Numeri 3
3
Aaron musuŋbii lɛ
1 #
Ɛks 6.23
Be mli ni Yehowa kɛ Mose wie yɛ Sinai Gɔŋ lɛ nɔ lɛ bii ni Aaron kɛ Mose yɔɔ lɛ agbɛii baa nɛɛ: 2#Num 26.60 Aaron bihii lɛ ji Nadab, ekromɔbi lɛ, kɛ Abihu kɛ Eleazar kɛ Itamar. 3Aaron fɔ ebihii nɛɛ mu, ni ewo amɛ osɔfo koni amɛtsu osɔfoyeli nitsumɔ. 4#Lev 10.1-2; Num 26.61 Shi Nadab kɛ Abihu gboi be ni amɛhiɛ la ko ni he tseee kɛtee Yehowa hiɛ be ni ayɔɔ Sinai Shiaŋa lɛ nɔ lɛ. Amɛshiii bii. Eleazar kɛ Itamar pɛ sɔ̃mɔ akɛ osɔfoi yɛ amɛtsɛ Aaron walabeiaŋ.
Ato Levibii lɛ akɛ osɔfoi lɛ awalɔi
5Kɛkɛ ni Yehowa kɛɛ Mose akɛ, 6#Ɛks 32.29 “Ŋɔɔ Levi akutso lɛ kɛba ni owo amɛ yelikɛbualɔi, mɛi ni baawa Osɔfo Aaron yɛ esɔfoyeli nitsumɔ lɛ mli. 7Amɛbaasɔ̃mɔ kɛtsu nitsumɔi fɛɛ ni kɔɔ Kpee Buu Krɔŋkrɔŋ lɛ he, ni amɛbaatsu nii amɛhã Osɔfo Aaron kɛ maŋbii lɛ fɛɛ hu. 8Amɛbaakwɛ Kpee Buu Krɔŋkrɔŋ lɛ mli saamɔ nibii lɛ fɛɛ anɔ, ni amɛbaawa maŋbii foji lɛ kɛji amɛba koni amɛbaja yɛ Yehowa Kpee Buu Krɔŋkrɔŋ lɛŋ. 9Ojɔɔ Levibii lɛ anɔ ohã Aaron kɛ ebihii lɛ. Oŋɔ amɛ yɛ Israelbii lɛ ateŋ, ni ojɔɔ amɛnɔ kwraa ohã koni amɛsɔ̃mɔ Aaron kɛ ebihii osɔfoi lɛ. 10Ojɔɔ osɔfoyeli lɛ nɔ ohã Aaron kɛ ebihii lɛ pɛ. Mɔ fɛɛ mɔ ni aaajɛ sɛɛ efee ehe osɔfo lɛ agbe lɛ.”
11Ni Yehowa kɛɛ Mose akɛ, 12#Ɛks 13.2 “Naa, miŋɔ Levibii fɛɛ ni yɔɔ Israelbii ateŋ lɛ mikɛmiito kromɔbii ni gbeleɔ musu naa yɛ Israelbii ateŋ lɛ anajiaŋ. No hewɔ lɛ, Levibii lɛ etsɔ̃ minɔ. 13Ejaakɛ gbi ni migbe Ijipt shikpɔŋ lɛ nɔ kromɔbii fɛɛ lɛ, mijɔɔ Israelbii akromɔbii fɛɛ anɔ mihã mihe, kɛjɛ gbɔmɔ kromɔbi nɔ kɛyashi shĩa kooloo kromɔbi nɔ. Minii ji amɛ fɛɛ. Mi ji Yehowa.”
Levibii lɛ akanemɔ
14Yehowa kɛ Mose wie yɛ Sinai shiaŋa lɛ nɔ ni ekɛɛ lɛ akɛ, 15“Kanemɔ Levi we lɛ hii fɛɛ kɛjɛ nuu fɛɛ nuu ni eye nyɔŋ kome nɔ kɛyaa, yɛ amɛtsɛmɛi awei lɛ kɛ amɛwekui anaa.” 16Mose kane amɛ bɔ ni Yehowa fã lɛ lɛ. 17#Num 26.57-64 Levi fɔ bihii etɛ̃, ni amɛgbɛii ji Gershon kɛ Kohat kɛ Merari. 18Gershon bihii lɛ agbɛii yɛ amɛwekui anaa ji Libni kɛ Shimei. 19Kohat yɛ bihii ejwɛ; amɛgbɛii yɛ amɛwekui lɛ anaa ji Amram kɛ Izehar kɛ Hebron kɛ Uziel, 20ni Merari bihii enyɔ lɛ agbɛii yɛ amɛwekui lɛ anaa ji Maheli kɛ Mushi. Mɛnɛɛmɛi ji Levibii lɛ awekui lɛ yɛ amɛtsɛmɛi awei lɛ anaa.
