22 Ka pepehi ʻana o Ioaba iā ʻAbenera, a kanikau akula ʻo Dāvida iā ia.
1¶ He kaua loa nō i waena o ka ʻohana a Saula a me ka ʻohana a Dāvida; akā, māhuahua aʻela ko Dāvida ikaika, a emi ihola ka ʻohana a Saula a nāwaliwali.
2¶ Ua hānau nā keiki kāne na Dāvida ma Heberona: ʻo ʻAmenona kāna hānau mua na ʻAhinoama no Iezereʻela;
3a ʻo kāna lua: ʻo Kileaba na ʻAbigaila ka wahine a Nabala no Karemela; a ʻo ke kolu: ʻo ʻAbesaloma ke keiki kāne a Maʻaka a ke kaikamahine a Talemai ke aliʻi o Gesura;
4a ʻo ka hā: ʻo ʻAdoniia ke keiki kāne a Hagita; a ʻo ka lima: ʻo Sepatia ke keiki kāne a ʻAbitala;
5a ʻo ke ono: ʻo ʻItereama na ʻEgela ka wahine a Dāvida. Ua hānau kēia poʻe na Dāvida ma Heberona.
6¶ A i ka wā kaua i waena o ka ʻohana a Saula a me ka ʻohana a Dāvida, hoʻoikaika loa ihola ʻo ʻAbenera no ka ʻohana a Saula.
7Aia kekahi haiā wahine a Saula, ʻo Rizepa kona inoa, kekahi kaikamahine a ʻAia. ʻĪ akula ʻo ʻIse-Boseta iā ʻAbenera, “No ke aha lā ʻoe i komo aku ai i loko i ka haiā wahine a kuʻu makua kāne?”
8A laila, huhū loa ʻo ʻAbenera i nā hua ʻōlelo a ʻIse-Boseta, ʻī akula, “He poʻo ʻīlio nō anei au nāna i lokomaikaʻi aku i ka ʻohana a Saula a kou makua kāne, i kona poʻe hoahānau, a me kona poʻe makamaka, ma ke kūʻēʻē ʻana i kā Iuda i kēia manawa, ʻaʻole hoʻi au i hāʻawi aku iā ʻoe ma loko o ka lima o Dāvida, i hoʻāhewa mai ai ʻoe iaʻu i nēia lā no ua wahine nei?
9“Pēlā ke Akua e hana mai ai iā ʻAbenera a nui aku, ke hana ʻole aku au iā Dāvida e like me kā Iēhova i hoʻohiki aku ai iā ia;
10e lawe i ke aupuni mai ka ʻohana a Saula aku, a e kūkulu i ka noho aliʻi o Dāvida ma luna o kā ʻIseraʻela a ʻo kā Iuda, mai Dana a hiki i Beʻereseba.”
11ʻAʻole nō i hiki iā ia ke pane ʻōlelo hou aku iā ʻAbenera; no ka mea, ua makaʻu kēlā iā ia.
12¶ A hoʻouna maila ʻo ʻAbenera i nā ʻelele i o Dāvida lā, ʻī maila, “No wai anei ka ʻāina?” Wahi āna, “E hoʻokuʻikahi kāua, eia hoʻi me ʻoe nō kuʻu lima, e hoʻohuli aku ai i kā ʻIseraʻela a pau i ou lā.”
13ʻĪ akula kēlā, “Pono; e hoʻokuʻikahi nō kāua; hoʻokahi hoʻi aʻu mea e kauoha aku nei iā ʻoe, wahi āna, ‘ʻAʻole ʻoe e ʻike mai i kuʻu maka, ke lawe ʻole mai ʻoe ma mua iā Mikala ke kaikamahine a Saula, i kou hele ʻana mai e ʻike i kuʻu maka.’”
14Hoʻouna akula ʻo Dāvida i nā ʻelele i o ʻIse-Boseta lā ke keiki a Saula, ʻī akula, “E hāʻawi mai ʻoe i kaʻu wahine iā Mikala, aʻu i kūʻai ai naʻu i nā ʻōmaka o nā Pilisetia he haneri.”
