ʻO KA ʻEPISETOLE MUA A PAULO KA LUNAʻŌLELO I KO KORINETO 15
15
MOKUNA XV.
1 No ke ala hou ʻana o Kristo a me nā kānaka a pau loa.
1¶ Ke haʻi hou aku nei au iā ʻoukou, e nā hoahānau, i ka ʻeuanelio aʻu i aʻo aku ai iā ʻoukou ma mua, i ka mea a ʻoukou i mālama mai ai, a ma laila nō hoʻi ʻoukou e kū nei.
2ʻO ia hoʻi ko ʻoukou mea e ola ai, ke manaʻo mau ʻoukou i nā mea aʻu i haʻi aku ai iā ʻoukou, ke ʻole hoʻi i makehewa ko ʻoukou manaʻoʻiʻo.
3No ka mea, hāʻawi mua aku au iā ʻoukou i ka mea aʻu i loaʻa mai, i ka make ʻana o Kristo no ko kākou hewa, e like me kā ka Palapala Hemolele;
4a kanu ʻia ʻo ia, a i ka pō ʻekolu, ala hou mai ʻo ia, e like me kā ka Palapala Hemolele;
5a ʻike ʻia ʻo ia e Kepa, a laila, e ka poʻe ʻumikumamālua.
6A ma hope iho, ʻike ʻia ʻo ia e nā hoahānau ʻelima haneri a keu, i ka wā hoʻokahi. A ke ola lā nō ka nui o lākou i kēia manawa, a ʻo kekahi poʻe, ua moe.
7A ma hope iho, ʻike ʻia ʻo ia e Iakobo, a laila e ka poʻe lunaʻōlelo a pau.
8ʻO wau nō kai ʻike hope loa aku iā ia, me he keiki hānau hapa lā.
9No ka mea, wau nō ka mea liʻiliʻi loa o ka poʻe lunaʻōlelo. ʻAʻole hoʻi e pono ke kapa ʻia mai au, he lunaʻōlelo; no ka mea, ua hoʻomāinoino aku au i ka ʻekalesia o ke Akua.
10Akā, ua lilo wau i koʻu mea i lilo ai, ma ka lokomaikaʻi wale o ke Akua; ʻaʻole hoʻi i makehewa kona lokomaikaʻi mai ma luna oʻu; no ka mea, ua pākela aku koʻu hoʻoikaika ʻana ma mua o lākou a pau. ʻAʻole hoʻi wau, ʻo ka lokomaikaʻi nō o ke Akua i loko oʻu.
11A inā ʻo wau paha, ʻo lākou paha, pēlā nō mākou e aʻo aku nei, a pēlā nō hoʻi ʻoukou i manaʻoʻiʻo mai ai.
12¶ A inā i haʻi ʻia ʻo Kristo, i hoʻāla ʻia ʻo ia, mai ka make mai, pehea lā e ʻōlelo nei kekahi poʻe o ʻoukou, ʻAʻohe ala ʻana, mai ka make mai?
13Inā ʻaʻohe ala ʻana, mai ka make mai, inā ʻaʻole i ala ʻo Kristo;
14a inā ʻaʻole i ala ʻo Kristo, inā ua makehewa kā mākou aʻo ʻana aku, a ua makehewa hoʻi kā ʻoukou manaʻoʻiʻo ʻana mai.
15A inā ua loaʻa hoʻi mākou, he poʻe hōʻike wahaheʻe i ke Akua; no ka mea, ua hōʻike mākou ma o ke Akua lā, i kona hoʻāla ʻana mai iā Kristo; ʻaʻole hoʻi ia i hoʻāla mai iā ia, ke ala ʻole ka poʻe make.
16No ka mea, inā ʻaʻole ala ka poʻe make, inā ʻaʻole i hoʻāla ʻia ʻo Kristo.
17A inā ʻaʻole i hoʻāla ʻia ʻo Kristo, ua makehewa ko ʻoukou manaʻoʻiʻo ʻana; a ke noho nei nō hoʻi ʻoukou i loko o ko ʻoukou hewa.
18A laila, ua make ka poʻe i moe i loko o Kristo.
19Inā ma kēia ola ʻana wale nō ka lana ʻana o ko kākou manaʻo i loko o Kristo, ua ʻoi aku kā kākou pōʻino i ko nā kānaka a pau.
