Numeri 1
1
Israelbii ayikulɛ kanemɔ, klɛŋklɛŋ nɔ̃
1Israelbii lɛ Ijipt shikpɔŋ lɛ nɔ shimɔ sɛɛ afi ni ji enyɔ lɛ mli nyɔŋ ni ji enyɔ lɛ klɛŋklɛŋ gbi lɛ nɔ lɛ, Yehowa kɛ Mose wie yɛ Kpee Buu lɛ mli yɛ Sinai Shiaŋa lɛ nɔ, ni ekɛɛ lɛ akɛ, 2#Num 26.2-51; Ɛks 30.12 “Nyɛkanea Israel asafo muu lɛ fɛɛ yikulɛ yɛ amɛwekui lɛ kɛ amɛtsɛmɛi awei lɛ anaa. Aŋmala hii fɛɛ agbɛii 3kɛjɛ mɛi ni eye afii nyɔŋmai enyɔ kɛyaa, ni ji mɔ fɛɛ mɔ ni eshɛ tayaa. Bo kɛ Aaron akane mɛi lɛ yɛ amɛsafoi anaa. 4Akutso fɛɛ akutso mli nuu kome ni ji onukpa yɛ etsɛmɛi awe afata nyɛhe.” 5Hii, akutseiaŋ onukpai, ni ahala akɛfata Mose kɛ Aaron he koni amɛtsu nii lɛ agbɛii baa nɛɛ: Ruben akutso lɛ fã Elizur, Shedeur bi lɛ; 6ni Simeon akutso lɛ fã Shelumiel, Zurishadai bi lɛ; 7#Ɛks 6.22 ni Yuda akutso lɛ fã Nahashon, Aminadab bi lɛ. 8Isakar akutso lɛ fã Netanel, Zuar bi lɛ, 9ni Zebulon akutso lɛ fã Eliab, Helon bi lɛ; 10#1 Kron 7.28 ni Efraim akutso lɛ, ni ji Yosef shwiei lɛ, fã Elishama, Amihud bi lɛ; ni Manase akutso, ni ji Yosef nɔŋŋ shwiei hu, fã Gamaliel, Pedazur bi lɛ. 11Benyamin akutso lɛ fã Abidan, Gideoni bi lɛ; 12ni Dan akutso lɛ fã Ahiezer, Amishadai bi lɛ; 13ni Asher akutso lɛ fã Pagiel, Okran bi lɛ; 14Gad akutso lɛ fã Eliasaf, Deuel bi lɛ; 15ni Naftali akutso lɛ fã Ahira, Enan bi lɛ. 16Gbɔmɛi nɛɛ ji hiɛnaanɔbii, ni asaŋ amɛ ji amɛtsɛmɛi akutsei lɛ amli onukpai, ni ahala amɛ, ni afee amɛ Israel akutsei lɛ ahiɛnyiɛlɔi lɛ. 17Mose kɛ Aaron ŋɔ hii ni atsi amɛgbɛii atã nɛɛ amɛfata amɛhe, 18ni amɛbua Israel asafo muu lɛ fɛɛ naa kɛkpe yɛ nyɔŋ ni ji enyɔ lɛ klɛŋklɛŋ gbi lɛ nɔ, ni amɛŋmala maŋbii lɛ agbɛii yɛ amɛwekui lɛ kɛ amɛtsɛmɛi awei lɛ anaa. Hii fɛɛ ni eye kɛjɛ afii nyɔŋmai enyɔ kɛyaa lɛ aŋmala amɛgbɛii ni akane amɛyibɔ. 19Bɔ ni Yehowa fã Mose akɛ efee lɛ, nakai efee, ni ekɛkane Israel asafo lɛ yikulɛ yɛ Sinai Shiaŋa lɛ nɔ. 20Akɛjɛ Ruben ni ji Israel kromɔbi lɛ bihii lɛ ashwiei lɛ anɔ, ni aŋmala hii fɛɛ ni eye kɛjɛ afii nyɔŋmai enyɔ kɛyaa ni asaŋ amɛshɛ tayaa lɛ agbɛii ekomekome yɛ amɛwekui kɛ amɛtsɛmɛi awei lɛ anaa.
21Rubenbii ayikulɛ ni ana ji mɛi akpei nyɔŋmai ejwɛ kɛ ekpaa kɛ ohai enumɔ.
22Ni Simeon shwiei lɛ, kɛjɛ nuu fɛɛ nuu ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
23mɛi akpei nyɔŋmai enumɔ kɛ nɛɛhu kɛ ohai etɛ̃.
