Numeri 32
32
Akutsei ni hi Yordan Faa lɛ bokãgbɛ lɛ
(Deuteronomio 3.12-22)
1Rubenbii lɛ kɛ Gadbii lɛ yɛ kooloi babaoo diɛŋtsɛ. No hewɔ lɛ, be ni amɛna akɛ Yazer kɛ Gilead shikpɔŋ lɛ hi hã kooloolɛɛ lɛ, 2amɛbakɛɛ Mose kɛ Osɔfo Eleazar kɛ maŋ lumɛi lɛ akɛ, 3“Atarot kɛ Dibon kɛ Yazer kɛ Nimra kɛ Heshbon kɛ Eleale kɛ Sebam kɛ Nebo kɛ Beon, 4ni ji shikpɔji ni Yehowa hã Israelbii ye amɛnɔ bii lɛ anɔ kunim lɛ hi hã kooloolɛɛ, ni wɔyɛ kooloi babaoo. 5Nyɛfai nɛ, nyɛkɛ shikpɔŋ lɛ ahãa wɔ akɛ wɔgbɛfaŋnɔ. Nyɛkɛ wɔ akafoa Yordan lɛ kɛmiiya esɛɛ akɛ wɔyahi jɛi.”
6Mose here Gad hii lɛ kɛ Rubenbii lɛ nɔ, ni ekɛɛ amɛ akɛ, “Aso nyɛnyɛmimɛi lɛ aya ni amɛyawu ta be mli ni nyɛ lɛ nyɛtara shi yɛ biɛ lo? 7Mɛɛba nyɛfãa Israelbii lɛ atsui koni amɛkafo Yordan lɛ kɛtee shikpɔŋ ni Yehowa kɛhãa amɛ lɛ nɔ lɛ? 8Nɛkɛ nɔŋŋ ji bɔ ni nyɛtsɛmɛi fee be ni mitsu amɛ kɛjɛ Kadesh Barnea akɛ amɛyasara shikpɔŋ lɛ. 9#Num 13.17-33 Ni be ni amɛbashɛ Eshkol Jɔɔ lɛ mli, ni amɛna jɛi shikpɔŋ lɛ, ni amɛku amɛsɛɛ amɛba lɛ, amɛbafã Israelbii lɛ atsui koni amɛkaya shikpɔŋ ni Yehowa kɛhãa amɛ lɛ nɔ. 10Yehowa mli wo la nakai gbi lɛ, ekã kitã ekɛɛ, 11‘Hii ni shi Ijipt shikpɔŋ lɛ nɔ lɛ ateŋ mɛi ni eye kɛjɛ afii nyɔŋmai enyɔ kɛyaa lɛ ateŋ mɔ ko mɔ ko hiŋmɛi enaŋ shikpɔŋ ni mikã he kitã akɛ mikɛbaahã Abraham kɛ Isak kɛ Yakob lɛ, ejaakɛ amɛyeko mi anɔkwa kɛwulako shi, 12ja Keniznyo Yefune binuu Kaleb lɛ kɛ Nun binuu Yoshua lɛ. Amɛ lɛ amɛye mi anɔkwa kɛwula shi.’ 13#Num 14.26-35; Yos 1.13-15 Yehowa mli fu Israelbii lɛ, ni ehã amɛtsomlo yɛ shiaŋa lɛ nɔ afii nyɔŋmai ejwɛ kɛyashi yinɔbii ni gbo Yehowa nɔ toi lɛ fɛɛ gboi. 14Amrɔ nɛɛ lɛ, nyɛ nyɛbaye nyɛtsɛmɛi hii toigbolɔi lɛ anajiaŋ, ni nyɛmiitao akɛ Yehowa mlifu ni naa wa lɛ aba Israel nɔ fe tsutsu lɛ? 15Kɛji nyɛkwa Yehowa lɛ, lɛ hu eeekwa maŋ lɛ yɛ shiaŋa lɛ nɔ, ni belɛ nyɛaakpãtã Israel maŋ muu nɛɛ fɛɛ hiɛ.”
