Yesaia 5

Waintrom he lala

1Hã mala suɔmɔ lala

mahã mishieŋtsɛ lɛ

yɛ ewaintrom lɛ he.

Mishieŋtsɛ lɛ yɛ waintrom

yɛ gɔŋ ni baa nii jogbaŋŋ nɔ.

2 # Mat 21.33; Mar 12.1; Luk 20.9 Etsa mli, ni efamɔ emli tɛi

ni etɛo waintsei kpakpai yɛ mli;

ema mɔɔ yɛ teŋ,

ni etsa wain bu hu yɛ mli.

Ehiɛ kã nɔ akɛ trom lɛ baawo

wainyibii kpakpai,

shi ewo kooŋ wainyibii moŋ.

3No hewɔ lɛ, nɔ ni mishieŋtsɛ lɛ kɛɔ nɛ, “Agbɛnɛ nyɛ Yerusalɛmbii kɛ nyɛ Yudabii, nyɛ fai nɛ, nyɛkojoa mi kɛ miwaintrom lɛ teŋ. 4Mɛni esa akɛ afee mitrom lɛ lolo ni mifeko? Be ni mihiɛ kã nɔ akɛ ewo wainyibii kpakpai lɛ, mɛni hewɔ ni ewo kooŋ wainyibii moŋ nɛɛ?

5“Agbɛnɛ mibatsɔ̃ɔ nyɛ nɔ ni mibafee miwaintrom lɛ. Mibajie ehe afabaŋ lɛ koni kooloi akpãtã ehiɛ. Mibakumɔ ehe gbogbo lɛ hu koni anaanaa enɔ kɛho. 6Mibahã emli atsa; akpɔlɔŋ emli tsei lɛ ahe, ni ahuŋ he; kpitikpitii kɛ ŋmeii baatsa yɛ mli. Mibawo atatui lɛ kitã akɛ amɛkanɛ nu amɛshwie nɔ.”

7Israel ji Yehowa, Taiatsɛ lɛ,

waintrom lɛ,

ni Yudabii lɛ ji waintsei kpakpai

ni etɛo lɛ;

ni ekwɛ jalɛ saneyeli gbɛ

ni naa lashishwiemɔ moŋ ena,

ni yɛ ekpakpafeemɔ najiaŋ lɛ,

yaafo moŋ afo!

Efɔŋ ni adesa feɔ

8Kpoo hã nyɛ, nyɛ mɛi ni nyɛheheo mɛi ashĩai nyɛfataa shĩai ni nyɛyɔɔ ahe, ni nyɛŋɔɔ mɛi aŋmɔji nyɛfataa nyɛŋmɔji ahe. Nyɛhiɛ nɛkɛ ni eshwɛŋ shikpɔŋ ko dɔŋŋ yɛ he ko ni abaashi nyɛ pɛ koni nyɛhi shikpɔŋ lɛ nɔ. 9Yehowa, Taiatsɛ, wie yɛ mi diɛŋtsɛ mitoiŋ akɛ, “Bɔ fɛɛ bɔ ni fee lɛ, shĩai pii baatsɔmɔ amaŋfɔ̃, shĩai wuji fɛɛfɛji baakamɔ shi ni gbɔmɛi bɛ mli. 10Ejaakɛ waintrom kpãi nyɔŋma dalɛ, wain litai kpaanyɔ pɛ abaana kɛjɛ mli, ni abele kiloi oha kɛ nyɔŋmai kpaanyɔ ni adu lɛ, abaana abele kiloi nyɔŋma kɛ kpaanyɔ pɛ kɛjɛ mli.”

11Ni kpoo hã mɛi ni teɔ shi maŋkɛ mra ni amɛyanyiɛɔ dãatseiaŋ, mɛi ni taraa shi yɛ dãa he kɛyashiɔ jenamɔ yi waa, ni wain hãa amɛhiɛ feɔ laŋlaŋ. 12#Amos 6.5-6; Lal 28.5 Amɛkɛ saŋku kɛ obenta kɛ milɛ̃ kɛ blɛ kɛ wain yeɔ amɛgbiijuji lɛ, shi amɛbuuu Yehowa, nifeemɔnii, ni amɛnãaa eninenaa nitsumɔi lɛ hu. 13No hewɔ lɛ, abaaŋɔ miwebii lɛ nom, ejaakɛ amɛleee nii. Hɔmɔ miigbe amɛhiɛnaanɔbii lɛ, ni maŋbii babaoo baagboi kɛ kumai. 14No hewɔ lɛ, gbohiiaje elɛɛ esɛŋ, ni egbɛ edaaŋ hatoo fe nine kɛmiimɛ Yerusalɛm lumɛi lɛ kɛ esafo yuu lɛ kɛ mɛi ni feɔ hoo lɛ kɛ mɛi ni mli filiɔ amɛ lɛ koni emi amɛ.