24Ni Gad shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
25mɛi akpei nyɔŋmai ejwɛ kɛ enumɔ kɛ ohai ekpaa kɛ nyɔŋmai enumɔ.
26Yuda shwiei lɛ kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
27mɛi akpei nyɔŋmai kpawo kɛ ejwɛ kɛ ohai ekpaa.
28Ni Isakar shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
29mɛi akpei nyɔŋmai enumɔ kɛ ejwɛ kɛ ohai ejwɛ.
30Ni Zebulon shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
31mɛi akpei nyɔŋmai enumɔ kɛ kpawo kɛ ohai ejwɛ.
32Efraim shwiei lɛ, ni jɛ Yosef mli lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
33mɛi akpei nyɔŋmai ejwɛ kɛ ohai enumɔ.
34Ni Manase shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
35mɛi akpei nyɔŋmai etɛ̃ kɛ enyɔ kɛ ohai enyɔ.
36Ni Benyamin shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
37mɛi akpei nyɔŋmai etɛ̃ kɛ enumɔ kɛ ohai ejwɛ.
38Dan shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
39mɛi akpei nyɔŋmai ekpaa kɛ enyɔ kɛ ohai kpawo.
40Ni Asher shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
41mɛi akpei nyɔŋmai ejwɛ kɛ ekome kɛ ohai enumɔ.
42Ni Naftali shwiei lɛ, kɛjɛ mɛi ni eye afii nyɔŋmai enyɔ kɛyaa nɔ kɛyashi mɔ fɛɛ mɔ ni eshɛ tayaa, ayikulɛ fee
43mɛi akpei nyɔŋmai enumɔ kɛ etɛ̃ kɛ ohai ejwɛ.
44Gbɔmɛi nɛɛ ji mɛi ni Israel maŋ onukpai nyɔŋma kɛ enyɔ lɛ ni damɔ amɛtsɛmɛi awei lɛ anaa ni wa Mose kɛ Aaron kɛkane amɛyikulɛ lɛ. 45No hewɔ lɛ, Israelbii fɛɛ ni eye kɛjɛ afii nyɔŋmai enyɔ kɛyaa ni akane amɛ yɛ amɛtsɛmɛi awei anaa akɛ mɛi ni eshɛ tayaa lɛ, 46#Ɛks 12.37; Num 26.1-51 amɛyikulɛ fee mɛi akpei ohai ekpaa kɛ etɛ̃ kɛ ohai enumɔ kɛ nyɔŋmai enumɔ.
47Shi Levibii lɛ akaneee amɛ ashiii akutsei krokomɛi lɛ anɔ, 48ejaakɛ Yehowa kɛɛ Mose akɛ, 49“Kɛji okane Israelbii lɛ ayikulɛ lɛ, okakane Levibii lɛ oshi nɔ. 50Moŋ akɛ miKpee Buu Krɔŋkrɔŋ lɛ kɛ ehe nibii lɛ fɛɛ kɛ nɔ fɛɛ nɔ ni fata he lɛ nɔkwɛmɔ awo amɛdɛŋ. Amɛ amɛtere Buu lɛ kɛ ehe nibii lɛ fɛɛ, ni amɛ nɔŋŋ amɛkura Buu lɛ. Ni kɛji ato shi yɛ he ko lɛ, amɛmãmɔ amɛwɔɔhei amɛkɛbɔle Buu lɛ he kpula kɛkpe. 51#Num 3.10, 38 Kɛji maŋ lɛ fã nyiɛmɔ lɛ, Levibii lɛ afã Buu lɛ, ni kɛji shɛ be ni abaashi Buu lɛ, Levibii lɛ nɔŋŋ ashi. Mɔ folo fɛɛ mɔ folo ni aaabɛŋkɛ Buu lɛ agbe lɛ. 52Kɛji ashɛ shitoohe ko lɛ, Israelbii fɛɛ ashi amɛbuui yɛ amɛsafo kuikui lɛ anaa. Mɔ fɛɛ mɔ buu ahi esafo shitoohe mli, ni asaŋ yɛ etsɛmɛi awe aflaŋaa shishi. 53Shi Levibii lɛ ashishii amɛbui lɛ kɛbɔle miKpee Buu Krɔŋkrɔŋ lɛ; amɛbu he bɔ ni afee ni mɔ folo ko akabɛŋkɛ Buu lɛ ni no yatsɛ mimlifu bahã Israelbii lɛ.” 54Bɔ ni Yehowa fã Mose lɛ nakai pɛpɛɛpɛ Israelbii lɛ fee lɛ.
Bible in Ga Language © Bible Society of Ghana, 2020.