Mateo 24
24
Sɔlemɔ we lɛ fitemɔ he gbalɛ
(Marko 13.1-2; Luka 21.5-6)
1Ni Yesu je kpo yɛ Sɔlemɔ we lɛ ni be ni eyaa lɛ, ekaselɔi lɛ ba eŋɔɔ ni amɛkɛ Sɔlemɔ we lɛ tsui lɛ tsɔ̃ɔ lɛ. 2#Luk 19.44 Shi Yesu kɛɛ amɛ akɛ, “Te nyɛmiina nii nɛɛ fɛɛ? Anɔkwale mikɛɔ nyɛ akɛ, ashiŋ tɛ kome yɛ eko nɔ yɛ biɛ ni akpãŋ aluŋ shi.”
Amanehului ashishijee
(Marko 13.3-13; Luka 21.7-19)
3Shi be ni eta shi yɛ Mugɔŋ lɛ nɔ lɛ, ekaselɔi lɛ ba eŋɔɔ yɛ afã amɛbakɛɛ lɛ akɛ, “Tsɔ̃ɔmɔ wɔ beyinɔ ni aaafee nii nɛɛ, ni mɛni ji obaa lɛ kɛ je nɛɛŋ naagbee lɛ he okadi?” 4Ni Yesu here nɔ ekɛɛ amɛ akɛ, “Nyɛkwɛa ni ahia koni mɔ ko akabalaka nyɛ. 5#Mat 24.24; Bɔf 5.36, 37; 1 Yoh 2.18 Ejaakɛ mɛi pii kɛ migbɛi aaabakɛɛ akɛ, ‘Mi ji Kristo lɛ!’ Ni amɛaalaka mɛi pii. 6Shi nyɛaanu tai kɛ tai atatsĩĩ ahe; nyɛkwɛa ni nyɛtsui akafãa; ejaakɛ esa akɛ nii nɛɛ fɛɛ aba mli, shi kɛ̃lɛ naagbee lɛ shɛko. 7Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔ̃ji kɛ shikpɔŋ hosomɔi aaaba hei srɔtoi. 8Shi enɛɛmɛi fɛɛ lɛ kɔ̃ɔmɔi lɛ ashishijee ni. 9#Mat 10.17, 22; Yoh 16.2 Nakai be lɛ mli lɛ amɛaaŋɔ nyɛ amɛwo amanehulu mli, ni amɛaagbe nyɛ; ni migbɛi lɛ hewɔ lɛ jeŋmaji fɛɛ aaanyɛ nyɛ. 10Ni nakai be lɛ mli lɛ mɛi pii anane aaatɔ̃tɔ̃ ni amɛaatsɔ̃ɔtsɔ̃ɔ amɛnanemɛi asɛɛgbɛ, ni amɛaanyɛnyɛɛ amɛhe. 11#Mat 7.15; 1 Yoh 4.1 Ni amale gbalɔi pii aaate shi, ni amɛaalaka mɛi pii. 12#2 Tes 2.10; 2 Tim 3.1-5 Ni akɛni mlakwamɔ baafa hewɔ lɛ, mɛi pii asuɔmɔ lɛ he aaajɔ. 13#Mat 10.22; Kpoj 13.10 Shi mɔ ni hiɛɔ mli kɛyawulaa shi lɛ, lɛ eyiwala aaahere. 14#Mat 28.19; 10.18 Ni aaashiɛ maŋtsɛyeli lɛ he sane kpakpa nɛɛ atsɔ̃ɔ yɛ je lɛ mli fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”
Amanehulu kpeteŋkple lɛ
(Marko 13.14-23; Luka 21.20-24)
15 #
Dan 9.26, 27; 12.11 “No hewɔ lɛ, kɛ nyɛna ‘Amaŋfɔ̃ nihiinii lɛ’ ni gbalɔ Daniel wie he lɛ akɛ ema he krɔŋkrɔŋ lɛ (mɔ ni kaneɔ lɛ eyoo sɛɛ!) 16No lɛ mɛi ni yɔɔ Yudea lɛ ajo foi amɛya gɔji lɛ anɔ; 17#Luk 17.31 mɔ ni yɔɔ tsu yiteŋ lɛ, ekakpeleke shi eyakɔ nɔ ko kɛjɛ eshĩa; 18ni mɔ ni yɔɔ ŋmɔshi lɛ, ekaaku esɛɛ eyakɔ etade. 