Amos 2
2
Moab
1Bɔ ni Yehowa kɛɛ nɛ, “Tɔ̃mɔi babaoo ni Moabbii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛshã Edom maŋtsɛ gbonyo wui kɛyashi etsɔ̃ lamlu, ni amɛkɛshwie ehiɛ shi. 2No hewɔ lɛ, mibama Moab shikpɔŋ lɛ naa la, ni la nɛɛ baashã Keriot maŋ lɛ mli mɔji lɛ fɛɛ. Moabbii lɛ baagboi yɛ oshebɔɔ kɛ tɛtɛrɛmantɛrɛ gbɛɛmɔ kɛ hoofeemɔ lɛ mli. 3#Yes 15.1—16.14; 25.10-12; Yer 48.1-47; Eze 25.8-11; Zef 2.8-11 Mibaplene Moab maŋ nɔyelɔi lɛ, ni mibagbe emli lumɛi lɛ fɛɛ hu mafata he.”
Yuda
4Bɔ ni Yehowa kɛɛ nɛ, “Tɔ̃mɔi babaoo ni Yudabii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛkwa Yehowa mlai lɛ, ni amɛyeee ekpɔi lɛ anɔ. Apasa jemawɔji asɛɛ ni amɛyanyiɛ, tamɔ amɛtsɛmɛi lɛ yanyiɛ lɛ, hã amɛdu gbɛ. 5No hewɔ lɛ, mibama Yuda shikpɔŋ lɛ naa la, ni ebaashã Yerusalɛm mɔji lɛ fɛɛ.”
Israel toigbalamɔ
6Bɔ ni Yehowa kɛɛ nɛ, “Tɔ̃mɔi babaoo ni Israelbii etɔ̃ hewɔ lɛ, miŋmɛŋ amɛtoi ni mito akɛ mibagbala lɛ he, ejaakɛ amɛhɔ̃ɔ jalɔi amɛhe jwiɛtɛi, ni ohiafo lɛ amɛhɔ̃ɔ lɛ tokota jara naa. 7Amɛnaanaa ohiafoi ayitsei anɔ yɛ shikpɔŋ mlu mli, ni amɛtsirɛɔ mɛi ni ehao kɛyaa gbɛsɛɛ. Mɔ kɛ lɛ diɛŋtsɛ etsɛ fɛɛ kɛ oblayoo kome lɛ nɔŋŋ naa bɔlɛ, ni amɛkɛbuleɔ migbɛi krɔŋkrɔŋ lɛ. 8#Ɛks 22.25 Amɛkãmɔɔ atadei ni akɛbato amɛ awaba anɔ yɛ afɔleshãa latɛ fɛɛ afɔleshãa latɛ naa, ni amɛnuɔ wain ni ahe yɛ mɛi ni abu amɛ fɔ adɛŋ yɛ amɛNyɔŋmɔ lɛ Sɔlemɔ we lɛ.
9 #
Deut 3.8-11
“Shi kɛ̃lɛ mikpãtã Amorbii ni kwɔlɔ tamɔ tsenedru tsei, ni amɛhe wa hu tamɔ odum lɛ ahiɛ yɛ amɛ, Israelbii, ahiɛ. Mikpãtã amɛnɔ yibii lɛ ahiɛ, ni mifite amɛshishi fãi lɛ fɛɛ hu. 10Mijie nyɛ yɛ Ijipt shikpɔŋ lɛ nɔ, ni mikpala nyɛ afii nyɔŋmai ejwɛ sɔŋŋ yɛ shiaŋa lɛ nɔ kɛba koni nyɛbaŋɔ Amorbii lɛ ashikpɔŋ lɛ. 11#Num 6.2-18 Mitee nyɛbihii lɛ ekomɛi ashi, ni mifee amɛ gbalɔi, ni mifee nyɛblahii lɛ ekomɛi hu Nazirifoi. Israelbii, ebɛ mli nakai lo? Mi Yehowa mikɛɛ. 12#Yer 11.21 Shi nyɛhã Nazirifoi lɛ bɔ̃i dãanumɔ, ni amɛkɛku kitã ni amɛkã Nyɔŋmɔ mli, ni nyɛwo gbalɔi lɛ akitã akɛ amɛkagba gbalɛ ni mikɛhã amɛ lɛ. 13Naa, mibamia nyɛ makpɛtɛ shi tamɔ shwiili ni ewo ŋmaa tɔtɔɔtɔ miaa nii kpɛtɛɔ shi. 14Foijee aaalaaje mɔ ni he yɔɔ oya kɛ foijee, hewalɛ aaaŋmɛɛɛ hewalɔ, ni kãkãlɔ hu nyɛŋ lɛ diɛŋtsɛ eyiwala po ehere. 15Gãitsɛ̃lɔi nyɛŋ shi amɛdamɔ lɛ, foijelɔ he ejeŋ mli lɛ, mɔ ni ta okpɔŋɔ nɔ hu hereŋ eyiwala. 16Nakai gbi lɛ kãkãlɔi lɛ ateŋ mɔ ni tsui esa tete aaajo foi kɛ ehe yayai.” Yehowa ni kɛɛ.
Bible in Ga Language © Bible Society of Ghana, 2020.