15Abaawo mɔ fɛɛ mɔ hiɛgbele, ni abaaba nuu fɛɛ nuu shi, ni hewolɔi lɛ hu aaaba amɛ shi. 16Shi Yehowa, Taiatsɛ lɛ, jieɔ egbojee kpo kɛtsɔ̃ jalɛnii ni efeɔ nɔ, ni Nyɔŋmɔ Krɔŋkrɔŋ lɛ tsɔ̃ɔ akɛ ehe tse krɔŋkrɔŋ lɛɛlɛŋ kɛtsɔ̃ jalɛ sane ni eyeɔ lɛ nɔ. 17Too gwantɛŋbii aaaye nii yɛ ŋa nɔ he ni jwɛifɔ yɔɔ, ni abotiabii ni eshwishwii aaaye nii kɛnyiɛ amaŋfɔ̃ tsui koi lɛ ateŋ.

18Kpoo hã mɛi ni kɛ amale kpãa gbalaa nɔsha, ni amɛkɛ shwiili he taŋkpee diɛŋtsɛ gbalaa esha lɛ. 19#Yer 17.15; 2 Pet 3.4 Amɛkɛɔ akɛ, “Yehowa he afee oya; nɔ ni eto akɛ ebaafee lɛ, efee koni wɔkwɛ. Ha ni Israel Mɔ Krɔŋkrɔŋ Koome lɛ yiŋ ni eto lɛ abɛŋkɛ wɔ ni aba mli koni wɔle.”

20Kpoo hã mɛi ni tsɛɔ nɔ fɔŋ akɛ nɔ kpakpa ni amɛtsɛɔ nɔ kpakpa akɛ nɔ fɔŋ lɛ. Kpoo hã mɛi ni ŋɔɔ duŋ amɛfeɔ la, ni amɛŋɔɔ la hu amɛfeɔ duŋ lɛ. Kpoo hã mɛi hu ni ŋɔɔ nɔ ni joɔ amɛfeɔ nɔ ni ŋɔɔ, ni amɛŋɔɔ nɔ ni ŋɔɔ amɛfeɔ nɔ ni joɔ lɛ.

21 # Abɛi 3.7; Rom 12.17 Kpoo hã mɛi ni buɔ amɛhe nilelɔi kɛ mɛi ni tsɛɔ amɛhe hiɛtɛ̃lɔi lɛ!

22Kpoo hã mɛi ni feɔ ekãa kɛ wainnumɔ! Kpoo hã mɛi ni waa amɛ kɛ dãa ni wa futumɔ! 23Kpoo hã mɛi ni heɔ nyɔɔŋnii ni no hãa amɛŋmɛɔ mɔ ni efe efɔŋ he tswaa lɛ, ni amɛhãa mɔ ni sane ja gbɛnaanii ŋmɛɔ lɛ lɛ! 24No hewɔ lɛ, bɔ ni lalilɛi shãa gbetseli, ni la ni tsoɔ shãa jwɛi gbiŋ lɛ, nakai nɔŋŋ amɛfãi lɛ aaakpɔtɔ, ni kɔɔyɔɔ baatswa amɛfofro lɛ ashwie, ejaakɛ amɛkwa Yehowa, Taiatsɛ, mla lɛ, ni amɛgbe Israel Mɔ Krɔŋkrɔŋ Koome lɛ wiemɔ lɛ he guɔ. 25Enɛ hewɔ lɛ, Yehowa mli fu ewebii lɛ, ni ewo enine nɔ yɛ amɛnɔ, ni egbala amɛtoi. Gɔji lɛ hoso, ni amɛgbohii lɛ jwere blohui amli oookɛɛ shĩaŋ jwɛi ni abɛɛ ashwie. Shi fɛɛ sɛɛ lɛ Yehowa mlifu lɛ naa bako shi, shi ekpã enine lɛ mli lolo.

26Yehowa baato okadi ekɛtsɛ maŋ ko ni yɔɔ shɔŋŋ; ebaakpã blɛ ekɛtsɛ lɛ kɛjɛ jeŋ naagbeehe lɛ. Ni naa, maŋ nɛɛ baafee oya aba mramra. 27Etɔŋ amɛteŋ mɔ ko mɔ ko, ni amɛteŋ mɔ ko mɔ ko tɛŋ; amɛteŋ mɔ ko hɛfiinii fɛneŋ, mɔ ko mɔ ko tokota naa kpãa tseŋ. 28Amɛgãimlibii anaa ba, ni amɛtataa amɛgãi lɛ; amɛkpɔŋɔ akoklotoi tamɔ tswɛrɛbo, ni amɛshwiilii anaji lɛ tsɔ̃mɔɔ amɛhe oyaoya tamɔ lasuogbele. 29Amɛhuuɔ tamɔ jata, amɛhuuɔ tamɔ jata oblahii pɛ; amɛshiɔ amɛsɛŋ ni amɛyeɔ kooloo ni amɛgbɔbiɔ lɛ nɔ, ni amɛmɔɔ lɛ kɛyaa, ni mɔ ko nyɛɛɛ kooloo ni amɛmɔ lɛ yiwala ahere.

30Amɛaashi amɛsɛŋ amɛwo Israel nakai gbi lɛ, ni amɛsɛŋshimɔ lɛ aaagbɛɛ tamɔ ŋshɔ gbɛɛmɔ. Ni kɛji akwɛ shikpɔŋ lɛ nɔ lɛ, nɔ ni aaana ji duŋ kɛ awerɛhoo sɔŋŋ, ni oblɔtu aaaha hulu la hiɛ.

Currently Selected:

Yesaia 5: NEGAB

Highlight

Copy