Markus 10
10
Tentang cerai
10:1-12
(Mat 19:1-9)
1Habis itu, Yesus brangkat ke daera Yudea deng daera di sebla kali Yordan, trus banyak orang datang lagi kumpul kliling Dia, trus De kas ajar dong sperti biasa lagi.
2Trus orang-orang Farisi datang untuk coba Yesus, dong tanya ke Dia, “Di tong pu hukum agama, bisa ka kalo suami cerai deng de pu istri?”
3Yesus jawab, “Musa printa apa ke kam?”
4Dong jawab, “Musa kas ijin bikin surat cerai baru cerai.”#Ulangan 24:1
5Trus Yesus bilang ke dorang,
“Karna memang kam pu kepala batu jadi Musa tulis aturan itu untuk kas ijin kam cerai. 6Tapi dari pertama waktu Allah bikin dunia ini, ‘Allah bikin dong tu laki-laki deng prempuan. 7Itu jadi laki-laki tra tinggal lagi sama de pu bapa deng mama, tapi hidup satu hati deng de pu istri, 8biar dong dua jadi satu.’#Kejadian 2:24 Jadi dong dua bukan dua orang lagi tapi satu. 9Jadi, apa yang Allah su kas satu, manusia tra bole kas pisa.”
10Waktu dong su di ruma, murid-murid tanya lagi ke Yesus tentang itu. 11Trus De bilang ke dorang,
“Sapa saja yang kas cerai de pu istri baru pigi kawin lagi deng prempuan lain, itu de su bikin dosa ke de pu istri karna su tidur deng orang yang bukan de pu pasangan. 12Begitu juga deng prempuan yang kas cerai de pu suami trus kawin lagi deng laki-laki lain, itu de su bikin dosa karna su tidur deng orang yang bukan de pu pasangan.”
Yesus berkati anana kecil
10:13-16
(Mat 19:13-15; Luk 18:15-17)
13Trus orang-orang bawa anana kecil ke Yesus supaya De taru tangan untuk berkati dorang. Tapi De pu murid-murid tegur orang-orang itu. 14Waktu Yesus liat dong bikin begitu, De mara baru bilang ke dorang,
“Kas biar anana kecil itu datang ke Sa, jang larang-larang dong, karna orang-orang sperti begini yang punya Allah pu Krajaan.#10:14 karna orang-orang sperti begini yang punya Allah pu Krajaan ‒ Yesus pu maksud tu, kalo orang mo masuk Allah pu krajaan, de harus trima Yesus deng renda hati, sama sperti anana. Tra bisa bawa apapa untuk kas benar diri, hanya percaya sama Yesus saja. 15Yang Sa bilang ini benar: Sapa saja yang tra mo trima Allah pu Krajaan di de pu hidup sperti anak kecil, de tra bisa masuk dalam Allah pu Krajaan.”
16Trus De peluk anana itu baru De taru tangan untuk berkati dorang.
Conto orang yang kaya
10:17-27
(Mat 19:16-26; Luk 18:18-27)
17Waktu Yesus De jalan lanjut lagi, ada satu orang yang lari ke De baru tanam lutut depan De trus tanya, “Bapa Guru yang baik, sa harus bikin apa supaya bisa hidup trus sampe trada akir?”
18Yesus jawab, “Knapa ko bilang Sa baik? Trada satu orang yang baik cuma Allah saja. 19Ko pasti tau Allah pu printa-printa, ‘Jang bunu orang, jang tidur deng orang yang bukan ko pu pasangan, jang curi, tra bole tipu waktu jadi saksi, tra bole tipu-tipu orang, juga ko harus kas tunjuk hormat sama ko pu bapa deng mama. ’”#Keluaran 20:12-16; Ulangan 5:16-20
20Trus orang itu bilang ke Dia, “Guru, Allah pu printa itu smua sa su bikin dari sa muda.”
21Yesus liat de deng rasa sayang, baru bilang ke dia, “Tinggal satu lagi yang ko blum bikin. Pigi baru jual smua yang ko punya trus kasi itu sama orang-orang miskin, deng bikin begitu ko nanti dapat harta di surga. Habis itu baru ko datang ikut Saya.”
22Dengar begitu langsung de pu hati hancur, trus de pigi deng rasa sedi skali, karna de pu harta banyak.
23Trus Yesus liat De pu murid-murid yang ada kliling De baru bilang ke dorang, “Memang susa skali orang yang pu harta banyak masuk dalam Allah pu Krajaan.” 24De pu murid-murid heran dengar apa yang De bilang itu. Tapi Yesus bilang lagi, “Sa pu anana, memang susa skali masuk dalam Allah pu Krajaan. 25Lebi gampang satu ekor unta masuk lewat lobang jarum daripada satu orang kaya masuk dalam Allah pu Krajaan.”
26Dong tamba heran lagi, trus bilang ke yang lain, “Kalo begitu sapa yang bisa slamat?”
27Yesus liat dong baru bilang, “Manusia tra bisa kas slamat de pu diri sendiri, tapi tra begitu untuk Allah, karna apa saja pasti bisa untuk Allah.”
Hasil dari ikut Yesus
10:28-31
(Mat 19:27-30; Luk 18:28-30)
28Trus Petrus bilang ke Yesus, “Liat, tong su kas tinggal smua-smua untuk ikut Bapa!”
