Yesaia 30
30
Akɛ Ijipt kpãŋ yaka
1Yehowa kɛɛ akɛ, “Kpoo hã bii kaniŋkajelɔi ni yaa ajina ni mi, mibɛ mli, ni amɛkpãŋɔ kpãŋmɔi ni jeee mitsui naa yiŋtoi ni, ni amɛkɛfeɔ esha amɛshiɔ esha nɔ. 2Amɛyiŋ amɛtee Ijipt, be mli ni amɛbiii mi ŋaawoo, koni amɛyaba Ijipt maŋtsɛ abo koni amɛyatao teemɔhe yɛ Ijipt. 3Shi Ijipt maŋtsɛ lɛ hewalɛ lɛ aaahã nyɛhiɛ agboi, ni Ijipt abo ni nyɛyaabɔ lɛ aaahã nyɛhiɛ agboi. 4Ejaakɛ eyɛ mli akɛ amɛlumɛi lɛ eshɛ Zoan, ni amɛbɔfoi lɛ hu eshɛ Hanes, ni ji Ijipt maji wuji lɛ anɔ nɛ, 5kɛ̃lɛ amɛ fɛɛ amɛhiɛ aaagboi yɛ maŋbii ni he bɛ sɛɛnamɔ ko hã amɛ lɛ hewɔ; amɛyeŋ amɛbuaŋ amɛ, ni amɛnaŋ amɛhe sɛɛ ko; shi hiɛgbele kɛ ahorabɔɔ moŋ amɛaana.”
6Kooloi ni yɔɔ wuoyigbɛ shiaŋa lɛ mli lɛ ahe ninaa nɛ, “Amɛtsɔ̃ɔ haomɔ kɛ hejaramɔ shikpɔŋ lɛ nɔ, he ni jatayoo kɛ jatanuu hũuɔ yɛ, he ni shinɔ kɛ onufu filikilɔ yɔɔ lɛ, ni amɛloɔ amɛnii ni amɛna lɛ amɛtereɔ tejibii ni amɛkɛ amɛjwetrii tereɔ yoomai kɛyaa maŋ ko ni he bɛ sɛɛnamɔ kɛha amɛ lɛ ŋɔɔ. 7#Lal 87.4; 89.11 Akɛni Ijipt dɛŋ yelikɛbuamɔ lɛ bɛ fɛifɛi, ni enyɛɛɛ nɔ ko nɔ ko etsu hewɔ lɛ, mitsɛɔ lɛ ‘Naafuutsɛ ni etĩii ehe.’ ”
Maŋbii toigbolɔi
8Kɛkɛ ni Nyɔŋmɔ kɛɛ mi akɛ, “Agbɛnɛ yaa ni oyaŋma yɛ tɛi tɛtɛrɛbii anɔ yɛ amɛhiɛ, ni oŋma owo wolo mli koni ekã shi akɛ odaseyelinɔ ehã wɔsɛɛ be kɛya naanɔ. 9Ejaakɛ gbɔmɛi atuatselɔi, bii amalelɔi ni amɛkpɛlɛ̃ɛɛ Yehowa toiboo ji amɛ. 10Amɛkɛɔ ninalɔi lɛ akɛ, ‘Nyɛkanaa nii’ ni amɛkɛɔ gbalɔi lɛ hu akɛ, ‘Nyɛkagbaa anɔkwale gbalɛ nyɛtsɔa wɔ; shi moŋ nyɛkɛ wɔ awiea wiemɔi ni ŋɔɔ; nyɛgbaa shishiumɔ gbalɛi moŋ; 11nyɛshĩa gbɛ lɛ, nyɛgbaa afã kɛjea tɛmpɔŋ lɛ nɔ; nyɛ kɛ wɔ akawiea Israel Mɔ Krɔŋkrɔŋ lɛ he dɔŋŋ.’ ”
12No hewɔ lɛ, agbɛnɛ nɔ ni Israel Mɔ Krɔŋkrɔŋ lɛ kɛɔ nɛ, “Akɛni nyɛkwa wiemɔ nɛɛ, ni nyɛkɛ nyɛhiɛ fɔ̃ yiwalɛ kɛ kutumpɔo nɔ, asaŋ nyɛshwãa hu nyɛfɔɔ nɔ, 13hewɔ lɛ nɔsha ni nyɛfee nɛɛ aaahã nyɛtsɔ̃ tamɔ gbogbo gojoo ni mli egba, ni ekpa, ni eehe egbee shi, ni trukaa hiŋmɛitswaa mli lɛ eeekumɔ eshwie shi. 14Ekuumɔ lɛ aaafee tamɔ gbɛshɔ̃lɔ gbɛ ni ajwara lɛ wɔtsɔwɔtsɔ bɔ ni anaaa eŋɛsuko kome po nɛkɛ kɛkɛ yɛ ekoi lɛ amli ni aaanyɛ akɛje la yɛ latɛ mli, aloo akɛyɛ nu yɛ dudɔ mli tete.”
