Bɔfoi 19

Paulo yɛ Efeso

1Be ni Apolo yɔɔ Korinto lɛ, Paulo yakpa gɔŋ nɔ maji lɛ anɔ kɛbaje Efeso. Ni ebana kaselɔi komɛi, 2#Bɔf 2.38 ni ebi amɛ akɛ, “Ani be ni nyɛhe nyɛye lɛ nyɛna Mumɔ Krɔŋkrɔŋ lo?” Ni amɛkɛɛ lɛ akɛ, “Mumɔ Krɔŋkrɔŋ ko yɛ he ko jiŋŋ, wɔnuko tete.” 3Ni ebi amɛ akɛ, “Belɛ mɛni mli abaptisi nyɛ awo mɔ?” Ni amɛkɛɛ, “Yohane baptisimɔ lɛ mli.” 4#Mat 3.11 Ni Paulo kɛɛ, “Yohane baptisimɔ lɛ, ekɛbaptisi mɛi ni etsake amɛtsui; shi ekɛɛ maŋ lɛ akɛ, amɛhe mɔ ni baa yɛ esɛɛ lɛ moŋ nɔ amɛye; lɛ ji Kristo Yesu lɛ.” 5Ni be ni amɛnu enɛ lɛ, abaptisi amɛ awo Nuŋtsɔ Yesu gbɛi mli; 6#Bɔf 8.17; 10.44, 46 ni be ni Paulo kɛ eniji shwie amɛnɔ lɛ, Mumɔ Krɔŋkrɔŋ lɛ ba amɛnɔ, ni amɛwie wiemɔi srɔtoi ni amɛgba. 7Shi hii lɛ fɛɛ aaafee nyɔŋma kɛ enyɔ.

8Ni Paulo tee kpeehe lɛ, ni eyawie kɛ ekãa, ni etsɔ̃ɔ amɛ nii kɛ mɔdɛŋbɔɔ nyɔji etɛ̃ sɔŋŋ ni amɛhe Nyɔŋmɔ maŋtsɛyeli lɛ he sane lɛ amɛye. 9#2 Tim 1.15; Bɔf 9.2 Shi be ni mɛi komɛi waje amɛtsui ni amɛbooo toi ni amɛwie tsɔ̃ɔmɔ lɛ he efɔŋ yɛ mɛi lɛ ahiɛ lɛ, eje amɛŋɔɔ ni ejie kaselɔi lɛ hu yɛ amɛteŋ, ni daa gbi lɛ eyawieɔ etsɔ̃ɔ mɛi yɛ mɔ ko ni atsɛɔ lɛ Tirano lɛ nikasemɔhe lɛ. 10Ehiɛ nakai feemɔ aahu afii enyɔ sɔŋŋ, ni mɛi fɛɛ ni yɔɔ Asia lɛ, Yudafoi kɛ Helabii lɛ fɛɛ, nu Nuŋtsɔ Yesu wiemɔ lɛ.

