Hosea 7
7
1“Kɛ mito miyiŋ akɛ matsa mimɛi Israelbii lɛ koni amɛshwere pɛ, kɛkɛ lɛ Efraim kɛ Samaria nifɔɔjianii lɛ eje kpo: no ji mɔshishiumɔ kɛ juu kɛ ojotswaa yɛ gbɛteŋ. 2Efeee amɛ kwraa akɛ miina amɛnifɔɔjianii lɛ fɛɛ. Shi naa amɛnifeemɔnii lɛ ebɔle amɛ, ni miikwɛ.”
Atoɔ yitso fɔŋ nigii yɛ Maŋtsɛ we lɛ
3Yehowa kɛɛ akɛ, “Amɛkɛ yiwalɛ nifeemɔi lɛ hãa maŋtsɛ lɛ mii shɛɔ ehe, ni amɛkɛ mɔshishinyiɛmɔ wiemɔ hãa lumɛi hu naa miishɛɛ. 4Amɛtsɔ̃mɔ mɛi ashishinyiɛlɔi kɛ mɛi ni yeee anɔkwa yɛ jamɔ mli. No hewɔ lɛ, amɛtamɔ flɔnɔɔ mli la ni awo ni nishãlɔ eŋmɛɛ he koni etso kɛyashi ma ni akpɔtɔ lɛ aaafu kɛha shãa. 5Gbi nɔ ni maŋtsɛ lɛ ye egbi jurɔ lɛ, lumɛi lɛ kɛ dãatɔɔ wo amɛ nɔŋŋ amɛhe hela. Maŋtsɛ ta fɛoyelɔi tete po adɛ̃. 6Yitso fɔŋ ni amɛto yɛ amɛtsui mli lɛ sukɔɔ yɛ amɛmli nyɔɔŋnyɔɔŋ fɛɛ, ni leebi lɛ etsoɔ grigri tamɔ flɔnɔɔ mli la.
7“Amɛkɛ mlila ni yɔɔ amɛmli lɛ gbegbee amɛnɔyelɔi lɛ. Amɛmaŋtsɛmɛi lɛ fɛɛ nyɔnyɔi, shi amɛteŋ mɔ ko mɔ ko kwraa ebooo etsɛɛɛ mi.”
Israel kɛ maji krokomɛi lɛ
8Yehowa kɛɛ, “Bɔ ni Israel kɛ ehe fufuaa maŋsɛɛ maji anɔbii lɛ, ehã etsɔ̃ tamɔ aboloo ni ebe fã kɛ fã. 9Gbɔi lɛ ehã ehewalɛ etã, shi eyooko; eyiteŋ eje waŋ, shi ekɔɔɔ sɛɛ. 10Israel shwãanii lɛ miiye odase miishi lɛ moŋ, shi kɛ̃lɛ maŋbii lɛ kpaleee koni amɛba mi, Yehowa amɛNyɔŋmɔ lɛ, ŋɔɔ, aloo koni amɛtao misɛɛgbɛ. 11Israel etsɔ̃ tamɔ okpo kwashia ni bɛ yitso: ŋmɛnɛ lɛ eetsɛ Ijipt koni ebawa lɛ; wɔ lɛ eetsɛ Asiria. 12Shi kɛji amɛshi kɛmiiya nɔŋŋ lɛ mibafɔ̃ amɛ nɔ yaa madu amɛ tamɔ aduɔ loofɔlɔ, ni mibagbala amɛtoi yɛ nifɔɔjianii ni amɛfee lɛ ahewɔ.
13“Kpoo hã amɛ ejaakɛ amɛshi mi, ni amɛbɔ ko. Amɛhiɛ ekpãtã ejaakɛ amɛtse mihiɛ atua. Mi lɛ mitao akɛ mahere amɛyiwala; shi amɛ lɛ amɛmalemaleɔ mihe. 14Amɛfooo amɛtsɛɛɛ mi kɛjɛɛɛ amɛtsuiiaŋ; shi moŋ amɛsai anɔ amɛfoɔ waa yɛ. Kɛji amɛmiisɔle yɛ abele kɛ wain he lɛ, amɛkɛ kakla folɔɔ amɛhe tamɔ wɔŋjalɔi lɛ feɔ lɛ. Gbɔmɛi nɛɛ etse mihiɛ atua. 15Yɛ mli akɛ mi ji mɔ ni tsɔse amɛ, ni mihã amɛna hewalɛ nɛ, shi daa nɛɛ lɛ efɔŋ pɛ amɛjwɛŋɔ yɛ mihe. 16#Lal 78.57 Amɛkã he amɛmiija Baal lolo, ni amɛtsɔ̃ tamɔ gãitso ni waaa. Naafuu wiemɔi ni amɛlumɛi lɛ wieɔ lɛ ahewɔ lɛ, amɛaanyɔnyɔi yɛ klante naa. Ni enɛ aaatsɔ̃ nɔ ni akɛaaye amɛhe fɛo yɛ Ijipt shikpɔŋ lɛ nɔ.”
Bible in Ga Language © Bible Society of Ghana, 2020.