19Shi kpoo hã yei ni hiɛ musu kɛ yei ni hãa fufɔ yɛ nakai bei lɛ amli lɛ! 20#Bɔf 1.12 Shi nyɛsɔlea, koni nyɛfoijee lɛ akaba yɛ fɛ̃i be lɛ mli aloo yɛ hejɔɔmɔ gbi lɛ nɔ. 21#Dan 12.1; Kpoj 7.14 Ejaakɛ nakai be lɛ mli lɛ amanehulu kpele aaaba ni anako enɔ dã kɛjɛ je lɛ shishijee mli kɛbashi ŋmɛnɛ, ni asaŋ anaŋ enɔ gbi ko gbi ko dɔŋŋ. 22Ni kɛ afooo nakai gbii lɛ anɔ lɛ, ahereŋ heloo ko heloo ko yiwala; shi mɛi ni ahala lɛ ahewɔ lɛ aaafo nɔ. 23No mli lɛ, kɛji mɔ ko kɛɛ nyɛ akɛ, ‘Naa, Kristo lɛ yɛ biɛ loo biɛ lɛ’, nyɛkahea nyɛyea. 24#Mat 24.5, 11; Deut 13.1-3; 2 Tes 2.8, 9 Ejaakɛ amale kristoi kɛ amale gbalɔi aaate shi ni amɛaafee okadii wuji kɛ ashwãi amɛtsɔ̃ɔ, bɔ ni kɛ aaaho lɛ amɛaalaka halamɔbii lɛ tete. 25Naa, mikɛɛ nyɛ mito. 26No hewɔ lɛ, kɛji amɛkɛɛ nyɛ akɛ, ‘Naa, eyɛ ŋa lɛ nɔ lɛ’, nyɛkayaa; aloo, ‘naa, eyɛ piai lɛ amli lɛ;’ nyɛkahea nyɛyea. 27#Luk 17.23, 24 Ejaakɛ bɔ ni srawa gbaa kɛjɛɔ bokã kɛyaa anai lɛ, nakai nɔŋŋ Gbɔmɔ Bi lɛ baa lɛ aaatamɔ. 28#Hiob 39.30; Hab 1.8; Luk 17.37 Ejaakɛ he fɛɛ he ni gbonyo kã lɛ, jɛi akpaŋai buaa amɛhe naa yɛ.”
Gbɔmɔ Bi lɛ baa
(Marko 13.24-27; Luka 21.25-28)
29 #
Yes 13.10; 34.4; Eze 32.7; Yoel 2.10, 31; 3.15; Kpoj 6.12-13; 2 Pet 3.10 “Shi nakai gbii lɛ amli amanehului lɛ asɛɛ nɔŋŋ lɛ, hulu aaawo duŋ, ni nyɔɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso. 30#Kpoj 1.7; Mat 26.64; Dan 7.13, 14; Kpoj 19.11; Zak 12.10-14 Kɛkɛ lɛ Gbɔmɔ Bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana Gbɔmɔ Bi lɛ ni eeba yɛ ŋwɛi atatui lɛ anɔ kɛ hewalɛ kɛ anunyam babaoo. 31#1 Kor 15.52; 1 Tes 4.16; Kpoj 8.1, 2 Ni eeetsu ebɔfoi lɛ kɛ tɛtɛrɛmantɛrɛ ni gbee wa, ni amɛaabua ehalamɔbii lɛ anaa kɛaajɛ kɔɔyɔi ejwɛ lɛ anɔ, kɛajɛ ŋwɛi naagbeehe kome kɛaaya naagbeehe kroko lɛ.”
Agbãmitso he nikasemɔ
(Marko 13.28-31; Luka 21.29-33)
32“Shi nyɛkasea agbãmitso abɛ ni ebuɔ lɛ, be ni eniji lɛ efrɔke ni eefu baa lɛ, nyɛle akɛ latsaa be lɛ eshɛ etã. 33Nakai nɔŋŋ nyɛ hu, kɛ nyɛna nii nɛɛ fɛɛ lɛ, nyɛlea akɛ eshɛ agboi lɛ anaa etã. 34Anɔkwale mikɛɔ nyɛ akɛ, nɛkɛ yinɔ nɛɛ hoŋ, ja nii nɛɛ fɛɛ eba mli dã. 35#Mat 5.18 Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ.”
