Markus 12

Conto tentang orang-orang kerja di kebun anggur

12:1-12

(Mat 21:33-46; Luk 20:9-19)

1Trus Yesus mulai crita conto ke dorang, begini,

“Ada satu orang yang bikin kebun anggur deng bikin pagar kliling kebun itu. De gali lobang untuk tempat ramas anggur sama de bangun tempat jaga yang tinggi di dalam kebun itu. Habis itu de kas sewa kebun itu sama orang-orang yang kerja kebun itu, trus de brangkat ke tempat yang jau.#Yesaya 5:1-2 2Waktu su mo panen, orang yang pu kebun tu suru de pu pesuru pigi ke orang-orang yang sewa kebun tu untuk ambil sbagian hasil panen itu dari dorang. 3Tapi dong tangkap pesuru itu baru dong pukul de trus suru de pigi deng tangan kosong. 4Trus orang yang pu kebun itu suru de pu pesuru yang lain lagi pigi ke dorang. Tapi dong pukul de di kepala sampe luka deng dong bikin malu dia. 5Trus de suru de pu pesuru satu lagi, tapi dong bunu dia. De suru de pu pesuru banyak pigi ke dong tapi sama saja, ada yang dong pukul deng ada yang dong bunu. 6Skarang tinggal satu orang saja yang ada deng dia, itu de pu anak yang paling de sayang. Jadi, yang trakir de suru de pu anak itu pigi ke dorang, karna de pikir, ‘De ini sa pu anak jadi pasti dong hormat sama dia.’

7Tapi dong baku kastau begini, ‘De ini yang nanti pu hak di tana ini, mari tong bunu de supaya tana ini tong bisa ambil.’ 8Jadi dong tangkap baru bunu anak itu, trus dong lempar de kluar kebun itu.”

9Trus Yesus tanya ke dorang, “Kam pikir orang yang pu kebun anggur itu nanti de bikin apa? De pasti pigi bunu orang-orang yang sewa kebun anggur itu, trus kasi kebun itu sama orang-orang lain. 10Kam blum perna baca ayat ini ka,

‘Batu yang tukang-tukang bangunan dong buang,

skarang jadi batu fondasi yang paling penting.

11 Itu smua Tuhan yang bikin,

itu hal luar biasa yang bikin tong heran skali.’” # Mazmur 118:22-23

12Trus dong cari cara untuk tangkap Yesus, karna dong tau kalo conto itu pu maksud Yesus bicara kas sala dorang. Tapi dong takut sama orang banyak, jadi dong pigi kas tinggal Dia.

Soal bayar pajak

12:13-17

(Mat 22:15-22; Luk 20:20-26)

13Trus orang Yahudi pu pemimpin-pemimpin dong suru orang Farisi brapa deng orang-orang yang dukung Herodes brapa untuk pigi jebak Yesus deng cara tanya-tanya Dia. 14Dong datang trus bilang ke Dia,

“Bapa guru, tong tau Bapa ni orang yang jujur, baru Bapa tra takut sapa-sapa, karna Bapa tra kas beda-beda orang, tapi kas ajar Allah pu mau deng benar. Jadi coba Bapa kastau sama kitong, mnurut tong pu aturan agama, tong bisa bayar pajak sama Raja Besar Roma ka tra bisa? Tong harus bayar ka tidak?”

15Tapi Yesus tau kalo dong cuma bikin diri baik depan orang, jadi De bilang sama dorang, “Knapa kam coba Saya? Bawa uang perak satu sama Sa, supaya Sa liat!” 16Trus dong bawa uang logam perak satu untuk Dia baru De tanya dorang, “Ini sapa pu gambar deng nama?”

Dong jawab, “Raja Besar Roma pu gambar deng nama.”

17Trus Yesus bilang sama dorang, “Kalo begitu, kasi sama Raja Besar Roma apa yang jadi Raja Besar Roma pu hak, trus kasi sama Allah apa yang jadi Allah pu hak.”

Dong smua heran skali pas dengar apa yang De bilang.

Yesus kas ajar tentang hidup kembali

12:18-27

(Mat 22:23-33; Luk 20:27-40)

18Habis itu orang-orang dari klompok Saduki#12:18 Saduki ‒ Ini klompok satu di agama Yahudi. Dong ni tra percaya kalo orang mati nanti hidup kembali, dong tra percaya kalo malaikat tu ada. Dong hanya percaya deng Musa pu lima kitab (Kejadian—Ulangan). datang ke Yesus. Dong itu tra percaya kalo orang-orang mati nanti hidup kembali. Jadi, dong tanya sama Yesus,

19“Bapa Guru! Musa de su tulis printa ini untuk kitong, ‘Kalo satu laki-laki de mati kas tinggal de pu istri baru dong dua tra pu anak, de pu sodara laki-laki musti kawin deng de pu istri supaya ada turunan untuk laki-laki yang su mati itu.’#Ulangan 25:5-6 20Ada crita satu begini, tuju orang sodara dong smua laki-laki. Yang sodara pertama kawin, trus mati tra pu anak. 21Trus yang kedua juga kawin deng janda itu, tapi de juga mati baru tra pu anak, yang ketiga juga sama saja. 22Dong smua begitu sampe yang ketuju, dong smua mati tapi trada anak. Habis dong smua mati, prempuan itu juga mati. 23Jadi waktu orang mati hidup kembali, sapa yang jadi prempuan itu pu suami? Karna tuju orang itu su kawin deng dia.”

