Mateo 18
18
Namɔ ji agbo fe fɛɛ?
(Marko 9.33-37; Luka 9.46-48)
1 #
Luk 22.24
Nakai ŋmɛlɛtswaa lɛ mli lɛ kaselɔi lɛ ba Yesu ŋɔɔ ni amɛbabi lɛ akɛ, “Namɔ ji agbo fe fɛɛ yɛ ŋwɛi maŋtsɛyeli lɛ mli?” 2Ni Yesu tsɛ gbekɛ bibioo ko kɛba eŋɔɔ, ni ekɛ lɛ damɔ amɛteŋ, 3#Mat 19.14; Luk 18.17 ni ekɛɛ, “Anɔkwale mikɛɔ nyɛ akɛ kɛji nyɛtsakeee ni nyɛtsɔ̃mɔ tamɔ gbekɛbii bibii lɛ, nyɛboteŋ ŋwɛi maŋtsɛyeli lɛ mli kwraa. 4No hewɔ lɛ, mɔ fɛɛ mɔ ni baa ehe shi tamɔ gbekɛ nɛɛ lɛ, lɛ ji agbo fe fɛɛ yɛ ŋwɛi maŋtsɛyeli lɛ mli. 5#Mat 10.40 Ni mɔ fɛɛ mɔ ni hereɔ gbekɛ fioo kome ni tamɔ mɔ nɛ yɛ migbɛi mli lɛ, ehereɔ mi.
Nanetɔ̃tɔ̃mɔ he kɔkɔbɔɔ
(Marko 9.42-48; Luka 17.1-2)
6 #
Luk 17.1, 2 “Shi mɔ ni tɔ̃tɔ̃ɔ bibii nɛɛ ateŋ mɔ kome ni heɔ minɔ yeɔ lɛ nane lɛ, faŋ nɔ ni akɛ teji wiɛ ŋmɔ ekuɛ ni akɛ lɛ yawo ŋshɔŋ. 7Kpoo hã je lɛ yɛ nanetɔ̃tɔ̃mɔ saji ahewɔ! Ejaakɛ nanetɔ̃tɔ̃mɔ saji lɛ baaba kɛ̃ moŋ nɛ; shi kpoo hã gbɔmɔ ni nanetɔ̃tɔ̃mɔ lɛ tsɔ̃ɔ enɔ̃ kɛbaa lɛ! 8#Mat 5.29, 30 Shi kɛji onine loo onane miitɔ̃tɔ̃ onane lɛ, foo yɛ ohe oshɛ ofɔ̃; faŋ nɔ ni oyɛ niji enyɔ loo naji enyɔ ni aaashɛ bo afɔ̃ naanɔ la lɛ mli. 9Ni kɛji ohiŋmɛi miitɔ̃tɔ̃ onane lɛ, fãa yɛ ohe oshɛ ofɔ̃; faŋ nɔ ni okɛ hiŋmɛi kome bote wala mli fe nɔ ni oyɛ hiŋmɛii enyɔ ni aaashɛ bo afɔ̃ abonsamiiaje.”
Too ni laaje lɛ he abɛ lɛ
(Luka 15.1-7)
10 #
Heb 1.14 “Nyɛkwɛa jogbaŋŋ koni nyɛkabu mɛi bibii nɛɛ ateŋ mɔ ko mɔ ko akɛ ejeee mɔ ko; ejaakɛ miikɛɛ nyɛ akɛ, amɛbɔfoi ni yɔɔ ŋwɛi lɛ kwɛɔ miTsɛ ni yɔɔ ŋwɛi lɛ hiɛ daa. [ 11Shi Gbɔmɔ Bi lɛ ba nɔ ni elaaje lɛ yiwalaheremɔ.]#Mat 9.13; Luk 19.10
12“Te nyɛsusuɔ tɛŋŋ, kɛji mɔ ko yɛ toi oha ni amɛteŋ ekome du gbɛ lɛ, ani eshiŋ nyɔŋmai nɛɛhu kɛ nɛɛhu lɛ yɛ gɔji lɛ anɔ ni eya eyatao nɔ ni edu gbɛ lɛ? 13Ni kɛji ena lɛ lɛ, anɔkwale mikɛɔ nyɛ akɛ, emii shɛɔ ehe yɛ no he fe nyɔŋmai nɛɛhu kɛ nɛɛhu ni eduko gbɛ lɛ. 14Nakai nɔŋŋ nyɛTsɛ ni yɔɔ ŋwɛi lɛ sumɔɔɔ akɛ bibii nɛɛ ateŋ mɔ kome laajeɔ.”