Skeva bihii lɛ

11 # Bɔf 14.3 Ni Nyɔŋmɔ tsɔ̃ Paulo nine nɔ etsu hewalɛ nitsumɔi hu ni nɔ ekaaa, 12#Bɔf 5.15 aahu po ni aŋɔɔ eklaladukui kɛ atade hiɛhaanii tete ayahaa helatsɛmɛi anɔ, ni amɛhelai lɛ tãa ni mumɔi fɔ̃ji lɛ hu jeɔ amɛmli. 13#Luk 9.49 Shi Yudafoi okɔmfoi ni nyiɛ kpaa shi lɛ ateŋ mɛi komɛi hu ka ni amɛkɛ Nuŋtsɔ Yesu gbɛi afã mɛi ni mumɔi fɔ̃ji yɔɔ amɛmli lɛ ayi akɛ, “Mina Yesu ni Paulo shiɛɔ lɛ.” 14Osɔfonukpa Skeva, Yudanyo lɛ, bihii kpawo ji mɛi ni feɔ nakai nii lɛ. 15Shi mumɔ fɔŋ lɛ here nɔ ni ekɛɛ amɛ akɛ, “Yesu lɛ, mile lɛ, ni Paulo hu, mile lɛ; shi nyɛ lɛ, namɛi ji nyɛ?” 16Ni gbɔmɔ ni mumɔ fɔŋ lɛ yɔɔ emli lɛ tua amɛ ni enine tsɔ̃ amɛnɔ ni efee amɛ butuu, ni amɛkɛ amɛhe yayai kɛ pilamɔi jo foi kɛjɛ nakai shĩa lɛ. 17#Bɔf 5.5, 11 Ni be ni Yudafoi kɛ Helabii fɛɛ ni yɔɔ Efeso lɛ nu enɛ lɛ, gbeyei mɔmɔ amɛ fɛɛ, ni awo Nuŋtsɔ Yesu gbɛi lɛ hiɛ nyam naakpa. 18Ni mɛi ni ehe eye lɛ ateŋ mɛi pii hu ba ni amɛbajaje amɛnifeemɔnii lɛ faŋŋ amɛtsɔ̃ɔ. 19Ni ŋkunyaayelɔi lɛ hu ateŋ mɛi babaoo ba ni amɛkɛ amɛwoji lɛ babua shi ni amɛshã yɛ mɛi fɛɛ hiɛ; ni be ni abu naa lɛ, efee jwiɛtɛi kukuji akpei nyɔŋmai enumɔ. 20#Bɔf 6.7; 12.24 Nɛkɛ hewalɛ gbɛ nɛɛ nɔ Nuŋtsɔ lɛ wiemɔ lɛ tsɔ̃ ekɛshwere ni eye kunim.

Sakasakafeemɔ ba Efeso

21 # Bɔf 23.11 Nii nɛɛ asɛɛ lɛ, Paulo to eyiŋ yɛ mumɔ lɛ mli akɛ eeeyatsɔ̃ Makedonia kɛ Akaia kɛya Yerusalɛm, ni ekɛɛ, “Kɛji mishɛ jɛi lɛ, ja miyakwɛ Roma hu.” 22#Bɔf 17.14; Rom 16.23 Shi be ni etsu mɛi ni sɔ̃mɔɔ lɛ lɛ ateŋ mɛi enyɔ, Timoteo kɛ Erasto, Makedonia lɛ, lɛ diɛŋtsɛ lɛ ehi Asia be fioo.

23 # Bɔf 19.9; 2 Kor 1.8, 9 Shi nakai be lɛ mli nɔŋŋ lɛ sakasakafeemɔ ko ni bate shi yɛ tsɔ̃ɔmɔ lɛ hewɔ lɛ ejeee shwɛmɔ. 24#Bɔf 16.16 Ejaakɛ jwiɛtɛiŋaalɔ ko ni atsɛɔ lɛ Demetrio lɛ kɛ jwiɛtɛi feɔ Artemi Sɔlemɔtsui ni hãa ŋaalɔi lɛ naa nitsumɔ pii. 25Etsɛ amɛ kɛ mɛi fɛɛ ni tsuɔ nakai nii lɛ eko lɛ kɛkpe, ni ekɛɛ, “Ataamɛi, nyɛle akɛ nɛkɛ ŋaa nɛɛ wɔkɛnaa wɔnii pii lɛ. 26Ni nyɛsaa nyɛmiina ni nyɛmiinu akɛ jeee Efeso nɛɛ kɛkɛ, shi moŋ shwɛ fioo ni Asia fɛɛ lɛ, Paulo nɛɛ ehã mɛi babaoo ayiŋ etsɔ̃, ni ekpale amɛ; ekɛɔ akɛ nii ni akɛ niji fee lɛ jeee nyɔŋmɔi ni. 27Miishe gbeyei akɛ, jeee wɔnitsumɔ nɛɛ kɛkɛ he guɔ baagbo, shi moŋ nyɔŋmɔyoo Artemi kekenam lɛ Sɔlemɔ we lɛ hu abuŋ lɛ ahaŋ nɔ ko nɔ ko, ni enunyam kpeteŋkple lɛ ni Asia kɛ jeŋ muu lɛ fɛɛ hu jaa lɛ baabutu.”

