Pinali a Njou‐Mboro‐Pinali 19
19
1Da baï mi gui mahana ka on ko̱ Apollos mi pane kaouna pou Corinthe, Paul mi sèrè amè an bil sél koukoula an mboro nord an guèl Asie tou, kè kan pou Éphèse, da kème ko̱ njou‐séna bong hanali an ndourou, 2da kème sa hi kli: Da ko̱ ouime la bilaou jinguèl, oui ya Saint‐Esprit tou lé? Da klime sa hi nè: Haï, tongna lana baï toula Saint‐Esprit name tane ga la ya. 3Da kème sa: Da on ouime ya baptême ba a guè lé? Kli sa: Baptème a Jean. 4Da Paul mi sa: Jean mi nding baptême ba baptême hèkèna békéfèn, da kème sa hi njoukouli an klime la bilaou a kè on ko̱ ma gui falè, ko̱ ba Jésus. 5Da ko̱ klime la baï on, klime ya baptême ka bil ling a Nanjou Jésus. 6Da ko̱ Paul mi goukou ndo̱kè toul kli, Saint‐Esprit mi diri kon toul kli, da klime sa ba njaka baïli toutoul toutoul, ka to̱ko̱ bong njaka Ouone. 7Da kli on bon mi ba wonron njoukouli mane botoulè‐séré.
8Da kème sé guè bil synagogue, ka sa ndo̱t ma féou saï, da kè wara, ka sa kara kli toul fènli a bilkaou a Ouone. 9Da ko̱ go̱ra njoukou hanali mi na bang, ka fa baï, da kli sa baï guè toul mboro on bèlya an nona ro̱kè njoukouli on, da kème ourou an mone kli, ka wal njou‐séna bongli an woro kli, da wara name bon an bil l’école a njoukou on ko̱ ling‐è ba Tyrannus. 10Da Paul mi nding mabahana on name bon ma saka séré, da mono kli on bon ko̱ mi bi an guèl Asie mi la baïnjaka Nanjou, Juifli tèn Grecli bon. 11Da Ouone mi nding kakaïya fèn sakamli ka ndo̱ka Paul, 12mono klime bi la kli‐mone klili da la takanaronali ka da mona Paul rou, da féré rou ka kon mona njou‐jangmali, da njangmali toutoul mi haï an mone kli, ka béké esprit mi tèn kala.
13Da Juif hanali, on ko̱ ba njou‐séna siya manguèl, kli ba njou‐ganjénali, klime lé baï nina béké espritli tèn kala fèn kli, da klime di ling a Nanjou kon toul kli on ko̱ mi kaou jing béké espritli, ka sa: Mè sa bi njaka baï ka ling a Jésus on ko̱ Paul mi sa mboura. 14Da kli ko̱ nding fèn mahana on ba goune wonronli mane difala‐séré a njou Juif hana ko̱ ling‐è ba Scéva, loukou sacrificateur. 15Da béké esprit on mi féré sa, ka sa hi kli: Mè toutou Jésus, da mè toutou Paul; da abaï, oui ba guèli lé? 16Da njoukou on ko̱ mi jing béké esprit mi tèn lé toul kli, ka gnèrèn kli, da njèrèn ta toul kli, mono on klime ngou tèn kala an bil voul on bolok bo̱on jing nongnoli an mone kli. 17Da njoukouli bon mi toutou baï aïn, Juifli tèn Grecli on ko̱ mi bi an pou Éphèse, da waou mi ba kli bon, da ling a Nanjou mi ya jonafèn tou. 18Da njoukou hanali nyèta an wora kli on mi la bilaou tou, klime gui ka hèkè békéfèn kli bi kala kéng ka sa ndingna fènli a kli. 19Da njoukou hanali nyèta on mi nding fèn ganjéna, klime gui ka ndoï takarata klili, ka soung an nona ro̱kè; da klime kèn mbori takarata on ko̱ klime jing l’argent mane saki bongkè‐dioui.
20Mono on, baïnjaka Nanjou mi ti maïya ka njéta da njèrèn ta toul fènli bon.
21Da afal ko̱ fèn aïnli mi o̱ bon tou, Paul mi ji ka esprit nè, ba ko̱ kème yé tana an bil sél koukoula an Macédoine, da bil sél koukoula an Achaïe, baï séna guè pou Jérusalem, ka sa: Afal ko̱ mème pane kaouna soko, dadaon mème ndé sé guè pou Rome kéng da. 22Da ko̱ kème pi njoukouli séré an wora kli on ko̱ mi nding bakara hi nè, sé guè guèl Macédoine, Timothée da Éraste, da kème pane amè an guèl Asie gounfènakè.
