Yesaia 9

1Shi kɛ̃lɛ duŋ kabitii lɛ woŋ mɔ ni aaahi jaramɔ mli lɛ he gbeyei.

Wɔsɛɛ Maŋtsɛ lɛ

Sa lɛ eha Zebulon kɛ Naftali fɛɛ hiɛ shwie shi; shi agbɛnɛ eeewo ŋshɔnaa shikpɔŋ lɛ, Yordan sɛɛ shikpɔŋ lɛ, jeŋmaji Galilea lɛ, hiɛ nyam.

2 # Mat 4.15; Luk 1.79 Mɛi ni nyiɛ duŋ mli lɛ,

ena la kpeteŋkple ko;

mɛi ni hi duŋ kabitii shikpɔŋ

nɔ lɛ,

la ekpɛ ehã amɛ.

3Ohã maŋbii lɛ ayi efa,

Ohã amɛnyamɔ efa.

Amɛmiinya yɛ ohiɛ

tamɔ anyaa yɛ nikpamɔ be mli,

loo tamɔ mɛi nyaa

kɛji amɛmiija haanii.

4 # Koj 7.22 Ejaakɛ amɛkɔŋtso ni tsɔ̃ jatsu lɛ,

kɛ amɛkpalamɔ tso lɛ

kɛ amɛnɔyelɔ lɛ dɛŋ kpãa lɛ

okumɔ fɛɛ mli,

tamɔ ofee Midian ta lɛ.

5Ejaakɛ aspaatre fɛɛ aspaatre

ni tabilɔ kɛbaashimɔ shi

yɛ ta lɛ mli

kɛ atade fɛɛ atade ni lá

ewu mli lɛ,

akɛbaafee lai ni ashã.

6 # Mika 5.1; Luk 2.7, 11 Ejaakɛ afɔ bi ahã wɔ!

Afɔ binuu ahã wɔ.

Elumɔyeli kã ekɔŋ.

Abaatsɛ lɛ “Naakpɛɛ Ŋaawolɔ,”

“Nyɔŋmɔ Hewalɔ, Naanɔtsɛ,

Hejɔlɛ Lumɔ.”

7 # Lal 72.3-4; 2 Sam 7.12, 16; Luk 1.32 Emaŋtsɛyeli lɛ shweremɔ

kɛ edɛŋ toiŋjɔlɛ lɛ,

esɛɛ efoŋ yɛ David

maŋtsɛ sɛi lɛ nɔ,

kɛ emaŋtsɛyeli hei fɛɛ.

Ekɛ jalɛ saneyeli kɛ nɔ ni

ja feemɔ

baahã emaŋtsɛyeli lɛ

ama shi kɛya naanɔ.

Yehowa, Taiatsɛ lɛ, kɛ hiɛdɔɔ baafee enɛ.

Yehowa baagbala Israel toi

8Nuŋtsɔ lɛ kɛ wiemɔ emaje ekɛmiishi Israel, ni ji Yakob shwiei lɛ, 9ni Efraimbii kɛ mɛi ni yɔɔ Samaria fɛɛ aaana ale, amɛ mɛi ni amɛkɛ henɔwomɔ kɛ hewoo jwɛŋmɔ kɛɔ akɛ, 10“Brikisi tsui lɛ ekumɔ, shi wɔ lɛ wɔkɛ tɛ ni ako baatswa tsui lɛ, ni atoo sikamore tsei lɛ ashwie shi, shi wɔ lɛ, wɔɔtɛo tsenedru tsei yɛ amɛnajiaŋ.”

11Yehowa aaatee henyɛlɔi ashi awo amɛ. 12Siriabii miijɛ bokãgbɛ, ni Filistibii hu miijɛ anaigbɛ amɛba kɛ amɛdaaŋ ni amɛgbɛ hatoo amɛkɛbami Israel. Kɛ̃lɛ fɛɛ sɛɛ lɛ Yehowa mlifu lɛ naa ejɔŋ; etoigbalamɔ nine lɛ ekpã mli lolo. 13Israelbii lɛ kpaleee amɛbaaa mɔ ni gbala amɛtoi lɛ ŋɔɔ lɛ, amɛtaooo Yehowa, Taiatsɛ lɛ, sɛɛgbɛ. 14Hewɔ lɛ gbi kometoo nɔ lɛ Yehowa baafo Israel yitso kɛ elei fɛɛ; ebaafo blɛo kɛ glã fɛɛ gbi kome. 15Maŋ onukpa kɛ hiɛnaanɔ gbɔmɔ ji yitso lɛ, ni gbalɔ ni tsɔ̃ɔ amale tsɔ̃ɔmɔ lɛ, lɛ ji lei lɛ. 16Ejaakɛ mɛi ni nyiɛ maŋbii lɛ ahiɛ lɛ ehã maŋbii lɛ edu gbɛ, ni amɛ mɛi ni anyiɛ amɛhiɛ lɛ ahiɛ ekpãtã. 17No hewɔ lɛ, Nuŋtsɔ lɛ naŋ amɛblahii lɛ ahe miishɛɛ, ni emusuŋ etsɔŋ lɛ yɛ amɛwusãi kɛ amɛkulafoi lɛ ahe. Ejaakɛ amɛteŋ mɔ fɛɛ mɔ lɛ, ebɛ Nyɔŋmɔ gbeyeishemɔ, ni asaŋ efɔŋfeelɔ ni, ni mɔ fɛɛ mɔ wieɔ kwashiai awiemɔ. Kɛ̃lɛ fɛɛ sɛɛ lɛ Yehowa mlifu lɛ ejɔŋ; etoigbalamɔ nine lɛ ekpã mli lolo.

18Maŋbii lɛ ayitsoŋwalɛ tsoɔ tamɔ la. Eshãa kpitikpitii kɛ ŋmeii fɛɛ; esɔoɔ koo hayii anaa la, ni elasu pukɔŋŋ lɛ teɔ shi kɛyaa ŋwɛi. 19Yehowa, Taiatsɛ lɛ, mlifu lɛ naa lɛ, shikpɔŋ lɛ shã. Maŋbii lɛ tsɔ̃ tamɔ latso ni tsoɔ; mɔ ko mɔ ko yeee buaa enyɛmi. 20Amɛaashara nii amɛye yɛ ninejurɔgbɛ, shi hɔmɔ aaaye amɛ kɛ̃, ni amɛaaye nii yɛ amɛbɛkugbɛ hu, shi amɛtɔrɔŋ. Mɔ fɛɛ mɔ aaaye enaanyo loo. 21Manase aaate shi awo Efraim, ni Efraim hu aaatua Manase, ni amɛyi enyɔ lɛ fɛɛ amɛaate shi amɛwo Yuda. Kɛ̃lɛ enɛ fɛɛ sɛɛ lɛ Yehowa mlifu lɛ ejɔŋ, ni etoigbalamɔ nine lɛ ekpã mli lolo.

Currently Selected:

Yesaia 9: NEGAB

Highlight

Copy