Lukas 4

Yesus dapa coba dari Iblis

4:1-13

(Mat 4:1-11; Mrk 1:12-13)

1Roh Allah kuasai Yesus, trus De pigi dari kali Yordan. Roh Allah bawa De ke tempat sepi yang kring. 2Disitu Yesus dapa coba dari Iblis 40 hari. 40 hari itu Yesus tra makan apapa jadi De rasa lapar. 3Begini Iblis bilang sama Yesus, “Ko ni Allah pu Anak to? Coba Ko suru batu ini jadi roti.”

4Yesus bilang dia, “Ada tatulis begini, ‘Manusia hidup tu bukan dari roti saja.’ ”#Ulangan 8:3

5Trus Iblis de bawa Yesus ke tempat satu yang tinggi, disana deng cepat skali Iblis kas liat smua krajaan di dunia. 6Iblis bilang Dia,

“Smua kuasa itu deng de pu bagus-bagus smua, sa nanti kasi untuk Ko, karna smua itu sa su dapa kasi. Trus sa bisa kasi smua itu sama sapa saja yang sa mau. 7Jadi sa mo kasi smua sama Ko tapi, kalo Ko mo tunduk semba sama saya.”

8Tapi Yesus jawab, “Ada tatulis, ‘Ko harus semba ko pu Tuhan Allah, trus ko harus kerja hanya untuk De saja!’ ” #Ulangan 6:13

9Habis itu de bawa Yesus ke Yerusalem trus bawa De di ujung bagian atas Ruma Allah. Baru de bilang ke Yesus, “Ko ni Allah pu Anak to, coba Ko lompat dari sini ke bawa. 10Karna ada tatulis begini, ‘Tentang Ko, Allah pasti kas printa De pu malaikat-malaikat untuk jaga Ko. 11Trus dong nanti tada Ko deng dong pu tangan supaya Ko pu kaki juga jang kena batu.’”#Mazmur 91:11-12

12Yesus jawab dia, “Ada tatulis, ‘Jang ko coba-coba ko pu Tuhan Allah!’ ” #Ulangan 6:16

13Stela Iblis slesai coba Yesus, de mundur dari Yesus trus de tunggu waktu yang baik.

Yesus mulai De pu kerja dari Galilea

4:14-15

(Mat 4:12-17; Mrk 1:14-15)

14Habis itu deng kuasa Roh Allah, Yesus De kembali ke daera Galilea. Di daera itu, di mana-mana tempat orang-orang crita tentang Yesus. 15Waktu itu De kas ajar di tempat-tempat ibada situ, smua orang dong puji-puji Dia.

Yesus dapa usir di Nazaret

4:16-30

(Mat 13:53-58; Mrk 6:1-6)

16Yesus De pigi juga ke Nazaret tempat dulu De besar disitu. Sperti biasa Yesus masuk ke tempat ibada pas orang Yahudi pu hari Sabat,#4:16 orang Yahudi pu hari Sabat ‒ Hari Sabat tu hari yang kusus untuk orang-orang Yahudi, mulai dari hari Jumat pas matahari masuk sampe Sabtu matahari masuk. Hari Sabat kusus untuk brenti kerja, baru ibada sama-sama. Aturan hari Sabat ada di Keluaran 20:9-10; Ulangan 5:13-14. trus bediri untuk baca Kitab Suci. 17Dong kasi Yesus baca kitab yang Nabi Yesaya de tulis. Habis buka kitab itu, De dapat ayat yang tulis begini,

18 “Tuhan pu Roh ada sama Saya,

karna De su pili Saya untuk kastau Brita Baik ke orang miskin.

De utus Sa untuk kas lepas orang yang dapa tangkap,

kas sembu mata yang tra bisa liat,

untuk kas lepas orang yang dapa injak,

19 trus kastau kalo Tuhan su mulai kas liat De pu sayang ke De pu umat.” #Yesaya 61:1-2

20Habis tu Yesus tutup kitab itu baru kas kembali sama yang tugas disitu, trus duduk. Smua orang dalam tempat ibada tu liat baik-baik ke Dia. 21Trus Yesus mulai kas ajar dorang, De bilang, “Hari ini smua yang tadi kam su dengar tu, skarang su jadi.”

22Smua orang puji De baru dong heran kata-kata bagus skali yang De bilang, trus dong bilang, “Tra sangka eh! De tu Yusuf pu Anak.”

