Bɔfoi 21

Paulo tee Yerusalɛm

1Agbɛnɛ be ni wɔkɛ amɛ gbala mli lɛ, wɔfã ni wɔnyiɛ tɛ̃ɛ kɛba Ko, ni enɔ jetsɛremɔ lɛ wɔkɛba Rodo, ni wɔjɛ jɛi wɔba Patara. 2Wɔna lɛlɛ ko yɛ jɛi ni miiya Foinikia ni wɔbote mli ni wɔkɛshwie nɔ. 3Shi be ni Kipro tua wɔhiɛ lɛ, wɔtswa lɛ wɔfɔ̃ abɛku ni wɔba Siria, ni wɔbakpeleke yɛ Tiro; ejaakɛ jɛi abaajie lɛlɛ lɛ mli nii yɛ. 4#Bɔf 11.12; 20.23 Be ni wɔbana kaselɔi lɛ, wɔhi jɛi gbii kpawo; ni amɛtsɔ Mumɔ lɛ nɔ amɛkɛɛ Paulo akɛ ekaya Yerusalɛm. 5#Bɔf 20.36 Ni eba mli akɛ, be ni wɔye gbii lɛ tã lɛ, wɔkɛshwie nɔ, ni amɛ kɛ amɛŋamɛi kɛ amɛbii fɛɛ bajie wɔ gbɛ kɛyashi maŋ lɛ klotia; ni wɔkula shi yɛ ŋshɔ lɛ naa, ni wɔsɔle. 6Wɔyeyee shɛɛ ni wɔbote lɛlɛ mli; ni amɛ hu amɛku amɛsɛɛ kɛtee amɛshĩai.

7Shi wɔ lɛ wɔjɛ Tiro wɔba Ptolemai. Ni wɔyaŋa nyɛmimɛi lɛ, ni wɔkɛ amɛ hi shi gbi kome. 8#Bɔf 8.40 Enɔ jetsɛremɔ lɛ wɔyiŋ kɛtee Kaisarea, ni wɔyabote Sanekpakpashiɛlɔ Filipo ni ji mɛi kpawo lɛ ateŋ mɔ kome lɛ we, ni wɔkɛ lɛ hi shi. 9#Bɔf 2.17 Ni eyɛ biyei oblayei ejwɛ ni gbaa. 10#Bɔf 11.28 Be ni wɔhi shi gbii kplaŋŋ yɛ jɛi lɛ, gbalɔ ko ni atsɛɔ lɛ Agabo lɛ jɛ Yudea ba; 11#Bɔf 20.24 ni be ni eba wɔŋɔɔ lɛ, ekɔ Paulo hɛfiinɔ lɛ ni ekɛfi lɛ diɛŋtsɛ eniji kɛ enaji ekɛɛ, “Bɔ ni Mumɔ Krɔŋkrɔŋ lɛ kɛɛ nɛ, ‘Nuu mɔ nɔ̃ ni ji hɛfiinɔ nɛɛ, nɛkɛ Yudafoi lɛ baafi lɛ yɛ Yerusalɛm, ni amɛaaŋɔ lɛ amɛwo jeŋmajiaŋbii lɛ adɛŋ.’ ” 12#Mat 16.22 Be ni wɔnu enɛ lɛ wɔkɛ jɛibii lɛ fɛɛ kpa Paulo fai akɛ ekaya Yerusalɛm lɛ. 13#Bɔf 20.24 Shi ehere nɔ ekɛɛ, “Mɛni nyɛfeɔ nɛɛ, nyɛmiifo ni nyɛkɛmiiwo mi awerɛho? Mi lɛ, jeee fii kɛkɛ misaa mihe mito, shi moŋ gbele diɛŋtsɛ yɛ Nuŋtsɔ Yesu gbɛi lɛ hewɔ yɛ Yerusalɛm.” 14Shi akɛni eŋmɛ̃ɛɛ gbɛ hewɔ lɛ, wɔfee diŋŋ wɔkɛɛ, “Afee bɔ ni Nuŋtsɔ lɛ sumɔɔ.”

