Levitiko 3
3
Naanyobɔɔ afɔlei
1“Kɛji mɔ ko miiba ebashã toiŋjɔlɛ naanyobɔɔ afɔle ehã Yehowa lɛ, ekɛ etsinai lɛ ateŋ eko, tsina lɛ nuu ni jio, yoo ni jio, efee kooloo ni kpa ko bɛ ehe. 2Mɔ lɛ kɛ enine aŋmɛ tsina lɛ yitso nɔ, ni egbe kooloo lɛ yɛ Kpee Buu lɛ shinaa lɛ naa, ni Aaron bihii osɔfoi lɛ kɛ kooloo lɛ lá lɛ abashwã afɔleshãa latɛ lɛ he koji ejwɛ lɛ he kɛkpe. 3Naanyobɔɔ afɔle kooloo lɛ mli nibii ni sa akɛ ashãa ahãa Yehowa ji fɔ fɛɛ ni ha mlinii lɛ he lɛ 4kɛ esabai enyɔ lɛ kɛ fɔ ni yɔɔ amɛhe lɛ, kɛ loo ni tsa mlɛbo lɛ. Ajie loo nɛɛ akɛfata sabai lɛ ahe. 5Osɔfoi lɛ kɛshwie afɔleshãa latɛ lɛ nɔ koni ashã: shãa afɔle ni jeɔ ŋma ewoɔ Yehowa ni.
6“Kɛji mɔ lɛ miiba ebashã naanyobɔɔ afɔle ehã Yehowa kɛ gwantɛŋi loo abotiai lɛ ateŋ eko lɛ, kooloo lɛ nuu ni jio, yoo ni jio, efee kooloo ni kpa ko bɛ ehe. 7Kɛji mɔ lɛ hiɛ gwantɛŋ kɛba afɔleshãa lɛ, no lɛ ekɛba Yehowa hiɛ, 8ni ekɛ enine aŋmɛ kooloo lɛ yitso nɔ, ni egbe lɛ yɛ Kpee Buu lɛ shinaa lɛ hiɛ. Osɔfoi lɛ kɛ kooloo lɛ lá lɛ ashwã afɔleshãa latɛ lɛ he koji lɛ ahe kɛkpe. 9Naanyobɔɔ afɔle kooloo nɛɛ mli nibii ni sa akɛ ashãa ahã Yehowa ji emli fɔ lɛ kɛ elei muu ni ajie kɛjɛ ekotosɛɛ wu lɛ tɔ̃ɔ nɔ, kɛ fɔ ni yɔɔ mlinii lɛ ahe lɛ, 10kɛ esabai enyɔ lɛ kɛ fɔ hu ni yɔɔ amɛhe, kɛ loo ni tsa mlɛbo lɛ nɔ lɛ. Ajie loo nɛɛ akɛfata sabai lɛ ahe. 11Osɔfo ni yɔɔ nitsumɔ nakai gbi lɛ nɔ lɛ ashã yɛ afɔleshãa latɛ lɛ nɔ akɛ niyenii afɔle ni aashã akɛhã Yehowa.
12“Kɛji mɔ lɛ kɛ abotia ba afɔleshãa lɛ, no lɛ ekɛbahã yɛ Yehowa hiɛ. 13Ekɛ enine aŋmɛ kooloo lɛ yitso nɔ, ni egbe lɛ yɛ Kpee Buu lɛ hiɛ. Osɔfoi lɛ kɛ kooloo lɛ lá lɛ ashwã afɔleshãa latɛ lɛ koji ejwɛ lɛ he kɛkpe. 14Kooloo lɛ mli nibii ni ekɛbaahã akɛ afɔle ni ashã ahã Yehowa ji fɔ ni ha mlinii lɛ he lɛ, 15kɛ esabai enyɔ lɛ kɛ fɔ hu ni ha amɛhe, kɛ loo ni tsa mlɛbo lɛ nɔ lɛ. Ajie loo nɛɛ akɛfata sabai lɛ ahe. 16Osɔfo lɛ ashã fɛɛ yɛ afɔleshãa latɛ lɛ nɔ akɛ niyenii afɔle ni ashãa kɛŋma akɛhã Yehowa. Fɔ lɛ fɛɛ lɛ Yehowa nɔ ni. 17#Jɛn 9.4; Lev 7.23, 26; 17.10-14; Deut 12.23; Bɔf 15.20, 29 Israelbii akaye kooloo fɔ loo lá. Enɛ atsɔ̃ akpɔ ni akã shi ahã nyɛ kɛ nyɛshwiei fɛɛ kɛmiiya naanɔ yɛ he fɛɛ he ni nyɛaahi.”
Bible in Ga Language © Bible Society of Ghana, 2020.