Mɔ ko leee gbi lɛ kɛ ŋmɛlɛtswaa lɛ
(Marko 13.32-37; Luka 17.26-30, 34-36)
36 #
1 Tes 5.1, 2 “Shi nakai gbi lɛ kɛ nakai ŋmɛlɛtswaa lɛ mɔ ko mɔ ko leee nɔ ko yɛ he, bɔfoi ni yɔɔ ŋwɛi lɛ tete leee, ni Bi lɛ leee, ja Tsɛ lɛ kome kɛkɛ. 37#Jɛn 6.11-13; Luk 17.26, 27 Shi bɔ ni Noa gbii lɛ fee lɛ, nakai Gbɔmɔ Bi lɛ baa lɛ hu aaatamɔ. 38#2 Pet 3.5, 6 Ejaakɛ bɔ ni eyɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yooŋɔɔ kɛ gbãlãhamɔ mli aahu kɛyashi gbi ni Noa yabote adeka lɛ mli, 39ni amɛleee kɛyashi nu afua lɛ baloo amɛ fɛɛ kɛtee lɛ, nakai nɔŋŋ Gbɔmɔ Bi lɛ baa lɛ aaatamɔ. 40#Luk 17.35, 36 No mli lɛ mɛi enyɔ aaahi ŋmɔshi; aaaŋɔ mɔ kome, ni aaashi mɔ kome lɛ. 41Yei enyɔ aaawiɛ yɛ wiɛ sɛɛ; aaaŋɔ mɔ kome, ni aaashi mɔ kome lɛ. 42#Mat 25.13 No hewɔ lɛ, nyɛsaraa, ejaakɛ nyɛleee nɔ gbi nɔ ni nyɛnuŋtsɔ lɛ baa. 43#Luk 12.39-40 Shi nyɛkaia akɛ, kɛ shĩatsɛ ko le nɔ ŋmɛlɛtswaa nɔ ni julɔ baa lɛ, kulɛ eeesra ni eŋmɛŋ gbɛ ni agbu ewe lɛ awoŋ. 44#Luk 12.40; Kpoj 16.15 No hewɔ lɛ, nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu lɛ nɔ Gbɔmɔ Bi lɛ baa.”
Tsuji anɔkwafoi
(Luka 12.41-48)
45“Belɛ namɔ ji tsulɔ anɔkwafo kɛ nilelɔ mɔ ni enuŋtsɔ kɛ lɛ eto ewebii lɛ anɔ, koni ehã amɛ amɛŋmaa yɛ be ni sa mli lɛ? 46Ajɔɔ nakai tsulɔ lɛ, mɔ ni be ni enuŋtsɔ lɛ baa lɛ ni eeebana lɛ ni eefee nakai lɛ. 47#Mat 25.21, 23 Anɔkwale mikɛɔ nyɛ akɛ ekɛ lɛ aaato enii fɛɛ kwa nɔ.
48 #
Jaj 8.11
“Shi kɛji nakai tsulɔ fɔŋ lɛ aaakɛɛ yɛ etsui mli akɛ, ‘Minuŋtsɔ lɛ miitsi ebaabe lɛ eeto;’ 49ni eeebɔ̃i enanemɛi tsuji lɛ yii, ni ekɛ dãatɔlɔi lɛ aaaye, ni ekɛ amɛ aaanu lɛ, 50nakai tsulɔ lɛ nuŋtsɔ lɛ aaaba yɛ gbi nɔ ni ekwɛɛɛ lɛ gbɛ kɛ ŋmɛlɛtswaa nɔ ni eleee, 51#Mat 8.12 ni eeefo emli enyɔ ni eeehã lɛ egbɛfaŋnɔ yɛ osatofoi lɛ ateŋ. Jɛi yaafo kɛ nyanyɔji ashishikpemɔ aaahi.”
Bible in Ga Language © Bible Society of Ghana, 2020.