15Ni nakai gbii lɛ asɛɛ lɛ wɔto wɔnii, ni wɔyiŋ kɛtee Yerusalɛm. 16Ni kaselɔi ni jɛ Kaisarea lɛ ateŋ mɛi komɛi kɛ wɔ tee, ni amɛhã wɔyato Mnason, Kipronyo ko ni ji kaselɔ kɛjɛ jeeŋmɔ lɛ, ŋɔɔ.

Paulo yasara Yakobo

17Be ni wɔshɛ Yerusalɛm lɛ, nyɛmimɛi lɛ here wɔ atuu. 18#Bɔf 15.13; Gal 1.19 Ni enɔ jetsɛremɔ lɛ, Paulo kɛ wɔ tee Yakobo ŋɔɔ; ni onukpai lɛ fɛɛ hu yɛ jɛi. 19Eŋa amɛ, ni egba amɛ nibii ni Nyɔŋmɔ tsɔ̃ esɔ̃ɔmɔ lɛ nɔ etsu yɛ jeŋmaji lɛ ateŋ lɛ ekomekome. 20#Bɔf 15.1 Shi be ni amɛnu lɛ, amɛwo Nyɔŋmɔ hiɛ nyam, ni amɛkɛɛ lɛ akɛ, “Anyɛmi, kwɛmɔ Yudafoi akpei abɔ ni ehe eye nɛɛ, ni amɛ fɛɛ lɛ, Mla lɛ he hiɛdɔlɔi ji amɛ. 21#Bɔf 16.3; Rom 10.4 Shi abatã ohe sane ahã amɛ akɛ otsɔ̃ɔ Yudafoi ni yɔɔ jeŋmaji lɛ ateŋ lɛ akɛ amɛkwa Mose, ni okɛɔ akɛ amɛkafolɔ amɛbii aketia, ni asaŋ amɛkanyiɛ amɛkusumi asɛɛ. 22Agbɛnɛ lɛ, te aaafee tɛŋŋ? Bɔ fɛɛ bɔ ni fee lɛ, amɛaanu akɛ oba. 23#Bɔf 18.18 No hewɔ lɛ, feemɔ nɔ ni wɔkɛɔ bo nɛɛ. Wɔyɛ hii ejwɛ ni ewo shi. 24Ŋɔɔ amɛ ni okɛ amɛ fɛɛ ayatsuu nyɛhe, ni owo nɔ ni ahãa lɛ ohã amɛ, koni amɛshɛ amɛyi, ni mɛi lɛ fɛɛ baana akɛ saji ni abagbaa yɛ ohe lɛ eko eko bɛ mli, shi moŋ bo diɛŋtsɛ tete obaa ojeŋ yɛ Mla lɛ naa, ni oyeɔ nɔ. 25#Bɔf 15.20, 29 Shi jeŋmajiaŋbii ni ehe eye lɛ ahewɔ lɛ, wɔ diɛŋtsɛ wɔŋma ni wɔkpɛ mli akɛ amɛkaye nɛkɛ nibii nɛɛ eko nɔ, shi moŋ amɛhi wɔji afɔlei kɛ lá kɛ kooloi ni ashɔ̃tɔ̃ kɛ ajwamãŋbɔɔ kɛkɛ.” 26#Num 6.9-20 Kɛkɛ ni Paulo ŋɔ hii lɛ, ni enɔ jetsɛremɔ be ni ekɛ amɛ fɛɛ etsuu amɛhe lɛ, ebote Sɔlemɔ we lɛ ni eyatsɔ̃ɔ beyinɔ ni hetsuumɔ gbii lɛ anaagbee lɛ baashɛ ni abaashã afɔle ahã amɛteŋ mɔ fɛɛ mɔ.