15Hoʻouna akula ʻo ʻIse-Boseta, a lawe aʻela iā ia mai ke kāne aku ʻo Paletiʻela ke keiki a Laisa.
16Hele pū maila kāna kāne me ia e uē ana ma hope iho ona, a hiki i Bahurima. A laila, ʻī aku ʻo ʻAbenera iā ia, “Ō hoʻi!” A hoʻi akula ia.
17¶ Kamaʻilio akula ʻo ʻAbenera me nā lunakahiko o kā ʻIseraʻela, ʻī akula, “Ua ʻimi aku ʻoukou iā Dāvida i nā manawa ma mua i aliʻi ma luna o ʻoukou.
18“Eia nō ka manawa; no ka mea, ua ʻōlelo mai ʻo Iēhova no Dāvida, i ka ʻī ʻana mai, ‘Ma ka lima o kaʻu kauā ʻo Dāvida e hoʻōla au i koʻu poʻe kānaka i kā ʻIseraʻela, mai loko mai o ka lima o ka poʻe Pilisetia, a mai loko mai hoʻi o ka lima o ko lākou poʻe ʻenemi a pau.’”
19ʻŌlelo akula hoʻi ʻo ʻAbenera ma loko o nā pepeiao o kā Beniamina; hele akula hoʻi ʻo ʻAbenera e haʻi aku ma loko o nā pepeiao o Dāvida ma Heberona i nā mea a pau a kā ʻIseraʻela i makemake ai, a me nā mea a pau i makemake ai kā Beniamina.
20¶ A hiki akula ʻo ʻAbenera i Heberona i o Dāvida lā, ʻo ia me nā kānaka he iwakālua. Hana ihola ʻo Dāvida i ʻahaʻaina na ʻAbenera a na ka poʻe kānaka me ia.
21ʻĪ akula ʻo ʻAbenera iā Dāvida, “E kū aʻe au a hele aku e hōʻuluʻulu i kā ʻIseraʻela a pau i kuʻu haku i ke aliʻi, i hana lākou i berita me ʻoe, i noho aliʻi hoʻi ʻoe ma luna o nā mea a pau a kou naʻau e makemake nei.” Hoʻihoʻi akula ʻo Dāvida iā ʻAbenera, a hele akula ia me ka maluhia.
22¶ Aia hoʻi, hele maila nā kānaka o Dāvida me Ioaba mai ke kaua mai, a lawe pū maila me lākou i ka waiwai pio he nui; ʻaʻole hoʻi ʻo ʻAbenera me Dāvida i Heberona; no ka mea, ua hoʻihoʻi kēlā iā ia, a ua hele aku ia me ka maluhia.
23A hiki maila ʻo Ioaba a me ka poʻe kaua a pau pū me ia, haʻi maila lākou iā Ioaba, i ka ʻī ʻana mai, “I hele mai nei ʻo ʻAbenera ke keiki a Nera i ke aliʻi, a ua hoʻihoʻi aku kēlā iā ia, a ua hala aku ia me ka maluhia.”
24A laila, hele akula ʻo Ioaba i ke aliʻi, ʻī akula, “He aha kāu i hana ai? Aia hoʻi, ua hele mai nei ʻo ʻAbenera; he aha hoʻi kāu i hoʻihoʻi aku ai iā ia, a ua hala loa kēlā?
25“Ua ʻike ʻoe iā ʻAbenera ke keiki a Nera, i hele mai nei ia e hoʻopunipuni iā ʻoe, a e ʻike i kou hele ʻana aku a me kou hoʻi ʻana mai, a e ʻike hoʻi i nā mea a pau āu e hana nei.”
26¶ A hoʻi mai ʻo Ioaba i waho, mai o Dāvida mai, kēnā akula ia i nā kānaka e kiʻi iā ʻAbenera, na lākou ia i hoʻihoʻi mai, mai ka pūnāwai mai ʻo Sira; ʻaʻole hoʻi i ʻike ʻo Dāvida.