21Gershon shwiei lɛ ji Libnibii lɛ kɛ Shimeibii lɛ. 22Be ni akane amɛhii fɛɛ ni eye kɛjɛ nyɔŋ kome kɛyaa lɛ, ana mɛi akpei kpawo kɛ ohai enumɔ. 23Gershonbii awekui nɛɛ lɛ, akɛ Kpee Buu Krɔŋkrɔŋ lɛ sɛɛ ni ji anaigbɛ hã amɛ akɛ amɛshihilɛhe koni amɛmãmɔ amɛbui lɛ yɛ jɛi. 24Amɛwekui lɛ fɛɛ amli wekunukpa lɛ ji Eliasaf, Lael bi lɛ. 25Amɛ amɛdɛŋ atu nibii nɛɛ anɔkwɛmɔ kɛ kuramɔ awo: Kpee Buu Krɔŋkrɔŋ lɛ, kɛ buu lɛ yiteŋ nɔhaanɔ lɛ, kɛ eshinaa lɛ naa mama lɛ, 26kɛ kpo ni bɔle Kpee Buu Krɔŋkrɔŋ lɛ kɛ afɔleshãa latɛ lɛ fɛɛ kpula lɛ he mamai lɛ, kɛ mamai lɛ ahe taŋkpei lɛ, kɛ kpo lɛ agbo lɛ naa mama lɛ hu. Nɔ fɛɛ nɔ ni kɔɔ nibii nɛɛ ahe lɛ amɛnitsumɔ ni.
27Kohat shwiei lɛ ji Amrambii lɛ kɛ Izeharbii lɛ kɛ Hebronbii lɛ kɛ Uzielbii lɛ. Mɛnɛɛmɛi ji Kohatbii lɛ. 28Be ni akane amɛhii fɛɛ ni eye kɛjɛ nyɔŋ kome kɛyaa lɛ ana mɛi akpei kpaanyɔ kɛ ohai ekpaa. 29Kohatbii awekui nɛɛ lɛ akɛ Kpee Buu Krɔŋkrɔŋ lɛ ŋmawuiaŋ kɛyaa wuoyigbɛ lɛ hã amɛ akɛ amɛshihilɛhe koni amɛmãmɔ amɛbui lɛ yɛ jɛi. 30#Lev 10.4 Amɛwekui lɛ fɛɛ amli onukpa lɛ ji Elizafan, Uziel bi lɛ. 31#Num 7.9 Nibii ni atu awo amɛdɛŋ ji Kpãŋmɔ Adeka lɛ, kɛ okplɔ̃ lɛ, kɛ kanetso lɛ, kɛ afɔleshãa latɛi lɛ, kɛ nibii fɛɛ ni osɔfoi lɛ kɛ sɔ̃mɔɔ yɛ He Krɔŋkrɔŋ lɛ kɛ muhɔɔ lɛŋ lɛ. Nɔ fɛɛ nɔ ni kɔɔ nibii nɛɛ ahe lɛ amɛnitsumɔ ni.
32Levibii lɛ anukpa fe fɛɛ ji Eleazar, Osɔfo Aaron bi lɛ; ni lɛ ekwɛɔ mɛi ni tsuɔ He Krɔŋkrɔŋ lɛŋ nitsumɔi lɛ anɔ.
33Merari shwiei lɛ ji Mahelibii lɛ kɛ Mushibii lɛ. Mɛnɛɛmɛi ji Meraribii lɛ. 34Be ni akane amɛhii fɛɛ ni eye kɛjɛ nyɔŋ kome kɛyaa lɛ, ana mɛi akpei ekpaa kɛ ohai enyɔ. 35Meraribii nɛɛ awekui lɛ fɛɛ awekunukpa lɛ ji Zuriel, Abihail bi lɛ. Ahã Meraribii nɛɛ Kpee Buu Krɔŋkrɔŋ lɛ koŋ nɔ kɛyaa kooyigbɛ akɛ amɛshihilɛhe koni amɛmãmɔ amɛbui lɛ yɛ jɛi. 36Nibii ni atu awo amɛdɛŋ ni amɛkwɛ nɔ ji Kpee Buu Krɔŋkrɔŋ lɛ he nibii ni ji mplaŋi lɛ kɛ mlibɛlɛmɔnii lɛ, kɛ akulashiŋi lɛ, kɛ nibii ni akulashiŋi lɛ mamɔ̃ɔ nɔ lɛ, kɛ amɛhe nibii krokomɛi lɛ fɛɛ. Nɔ fɛɛ nɔ ni kɔɔ nibii nɛɛ ahe lɛ amɛnitsumɔ ni. 37Amɛ nɔŋŋ akɛ kpo lɛ he akulashiŋi lɛ, kɛ nibii ni akulashiŋi lɛ mamɔ̃ɔ nɔ kɛ amɛhe shiŋmlitsei lɛ kɛ taŋkpei lɛ hã koni amɛkwɛ nɔ.
