Markus 14

Rencana untuk bunu Yesus

14:1-2

(Mat 26:1-5; Luk 22:1-2; Yoh 11:45-53)

1Dua hari lagi orang Yahudi dong pu hari besar Paska deng hari besar Roti Tra Pake Ragi#14:1 hari besar Roti Tra Pake Ragi ‒ Slama tuju hari dong makan roti yang tra pake ragi deng dong tra bole kerja brat. Ragi itu satu bahan untuk bikin roti supaya roti naik. Roti kalo tra pake ragi itu nanti agak kras. mulai. Imam-imam kepala deng guru-guru agama dong cari jalan untuk tangkap trus bunu Yesus diam-diam deng cara tipu. 2Dong bilang, “Tra bole pas di hari besar supaya orang-orang dong jang kaco.”

Prempuan kas pake minyak wangi di Yesus pu kepala

14:3-9

(Mat 26:6-13; Yoh 12:1-8)

3Waktu Yesus ada di Betania, di Simon yang dulu sakit kulit busuk pu ruma, Yesus ada duduk makan. Begini prempuan satu datang bawa botol dari batu puti yang de pu isi minyak wangi asli yang de pu nama narwastu. Minyak ini de pu harga mahal. Prempuan itu de buka botol deng cara kas pata tutup botol trus kas pake minyak itu ke atas Yesus pu kepala. 4Ada brapa orang yang tra snang trus bilang ke yang lain, “Untuk apa de buang-buang minyak narwastu sperti itu? 5Karna minyak itu kalo jual de pu harga lebi dari 300 uang perak,#14:5 uang perak ‒ Bahasa Yunani: dinar. Biasa satu dinar tu gaji untuk satu hari kerja, jadi 300 dinar itu gaji untuk orang yang kerja slama satu taun. trus uang itu bisa kasi ke orang-orang miskin.” Trus dong mara prempuan itu.

6Tapi Yesus bilang,

“Kas biar dia. Knapa kam bikin susa dia? De su bikin yang baik ke Saya. 7Karna orang-orang miskin tu ada trus deng kam, jadi kam bisa tolong dong kapan saja kalo kam mau. Tapi Sa trakan ada sama-sama trus deng kam. 8De su bikin apa yang de bisa bikin. Sa pu badan ni de su kas pake minyak untuk kas siap Sa nanti dapa kubur. 9Yang Sa bilang ini benar: Dimana saja Brita Baik orang kastau di sluru dunia, dong juga nanti ingat apa yang de bikin ini.”

Yudas jual Yesus

14:10-11

10Trus Yudas Iskariot de pigi, de tu satu orang dari Yesus pu 12 murid. De pigi ke imam-imam kepala supaya de bisa jual Yesus ke dorang. 11Dong smua snang skali waktu dengar apa yang de bilang, baru dong janji untuk kasi uang sama dia. Habis itu de mulai cari waktu yang pas untuk jual Yesus.

Yesus makan Paska deng De pu murid-murid

14:12-21

(Mat 26:17-25; Luk 22:7-14, 21-23; Yoh 13:21-30)

12Pas hari pertama dari hari besar Roti Tra Pake Ragi, waktu orang potong domba Paska, Yesus pu murid-murid tanya ke Dia, “Bapa mau tong kemana untuk kas siap makanan Paska untuk Bapa?”

13Langsung Yesus suru De pu murid dua orang,

“Kam dua pigi ke kota, nanti kam dua ketemu laki-laki satu yang pikul air dalam tempayan.#14:13 Tempayan itu dari tana liat yang dong pake jadi tempat simpan air anggur, minyak zaitun, air, deng smua yang cair. Dalam budaya disana tra biasa laki-laki yang pikul air dalam tempayan. Kam ikut dia, 14nanti de masuk ke ruma satu, trus kam bilang ke orang yang pu ruma itu, ‘Guru De tanya: Tempat mana yang Sa deng Sa pu murid-murid mo makan Paska?’ 15Trus orang itu nanti kas tunjuk kam ruang besar satu di tingkat atas, yang su lengkap karna smua su ada. Nanti disitu kam dua kas siap makan Paska untuk kitong.”

16Trus Yesus pu murid dua orang itu pigi ke kota, begini smua jadi sperti yang Yesus su bilang ke dorang. Trus dong kas siap makanan Paska.

17Waktu hari su malam, Yesus datang sama-sama deng De pu 12 murid itu. 18Waktu dong ada duduk makan, Yesus bilang, “Yang Sa bilang ini benar: Ada satu orang dari kam yang nanti jual Saya. De ada makan sama-sama deng Saya.”

19Begini dong smua sedi, trus satu-satu orang bilang ke Dia, “Tuhan, bukan sa to?”

20De jawab,

“Orang itu, de tu satu orang dari kam Sa pu 12 murid ini, de yang ada colo roti sama-sama deng sa dalam satu mangkok ini. 21Sa Anak Manusia memang nanti mati, sama sperti yang ada tatulis tentang Sa, tapi claka untuk orang yang jual Sa Anak Manusia. Lebi baik untuk orang itu kalo de tra perna lahir.”

