Ester 8
8
Akɛɛ Yudafoi lɛ akɛ amɛfã amɛhe
1Nakai gbi lɛ nɔŋŋ lɛ Maŋtsɛ Ahashwerosh ŋɔ Haman, Yudafoi lɛ ahenyɛlɔ lɛ, shĩa ni ekɛhã Maŋnyɛ Ester; ni Mɔdekai bɔ̃i maŋtsɛ lɛ ŋɔɔ yaa ejaakɛ Maŋnyɛ Ester tsɔ̃ɔ Maŋtsɛ Ahashwerosh emɔ ni ji Mɔdekai. 2Maŋtsɛ lɛ jie ewaoga ni ekɛsɔoɔ wolo naa, ni ehe yɛ Haman dɛŋ lɛ yɛ ewao ni ekɛhã Mɔdekai. Ester tu Haman shĩa lɛ ewo Mɔdekai dɛŋ koni ekwɛ nɔ.
3Enɛ sɛɛ lɛ Ester kɛ maŋtsɛ lɛ yawie ekoŋŋ. Eyaho ekula Maŋtsɛ Ahashwerosh naji anaa, ni ekɛ yaafo kpa lɛ fai akɛ efo efɔŋ ni Haman, Agagnyo lɛ, eto akɛ afee Yudafoi lɛ mli ehã amɛ. 4Maŋtsɛ lɛ kpã enine mli ni ekɛ tsi ni ehiɛ lɛ tsɔ̃ɔ Ester hiɛ. No hewɔ lɛ, Ester te shi edamɔ maŋtsɛ lɛ hiɛ, 5ni ekɛɛ lɛ akɛ, “Nii, kɛji esa ohiɛ lɛ, no lɛ hã aŋmã wolo koni akɛyatsi yiŋsha ni Hamedata bi Haman, Agagnyo lɛ, to koni ekɛkpãtã Yudafoi ni yɔɔ Maŋtsɛ shikpɔji fɛɛ anɔ lɛ ahiɛ lɛ naa. 6Ejaakɛ aso manyɛ naa madamɔ kɛji sane fɔŋ nɛɛ banina mimaŋbii lɛ, ni akpãtã amɛhiɛ kɛbule amɛshishi?”
7Kɛkɛ ni Maŋtsɛ Ahashwerosh kɛɛ Maŋnyɛ Ester kɛ Mɔdekai, Yudafonyo lɛ, akɛ, “Naa, mihã asɛŋ Haman yɛ Yudafoi lɛ ayinɔ ni ekpãŋ lɛ hewɔ, ni mikɛ shĩa lɛ hu eke Ester. 8Nyɛbaanyɛ nyɛŋma Yudafoi lɛ nɔ fɛɛ nɔ ni nyɛaasumɔ yɛ sane nɛɛ he yɛ mi, migbɛi mli. Asaŋ nyɛkɛ miwolo naasɔomɔ ga lɛ asɔoa wolo lɛ naa, ejaakɛ wolo ni aŋmã yɛ maŋtsɛ gbɛi mli, asaŋ ni akɛ ewolo naasɔomɔ ga lɛ esɔo naa lɛ, anyɛŋ emli sane lɛ mli afo.”
9Sane nɛɛ ba yɛ nyɔŋ ni ji etɛ̃ ni ji nyɔŋ ni atsɛɔ lɛ Siwan lɛ nɔ gbi ni ji nyɔŋmai enyɔ kɛ etɛ̃ lɛ nɔ. Mɔdekai tsɛ maŋtsɛ lɛ woloŋmalɔi lɛ kɛkpe; ni amɛŋmã wolo lɛ bɔ ni Mɔdekai fã akɛ amɛŋmã lɛ pɛpɛɛpɛ, ni akɛtee ayahã Yudafoi lɛ kɛ amraloi lɛ kɛ lumɛi lɛ kɛ shikpɔji srɔtoi lɛ anɔ onukpai lɛ kɛjɛ India aahu kɛbashi Kush#8.9: Kush: Kush ji blema Etiopia lɛ. Fɛɛ fee shikpɔji oha kɛ nyɔŋmai enyɔ kɛ kpawo. Shikpɔŋ fɛɛ shikpɔŋ lɛ aŋmã ewolo lɛ yɛ lɛ eniŋmãa mli, ni maŋ fɛɛ maŋ lɛ aŋmã ewolo lɛ yɛ lɛ diɛŋtsɛ ewiemɔ mli. Yudafoi lɛ hu awolo lɛ aŋmã yɛ amɛniŋmãa kɛ amɛwiemɔ mli. 10Mɔdekai hã aŋmala woji lɛ yɛ Maŋtsɛ Ahashwerosh gbɛi mli, ni akɛ maŋtsɛ lɛ wolonaasɔomɔ ga lɛ sɔo amɛnaa. Kɛkɛ ni ekɛ woji lɛ tsu bɔfoi ni tara maŋtsɛ lɛ okpɔŋɔi ni afoijee naa wa lɛ ekomɛi anɔ kɛtee.