28Be ni ŋaalɔi lɛ nu enɛ lɛ, amɛmli wo la pam, ni amɛbolɔ amɛkɛɛ, “Efesobii Artemi lɛ kekenam ni!” 29#Bɔf 20.4 Ni maŋ lɛ mli fɛɛ fee sakasaka; ni amɛkɛ jwɛŋmɔ kome tsɛ̃ kɛtee nikwɛmɔhe lɛ, ni amɛyamɔmɔ Gaio kɛ Aristarko ni ji Makedoniabii ni fata Paulo he kɛfã gbɛ lɛ. 30Shi be ni Paulo tao akɛ eya mɛi lɛ ateŋ lɛ, kaselɔi lɛ ekpɛlɛ̃ɛɛ lɛ; 31ni Asia lumɛi lɛ ateŋ mɛi komɛi hu ni ji Paulo shieŋtsɛmɛi lɛ tsu eŋɔɔ abawo lɛ ŋaa akɛ ekakwɛ ni etee nikwɛmɔhe lɛ. 32Agbɛnɛ be ni mɛi komɛi bolɔɔ nɛkɛ lɛ, mɛi komɛi hu miibolɔ ekroko; ejaakɛ kpee lɛ efee basabasa ni mɛi kpotoo leee nɔ hewɔ ni amɛbakpe tete. 33Akɛni Yudafoi lɛ tsirɛ Aleksandro yisɛɛ kɛba hiɛgbɛ hewɔ lɛ, mɛi pii susu akɛ lɛ ejɛ ni basabasa lɛ ba. Shi Aleksandro fɔ̃ enine eetao akɛ ejieɔ enaa etsɔ̃ɔ mɛi lɛ. 34Shi be ni amɛyoo akɛ Yudanyo ji lɛ lɛ, amɛ fɛɛ amɛkɛ gbee kome bolɔ aaafee ŋmɛlɛtswai enyɔ sɔŋŋ akɛ, “Efesobii Artemi lɛ kekenam ni!”

35Ni be ni maŋ woloŋmalɔ lɛ ekpãtã mɛi lɛ, ekɛɛ, “Ataamɛi Efesobii, mɛɛ gbɔmɔ po leee akɛ Artemi kekenam lɛ kɛ amãgã ni kpeleke shi kɛjɛ Dio ŋɔɔ lɛ Efesobii amaŋ nɛɛŋ ewulɔmɔ yɔɔ? 36Agbɛnɛ akɛni enɛ he bɛ ŋwanejee hewɔ lɛ, esa akɛ nyɛfeɔ dioo, ni nyɛkafee gidigidi ko. 37Nyɛkɛ hii nɛɛ eba biɛ; amɛjeee Sɔlemɔ we nii julɔi lɛ, amɛjeee nyɛnyɔŋmɔyoo lɛ he musubɔlɔi hu. 38No hewɔ lɛ, kɛji Demetrio kɛ enanemɛi ŋaalɔi lɛ kɛ mɔ ko yɛ sane ko lɛ, kojomɔ gbii yɛ, ni amralofoi hu yɛ; nyɛhãa amɛkɛ sane lɛ ayaa amɛhiɛ. 39Shi kɛji saji krokomɛi anaa nyɛtaoɔ lɛ, akwaashɔŋ lɛ aaaye yɛ mla naa. 40Ejaakɛ kɛ wɔkwɛɛɛ ni ahi lɛ, abaafolɔ wɔnaa yɛ ŋmɛnɛ gbi nɛɛ basabasafeemɔ lɛ hewɔ, ni wɔbɛ sane ko ni wɔɔnyɛ wɔkɛjie wɔnaa yɛ hoofeemɔ nɛɛ he.” 41Ni be ni ekɛɛ enɛ lɛ, ewo asafo lɛ gbɛ.

Currently Selected:

Bɔfoi 19: NEGAB

Highlight

Copy