Kisah Para Rasul 7

Stefanus bicara di depan Sidang Agama

7:1-53

1Trus Pemimpin Imam de tanya sama Stefanus, “Betul smua yang dong ada tudu sama ko?”

2Trus Stefanus de jawab,#7:2 Stefanus de jawab ‒ Stefanus de mo kastau kalo de percaya sama Allah yang Abraham, Ishak deng Yakub dong semba. De juga kas tunjuk hormat sama hukum Musa. Stefanus de kastau kalo sperti dong pu nene moyang yang tolak apa yang Allah mo kasi, sperti itu juga dong yang tolak Yesus yang Allah su kirim.

“Bapa-bapa deng sodara-sodara! Dengar e! Allah yang luar biasa De kas tunjuk De pu diri sama tong pu moyang Abraham. Itu jadi waktu de masi di daera Mesopotamia, seblum de pinda ke Kota Haran.#7:2 Kota Haran ‒ Stefanus mo kastau kalo Allah bicara sama Abraham waktu de masi blum tinggal di daera Israel. Supaya orang bisa tau kalo orang dong bisa semba Allah dimana saja, Ruma Allah tra begitu penting sperti pemimpin agama Yahudi pikir. 3Allah bilang sama Abraham begini, ‘Kluar kas tinggal ko pu tana deng ko pu kluarga besar. Ko pigi ke tana yang nanti Sa kas tunjuk sama ko.’#Kejadian 12:1 4Itu jadi, Abraham de kas tinggal daera Mesopotamia, orang Kasdim pu tana. Baru de pigi tinggal di Kota Haran. Stela Abraham pu bapa mati, Allah suru de pinda dari Haran ke tana yang skarang tong ada tinggal ini.

5Waktu itu, Allah tra kasi tana sama Abraham biar mo satu jingkal juga. Tapi Allah De janji kalo nanti De kasi tana itu sama Abraham deng de pu anana cucu, padahal waktu itu Abraham trada anak. 6Tapi Allah De bilang sama Abraham begini, ‘Ko pu anana cucu nanti jadi orang pendatang di orang asing pu tana, nanti dong jadi budak trus dong tinggal dapa injak-injak trus sampe 400 taun. 7Tapi bangsa yang bikin dong jadi budak itu nanti dapa hukum dari Saya, dong nanti kluar dari tana itu trus datang sembayang sama Sa di tempat ini.’#Kejadian 15:13-14 8Habis itu Allah bikin sah janji itu deng acara sunat,#7:8 bikin sah janji itu deng acara sunat ‒ Allah suru Abraham de sunat untuk jadi tanda kalo dong jadi Allah pu orang deng mo semba sama Allah. Allah suru Abraham de kas sunat de pu anana laki-laki. Jadi waktu Abraham pu anak Ishak lahir, stela dlapan hari de sunat Ishak. Trus Ishak de sunat de pu anak Yakub, trus Yakub de sunat de pu anana laki-laki. Yakub pu anana tu tong pu moyang 12 orang.#Kejadian 12:1-3; 17; 21:2-4

9Tong pu moyang dong iri sama dong pu sodara Yusuf, jadi dong jual de ke tana Mesir. Tapi Allah slalu sama-sama deng dia. 10Trus Allah kas slamat de dari smua sengsara yang de dapat. Allah bikin de pu cara pikir paling baik sampe raja Mesir ato Firaun ni, baik sama dia. Itu jadi, raja Mesir angkat de jadi orang kedua di negri itu deng pegang kuasa di de pu istana.

11Habis tu ada klaparan di smua tana Mesir deng tana Kanaan, yang bikin sampe dong kena sengsara yang brat. Tong pu moyang dong tra bisa dapat makanan. 12Tapi waktu tong pu moyang laki-laki pu bapa Yakub de dengar kalo di tana Mesir ada makanan, de suru tong pu moyang dong pigi kesana. Itu pertama kali dong kesana. 13Waktu dong pigi kedua kali, Yusuf kas knal de pu diri sama de pu sodara-sodara,#7:13 Yusuf kas knal de pu diri sama de pu sodara-sodara ‒ Waktu itu Yusuf su tinggal 13 taun di Mesir. De su blajar budaya deng bahasa Mesir, de juga pake pakean Mesir. De pake penerjema untuk bicara ke de pu kaka-kaka supaya dong tra tau kalo de Yusuf. Jadi de pu kaka-kaka tra tau kalo de Yusuf sampe de kastau sendiri. Liat crita di Kejadian 42—45. itu baru raja Mesir tau Yusuf pu kluarga. 14Habis itu Yusuf suru pigi jemput de pu bapa Yakub, deng de pu kluarga besar smua, dong pu jumla 75 orang. 15Trus Yakub dong pigi ke Mesir. Disitu de mati, de sama tong pu nene moyang. 16Dong pu mayat dong kas pinda ke Sikhem trus dong taru dalam goa kubur yang Abraham su bli deng uang perak#7:16 uang perak Bahasa Yunani: dinar. Biasa satu dinar tu gaji untuk satu hari kerja. dari Hamor pu anana di Sikhem.#Kejadian 37:1—50:14