23Ka name o̱kèo̱ loukou baï mana baï toul mbora on. 24Baï njoukouna mbéo ko̱ ba gavou ling‐è ba Démétrius, ko̱ mi tou fèn ndamli jing argent, kème ko̱ tou fèn ndame Diane ka argent, da njou‐pina nèli mi jing mbo̱ri nyèta baï toul pina on. 25Kème ndoï kli on tèn njoukou hanali on ko̱ pina kli mi mabahana ka amè, ka sa hi kli O njoïli oui toutou ko̱ name jing fèn nguèra nali mbo̱l pina aïn. 26Da oui ko̱ ka la, on mi tane ti ba an pou Éphèse ka ho̱kè ya, da garakè mi pane gounfènakè on an guèl Asie bon, Paul on mi mong ka ki ro̱kè njoukouli, ka sa, ouondi on ko̱ njoukouli mi mosso ka ndo̱ko̱ kli, kli tane ga ti ba Ouone ya. 27Da touya yé bo̱l ba pina na mi lé ka tèn ba fèn poukna ka ho̱ko̱ na ya; da yé hoforo bo̱on. Da tongna bèlafèn nè ko̱ njoukouli an guèl Asie tèn njoukouli manguèl bon mi dik nè ma moungnourou.
28Da ko̱ klime la baï aïn, hèrè mi ba kli maïya, da klime wan njaka guè siya ka sa: Diane a njoukouli an pou Éphèse ba kakaïyakè!
29Da pou on bon mi mba jing loukou baï, da klime ngoungou ka laou mabahana sé guè bil théâtre, ko̱ klime ba Gaïus kira Aristarque, ko̱ ba njoukouli an guèl Macédoine, njoukouli on ko̱ mi ba Paul sé domboro. 30Da ko̱ Paul mi ji baï ndé rina guè bil théâtre jing njoukouli kéng njou‐séna bong mi dèn nè bi. 31Da zaworo hanali an guèl Asie ko̱ ba bako̱la nèli mi ndé pi gui monè ka sa jo̱jo̱ nè, an kème ri sé guè bil théâtre ya. 32Mono njoukou hanali mi wan pomna toul baï mbéo, da njoukou afékéli mi wan pomna toul baï aféké ka toul, baï njoukouli on ko̱ mi ndoï toul kli mi wal tou, da gara ro̱kè njoukouli on nyèta ko̱ mi kaou zéng kli, kli tane ga tou fèna mbéo ko̱ klime ndoï guè ndourou ya. 33Da klime ya Alexandre, tèn kala an wora ro̱kè njoukouli, da Juifli mi sokoro nè ti dambèl. Da Alexandre mi to̱ko̱ ndo̱kè da ji baï sana baï hi njoukouli baï gnèra kli. 34Da ko̱ klime ko̱ ko̱ kè ba Juif, kli bon mi wan njaka mane njaka kli bon hèdi mana l’heure séré: Diane a njoukouli an pou Éphèse ba kakaïyakè!
35Da ko̱ njou‐mossona takarata an pou, mi to ro̱kè njoukouli on an klime kaou yime, kè sa: Oui njoukouli an pou Éphèse, njoukou ba guè ko̱ tane ga touya ko̱ ba pou Éphèse mi ko̱ pèng temple a kakaïya Diane, ko̱ tétéme monè mi lé gui ka nonkala ya lé? 36Da on njoukouli tane ma baï fana baï on ya, dadaon oui kaou abaï ka njaka baï, ka nding fèn gata ka ndol ya. 37Baï ko̱ ouime ya njoukou aïnli gui guèl aïn, ko̱ kli on mi tane ga ti ba njou‐riyali a temple, malèba njoukouli on ko̱ poukou ouone waïn na ya. 38Da mono on, tokorè Démétrius da njoukouli on ko̱ nding pina jing nè, klime yé jing Démétrius baï hana an toula njoukouna, name lana guingna mana, da njou‐walabaïli makaou an klime sa kita jing hana. 39Da tokoré ouime nza baï aféké katoul da njoukouli on ko̱ mi ndoï ka mboro guingna ma wal baï on. 40Baï ka babaï yé kli ma baï sana kita na baï toul loukou baï on ko̱ mi tèn kassénaï, tane rokokè, baï ko̱ name tane ma baï to̱ko̱na saon zaou aïn ya, ko̱ njoukouli mi ndoï gui mahana ka on. 41Da ko̱ kème sa baï aïn o̱tou, kè sa an njoukouli on ko̱ mi ndoï mi sé.
Currently Selected:
Pinali a Njou‐Mboro‐Pinali 19: KBN1947
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society in 1947.
