ʻO KA ʻEPISETOLE LUA A PAULO KA LUNAʻŌLELO I KO KORINETO 6
6
MOKUNA VI.
1 Hōʻike aku ʻo Paulo mā i ko lākou pono ma ke aloha; e noho kaʻawale ka poʻe haipule.
1¶ A ʻo mākou nā hoa hana, ke noi aku nei hoʻi mākou, mai lawe makehewa ʻoukou i ka lokomaikaʻi o ke Akua.
2(No ka mea, ke ʻī maila ʻo ia,
“«Ua hoʻolohe akula au iā ʻoe i ka manawa i maliu ʻia ai,
A ua kōkua akula au iā ʻoe i ka lā e ola ai».
Aia hoʻi, ʻānō «ka manawa e maliu ʻia mai ai»;
Aia hoʻi, ʻānō «ka lā e ola ai».”)
3ʻAʻole nō mākou e hoʻohihia aku i kekahi, o ʻōlelo ʻino ʻia mai ka ʻoihana kahuna.
4Akā, ma nā mea a pau e hōʻike ana iā mākou iho i poʻe kāhuna no ke Akua, ma ka hoʻomanawanui, ma ka hōʻino ʻia mai, ma ka pōʻino, ma ka pilikia,
5ma ka hahau ʻia, ma ka paʻa ʻana i nā hale paʻahao, ma ka haunaele, ma ka hoʻoluhi ʻana, ma ke kiaʻi ʻana, ma ka hoʻopōloli ʻana,
6ma ka maʻemaʻe, ma ka ʻike, ma ke ahonui, ma ka lokomaikaʻi, ma ka ʻUhane Hemolele, ma ke aloha hoʻokamani ʻole,
7ma ka ʻōlelo ʻoiaʻiʻo, ma ka mana o ke Akua, ma ke kāhiko o ka pono ma ka ʻākau a me ka hema,
8ma ka mahalo ʻia mai a me ka mahalo ʻole ʻia mai, ma ka ʻōlelo ʻino ʻia mai, a me ka ʻōlelo maikaʻi ʻia mai; e like me nā mea hoʻopunipuni; akā, he ʻoiaʻiʻo naʻe;
9like me nā mea ʻike ʻole ʻia, a ua kaulana naʻe; like me ka poʻe e make ana, aia hoʻi, ke ola nei mākou; like me nā mea i hahau ʻia, ʻaʻole naʻe i make;
10like me nā mea kaumaha; akā, e ʻoliʻoli mau ana; like me nā mea ʻilihune, a ua waiwai naʻe nā mea he nui iā mākou; like me nā mea nele loa, a ua loaʻa nō naʻe nā mea a pau.
11¶ E ko Korineto, ua hāmama aʻe nei ko mākou waha iā ʻoukou, ua hoʻoākea ʻia ko mākou naʻau.
12ʻAʻole o ʻoukou pilikia i loko o mākou; akā, ua pilikia ʻoukou i loko o ko ʻoukou naʻau iho.
13I hoʻouku ʻia mai au ma ka mea like, (ke ʻōlelo aku nei au iā ʻoukou me he mau keiki lā,) e hoʻoākea ʻia hoʻi ʻoukou.
14¶ Mai hoʻopili ʻano ʻē ʻia ʻoukou me nā hoʻomaloka; no ka mea, he aha ke kuʻikahi ʻana o ka pono me ka hewa? Pehea lā hoʻi e kohu like ai ka mālamalama me ka pouli?
15He aha hoʻi ka manaʻo hoʻokahi ʻana o Kristo me Beliala? He aha hoʻi ke kuleana o ka mea manaʻoʻiʻo me ka mea hoʻomaloka?
16Pehea hoʻi e kū like ai ka luakini o ke Akua me ko nā kiʻi? No ka mea, ʻo ʻoukou ka luakini o ke Akua ola; e like me kā ke Akua i ʻōlelo mai ai,
“«E noho pū auaneʻi au me lākou, a e hele pū hoʻi;
ʻO wau auaneʻi ko lākou Akua, a ʻo lākou hoʻi auaneʻi koʻu poʻe kānaka».”
17No laila, ke ʻī maila ka Haku, “«E puka mai ʻoukou mai waena mai o lākou, i kaʻawale ʻoukou;
Mai hoʻopā aku hoʻi i ka mea haumia», a e hoʻokipa mai au iā ʻoukou.
18“A e lilo nō au i Makua no ʻoukou,
A e lilo mai hoʻi ʻoukou i poʻe keiki kāne a i poʻe kaikamāhine naʻu,”
Wahi a ka Haku Mana.
Currently Selected:
ʻO KA ʻEPISETOLE LUA A PAULO KA LUNAʻŌLELO I KO KORINETO 6: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