15 #
Ɛks 14.14
Bɔ ni Nuŋtsɔ Nyɔŋmɔ, Israel Mɔ Krɔŋkrɔŋ lɛ, kɛɔ nɛ, “Sɛɛkuu kɛbaa kɛ diŋŋfeemɔ mli nyɛyi aaana wala yɛ; kpoofeemɔ kɛ hiɛnɔkãmɔ mli nyɛhewalɛ yɔɔ. Shi moŋ nyɛkwa, 16ni nyɛkɛɛ akɛ, ‘Dabida! Wɔɔtara okpɔŋɔi anɔ kɛjo foi.’ No hewɔ lɛ, foi kɛ̃ nyɛaajo. Ni nyɛkɛɛ hu akɛ ‘Wɔɔtara okpɔŋɔi ni foijee naa wa nɔ.’ No hewɔ lɛ, mɛi ni aaatiu nyɛ lɛ hu afoijee naa baawa. 17#Lev 26.36 Gbɔmɔ kometoo yiŋaa naa lɛ, mɛi akpe aaajo foi; nyɛ fɛɛ nyɛaajo foi kɛji mɛi enumɔ ŋa nyɛyi kɛyaashi beyinɔ ni aaashwɛ mɛi fioo tamɔ aflaŋaa tso ni ma gɔŋ yiteŋ, loo tamɔ aflaŋaa ni ma gɔŋkpɔ yiteŋ. 18No hewɔ lɛ, Yehowa miimɛ koni eduro nyɛ, ni no hewɔ lɛ, efee kralo koni ena nyɛ mɔbɔ, ejaakɛ Yehowa lɛ Nyɔŋmɔ ni yeɔ jalɛ sane ni. Ajɔɔ mɛi fɛɛ ni hiɛ kã enɔ lɛ.”
Nyɔŋmɔ baajɔɔ emɛi lɛ
19Ao nyɛ Zionbii ni nyɛyɔɔ Yerusalɛm, nyɛwoŋ yara nyɛfoŋ dɔŋŋ. Emusuŋ baatsɔ̃ lɛ yɛ nyɛhe kɛji nyɛbolɔ nyɛtsɛ lɛ. Kɛji enu blɔmɔ lɛ, eeehã nyɛ hetoo. 20Yɛ mli akɛ Nuŋtsɔ lɛ ehã amanehulu kɛ haomɔ eba nyɛnɔ moŋ nɛ, shi nyɛ-Tsɔɔlɔ lɛ eteŋ ehe dɔŋŋ, shi nyɛhiŋmɛii aaana nyɛ-Tsɔɔlɔ lɛ. 21#Deut 5.29; 28.14 Ni ninejurɔgbɛ esa akɛ nyɛtsɔ jio, abɛkugbɛ esa akɛ nyɛtsɔ jio, nyɛtoii aaanu wiemɔ ko yɛ nyɛsɛɛgbɛ akɛ, “Gbɛ lɛ nɛ, nyɛyia nɔ!” 22#Jɛn 35.2, 4 Kɛkɛ lɛ nyɛaabule nyɛmãgãi ni ashwie he jwiɛtɛi kɛ amãgãi ni ashwie he shika lɛ hu. Nyɛaashɛrɛ amɛ nyɛshwie tamɔ nibii ni ahe tseee; nyɛaakɛɛ akɛ, “Aloo amɛ ashwie kɛje wɔhiɛ.” 