20¶ Akā, ua ala ʻiʻo nō ʻo Kristo, mai ka make mai, a ua lilo ʻo ia i hua mua o ka poʻe i moe.
21No ka mea, mai ke kanaka mai ka make, a pēlā nō, mai ke kanaka mai ke ala hou ʻana, mai ka make mai.
22E like me ka make ʻana o nā kānaka a pau ma o ʻAdamu lā, pēlā nō e hoʻōla ʻia mai ai nā kānaka a pau ma o Kristo lā.
23ʻO kēlā mea kēia mea, ma kona wā pono; ʻo Kristo ka hua mua; a laila, ʻo ko Kristo poʻe, i kona wā e hiki mai ai.
24ʻO ia hoʻi ka hope, i ka wā e hoʻihoʻi ia i ke aupuni i ke Akua, i ka Makua; i kona wā e hoʻopau ai i nā ʻoihana aliʻi, a me ka ikaika, a me ka mana.
25No ka mea, iā ia nō ke aupuni, a hiki i ka wā e waiho ai ia i nā ʻenemi a pau ma lalo iho o kona mau wāwae.
26A ʻo ka ʻenemi hope loa, ʻo ka make, e hoʻopau ʻia nō ia.
27No ka mea, «ua waiho nō ia i nā mea a pau ma lalo iho o kona mau wāwae». A i kāna ʻōlelo ʻana, “Ua pau nā mea i ka waiho ʻia ma lalo iho ona,” ua maopopo nō he ʻokoʻa ka Mea nāna i waiho mai nā mea a pau ma lalo iho ona.
28A i ka wā e lilo ai nā mea a pau ma lalo iho ona, a laila, ʻo ke Keiki hoʻi kekahi, e mālama aku nō ia i ka Mea, nāna i hoʻolilo mai nā mea a pau ma lalo iho ona, i mau loa ka maopopo ʻana, ʻo ke Akua wale nō.
29¶ A i ʻole loa e ala mai ka poʻe make, pehea lā e hana ai ka poʻe i bapetizo ʻia ai no ka poʻe make? No ke aha lā i bapetizo ʻia ai lākou no ka poʻe make?
30A no ke aha lā mākou e ʻaneʻane pōpilikia, i kēlā hora i kēia hora?
31He ʻoiaʻiʻo, ma kuʻu ʻoliʻoli ʻana no ʻoukou i loko o Kristo Iesū, ko kākou Haku, ua make au i kēlā lā i kēia lā.
32He aha koʻu pono e loaʻa mai, i koʻu hakakā ʻana ma ko ke kanaka, me nā ʻīlio hae ma ʻEpeso, ke ala ʻole mai ka poʻe make? «E ʻai kākou, a e inu; no ka mea, ʻapōpō e make ana kākou».
33E ao o hoʻopunipuni ʻia ʻoukou; “ʻO ka launa aku i ka hewa, ka mea e ʻino ai ka noho pono ʻana.”
34E ala ʻoukou i ka pono, mai hana hewa; no ka mea, ua naʻaupō kekahi poʻe i kā ke Akua. Ke ʻōlelo aku nei au i kēia, i mea e hilahila ai ʻoukou.
35¶ E nīnau mai auaneʻi kekahi, “Pehea lā e hoʻāla ʻia mai ai ka poʻe make? E hele mai lākou me ke kino hea?”
36Kē, he lapuwale; ʻaʻole e hoʻūlu ʻia ka mua āu e lūlū nei, ke make ʻole ia.
37ʻO ka mea āu e lūlū nei, ʻaʻole ʻoe i lūlū i ke kino e hiki mai ana, ʻo ka hua wale nō, ʻo ka huita paha, he mea ʻē paha.
38A na ke Akua nō e hāʻawi mai i ke kino no ia mea, e like me kona makemake iho; no kēlā hua kēia hua i kona kino iho.
39ʻO nā ʻiʻo a pau, ʻaʻole ia he ʻiʻo hoʻokahi. He ʻiʻo kanaka kahi, a he ʻiʻo holoholona kahi, a ʻo ko ka iʻa kahi, a he ʻiʻo manu kahi.