38Shi mɛi ni baamãmɔ amɛbui yɛ Kpee Buu Krɔŋkrɔŋ lɛ hiɛ yɛ bokãgbɛ ni amɛkɛ jɛi afee amɛshihilɛhe ji Mose kɛ Aaron kɛ ebihii lɛ. He Krɔŋkrɔŋ lɛ mli sɔ̃ɔmɔ kɛ kusumi fɛɛ ni sa akɛ atsu ahã Israel maŋbii lɛ, amɛ esa akɛ amɛtsu. Mɔ fɛɛ mɔ ni aaajɛ sɛɛ ni ekɛ ehe aaawo amɛnitsumɔ lɛ mli lɛ agbe lɛ. 39Levibii hii fɛɛ ni eye kɛjɛ nyɔŋ kome kɛyaa ni Mose kɛ Aaron kane yɛ amɛwekui anaa yɛ Yehowa fãmɔ naa lɛ ayikulɛ shɛɔ mɛi akpei nyɔŋmai enyɔ kɛ enyɔ.
Levibii lɛ ye kromɔ bihii anajiaŋ
40Kɛkɛ ni Yehowa kɛɛ Mose akɛ, “Ŋmaa Israelbii akromɔbihii fɛɛ; kɛjɛ mɔ ni eye nyɔŋ kome nɔ kɛyaa, agbɛii koni okane amɛyikulɛ, 41ni otse Levibii lɛ ohã mi, Yehowa, koni okɛ amɛ ato Israelbii kromɔ bihii lɛ fɛɛ anajiaŋ. Nakai nɔŋŋ oŋɔ̃ Levibii ashĩa kooloi ohã mi koni okɛto Israelbii fɛɛ ashĩa kooloi akromɔ bihii fɛɛ anajiaŋ.” 42Mose kane Israelbii akromɔbihii fɛɛ tamɔ bɔ ni Yehowa fã lɛ lɛ. 43Kromɔ bihii ni eye kɛjɛ nyɔŋ kome kɛyaa agbɛii ni aŋma lɛ ayikulɛ fee mɛi akpei nyɔŋmai enyɔ kɛ enyɔ kɛ ohai enyɔ kɛ nyɔŋmai kpawo kɛ etɛ̃.
44Yehowa kɛɛ Mose akɛ, 45“Jɔɔmɔ Levibii lɛ anɔ ohã mi yɛ Israelbii akromɔbihii fɛɛ anajiaŋ, ni ojɔɔ Levibii ashĩa kooloi anɔ ohã mi yɛ Israelbii fɛɛ ashĩa kooloi akromɔbihii anajiaŋ. Levibii lɛ minii ji amɛ. Mi, mi ji Yehowa. 46Israelbii akromɔbihii ohai enyɔ kɛ nyɔŋmai kpawo kɛ etɛ̃ ni edɛŋ Levibii lɛ ayikulɛ lɛ nɔ lɛ, akpɔ̃ amɛ. 47Hemɔ He Krɔŋkrɔŋ lɛ niŋmɛɛ tɛ naa jwiɛtɛi shekeli enumɔ yɛ mɔ kome yi, shekel kome feɔ garai nyɔŋmai enyɔ. 48Ni shika ni akɛbaakpɔ̃ mɛi ni edɛŋ nɔ nɛɛ lɛ okɛhã Aaron kɛ ebihii lɛ.” 49No hewɔ lɛ, Mose he shika ni awo akɛkpɔ̃ mɛi ni edɛŋ Levibii lɛ anɔ lɛ, 50yɛ Israelbii lɛ akromɔbii lɛ adɛŋ. Ena jwiɛtɛi shekeli akpe kome kɛ ohai etɛ̃ kɛ nyɔŋmai ekpaa kɛ enumɔ; 51ni Mose kɛ mɛi ni akpɔ̃ lɛ shika lɛ hã Aaron kɛ ebihii lɛ bɔ ni Yehowa fã akɛ efee lɛ.
Bible in Ga Language © Bible Society of Ghana, 2020.