Numeri 5
5
Mɛi ni ahe tseee
1Yehowa kɛɛ Mose akɛ, 2#Lev 13.46; Lev 15.2 “Fã Israelbii lɛ akɛ amɛ jie mɔ fɛɛ mɔ ni miiye kpiti aloo ehe miiho nu aloo eta gbonyo he ekɛbule ehe yɛ shitoohe lɛ mli kɛya shitoohe lɛ sɛɛ. 3Nuu kɛ yoo fɛɛ, nyɛjiea amɛ kɛyaa koni amɛkabule shitoohe lɛ he ni mihiɔ nyɛteŋ yɛ lɛ.”
4Israelbii lɛ fee nɔ ni Yehowa kɛɛ Mose lɛ, ni amɛ jie gbɔmɛi nɛɛ fɛɛ yɛ amɛteŋ kɛtee shitoohe lɛ sɛɛ.
Bɔ ni afee ato tɔ̃mɔ najiaŋ
5Yehowa kɛɛ Mose akɛ, 6#Lev 6.2-7 “Kɛɛmɔ Israelbii lɛ akɛ kɛji nuu ko loo yoo ko booo Yehowa toi, ni efee enaanyo esha, ni ekɛkwa Yehowa ni nakai mɔ lɛ ye fɔ lɛ, 7no lɛ ejaje esha ni efee lɛ, ni eto mɔ ni efee lɛ esha lɛ najiaŋ; asaŋ ekɛ nii ni ekɛtoɔ mɔ lɛ najiaŋ lɛ mlijaa enumɔ mli ekome afata he ehã mɔ lɛ. 8Shi kɛji mɔ nɔ ni atɔ̃ lɛ egbo, ni anaaa ewekunyo ko ni bɛŋkɛ lɛ koni akɛ najiaŋtoo nii lɛ ahã mɔ lɛ lɛ, no lɛ najiaŋtoo nii lɛ atsɔ Yehowa nɔ, ni akɛhã osɔfo lɛ; esoro ojwɛni ni tɔ̃lɔ lɛ baahã koni akɛshã afɔle ekɛdãi efɔŋ ni efee lɛ. 9Asaŋ nibii fɛɛ ni Israelbii lɛ kɛaabahã akɛ amɛkɛbake Yehowa lɛ, osɔfoi lɛ anɔ ni. 10Osɔfo fɛɛ osɔfo lɛ, nii ni akɛaabahã lɛ lɛ, enɔ ni.”
Kɛji nuu kɛɛ eŋa eje esɛɛ
11Yehowa kɛɛ Mose akɛ, 12“Kɛɛmɔ Israelbii lɛ akɛ, ‘Kɛji nuu ko ŋa je esɛɛ, 13ni ehã nuu kroko kɛ lɛ bɔ, ni etɔ̃ ewu lɛ nɔ, shi eshiu ewu lɛ sane nɛɛ nɔ ejaakɛ odasefonyo bɛ he, ni asaŋ amɔ̃ɔɔ lɛ, tsɛbelɛ yoo lɛ ena ebule ehe 14loo kɛji awuŋayeli te shi yɛ nuu ko mli, ni eye eŋa he awuŋã lɛ, yoo lɛ ebule ehe jio, ebuleko ehe jio, 15nuu lɛ kɛ eŋa lɛ aba osɔfo lɛ ŋɔɔ. Nuu lɛ ahiɛ akoko mamu kilo kome hu kɛba. Ekɛ mu akashwie mamu lɛ nɔ, ni ekɛ krɔbɔo hu akafɔ̃ nɔ, ejaakɛ eji awuŋayeli he niyenii afɔle ni akɛmiitao anɔkwale lɛ ale.’