23Jadi Yesus bilang sama dong begini, “Pasti kam mo bicara Sa kata pepata yang bilang,#4:23 Dokter, kas sembu ko pu diri dulu ‒ Dalam pepata ini ʻDokterʼ itu Yesus, trus ʻko pu diriʼ tu orang-orang di De pu kampung halaman. Orang-orang ini mo Yesus bikin sperti yang Yesus su bikin di tempat lain, untuk kas bukti kalo De benar-benar Raja Yang Allah Pili. ‘Dokter, kas sembu ko pu diri dulu.’ Coba bikin disini di Ko pu kampung smua yang tong su dengar yang Ko su bikin di Kapernaum! ”

24Yesus tamba bicara lagi,

“Yang Sa bilang ini benar: Trada nabi yang dapa hormat di de pu kampung sendiri. 25Yang Sa bilang ini benar: Waktu jaman Nabi Elia, disitu hujan tra turun sampe tiga stenga taun, ada musiba lapar di smua negri itu. Waktu itu ada banyak janda-janda di Israel, 26tapi Allah tra utus Elia ke satu orang dari dorang, tapi ke satu prempuan janda di Sarfat, di tana Sidon.#1 Raja-raja 17 27Waktu Nabi Elisa pu jaman, banyak orang yang sakit kulit busuk di Israel, juga trada satu orang yang dapa kas sembu dari dorang, cuma Naaman, orang Siria itu.”#2 Raja-raja 5:1-19

28Dengar itu smua orang di tempat ibada dong mara skali. 29Dong bediri trus usir Yesus kluar kota baru bawa De ke pinggir gunung, tempat kota itu dong bangun. Dong mo dorong De ke jurang itu. 30Tapi Yesus De jalan dari tenga-tenga dong trus pigi.

Yesus dalam tempat ibada di Kapernaum

4:31-37

(Mrk 1:21-28)

31Trus Yesus pigi ke Kota Kapernaum di daera Galilea. Disitu Yesus kas ajar stiap hari Sabat. 32Dong smua heran dengar apa yang De kas ajar, karna De pu kata-kata penu deng kuasa. 33Di dalam tempat ibada itu, ada satu orang yang krasukan setan, de batariak deng suara kras, 34“He Yesus, orang Nazaret, Ko mo bikin apa deng kitong? Ko datang mo kas hancur tong ka? Sa tau Ko tu sapa, Ko itu Orang Suci yang Allah utus.”

35Tapi Yesus printa dia, “Diam! Kluar dari dia!” Setan itu banting orang itu di tenga-tenga orang banyak, trus de kluar baru tra bikin sakit orang itu.

36Trus smua orang yang liat tu heran, dong baku bicara, “Sunggu, hebat skali kata-kata ini! Karna deng penu kuasa De kas printa setan-setan, trus dong kluar.” 37Trus tasebar brita tentang Yesus di smua daera itu.

Yesus De kas sembu Simon pu mama mantu deng banyak orang lain

4:38-41

(Mat 8:14-17; Mrk 1:29-34)

38Yesus kas tinggal tempat ibada, trus pigi ke Simon pu ruma. Simon pu mama mantu sakit panas tinggi, jadi dong minta Yesus tolong mama. 39Trus Yesus pigi bediri di samping mama baru usir sakit itu. Panas tinggi tu hilang, langsung mama de bangun deng kas siap makanan untuk Yesus dorang.

40Pas matahari masuk, banyak orang bawa dong pu kluarga yang mendrita sakit macam-macam. Trus Yesus De taru tangan di dong smua yang sakit satu-satu trus kas sembu dorang. 41Dari banyak orang kluar setan-setan deng batariak, “Yesus, Ko ni Allah pu Anak.” Tapi Yesus larang dong bicara, karna dong tau kalo Yesus tu Raja Yang Allah Pili.

Yesus kas ajar di kota-kota lain

4:42-44

(Mrk 1:35-39)

42Pas matahari baru mo naik, Yesus pigi ke tempat yang sunyi. Orang-orang dong cari De, pas dong dapat, baru dong coba tahan Yesus supaya jang kas tinggal dorang. 43Tapi Yesus bilang, “Di kota-kota lain juga Sa harus kastau Brita Baik tentang Allah pu Krajaan,#4:43 Allah pu Krajaan ‒ Istila ni pu arti, Raja yang Allah janji tu su pegang printa di bumi, trus De printa jadi Raja dalam orang pu hidup. Smua ini mulai jadi waktu Yesus datang ke bumi. Waktu Yesus ada di bumi, De bikin banyak macam tanda luar biasa, trus itu kas tunjuk kalo De su mulai printa jadi Raja di bumi. Allah pu Krajaan juga pu arti, dunia yang baru yang Allah pu orang-orang nanti tinggal disitu sampe trada akir, yang waktu itu Yesus betul-betul printa jadi Raja, trada yang lawan De lagi. karna untuk itu Sa dapa utus ke dunia ini.” 44Trus De kastau Brita Baik dalam tempat-tempat ibada di daera Yudea.

Currently Selected:

Lukas 4: MPapua

Highlight

Copy

Compare