11Woji lɛ kɛɛ akɛ Maŋtsɛ Ahashwerosh ehã Yudafoi ni yɔɔ maŋ fɛɛ maŋ nɔ hegbɛ koni amɛbua amɛhe naa amɛbɔ asafoi ni amɛdamɔ shi kɛfã amɛhe. Kɛji mɛi komɛi aaabatua amɛ yɛ maŋ fɛɛ maŋ ko nɔ lɛ, amɛkɛ mɛi lɛ awu kɛfã amɛhe ni amɛgbe amɛ kɛ amɛbii kɛ amɛ hɔi kɛ yei fɛɛ kɛbule amɛshishi; ni no sɛɛ lɛ amɛha mɛi nɛɛ anibii amɛhã amɛhe, 12yɛ gbi kome nɔ. Gbi nɛɛ ji nyɔŋ ni ji nyɔŋma kɛ enyɔ, ni egbɛi ji Adar, lɛ nɔ gbi ni ji nyɔŋma kɛ etɛ̃ lɛ, yɛ Maŋtsɛ Ahashwerosh nɔyeli shikpɔji fɛɛ anɔ. 13Wolo lɛ fã akɛ ashiɛ emli sane lɛ akɛ akpɔ yɛ shikpɔŋ fɛɛ shikpɔŋ nɔ koni maŋbii fɛɛ ana ale, asaŋ koni Yudafoi lɛ asaa amɛhe amɛto nakai gbi lɛ, ni amɛtɔ amɛhe owele yɛ amɛhenyɛlɔi anɔ. 14Kɛkɛ ni okpɔŋɔnɔtalɔi ho tara maŋtsɛ lɛ diɛŋtsɛ okpɔŋɔi komɛi anɔ, yɛ maŋtsɛ lɛ famɔ naa, ni amɛhe fee oya amɛkɛ woji lɛ tee. Ashiɛ akpɔ nɛɛ yɛ Susa ni ji maŋtsɛmaŋ lɛ hu mli.
15Mɔdekai je maŋtsɛ lɛ hiɛ etee, ni ewo maŋtsɛ atade ni akɛ mama bluu kɛ mama yɛŋ ekpɛ, kɛ enɔ atade wuyaa ni akɛ klala yɛŋ kɛ kuŋtu tsuru faa kpɛ. Shika akekre agbo fi eyitso. Susa maŋ lɛ nya ni amɛna miishɛɛ. 16Yudafoi lɛ ahe tse amɛ, ni amɛnya, ni amɛmli fili amɛ jogbaŋŋ; asaŋ hiɛ sɔ amɛ. 17Anɔkwa shikpɔŋ fɛɛ shikpɔŋ kɛ maŋ fɛɛ maŋ nɔ ni Maŋtsɛ Ahashwerosh shɛɛ kɛ akpɔ lɛ yashɛ lɛ, jɛi Yudafoi lɛ na miishɛɛ, ni amɛnya, ni amɛŋmɛŋmɛɛ okplɔ̃, ni amɛyeyee gbii juji. Shikpɔji anɔ bii lɛ ateŋ mɛi babaoo tsɔ̃mɔ amɛhe Yudafoi tete, ejaakɛ Yudafoi lɛ ahe ŋmiŋmi emɔmɔ amɛ.
Bible in Ga Language © Bible Society of Ghana, 2020.