29Yesus jawab,
“Yang Sa bilang ini benar: Orang yang kas tinggal de pu ruma, de pu sodara laki-laki ato sodara prempuan, de pu mama ato bapa, de pu anana ato de pu kebun karna Sa, deng karna mau kastau Brita Baik, 30orang itu di waktu skarang ini pasti dapat 100 kali lebi banyak: ruma, sodara laki-laki, sodara prempuan, mama, anana deng kebun. Biar de dapa siksa banyak juga, di jaman yang datang nanti de hidup trus sampe trada akir. 31Tapi banyak orang yang pertama nanti jadi yang trakir, trus yang trakir nanti jadi yang pertama.”
Yesus kastau yang ketiga kali kalo nanti De mo sengsara
10:32-34
(Mat 20:17-19; Luk 18:31-34)
32Yesus deng De pu murid-murid dong jalan ke Yerusalem trus Yesus jalan depan dorang. Yesus pu murid-murid dong heran tapi orang-orang yang ada ikut De, dong takut. Yesus panggil De pu 12 murid satu kali lagi baru kastau ke dong apa yang nanti jadi sama Dia. 33De bilang,
“Skarang tong pigi ke Yerusalem, baru Sa Anak Manusia nanti dapa kasi ke imam-imam kepala deng guru-guru agama, trus nanti dong hukum mati Saya. Nanti dong kasi Sa ke orang-orang bukan Yahudi, 34baru nanti dong ejek, dong luda, dong cambuk deng bunu Sa, tapi hari ketiga Sa nanti hidup kembali.”
Yakobus deng Yohanes minta jadi orang pertama
10:35-45
(Mat 20:20-28)
35Trus Yakobus deng Yohanes, bapa Zebedeus pu anana, dong dua jalan dekat ke Yesus trus bilang ke Dia, “Guru, Guru kasi apa yang tong mo minta ke Guru ini ka!”
36Yesus tanya dong dua, “Apa yang kam dua mo Sa bikin untuk kam dua?”
37Dong dua bilang, “Tong dua mo Guru kas ijin tong dua duduk di samping Guru, yang satu di sebla kanan deng yang satu lagi di sebla kiri, waktu nanti Guru jadi Raja yang pu kuasa luar biasa.”
38Tapi Yesus bilang dong dua, “Kam tra tau apa yang kam minta. Kam sanggup minum dari glas sengsara yang Sa minum ato sanggup trima baptisan siksa macam Sa nanti ka?”
39Dong dua jawab, “Tong sanggup.”
Yesus bilang ke dong dua, “Memang nanti kam juga minum dari glas sengsara yang Sa minum deng trima baptisan siksa macam Saya. 40Tapi kalo soal duduk di Sa pu sebla kanan ato kiri, Sa tra pu hak untuk kasi. Itu nanti Allah yang kasi ke orang-orang yang De su pili.”
41Dengar begitu, spulu murid yang lain dong mara sama Yakobus deng Yohanes.
42Trus Yesus panggil dong baru bilang,
“Kam su tau kalo dong yang dapa anggap pemimpin-pemimpin dari bangsa-bangsa lain, biasa tindas orang-orang yang dong pimpin, sama orang-orang yang pegang kuasa bikin apa saja yang dong mau ke dorang. 43Tapi kam tra bole begitu. Sapa saja yang mo jadi lebi hebat dari yang lain, de harus layani yang lain. 44Trus sapa saja dari kam yang mo jadi yang pertama, de harus jadi pesuru untuk kam smua. 45Karna Sa Anak Manusia juga datang bukan untuk orang layani Sa, tapi untuk layani orang, trus untuk kasi Sa pu hidup ganti banyak orang untuk kas bebas dorang.”
Yesus kas sembu Bartimeus
10:46-52
(Mat 20:29-34; Luk 18:35-43)
46Trus Yesus deng de pu murid-murid tiba di Kota Yerikho. Trus waktu Yesus pigi dari kota itu sama-sama De pu murid-murid deng orang banyak skali, ada orang buta satu yang biasa minta-minta, de pu nama Bartimeus, bapa Timeus pu anak. Bartimeus de duduk di pinggir jalan. 47Waktu de dengar kalo yang ada lewat itu Yesus orang Nazaret, de mulai batariak bilang, “Yesus, Daud pu turunan, kasian sa ka!” 48Banyak orang yang tegur supaya de diam.
Tapi de batariak lebi kras lagi, “Daud pu turunan, kasian sa ka!”
49Yesus brenti trus bilang, “Suru de datang kemari!”
Jadi dong panggil orang buta itu trus bilang ke dia, “Kas kuat ko pu hati! Bediri, Yesus suru ko ke Dia.” 50Langsung orang buta itu lepas de pu baju panjang luar, bediri cepat-cepat baru pigi ke Yesus.
51Yesus tanya dia, “Ko mau Sa bikin apa untuk ko?”
Orang buta itu jawab, “Guru, sa mau supaya sa bisa liat!”
52Trus Yesus bilang ke dia, “Ko bisa pigi, karna ko percaya Sa, ko sembu!” Waktu itu juga de bisa liat, trus de ikut jalan sama-sama deng Yesus.
Currently Selected:
Markus 10: MPapua
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