Amɔ Paulo yɛ Sɔlemɔ we lɛ

27Shi be ni eshwɛ fioo ni aaagbe gbii kpawo lɛ naa lɛ, Yudafoi ni jɛ Asia lɛ na lɛ yɛ Sɔlemɔ we lɛ, ni amɛta asafo lɛ fɛɛ mli, ni amɛbamɔ lɛ; 28#Bɔf 6.13; Eze 44.7 ni amɛbolɔ akɛ, “Ataamɛi Israelbii, nyɛbafataa wɔhe! Naa nuu lɛ ni wieɔ maŋ nɛɛ kɛ Mla lɛ kɛ biɛ nɛɛ he efɔŋ etsɔ̃ɔ mɛi fɛɛ yɛ he fɛɛ he lɛ; ni esaa ekɛ Helabii eba Sɔlemɔ we lɛ ekɛbabule He Krɔŋkrɔŋ nɛɛ hu.” 29#Bɔf 20.4; 2 Tim 4.20 Ejaakɛ amɛna lɛ kɛ Trofimo ni jɛ Efeso lɛ yɛ maŋ lɛ mli momo hewɔ lɛ amɛsusu akɛ Paulo kɛ lɛ ba Sɔlemɔ we lɛ. 30Ni maŋ muu lɛ fɛɛ bu, ni maŋbii lɛ sha foi kɛbabua mɛhe naa; ni amɛmɔ Paulo amɛgbala lɛ kɛjɛ Sɔlemɔ we lɛ kɛje kpo, ni amrɔ lɛ nɔŋŋ lɛ aŋamɔ shinai lɛ. 31Shi be ni amɛheɔ lɛ amɛgbe lɛ, ayatswa asafoiatsɛnukpa lɛ adafi akɛ Yerusalɛm fɛɛ efee gidigidi. 32Ni amrɔ lɛ eŋɔ asraafoi kɛ asafoiatsɛmɛi ni ekɛ amɛ kpeleke shi kɛ foi kɛbanina amɛ. Be ni amɛna asafoiatsɛnukpa lɛ kɛ asraafoi lɛ, amɛfɔ̃ɔ Paulo yii. 33#Bɔf 19.11 Kɛkɛ ni asafoiatsɛnukpa lɛ tsi bɛŋkɛ ni emɔ emli, ni efã akɛ awo lɛ kɔsɔŋkɔsɔi enyɔ, ni ebi mɔ ni ji lɛ kɛ nɔ ni efee. 34Shi be ni asafo lɛ mli mɛi komɛi miibolɔ miikɛɛ nɛkɛ lɛ, mɛi komɛi hu miibolɔ miikɛɛ nɔ kroko. Ni akɛni hoofeemɔ lɛ hewɔ lɛ enyɛɛɛ ena anɔkwale lɛ, efã akɛ akɛ lɛ aya mɔɔ lɛ mli. 35Ni be ni eshɛ atrakpoi lɛ anaa lɛ, eba mli akɛ asafo lɛ gidigidifeemɔ hewɔ lɛ asraafoi lɛ wo lɛ, 36#Bɔf 22.22; Luk 23.18 ejaakɛ maŋbii asafo yuu lɛ nyiɛ sɛɛ miibolɔ akɛ, “Akɛ lɛ aya!”

37Shi be ni akɛ Paulo baabote mɔɔ lɛ mli lɛ, ebi asafoiatsɛnukpa lɛ akɛ, “Ani miyɛ hegbɛ akɛ mikɛ bo wieɔ wiemɔ ko lo?” Ebi lɛ akɛ, “Ole Hela wiemɔ? 38Belɛ jeee bo ji Ijiptnyo lɛ ni nyɛsɛɛ nɛɛ ni ekɛ atuatsemɔ ba ni ekpala hii awuyelɔi akpei ejwɛ eshwie esɛɛ kɛtee ŋa lɛ nɔ lɛ?” 39#Bɔf 9.11 Ni Paulo kɛɛ, “Mi lɛ Yudanyo ji mi, ni mijɛ Tarso, Kilikia maŋ ko ni yɔɔ gbɛi lɛ mli. Shi miikpa bo fai; ŋmɛɛ mi gbɛ ni mikɛ maŋ lɛ awie.” 40Ni be ni eŋmɛ lɛ gbɛ lɛ, Paulo damɔ atrakpoi lɛ anɔ, ni efɔ̃ maŋ lɛ nine; ni be ni jɛi jɔ koniŋŋ lɛ, ewie yɛ Hebri wiemɔ mli ekɛɛ.

Currently Selected:

Bɔfoi 21: NEGAB

Highlight

Copy