Abɛi 30
30
Agur Abɛi
1Yake bi Agur abɛi nɛ. Nɛkɛ nuu nɛɛ kɛɛ Itiel kɛ Ukal akɛ,
2“Lɛɛlɛŋ, mifaŋ kooloo; mijeee gbɔmɔ, ni mibɛ gbɔmɔ jwɛŋmɔ hu.
3Mikaseko nilee, ni asaŋ mileee Mɔ Krɔŋkrɔŋ lɛ he nɔ ko.
4Namɔ ekwɔ kɛtee ŋwɛi, ni esaa ekpeleke shi? Namɔ ebua kɔɔyɔɔ naa yɛ ekɔkɔŋ dã? Namɔ efi nu yɛ emama mli dã? Namɔ ŋɔ shikpɔŋ lɛ koji lɛ emamɔ shi? Te egbɛi hu? Ni mɛni ji ebi lɛ hu gbɛi? Bɛ ole?
5 #
Lal 12.7; 18.31 Nyɔŋmɔ wiemɔ fɛɛ wiemɔ lɛ, anɔkwale ni; Nyɔŋmɔ ji tsɛŋ kɛhã mɛi ni baa lɛ abo lɛ. 6#Lev 4.2 Kaaŋɔ nɔ ko ofata ewiemɔi lɛ ahe, kɛjeee nakai lɛ, eeekã ohiɛ, ni oootsɔ̃ amalelɔ.”
Abɛi krokomɛi hu
7Naa Nyɔŋmɔ, bo odɛ̃ŋ mibiɔ nibii enyɔ yɛ; kaakãmã mi dani migbo. 8#1 Tim 6.6-8; Mat 6.11 Hã mi kɛ kutumpɔo kɛ nablaba teŋ ajekɛ. Kaahã miye ohia lɛ, asaŋ kaahã mina nii hu. Lɛɛ mi kɛ niyenii pɛ ni ehĩa mi, 9koni mikatɔ tsɔ̃, ni mikwa bo, ni mikɛɛ akɛ, “Namɔ ji Yehowa”. Ni kaahã miye ohia, ni miyaju, ni mikɛgbe miNyɔŋmɔ lɛ gbɛi he guɔ.
10Kaaye tsulɔ ko he osheku ohã enuŋtsɔ, koni tsulɔ lɛ akabalomɔ bo, ni ebu bo fɔ.
11Mɛi komɛi yɛ ni amɛlomɔɔ amɛtsɛmɛi, ni amɛjɔɔɔ amɛnyɛmɛi hu.
12Mɛi komɛi yɛ ni amɛbuɔ amɛhe akɛ amɛ lɛ, amɛhe tse; tsɛbelɛ, amɛhe ewo muji kpɔtɔɔ.
13Mɛi komɛi yɛ ni woɔ amɛhe nɔ; lɛɛlɛŋ amɛsusuɔ akɛ gbɔmɛi wuji ji amɛ.
14Mɛi komɛi yɛ ni amɛnyanyɔji lɛ klantei ni; amɛnyanyɔji lɛ kaklai ni; ni amɛkɛtserɛɔ ohiafoi amli kɛjeɔ shikpɔŋ lɛ nɔ; amɛkɛtserɛɔ mɛi ni efi amɛ lɛ kɛjeɔ gbɔmɛi ateŋ.
15Shiti yɛ biyei enyɔ, atsɛɔ amɛ akɛ, “Hã mi, Hã mi”. Nibii etɛ̃ etɔɔɔ amɛ, ni nɔ ni ji ejwɛ tete kplokaaa amɛ.
16Nibii ejwɛ komɛi yɛ ni amɛtɔrɔko dã; nomɛi ji gbohiiaje kɛ musu ni fɔɔɔ, kɛ shikpɔŋ gbiŋ ni etɔɔɔ nu, kɛ la ni esraŋ nɔ.
17 #
Abɛi 20.20
Mɔ ni yeɔ etsɛ he fɛo ni egbeɔ enyɛ tsɔsemɔ he guɔ lɛ, kwãakwãalabitei aaafãmɔ ehiŋmɛii, ni akpaŋai aaaye eloo.
18Nibii etɛ̃ yɛ ni feɔ mi naakpɛɛ tsɔ̃, ni nɔ ni ji ejwɛ lɛ minuuu shishi; 19nomɛi ji, okropɔŋ filikimɔ yɛ ŋwɛi, kɛ onufu nyiɛmɔ yɛ tɛsaa nɔ, kɛ meele nyiɛmɔ yɛ ŋshɔ hiɛ, kɛ bɔ ni feɔ ni suɔmɔ baa nuu kɛ yoo teŋ.
20Nɛkɛ pɛ yoo ajwamãŋ yɔɔ; eyeɔ nii ni etsumɔɔ enaa, ni ekɛɔ akɛ, “Mifeko efɔŋ ko.”
21Nibii etɛ̃ hãa shikpɔŋ hosoɔ, ni nɔ ni ji ejwɛ lɛ, enyɛɛɛ mli emɔ, 22#Jaj 10.6 Nomɛi ji, nyɔŋ ni etsɔ̃ maŋtsɛ; kɛ buulu ni eye nii etɔ; 23kɛ yoo ni akpoo lɛ, ni ena wu; kɛ tsulɔyoo ni etsɔ̃ enuŋtsɔ ŋa.
24Nibii ejwɛ yɛ shikpɔŋ lɛ nɔ ni amɛdaraaa; shi amɛle nii pam. 25#Abɛi 6.6-8 Amɛ ji tsatsubii; amɛ lɛ kooloi bibii ni he waaa ni, shi kɛ̃lɛ amɛtaoɔ amɛniyenii amɛtoɔ yɛ latsaa be mli.
26Afutuɔkɔi hu kooloi ni he waaa ni, kɛ̃lɛ amɛfeɔ amɛtsui yɛ tɛsai amli. 27Baalabii hu amɛbɛ maŋtsɛ nɛ, shi kɛ̃lɛ amɛfãa yɛ amɛnɔkwɔlɛi anaa. 28Ooonyɛ okɛ onine amɔ tsunyɛ nɛ, shi kɛ̃lɛ maŋtsɛmɛi amɔjiaŋ ehiɔ.
29Nibii etɛ̃ yɛ ni amɛfamɔɔ amɛnaji abladeiaŋ; ni nɔ ni ji ejwɛ lɛ, enyiɛmɔ yɛ fɛo. 30Nomɛi ji jata, ni ji kooloi ateŋ ekãalɔ fe fɛɛ, ni etsɔ̃ɔɔ esɛɛ ehãaa mɔ ko mɔ ko 31kɛ wuɔnuu saase, kɛ too kpakpo kɛ maŋtsɛ ni nyiɛ ewebii ahiɛ abladeiaŋ. 32Kɛji ofee buuluianii, ni owo ohe nɔ, aloo ojwɛŋ jwɛŋmɔ fɔŋ lɛ, okɛ onine ato onaabu. 33Ejaakɛ kɛji osha fufɔ yɛ tɔ mli lɛ, onaa butru; kɛji oka gugɔ̃ atswɛrɛ lɛ lá jeɔ; ni kɛji owo mɔ ko mli la lɛ bei baa.
Bible in Ga Language © Bible Society of Ghana, 2020.