Mɔ kɛ enyɛmi ni etɔ̃ enɔ teŋsaamɔ
15 #
Lev 19.17; Luk 17.3; Gal 6.1 “Shi kɛji onyɛmi ko tɔ̃ onɔ lɛ, yaa ni oyatsɔ̃ɔ lɛ etɔ̃mɔ lɛ, okɛ lɛ yi enyɔ kɛkɛ. Kɛji ebo bo toi lɛ, nyɛmi efee nyɛmi. 16#Deut 19.15 Shi kɛji ebooo bo toi lɛ, kɛ mɔ kome loo mɛi enyɔ afata ohe, koni odasefoi enyɔ loo etɛ̃ daaŋ wiemɔ naa lɛ sane fɛɛ sane ama shi. 17#1 Kor 5.13 Ni kɛji amɛ hu ebooo amɛ toi lɛ, yaakɛɛ asafo lɛ, ni kɛji ebooo asafo lɛ hu toi lɛ, buu lɛ tamɔ wɔŋjalɔ kɛ toohelɔ. 18#Mat 16.19; Yoh 20.23 Anɔkwale mikɛɔ nyɛ akɛ, nɔ fɛɛ nɔ ni nyɛaafi yɛ shikpɔŋ lɛ nɔ lɛ, aaafi yɛ ŋwɛi; ni nɔ fɛɛ nɔ ni nyɛaafɛne yɛ shikpɔŋ lɛ nɔ lɛ, aaafɛne yɛ ŋwɛi. 19#Mar 11.24 Asaŋ anɔkwale mikɛɔ nyɛ akɛ, kɛji nyɛteŋ mɛi enyɔ kpãa gbee yɛ shikpɔŋ nɛɛ nɔ yɛ sane fɛɛ sane ni amɛbiɔ lɛ he lɛ, miTsɛ ni yɔɔ ŋwɛi lɛ aaafee ahã amɛ. 20#Mat 28.20 Ejaakɛ he ni mɛi enyɔ loo mɛi etɛ̃ ebua amɛhe naa yɛ, yɛ migbɛi mli lɛ, miyɛ amɛteŋ yɛ jɛi.”
Tsulɔ ni enaaa mɔbɔ lɛ he abɛ lɛ
21Kɛkɛ ni Petro ba eŋɔɔ ni ebabi lɛ akɛ, “Nuŋtsɔ, shii enyiɛ minyɛmi atɔ̃ minɔ ni mikɛfa lɛ? Kɛyashi shii kpawo lo?” 22#Luk 17.4 Yesu kɛɛ lɛ akɛ, “Mikɛɛɛ bo akɛ kɛyashi shii kpawo; shi moŋ shii kpawo toi nyɔŋmai kpawo. 23No hewɔ lɛ, ŋwɛi maŋtsɛyeli lɛ tamɔ maŋtsɛ ko ni taoɔ ekɛ etsuji ababu akɔntaa. 24Ni be ni ebɔ̃i buu lɛ, akɛ mɔ ko ni hiɛ lɛ nyɔmɔ talentai akpei nyɔŋma ba eŋɔɔ. 25Shi akɛni ebɛ nɔ ko ni ekɛaawo lɛ lɛ, enuŋtsɔ lɛ fã akɛ ahɔ̃ɔ lɛ kɛ eŋa kɛ ebii kɛ nii fɛɛ ni eyɔɔ, ni akɛwo nyɔmɔ lɛ. 26Kɛkɛ ni tsulɔ lɛ ho gbee enaji anaa ni ekpa lɛ fai ekɛɛ, ‘Nuŋtsɔ, too otsui shi ohã mi, ni mawo bo nyɔmɔ lɛ fɛɛ!’ 27Ni tsulɔ nɛɛ nuŋtsɔ lɛ musuŋ tsɔ̃ lɛ ni eŋmɛɛ ehe, ni ekɛ nyɔmɔ lɛ ke lɛ. 28Shi be ni nakai tsulɔ lɛ je kpo lɛ, eyana enanemɛi tsuji lɛ ateŋ mɔ kome ni hiɛ lɛ nyɔmɔ talentai oha; ni emɔ lɛ emia esɛ̃, ni ekɛɛ, ‘Wo mi nyɔmɔ ni ohiɛ mi lɛ!’ 29Kɛkɛ ni enaanyo tsulɔ lɛ ho kula shi ekpa lɛ fai ekɛɛ, ‘Too otsui shi ohã mi, ni mawo bo nyɔmɔ lɛ fɛɛ!’ 30Shi lɛ lɛ ekpɛlɛɛɛ; shi moŋ eyawo lɛ tsuŋ kɛyashi beyinɔ ni eeewo lɛ nyɔmɔ lɛ. 31Shi be ni enanemɛi tsuji lɛ na nɔ ni ba lɛ, edɔ amɛ tsɔ̃, ni amɛbagba amɛnuŋtsɔ lɛ fɛɛ. 32Kɛkɛ ni enuŋtsɔ lɛ hã ayatsɛ lɛ kɛba, ni ekɛɛ lɛ akɛ, ‘Tsulɔ fɔŋ! Akɛni okpa mi fai hewɔ lɛ mikɛ nɛkɛ nyɔmɔ nɛɛ fɛɛ ke bo. 33Ani kulɛ jeee bo hu ogbɛnaa ji akɛ ona onaanyo tsulɔ lɛ mɔbɔ, bɔ ni mi hu mina bo mɔbɔ lɛ?’ 34#Mat 5.26 Ni enuŋtsɔ lɛ mli fu, ni ekɛ lɛ hã ni apiŋ lɛ kɛyashi beyinɔ ni eeebawo lɛ nyɔmɔ lɛ fɛɛ. 35#Mat 6.14, 15 Nakai nɔŋŋ miTsɛ ni yɔɔ ŋwɛi lɛ hu aaafee nyɛ, kɛji nyɛteŋ mɔ fɛɛ mɔ kɛ enyɛmi tɔ̃mɔ ekeee lɛ kɛjɛɛɛ etsuiŋ lɛ.”
Bible in Ga Language © Bible Society of Ghana, 2020.