27A hoʻi hou maila ʻo ʻAbenera i Heberona, kono akula ʻo Ioaba iā ia i waena o ka ʻīpuka e ʻōlelo mālie aku iā ia, i laila kēlā i hou aku ai iā ia ma lalo iho o ka lima o ka iwi ʻaoʻao, a make ihola ia, no ke koko o ʻAsahela ʻo kona kaikaina.
28Ma hope iho, a lohe aʻela ʻo Dāvida, ʻī akula ia, “I mua o Iēhova ua hala ʻole mau loa au a me kuʻu aupuni i ke koko o ʻAbenera ke keiki a Nera.
29“E kau aku nō ia ma luna o ke poʻo o Ioaba, ma luna hoʻi o ka ʻohana a pau o kona makua kāne; ʻaʻole hoʻi e nele kekahi o ka ʻohana a Ioaba i ka maʻi pūhā, a i ka lēpera paha, a i ke kani koʻokoʻo paha, a i ka hāʻule paha ma luna o ka pahi kaua, a i ka ʻai ʻole paha.”
30Pēlā ʻo Ioaba me ʻAbisai kona kaikaina i pepehi ai iā ʻAbenera; no ka mea, ua pepehi iho ʻo ia i ko lāua kaikaina iā ʻAsahela i ke kaua ʻana ma Gibeona.
31¶ ʻŌlelo akula ʻo Dāvida iā Ioaba a me ka poʻe a pau me ia, “E haehae iho i ko ʻoukou kapa, a e kāʻei ʻoukou i ke kapa ʻinoʻino, a e kanikau i mua o ʻAbenera. A ʻo ke aliʻi ʻo Dāvida i hele ma hope o ka mānele.
32Kanu ihola lākou iā ʻAbenera ma Heberona; hoʻokiʻekiʻe aʻela ke aliʻi i kona leo i luna ma ka hale kupapaʻu o ʻAbenera, a uē ihola nā kānaka a pau.
33Kanikau ihola ke aliʻi ma luna o ʻAbenera, ʻī akula:
“Ua make nō anei ʻo ʻAbenera e like me ka make o ka naʻaupō?
34“ʻAʻole i nākiʻikiʻi ʻia kou mau lima, ʻaʻole hoʻi i paʻa nā wāwae i ka hao;
me ka hāʻule ʻana o kekahi i mua o nā kānaka hewa, pēlā nō ʻoe i hāʻule iho ai.”
Uē hou ihola nā kānaka a pau ma luna ona.
35A hele mai nā kānaka a pau e koi aku iā Dāvida e ʻai i ka ʻai ʻoiai ka lā; hoʻohiki akula Dāvida, ʻī akula, “Pēlā ke Akua e hana mai ai iaʻu a nui aku, ke hoʻāʻo iho au i ka berena a i kekahi mea ʻē aʻe, a napoʻo ka lā!”
36Nānā akula nā kānaka a pau, a ua ʻoluʻolu lākou ia mea; no ka mea, ma nā mea a pau a ke aliʻi i hana ai, ua ʻoluʻolu nā kānaka a pau i laila.
37No ka mea, ua ʻike nā kānaka a pau, a me kā ʻIseraʻela a pau ia lā, ʻaʻole no ke aliʻi ka pepehi iā ʻAbenera ke keiki a Nera.
38ʻŌlelo akula ke aliʻi i kāna poʻe kauā, ʻAʻole anei ʻoukou i ʻike, he kanaka nui i hāʻule i nēia lā i waena o kā ʻIseraʻela.
39“ʻĀnō hoʻi, ua nāwaliwali au i poni ʻia i aliʻi; a ʻo kēia mau kānaka nā keiki a Zeruia, ua ʻoi aku ko lāua koʻikoʻi i koʻu; e hoʻouku mai nō naʻe ʻo Iēhova i ka mea hana ʻino e like me kona hewa.”
Ka Baibala Hemolele © Partners Development Foundation, 2018.