40He kino ʻano lani kahi, a he kino ʻano honua kahi; ʻokoʻa hoʻi ka nani o ke kino lani ʻokoʻa ka nani o ko ka honua.
41ʻOkoʻa ka nani o ka lā, ʻokoʻa ka nani o ka mahina, ʻokoʻa ka nani o nā hōkū; no ka mea, ua ʻoi ka nani o kekahi hōkū i kekahi hōkū.
42Pēlā nō ke ala ʻana mai o ka poʻe make. Ua kanu ʻia ʻo ia ma ka palahō, ua hoʻāla ʻia mai ʻo ia ma ka palahō ʻole.
43Ua kanu ʻia ʻo ia ma ka hōʻino ʻia, ua hoʻāla ʻia mai ʻo ia ma ka nani; ua kanu ʻia ʻo ia ma ka nāwaliwali, ua hoʻāla ʻia mai ʻo ia ma ka mana.
44Ua kanu ʻia ʻo ia, he kino maoli, ua hoʻāla ʻia mai ʻo ia, he kino ʻuhane. He kino maoli kekahi kino, a he kino ʻuhane kekahi.
45Pēlā hoʻi ka palapala ʻana mai, “ʻO ke «kanaka» mua, ʻo ʻAdamu, «ua hana ʻia ʻo ia, he kanaka ola»;” a ʻo ʻAdamu hope, he ʻuhane hoʻōla ia.
46Akā hoʻi, ʻo ka mea ma ka ʻuhane, ʻaʻole ʻo ia ka mua, ʻo ka mea nō ma ke kino; a ma hope ka mea ma ka ʻuhane.
47ʻO ke kanaka mua, no ka lepo ia, a he lepo. A ʻo ke Kanaka hope, ʻo ia ka Haku, mai ka lani mai.
48E like me ka lepo, pēlā nō ka poʻe mai ka lepo mai; e like hoʻi me ka lani, pēlā nō ka poʻe mai ka lani mai.
49A e like me ko kākou lawe ʻana i ke ʻano o ko ka lepo, pēlā nō kākou e lawe ai i ke ʻano o ko ka lani.
50¶ Ke ʻōlelo nei au i kēia, e nā hoahānau, ʻaʻole e hiki i ka ʻiʻo a me ke koko ke noho aku ma ke aupuni o ke Akua; ʻaʻole hoʻi ka palahō ma kahi palahō ʻole.
51Eia hoʻi, ke haʻi aku nei au iā ʻoukou i ka mea pohihihi. ʻAʻole kākou a pau e moe, e ʻano hou ʻia mai nō kākou,
52ma ke sekona, ma ka ʻamo ʻana nō o ka maka, i ke kani ʻana o ka pū; no ka mea, e kani ʻiʻo nō ka pū, a e hoʻāla palahō ʻole ʻia mai ka poʻe make, a e ʻano hou ʻia mai kākou a pau.
53No ka mea, e hoʻokomo kēia palahō i ka palahō ʻole, a me kēia make i ka make ʻole i pono ai.
54A i ka wā e hoʻokomo ai kēia palahō i ka palahō ʻole, a me kēia make i ka make ʻole; a laila, e kō ai ka ʻōlelo i kākau ʻia, “«Ua ale ʻia ka make» e ka lanakila.
55“«E ka make, ʻauhea kou huelo ʻawa? e ka luapō, ʻauhea kou lanakila ʻana»?”
56Eia ka huelo ʻawa o ka make, ʻo ka hewa; a eia ka mea e nui ai ka hewa, ʻo ke kānāwai.
57E hoʻomaikaʻi ʻia hoʻi ke Akua, ka Mea nāna i hāʻawi mai iā kākou ka lanakila, ma ko kākou Haku, ma o Iesū Kristo lā.
58No ia mea, e nā hoahānau, e kūpaʻa ʻoukou, me ka nāueue ʻole, me ka hoʻomau i kā ʻoukou hana nui ʻana i ka hana a ka Haku; no ka mea, ua ʻike nō ʻoukou, ʻaʻole i makehewa kā ʻoukou hana ʻana ma ka Haku.
Currently Selected:
ʻO KA ʻEPISETOLE MUA A PAULO KA LUNAʻŌLELO I KO KORINETO 15: KBH
Highlight
Copy
Compare
Share
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