16Gad hii lɛ kɛ Ruben hii lɛ tsi bɛŋkɛ Mose, ni amɛkɛɛ akɛ, “Wɔmiitao akɛ wɔmãmɔ kooloi atsui kɛkɛ wɔhã wɔkooloi lɛ, ni wɔto maji hu wɔhã wɔbii abifabii lɛ. 17Shi wɔ lɛ wɔsaa wɔhe kɛhã tawuu, ni wɔbaanyiɛ wɔnyɛmimɛi Israelbii lɛ ahiɛ kɛwu ta lɛ kɛyashi wɔkɛ amɛ aaayashɛ amɛ hu amɛshitoohe. Shikpɔŋ lɛ nɔ bii lɛ ahewɔ lɛ wɔmiitao akɛ wɔbii lɛ ahi shi shweshweeshwe yɛ maji ni atswa gbogbo awo amɛhe lɛ amli. 18Wɔkuŋ wɔsɛɛ kɛbaŋ wɔshĩai amli kɛyashi beyinɔ ni Israel akutsei krokomɛi lɛ ateŋ eko fɛɛ eko aaana egbɛfaŋ shikpɔŋ. 19Wɔkɛ amɛ epeleŋ shikpɔŋ ko he yɛ Yordan lɛ sɛɛgbɛ kɛyaa fɛɛ, ejaakɛ wɔ wɔgbɛfaŋnɔ lɛ ebaje Yordan lɛ biɛgbɛ yɛ bokãgbɛ nɛɛ.”
20Mose kɛɛ amɛ akɛ, “Kɛji nyɛaafee nɔ ni nyɛkɛɛ nɛɛ lɛ, no lɛ nyɛsaa nyɛhe yɛ Yehowa hiɛ kɛyaa ta. 21Nyɛteŋ tabilɔ fɛɛ tabilɔ afo Yordan Faa lɛ koni ekɛ Yehowa henyɛlɔi lɛ ayawu kɛyashi beyinɔ ni Yehowa aaaye ehenyɛlɔi lɛ anɔ, 22ni eeeŋɔ shikpɔŋ lɛ. No sɛɛ dani nyɛku nyɛsɛɛ kɛba, ni nyɛaaye bem yɛ Yehowa kɛ Israel fɛɛ hiɛ, ni Yordan Faa lɛ bokãgbɛ shikpɔŋ nɛɛ aaatsɔ̃ nyɛgbɛfaŋnɔ. 23Shi kɛji nyɛyeee nyɛshiwoo lɛ nɔ yɛ Yehowa hiɛ lɛ, no lɛ nyɛtɔ̃ Yehowa nɔ, ni bɔ fɛɛ bɔ ni fee lɛ nyɛbaana nyɛtɔ̃mɔ lɛ he toigbalamɔ. 24Nyɛmãmɔa tsui nyɛhãa nyɛbii lɛ, ni nyɛmãmɔa kooloi atsui nyɛhãa nyɛkooloi lɛ; ni shi ni nyɛkɛ nyɛnaa ewo lɛ lɛ nyɛyea nɔ.”
25Gad hii lɛ kɛ Ruben hii lɛ here nɔ, ni amɛkɛɛ Mose akɛ, “Wɔnuŋtsɔ, bɔ ni okɛɛ lɛ wɔbaafee nakai. 26Wɔbii abifabii lɛ kɛ wɔŋamɛi lɛ kɛ wɔkooloi lɛ fɛɛ baahi Gilead maji lɛ amli; 27shi wɔ, hii lɛ, wɔsaa wɔhe, ni wɔbaanyiɛ Yehowa sɛɛ kɛyawu ta lɛ tamɔ bɔ ni okɛɛ lɛ pɛpɛɛpɛ.”