Makan minum sama-sama

14:22-25

(Mat 26:26-29; Luk 22:15-20; 1 Kor 11:23-25)

22Waktu Yesus deng De pu murid-murid ada makan, Yesus ambil roti, doa bilang trima kasi ke Allah, trus pata-pata roti baru kasi ke dong deng bilang, “Ambil, ini Sa pu badan.” 23Habis itu De ambil glas anggur, doa bilang trima kasi ke Allah trus kasi ke dorang, baru dong smua minum dari glas anggur itu. 24Trus De bilang ke dorang, “Ini Sa pu dara yang bikin sah Allah pu janji, yang tatumpa untuk banyak orang. 25Yang Sa bilang ini benar: Sa trakan minum hasil anggur lagi sampe hari yang Sa minum hasil anggur yang baru, di Allah pu Krajaan.”

Petrus nanti bilang tra knal Yesus

14:26-31

(Mat 26:30-35; Luk 22:31-34; Yoh 13:36-38)

26Habis Yesus deng De pu murid-murid menyanyi puji-puji Allah, dong pigi ke Bukit Zaitun. 27Trus Yesus bilang ke dorang, “Nanti kam smua kas tinggal Saya. Sperti ada tatulis,

‘Sa Allah, nanti pukul kas mati gembala,

trus domba-domba itu lari tapisa-pisa.’ # Zakharia 13:7

28Tapi stela Sa hidup kembali, Sa nanti duluan kam ke Galilea.”

29Trus Petrus jawab Dia, “Biar dong smua kas tinggal Bapa tapi sa trakan kas tinggal Bapa.”

30Trus Yesus bilang ke dia, “Yang Sa bilang ini benar: Hari ini, malam ini juga seblum ayam berkokok dua kali, ko su bilang tra knal Sa tiga kali.”

31Tapi Petrus bilang lagi sunggu-sunggu, “Biar sa harus mati sama-sama deng Bapa juga, sa trakan bilang sa tra knal Bapa.” Yang lain smua juga bilang begitu.

Di taman Getsemani

14:32-42

(Mat 26:36-46; Luk 22:39-46)

32Trus Yesus deng De pu murid-murid pigi ke tempat satu yang de pu nama Getsemani. Yesus bilang ke De pu murid-murid, “Kam duduk disini, Sa mo berdoa dulu.” 33Trus De bawa Petrus, Yakobus deng Yohanes ikut sama-sama deng Dia. De rasa susa deng gelisa. 34Trus De bilang ke dorang, “Sa pu hati hancur skali, rasa macam mo mati. Kam tinggal disini trus jaga-jaga.”

35De maju sdikit trus tunduk sampe muka ke tana baru berdoa supaya kalo bisa, De tra usa kena susa itu. 36De bilang, “Bapa, Sa pu Bapa. Trada yang tra bisa untuk Bapa. Jang kas biar Sa kena sengsara ini ka, tapi jang Sa pu mau yang jadi, biar Bapa pu mau saja yang jadi.”

37Habis itu De kembali, begini De liat dong ada tidur. Trus De bilang ke Petrus, “Simon, ko tidur ka? Ko tra bisa jaga-jaga satu jam saja ka? 38Jaga-jaga deng berdoa suda, supaya kam jang jatu waktu dapa uji. Memang kam pu hati mo bikin yang benar, tapi kam pu badan tra kuat mo bikin itu.”

39Trus De pigi lagi baru berdoa ulang sperti yang pertama. 40Trus waktu De kembali lagi, De liat dong ada tidur karna dong pu mata su brat skali, baru dong tra tau mo bilang apa ke Dia.

41Habis itu De kembali yang ketiga kali baru bilang ke dorang, “Kam masi istirahat deng tidur ka? Cukup suda. De pu waktu su tiba. Liat, Sa Anak Manusia dapa jual ke orang-orang yang bikin dosa pu tangan. 42Bangun suda, mari! Tong pigi. De yang jual Sa su datang.”

Yesus dapa tangkap

14:43-52

(Mat 26:47-56; Luk 22:47-53; Yoh 18:1-11)

43Waktu Yesus masi bicara, Yudas de muncul, de tu satu orang dari 12 murid dorang. Ada satu rombongan orang yang sama-sama deng dia, dong bawa pedang deng tongkat kayu, dong dapa suru dari imam-imam kepala, guru-guru agama, deng orang Yahudi pu tua-tua. 44Orang yang jual Yesus su kastau tanda ini ke dorang, “Orang yang nanti Sa cium,#14:44 Orang yang nanti Sa cium ‒ Kalo baku ketemu dong biasa kasi salam deng cara cium di pipi, yang kas tunjuk kalo dong baik, sayang, hormat deng akrab sama orang itu. itu De suda, tangkap De trus kam bawa deng jaga De baik-baik.” 45Trus waktu de sampe disitu, de langsung ke Yesus baru bilang, “Guru!” trus de cium Yesus.

46Jadi dong pegang Yesus trus tangkap Dia. 47Tapi satu orang dari dong yang ada disitu, cabut de pu pedang trus srang kas putus Pemimpin Imam pu pesuru pu tlinga.