16“Osɔfo lɛ kɛ yoo lɛ aba, ni ehã ebadamɔ Yehowa afɔleshãa latɛ lɛ hiɛ. 17#Ɛks 30.18 Osɔfo lɛ kɛ nu krɔŋkrɔŋ lɛ eko awo su kpulu mli, ni ekpiti shikpɔŋ su yɛ Kpee Buu Krɔŋkrɔŋ lɛ mli ewo nu lɛ mli. 18Agbɛnɛ osɔfo lɛ afɛne yoo lɛ yitsɔi yɛ eyiteŋ beiaŋ ni edamɔ Yehowa afɔleshãa latɛ lɛ hiɛ lɛ, ni ekɛ mamu, ni ji niyenii afɔle ni akɛjieɔ mɔ shi lɛ, ahã yoo lɛ ni ehiɛ. Osɔfo lɛ ahiɛ nu ni joɔ ni gbalaa loomɔ kɛbaa lɛ, 19koni ekamɔ kitã eshwie yoo lɛ nɔ, ni ekɛɛ lɛ akɛ, ‘Kɛji nuu kroko kɛ bo ebɔko, ni ojeko owu sɛɛ owoko ohe muji lɛ, no lɛ ohe aje loomɔ ni nu ni joɔ nɛɛ gbalaa kɛbaa lɛ mli; 20shi kɛji oje owu lɛ sɛɛ, ni nuu kroko kɛ bo ebɔ, ni owo ohe muji lɛ, 21(Osɔfo lɛ alomɔ yoo lɛ agbɛnɛ, ni ekɛɛ lɛ akɛ) no lɛ Yehowa ahã otsɔ̃ musumɔ ni atsɛɔ egbɛi akɛlomɔɔ, aloo akɛkãa kitã yɛ omaŋbii ateŋ. Yehowa ahã oyoohe abɛ, ni omusu afuu. 22Kɛji nɛkɛ nu nɛɛ ni gbalaa loomɔ kɛbaa lɛ bote omli lɛ, ehã omusu afũu, ni oyoohe abɛ.’ ”
Yoo lɛ ahere osɔfo lɛ nɔ akɛ, “Amen. Amen!”
23Osɔfo lɛ aŋmã loomɔi nɛɛ yɛ nɔ ko nɔ; no sɛɛ lɛ, efɔ niŋmaa lɛ ewo nu ni joɔ lɛ mli, 24ni ehã yoo lɛ anu nu ni joɔ ni gbalaa loomɔ kɛbaa lɛ, koni kɛji nu lɛ bote yoo lɛ mli lɛ epiŋ lɛ waa. 25Dani yoo lɛ baanu nu lɛ, osɔfo lɛ ahe mamu ni ji niyenii afɔle lɛ ni akɛjieɔ mɔ shi lɛ yɛ yoo lɛ dɛŋ, ni ewo afɔle lɛ nɔ kɛya kɛba yɛ Yehowa hiɛ; ni no sɛɛ lɛ ekɛma afɔleshãa latɛ lɛ nɔ. 26Osɔfo lɛ akpiti niyenii afɔle lɛ edɛ̃ kɔkɔ obɔ̃ kome, akɛ nɔ ni ekɛmiiye he odase, koni eshã yɛ afɔleshãa latɛ lɛ nɔ; ni no sɛɛ lɛ ehã yoo lɛ anu nu lɛ. 27Kɛji yoo lɛ eje ewu lɛ sɛɛ ekɛwo ehe muji lɛ, kɛji enu nu ni joɔ lɛ ni ebote emli lɛ, nu lɛ baahã epiŋ waa diɛŋtsɛ, ni emusu baafũu, ni eyoohe baabɛ, ni lɛ yoo lɛ ebaatsɔ̃ musumɔ yɛ emaŋbii ateŋ. 28Shi kɛji yoo lɛ ejeko ewu lɛ sɛɛ lɛ, no lɛ ehe baaje loomɔ lɛ mli, ni ebaawo shwiei.
29Enɛ ji mla ni kɔɔ nuu awuŋayeli he lɛ. Kɛji yoo je ewu sɛɛ ni ewo ehe muji, 30aloo nuu ye eŋa he awuŋã akɛ eje esɛɛ lɛ, nuu lɛ kɛ yoo lɛ aba koni yoo lɛ abadamɔ Yehowa afɔleshãa latɛ lɛ hiɛ koni osɔfo lɛ atsu yoo lɛ he nii yɛ nɛkɛ mla nɛɛ naa pɛpɛɛpɛ. 31Nuu lɛ yeŋ sɔ̃ ko kwraa; shi yoo lɛ kɛji etɔ̃ lɛ no lɛ eyi sɔ̃ lɛ aaatere lɛ diɛŋtsɛ nɔŋŋ.
Bible in Ga Language © Bible Society of Ghana, 2020.