23Eeehã nu anɛ ashwie nyɛdumɔ wui ni nyɛdu lɛ nɔ, kɛ ŋmãa ni ekwɛ̃ lɛ nɔ, ni amɛaawo yibii babaoo. Nakai be lɛ mli lɛ, nyɛtsinai lɛ aaaye nii yɛ ŋa ni lɛɛ nɔ, 24ni nyɛtsinai kɛ tejii ni akɛhuɔ lɛ aaaye nii ni ŋoo yɔɔ mli, ní akɛ sofi kɛ ŋmɔshi faka esha mli. 25Ni gbi nɔ ni aaaplene gbɔmɛi babaoo, ni amɛmɔji lɛ aaagbeegbee shi lɛ, faa baaho yɛ gɔji grɔŋŋi fɛɛ kɛ gɔ̃ŋkpɔi ni kwɔlɔ fɛɛ anɔ. 26Ni nyɔɔŋtsere aaakpɛ tamɔ hulu tsoɔ, ni hulu aaatso bɔ ni etsoɔ daa lɛ toi kpawo, tamɔ gbii kpawo mli hulutsoo ni abua naa, gbi ni Yehowa aaafimɔ emaŋ lɛ pilamɔi anɔ, ni eeetsa faji ni ewo amɛ be ni etswia amɛ nii lɛ.
Nyɔŋmɔ baagbala Asiria toi
27Naa Yehowa hewalɛ jɛ shɔŋŋ miiba! Emlifu miitso, ni eeje lasu kpɔŋŋ; enaa miitswa afui kɛ mlila, ni elilɛi tamɔ la ni kpãtãa nii ahiɛ. 28Emumɔ ni emuɔ lɛ tamɔ faa ni eyi kɛbata kuɛ, ni ebaakpãtã maji ahiɛ koni ekɛsha amɛmli tamɔ akɛ shaanii shaa nii amli lɛ. Ebaawo majimaji lɛ adaaŋ manyoflɛ koni ekpala amɛ kɛya. 29Nyɛaala lala ko tamɔ bɔ ni alaa nyɔɔŋ kɛji aaye gbijurɔ krɔŋkrɔŋ ko lɛ. Kɛkɛ lɛ nyɛtsui aaayimɔ kɛ miishɛɛ tamɔ mɛi ni aakpã blɛ aahã amɛ, be mli ni amɛnyiɛ kɛyaa Yehowa, ni ji Israel Tɛsaa lɛ, we lɛ.
30Ni Yehowa aaahã anu enunyam gbee lɛ, ni eeehã ana ehewalɛ nine ni kpelekeɔ shi lɛ kɛ emlifu ni naa wa lɛ; la ni kpãtãa nii ahiɛ aaatso, ni atatui aaaflɛ, ni nu kɛ nyɔŋmɔŋtɛi aaanɛ. 31Asiriabii aaayoyoro kɛji amɛnu Yehowa gbee lɛ, be ni ebaatswa amɛ nɔ kɛgbala amɛtoi lɛ. 32Bɔ ni miji kɛ saŋkui agbɛɛmɔ nyiɛɔ lɛ, nakai Yehowa baatswa amɛ kpãa kɛgbala amɛtoi. Yehowa diɛŋtsɛ kɛ Asiriabii lɛ baawu. 33#Kpoj 19.20 Ejaakɛ kɛjɛ jeeŋmɔ beebe ni asaa he ko ato kɛha Asiria maŋtsɛ lɛ shãa. Jɛi kwɔ, ni elɛɛ, ni eyi kɛ la kɛ lai babaoo. Ni Yehowa mumɔ ni emuɔ ni tamɔ la lɛ baama laii lɛ anaa la.
Currently Selected:
Yesaia 30: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