48Yesus bilang ke dorang,

“Kam kira Sa ni prampok ka, jadi kam datang lengkap deng pedang sama tongkat kayu untuk tangkap Saya? 49Stiap hari Sa ada deng kam dalam Ruma Allah untuk kas ajar orang banyak tapi kam tra tangkap Saya. Tapi memang smua ini harus jadi begini supaya apa yang ada tatulis dalam Kitab Suci itu jadi.”

50Trus De pu murid-murid smua lari kas tinggal Dia. 51Pas waktu itu ada anak muda satu yang cuma pake kain puti untuk pake tutup de pu badan, trus ikut Yesus. Dong tangkap dia, 52begini de lepas de pu kain itu trus lari tlanjang-tlanjang.

Yesus di depan Sidang Agama

14:53-65

(Mat 26:57-68; Luk 22:54-55, 63-71; Yoh 18:12-14, 19-24)

53Habis itu Yesus dapa bawa ke depan Pemimpin Imam, trus imam kepala smua, orang Yahudi pu tua-tua deng guru-guru agama, smua kumpul disitu. 54Trus Petrus su ikut Yesus dari jau sampe masuk ke Pemimpin Imam pu halaman, trus de duduk disana deng orang-orang yang jaga Ruma Allah, baru kas hangat badan dekat api.

55Imam-imam kepala deng anggota Sidang Agama smua brusaha cari bukti untuk kas sala Yesus supaya De dapa hukum mati, tapi dong tra dapat bukti apapa. 56Ada orang banyak juga yang kas saksi tipu-tipu untuk tudu Dia, tapi apa yang dong kas saksi tu smua beda-beda. 57Baru brapa orang bediri karang crita, dong bilang, 58“Tong perna dengar Orang ini De bilang, ‘Sa nanti kas hancur Ruma Allah ini yang manusia bikin deng dong pu tangan. Trus dalam tiga hari nanti Sa bikin Ruma Allah yang lain, yang bukan manusia bikin deng dong pu tangan.’ ” 59Tapi apa yang dong kas saksi itu juga beda-beda.

60Begini Pemimpin Imam bediri di depan orang-orang smua trus de tanya ke Yesus, “Ko tra mo jawab yang dong tudu-tudu ke Ko ini ka?” 61Tapi De diam deng tra bicara apapa. Pemimpin Imam itu, tanya De satu kali lagi, de bilang, “Ko tu Raja Yang Allah Pili ka, Ko tu De yang tong puji-puji pu Anak?”

62Yesus jawab, “Sa ini suda Dia, trus nanti kam liat Sa Anak Manusia, duduk di sebla kanan Yang Pu Kuasa Paling Besar, trus datang di awan-awan di langit.”#Mazmur 110:1; Daniel 7:13

63Begini Pemimpin Imam robek de pu pakean deng bilang, “Untuk apa tong cari saksi lagi? 64Kam su dengar De hina Allah! Kam pikir bagemana?”

Trus dong smua satu suara baru bilang kalo Yesus sala deng pantas dapa hukum mati.

65Trus brapa orang mulai luda Yesus deng tutup De pu muka baru pukul Dia, trus bilang, “Wei, nabi, Ko coba tebak, sapa yang pukul Ko?” Trus orang-orang yang jaga Ruma Allah dong juga pukul Dia.

Petrus bilang tra knal Yesus

14:66-72

(Mat 26:69-75; Luk 22:56-62; Yoh 18:15-18, 25-27)

66Waktu Petrus masi ada di halaman, begini Pemimpin Imam pu pesuru prempuan satu datang, 67trus waktu de liat Petrus ada kas hangat badan dekat api, de pratikan baik-baik trus bilang, “Ko juga biasa sama-sama deng Yesus orang Nazaret itu to?”

68Tapi Petrus bikin macam tra knal deng bilang, “Sa tra tau deng tra mengerti ko pu maksud tu apa.” Trus de pigi ke pintu gerbang [trus ayam berkokok].#14:68 trus ayam berkokok ‒ Bagian yang ada dalam kurung ini trada di teks-teks bahasa Yunani yang paling lama, tapi ada di brapa teks Yunani stela yang paling lama itu.

69Waktu pesuru prempuan itu liat Petrus lagi, de bilang lagi ke orang-orang yang ada disitu, “Orang ini satu dari dorang.”

70Tapi Petrus bilang lagi, de tra knal Dia. Tra lama begini orang-orang yang ada disitu dong juga bilang ke Petrus, “Pasti ko juga satu orang dari dorang, karna ko orang Galilea!”

71Begini Petrus bilang, “Sa sumpa! Sa tra knal orang yang kam ada bilang-bilang ini! Kalo sa tipu pasti Tuhan hukum saya!” 72Pas waktu itu ayam berkokok yang kedua kali. Jadi langsung Petrus ingat, kalo Yesus perna bilang ke dia, “Seblum ayam berkokok dua kali, ko su tiga kali bilang tra knal Saya.” Jadi Petrus mulai mnangis hancur.

Currently Selected:

Markus 14: MPapua

Highlight

Copy

Compare