Hosea 4
4
Yehowa kɛ sane shi Israel
1Nyɛ Israelbii, nyɛboa nɔ ni Yehowa kɛɔ toi, ejaakɛ Yehowa kɛ shikpɔŋ lɛ nɔ bii lɛ ena. “Anɔkwayeli kɛ mɔbɔnalɛ etã yɛ shikpɔŋ lɛ nɔ; ni aleee Nyɔŋmɔ hu yɛ shikpɔŋ lɛ nɔ. 2Nɔ ni eshwɛ amɛ pɛ ji kitãkãmɔ kɛ amale kɛ mɔgbee kɛ juu kɛ gbãlãfitemɔ; amɛkuɔ mla fɛɛ mla mli, ni amɛshwieɔ lá shi ni eko nyiɛ eko sɛɛ. 3Enɛ hewɔ lɛ, shikpɔŋ lɛ nɔ baagbi, ni enɔ nibii fɛɛ baagboi. Ŋaŋ kooloi kɛ loofɔji kɛ nuŋ loi tete baagboi.”
Yehowa kɛ sane shi Osɔfoi lɛ
4Yehowa kɛɛ akɛ, “Mɔ ko akashwa mɔ ko, ni mɔ ko akakã mɔ ko hiɛ hu, ejaakɛ nyɛ, Osɔfoi lɛ, nyɛ moŋ ji mɛi ni mikɛyɔɔ sane. 5Nyɛ lɛ, nyɛaatɔ̃ shwane, ni gbalɔi lɛ hu kɛ nyɛ baatɔ̃ nyɔɔŋ; no hewɔ lɛ, mibakpãtã Israel, nyɛnyɛ lɛ hiɛ. 6Mimaŋ lɛ hiɛ ekpãtã ejaakɛ amɛleee nii. Akɛni okwa nilee hewɔ lɛ, mi hu miikwa bo akɛ misɔfo; ni akɛni ohiɛ ekpa oNyɔŋmɔ lɛ mla lɛ nɔ hewɔ lɛ, mi hu mihiɛ miikpa obii lɛ anɔ.
7“Bɔ ni amɛ, osɔfoi lɛ, ayi faa lɛ, nakai nɔŋŋ amɛfeɔ esha babaoo amɛshiɔ mi; ni no hewɔ lɛ, mibahã amɛhiɛ nyam lɛ atsɔ̃ hiɛgbele. 8Amɛtsɔ̃ esha ni mimɛi lɛ feɔ lɛ nɔ amɛna nii, ni no hewɔ lɛ, amɛshweɔ akɛ mɛi aya nɔ afee esha. 9Magbala osɔfoi lɛ atoi tamɔ maŋbii lɛ nɔŋŋ yɛ amɛjeŋba hewɔ; mawo amɛnishaianii ni amɛfee lɛ he nyɔmɔ. 10Amɛbaaye nii nɛ, shi amɛtɔrɔŋ, ni amɛaabɔ ajwamãŋ nɛ, shi amɛshwereŋ kɛ bii, ejaakɛ amɛkwa mi, Yehowa, ni amɛtee wɔji moŋ aŋɔɔ.”
Yehowa wie eshi wɔŋjamɔ
11Yehowa kɛɛ akɛ, “Wain momo kɛ wain hee fɛɛ hãa nilee ŋmɛɔ mɔ. 12Mimɛi biɔ tso akɛ egba, ni amɛdɛ̃hiɛmɔtso lɛ gbaa amɛ teemɔŋ saji, ejaakɛ ajwamãŋbɔɔ mumɔ ehã amɛkwa amɛNyɔŋmɔ lɛ; ni amɛdu gbɛ, amɛtee wɔji aŋɔɔ. 13Amɛshã afɔlei yɛ gɔji lɛ ayiteiaŋ, ni amɛshã tsofakɛŋma yɛ gɔ̃ŋkpɔi lɛ anɔ; amɛshã yɛ odum kɛ onyai kɛ papao tsei ashishi, ejaakɛ tsei lɛ ahɔ̃ɔŋ lɛ mli hi.
“Enɛ hewɔ ni nyɛbiyei lɛ bɔɔ ajwamãŋ, ni nyɛbihii aŋamɛi lɛ fiteɔ gbãlã lɛ. 14Shi kɛji nyɛbiyei lɛ bɔ ajwamãŋ lɛ migbalaŋ amɛtoi, ni kɛji nyɛbihii aŋamɛi lɛ hu fite gbãlã lɛ migbalaŋ amɛtoi, ejaakɛ nyɛ, hii lɛ diɛŋtsɛ tete lɛ nyɛ kɛ ajwamãŋi ni yɔɔ jamɔhe lɛ yabɔɔ ajwamãŋ, ni nyɛ kɛ amɛ fɛɛ shãa wɔŋjamɔ afɔlei lɛ. Naa, maŋ ni bɛ jwɛŋmɔ lɛ ehiɛ kpãtãa.
15“Kɛji nyɛ, Israelbii, yeee mi anɔkwa yɛ mi jamɔ mli lɛ, nakai su lɛ akabala Yuda hu. Nyɛkayaa Gilgal, ni nyɛkayaa Bet-Aven hu nyɛyajaa; ni nyɛkɛ Yehowa gbɛi lɛ akakãa kitã akɛ ‘Gbii abɔ ni Yehowa ji Nyɔŋmɔ hiɛkãalɔ nɛɛ!’ 16Israelbii akuɛŋ ti tamɔ tsina oblayoo. Te aaafee tɛŋŋ ni Yehowa aaalɛ amɛ tamɔ alɛɔ toobii yɛ ŋa shwaŋŋ nɔ hu? 17Israel ekɔ wɔŋjamɔ efɔ enɔ; nyɛŋmɛa ejeŋ he nyɛhãa lɛ. 18Kɛji amɛnunuu dãi ni amɛtɔrɔ sɛɛ lɛ kɛkɛ lɛ amɛkɛ ajwamãŋbɔɔ lɛ etsa nɔ, ejaakɛ amɛsumɔɔ hiɛgbele moŋ fe hiɛnyam. 19Kɔɔyɔɔ fɔŋ ko baatswa amɛ waa, ni ebaahã amɛhiɛ agboi yɛ wɔŋjamɔ afɔleshãa hewɔ.”
Bible in Ga Language © Bible Society of Ghana, 2020.