28Kɛkɛ ni Mose wo Osɔfo Eleazar kɛ Nun bi Yoshua kɛ Israel akutseiatsɛmɛi lɛ kitã yɛ Gad hii lɛ kɛ Ruben hii lɛ ahewɔ ekɛɛ akɛ, 29#Yos 1.12-15 “Kɛji Gad hii lɛ kɛ Ruben hii lɛ kɛ nyɛ aaafo Yordan lɛ, ni amɛteŋ hii fɛɛ aaawa nyɛ kɛwu ta lɛ yɛ Yehowa hiɛ, ni nyɛaaye shikpɔŋ lɛ nɔ lɛ, nyɛkɛ Gilead shikpɔŋ lɛ ahãa amɛ akɛ amɛgbɛfaŋnɔ. 30Shi kɛji amɛhii lɛ emiaaa koni amɛ kɛ nyɛ afo Yordan lɛ kɛyawu ta lɛ, no lɛ shikpɔŋ ni nyɛaana yɛ Kanaan shikpɔŋ lɛ nɔ lɛ, no nɔŋŋ eko kɛkɛ nyɛhãa amɛ.”
31Kɛkɛ ni Gad hii lɛ kɛ Ruben hii lɛ here Mose nɔ, ni amɛkɛɛ akɛ, “Bɔ ni Yehowa ekɛɛ lɛ nakai otsuji baafee. 32Wɔbaamia kɛfo Yordan lɛ yɛ Yehowa hiɛ kɛya Kanaan shikpɔŋ lɛ nɔ bɔ ni afee ni wɔgbɛfaŋ shikpɔŋ ni wɔna yɛ biɛ nɛɛ, yɛ Yordan lɛ bokãgbɛ lɛ, ahi shi ahã wɔ.”
33No hewɔ lɛ, Mose kɛ shikpɔji kɛ maji ni yɔɔ Amorbii amaŋtsɛ Sihon kɛ Bashan maŋtsɛ Og hu shishi lɛ fɛɛ hã Gadbii lɛ kɛ Rubenbii lɛ kɛ Yosef bi Manase shwiei akutso lɛ fã lɛ akɛ amɛgbɛfaŋnɔ. 34Gadbii lɛ saa maji ni atswa gbogbo awo amɛhe kɛwaje amɛ lɛ amli tsui lɛ. Dibon kɛ Atarot kɛ Aroer, 35kɛ Atrot-Shofan kɛ Yazer kɛ Yogbeha, 36kɛ Bet-Nimra kɛ Bet-Haran. Amɛmãmɔ kooloi atsui hu yɛ amɛmli. 37Rubenbii lɛ saa tsui ni yɔɔ maji nɛɛ amli lɛ amɛmãmɔ: Heshbon kɛ Eleale kɛ Kiriataim, 38kɛ Nebo kɛ Baal-Meon, maŋ ni amɛtsake egbɛi lɛ, kɛ Shibma. Amɛwowoo maji ni amɛsaa nɛɛ fɛɛ gbɛii hei.
39Manase binuu Makir shwiei lɛ fã ta kɛtee, ni amɛyatua Gilead, ni amɛshɔ̃ jɛi shikpɔŋ lɛ, ni amɛshwie Amorbii lɛ ni yɔɔ nɔ lɛ. 40Kɛkɛ ni Mose jɔɔ Gilead shikpɔŋ lɛ nɔ eha Manase bi Makir shwiei lɛ, ni amɛhi jɛi. 41#Deut 3.14 Manase binuu Yair hu tee ni eyatua Amorbii akrowai komɛi, ni eshɔ̃, ni ewo jɛi akɛ, “Yair Akrowai.” 42Noba hu tee eyatua Kenat maŋ lɛ kɛ ehe akrowai lɛ, ni eshɔ̃ fɛɛ, ni ekɛ egbɛi “Noba” lɛ wo maŋ lɛ.
Bible in Ga Language © Bible Society of Ghana, 2020.