24Yesus bilang ke dorang,

“Kam su sala skali, karna kam tra mengerti Kitab Suci deng juga Allah pu kuasa. 25Karna kalo orang mati dong hidup kembali, dong tra kawin deng tra dapa kawin tapi dong sperti malaikat di surga. 26Trus tentang orang mati nanti hidup kembali, kam blum perna baca dalam kitab Musa ka, yang crita tentang pohon duri lebat itu? Waktu itu Allah bicara ke Musa begini, ‘Sa ini suda, Allah yang Abraham, Ishak, deng Yakub dong semba.’#Keluaran 3:6 27Jadi De bukan Allah dari orang mati, tapi Allah dari orang yang hidup. Kam su sala mengerti!”

Printa yang paling penting

12:28-34

(Mat 22:34-40; Luk 10:25-28)

28Waktu itu ada guru agama satu yang dengar Yesus baku tawar deng orang-orang klompok Saduki. De liat apa yang Yesus jawab ke dong itu pas skali, jadi de datang ke Yesus trus tanya, “Printa mana yang paling penting?”

29Yesus jawab,

“Printa yang paling penting itu: ‘Orang Israel dengar ini, Tuhan itu tong pu Allah, Tuhan itu cuma satu. 30Sayang ko pu Tuhan Allah deng sunggu-sunggu, deng smua ko pu hidup, deng smua yang ko pikir, deng juga smua tenaga.’#Ulangan 6:4-5 31Trus printa yang kedua itu: ‘Sayang orang lain sama sperti ko sayang ko pu diri sendiri.’#Imamat 19:18 Trada printa yang lebi penting dari printa dua ini.”

32Trus begini guru agama itu bilang ke Yesus,

“Apa yang Guru bilang tu benar skali, ‘Tuhan Allah itu cuma satu, trada Allah yang lain lagi, cuma De saja.’#Ulangan 4:35 33Memang harus ‘sayang ko pu Tuhan Allah deng sunggu-sunggu, deng smua yang ko pikir, deng smua tenaga,’ deng juga ‘sayang orang lain sama sperti ko sayang ko pu diri sendiri.’ Bikin printa dua ini lebi penting daripada smua korban persembahan yang dong bakar deng persembahan yang lain juga.”#Hosea 6:6

34Yesus liat kalo guru agama tu de jawab baik skali, jadi Yesus bilang ke Dia, “Sdikit lagi ko jadi Allah pu orang dalam De pu Krajaan.”#12:34 Sdikit lagi ko jadi Allah pu orang dalam De pu Krajaan ‒ Bahasa Yunani: ko tra jau dari Allah pu Krajaan.

Habis itu, trada satu orang yang brani tanya-tanya lagi sama Yesus.

Yesus pu hubungan deng Daud

12:35-37

(Mat 22:41-46; Luk 20:41-44)

35Waktu Yesus ada ajar di Ruma Allah, De bilang, “Knapa guru-guru agama bisa bilang kalo Raja Yang Allah Pili itu Daud pu turunan? 36Padahal Daud sendiri waktu Roh Allah kuasai dia, de bilang,

‘Tuhan Allah su bilang sama sa pu Tuhan:

Duduk di Sa pu sebla kanan,

sampe Ko pu musu-musu Sa taru di bawa Ko pu kaki.’ # Mazmur 110:1

37Daud sendiri sebut De itu ʻTuhan,ʼ jadi De bukan hanya Daud pu turunan saja.”

Orang yang banyak-banyak itu dong snang dengar yang De bilang.

Yesus kas naseat supaya hati-hati deng guru-guru agama

12:38-40

(Mat 23:5-7; Luk 20:45-47)

38Waktu Yesus kas ajar orang banyak itu, De bilang,

“Kam harus hati-hati deng guru-guru agama. Dong snang jalan pake baju-baju panjang trus dong mau skali dapat hormat di pasar, 39dong juga suka duduk paling depan di tempat ibada deng di pesta-pesta. 40Tapi dong biasa tipu janda-janda untuk ambil paksa dong pu ruma. Trus untuk tutup dong pu klakuan jahat itu, dong doa yang panjang-panjang. Dong ini pasti trima hukuman yang lebi brat.”

Janda miskin pu persembahan

12:41-44

(Luk 21:1-4)

41Satu kali begini, Yesus duduk baku depan deng kotak persembahan trus pratikan orang-orang dong kasi uang ke dalam kotak itu bagemana. Orang kaya banyak yang kas masuk uang besar. 42Trus ada janda satu yang miskin datang baru kas masuk uang logam dua yang de pu nilai paling kecil. 43Yesus panggil De pu murid-murid trus bilang ke dorang,

“Yang Sa bilang ini benar: Janda miskin ini de kasi lebi banyak dari smua orang yang kas masuk uang ke dalam kotak persembahan. 44Karna dong smua kasi dong pu persembahan dari dong pu uang yang banyak, tapi janda ini de su kasi smua yang de punya, smua yang de perlu untuk pake hidup.”

Currently Selected:

Markus 12: MPapua

Highlight

Copy

Compare