Yesaia 23
23
Tiro he gbalɛ
1 #
Eze 26.1—28.19; Yoel 3.4-8; Amos 1.9-10; Zak 9.1-4; Mat 11.21-22; Luk 10.13-14 Nyɛ Tiro lɛji amli asrɛfoi, nyɛwoa yara nyɛfoa, ejaakɛ akpãtã nyɛmaŋ Tiro lɛji amaamɔhe lɛ hiɛ. Ajɛ Kipro shikpɔŋ lɛ nɔ ahã amɛle nɔ ni eba lɛ. 2Ao nyɛ ŋshɔnaabii, Ao Sidon jarayelɔi, nyɛfea kpoo! Nyɛtsulɔi lɛ tsɔ̃ ŋshɔ hiɛ, 3ni amɛnyiɛ fai wuji hu ahiɛ amɛye jara. Amɛye Shihor abele, ni ji Nilo Faa lɛ he nikpamɔnii lɛ, jara. Nyɛ kɛ majimaji ye jara.
4Ao Sidon, ohiɛ agbo; ejaakɛ ŋshɔ ewie, ŋshɔ shishi diɛŋtsɛ ewie akɛ, “Mikɔ̃mɔko dã, asaŋ mifɔko dã. Milɛko oblahii dã lɛ, milɛko oblayei hu dã.”
5Kɛji sane lɛ yashɛ Ijipt lɛ, jɛibii baahao yɛ Tiro sane ni abagba lɛ hewɔ.
6Nyɛ Foinikiabii ni kã ŋshɔnaa, nyɛwoa lele, nyɛjoa foi kɛyaa Tarshish. 7Kwɛ, nyɛmaŋ ni ji blema maŋ Tiro kɛ emli miishɛɛ babaoo lɛ ni yato gbɔ yɛ maŋsɛɛ nɔŋŋ nɛ. (Tiro) 8#Kpoj 18.23 Namɔ to nɛkɛ yiŋ yɛ Tiro he, lɛ maŋ ni etoɔ maŋtsɛmɛi, maŋ ni ejarayelɔi lɛ lumɛi sɔŋŋ ni lɛ, ni eguɔyelɔi ahiɛ ba nyam yɛ shikpɔŋ muu lɛ fɛɛ nɔ lɛ? 9Yehowa, Taiatsɛ lɛ, ni to nɛkɛ yiŋ. Eto yiŋ nɛɛ koni ekɛba amɛhe ni amɛwoɔ, yɛ hiɛnyam ni amɛna hewɔ lɛ shi, bɔ ni afee ni shikpɔŋ lɛ nɔ anunyam gbɔmɛi fɛɛ ahiɛ agboi.
10 #
Hiob 12.18, 21 Ao Tarshishbii, nyɛyaa shikpɔŋ lɛ nɔ ni nyɛyahua; nɔ ko nɔ ko bɛ ni tsĩɔ nyɛ gbɛ dɔŋŋ. 11Yehowa ewo enine nɔ yɛ ŋshɔ nɔ, ni ehoso maŋtsɛyelii. Efã akɛ afite Kanaan mɔji lɛ. 12#Eze 28.21 Ekɛɛ akɛ, “Ao Sidon, ni awaa obii yi, omli akafili bo dɔŋŋ! Sidonbii, nyɛtea shi koni nyɛyaa Kipro, shi jɛi hu nyɛnaŋ hejɔlɛ.”
13Naa Babilonbii ashikpɔŋ lɛ. Babilonbii lɛ ji mɛi ni hã jwɛiaŋ kooloi kakawuai kpãtã Tiro maŋ lɛ hiɛ lɛ, shi jeee Asiriabii lɛ. Babilonbii lɛ mamɔ amɛ diɛŋtsɛ amɛmɔji ni kwɔlɔ, ni amɛkumɔ Tiro mɔji ni yɔɔ sa lɛ, ni amɛhã Tiro fee koikoi.
14Ao Tarshish lɛji amli bii, nyɛwoa lele, ejaakɛ akpãtã nyɛmɔji lɛ ahiɛ.
15Kɛjɛ nakai be lɛ, hiɛ aaakpa Tiro nɔ kɛyaashi afii nyɔŋmai kpawo, ni ji be ni maŋtsɛ kome yeɔ yɛ maŋtsɛ sɛi nɔ lɛ. Afii kpawo lɛ naagbee lɛ, Tiro sane baatsɔ̃ tamɔ bɔ ni alaa yɛ yoo ajwamãŋ he akɛ, 16“Ajwamãŋ ni hiɛ ekpa onɔ,
kɔ saŋku koni okɛyakpa maŋ lɛ mli.
Tswaa saŋku lɛ jogbaŋŋ,
ni ola lalai babaoo
bɔ ni afee ni akai bo ekoŋŋ.”
17Afii nyɔŋmai kpawo lɛ naagbee lɛ, Yehowa baahã Tiro aku sɛɛ ebɔi ejarayeli lɛ ekoŋŋ. Ebaafee ehe apaafonyo ehã shikpɔŋ lɛ nɔ maŋtsɛyelii fɛɛ. 18Tiro baajɔɔ ejarayeli mli nii kɛ apaa ni abaabɔ lɛ mli nii hu nɔ ehã Yehowa. Atĩaŋ esɛɛnamɔ lɛ naa amaŋ shi, shi ejarayeli lɛ mli nii baahã ana niyenii babaoo kɛ mamai fɛɛfɛji ahã mɛi ni sɔmɔɔ Yehowa lɛ.
Currently Selected:
Yesaia 23: NEGAB
Highlight
Share
Copy
Want to have your highlights saved across all your devices? Sign up or sign in
Bible in Ga Language © Bible Society of Ghana, 2020.