17Tapi su dekat waktu yang Allah pu janji sama Abraham mo jadi, dong tamba banyak lagi di Mesir. 18Sampe nanti ada raja baru satu yang pegang printa di tana Mesir, de ni tra tau tentang Yusuf. 19Raja itu de tipu deng siksa tong pu nene moyang juga suru buang dong pu bayi, supaya dong mati.#7:19 buang dong pu bayi, supaya dong mati ‒ Raja Mesir de takut kalo orang Israel dong jadi banyak, dong bisa balik lawan de pu printa. Jadi de suru de pu orang untuk buang smua orang Israel pu anak bayi laki-laki ke dalam kali Nil. Liat Keluaran 1. Kira-kira dong ada 1,5 juta orang Israel di Mesir. 20Pas waktu itu Musa de lahir, de bayi yang bagus skali di Allah pu mata. Slama tiga bulan de dapa piara di de pu bapa pu ruma. 21Habis itu dong musti buang Musa, tapi raja Mesir pu anak prempuan ambil deng piara de sperti de pu anak sendiri. 22Jadi Musa blajar smua ilmu bangsa Mesir, de jadi pintar bicara deng bisa bikin apa saja deng de pu kuasa.#Keluaran 2:1-10

23Waktu Musa de pu umur 40 taun, muncul dalam de pu hati rasa rindu mo pigi liat de pu sodara-sodara orang-orang Israel. 24Pas waktu itu de liat satu orang de dapa siksa dari orang Mesir satu, jadi de pigi balas dendam deng cara bunu orang Mesir itu. 25Musa de kira de pu orang-orang mngerti kalo Allah mo pake de untuk kas slamat dong dari orang Mesir, tapi dong tra mngerti.

26Besok begini de liat dua orang Israel baku pukul, trus de coba untuk bikin dong dua baku damei. De bilang, ‘Eee! Kam dua itu sodara, knapa kam baku pukul?’ 27Tapi orang yang bikin sala sama de pu teman itu, de dorong Musa deng bilang, ‘Sapa yang su angkat ko jadi tong pu pemimpin deng hakim ka? 28Knapa! Ko mo bunu sa sperti kmarin ko su bunu orang Mesir itu ka?’#Keluaran 2:14 29Pas Musa de dengar kata-kata itu, de takut trus lari dari Mesir baru pigi tinggal di daera Midian.#7:29 Daera Midian ni di sebla timur dari Laut Mera, kira-kira 160 km dari Mesir. Disana de kawin trus de dapat anak laki-laki dua.

30Stela 40 taun begitu, satu malaikat kas tunjuk diri sama Musa#7:30 satu malaikat kas tunjuk diri sama Musa ‒ Di Keluaran 3:2—4:17 itu kas jlas kalo malaikat ini tu Tuhan sendiri. Tuhan kas tunjuk diri dalam bentuk malaikat. Yang Stefanus bilang di ayat 30-34 juga kas tunjuk ini. sperti api yang menyala di dalam pohon duri lebat, di tempat sepi yang kring#7:30 tempat sepi yang kring ‒ Musa di tempat sepi ini untuk jaga kambing domba. Daera ini kring, tra bisa pake untuk kebun, tapi ada tumbuhan sdikit untuk binatang bisa makan. dekat gunung Sinai. 31Musa de heran deng smua yang de liat. Jadi de pigi dekat pohon kecil itu supaya bisa liat deng jlas. Tapi de dengar Tuhan pu suara bilang, 32‘Sa ini suda, Allah yang ko pu nene moyang Abraham, Ishak, deng Yakub dong semba.’#Keluaran 3:6 Musa de gementar deng tra brani liat pohon kecil itu lagi. 33Trus Tuhan bilang lagi, ‘Buka ko pu sendal, karna tempat yang ko ada bediri tu tana suci. 34Sa su liat deng sunggu-sunggu kalo Sa pu orang di Mesir sengsara skali. Sa su dengar dong batariak minta tolong, trus Sa turun kas bebas dorang. Mari, Sa mo utus ko kembali ke Mesir.’ ”#Keluaran 3:7, 8

35Stefanus bilang lagi,

“Musa de ni yang bangsa Israel tolak#7:35 bangsa Israel tolak ‒ Sama sperti orang Israel tolak Musa yang Allah utus untuk kas bebas dong yang jadi budak di Mesir, dong pu anana cucu orang Yahudi dong tolak Yesus yang Allah utus untuk kas bebas dong dari dong pu dosa. trus bilang de begini, ‘Sapa yang su angkat ko jadi tong pu pemimpin deng hakim ka?’#Keluaran 2:14 Tapi memang de orang yang Allah utus untuk pimpin deng kas bebas orang-orang Israel. Allah suru de lewat malaikat yang kas tunjuk diri di pohon duri lebat yang menyala. 36Musa de yang bawa dong kluar dari tana Mesir. De yang bikin tanda-tanda heran di Mesir, di Laut Mera, deng di tempat sepi yang kring sampe 40 taun. 37Musa ini juga yang bilang sama orang Israel begini, ‘Satu Nabi sperti saya, nanti Allah angkat untuk kam dari tenga kam pu sodara-sodara.’#Ulangan 18:15 38Musa ni ada sama-sama deng orang-orang Israel di tempat sepi yang kring. De yang jadi jembatan untuk Allah pu orang-orang di tempat sepi yang kring itu, waktu malaikat bicara sama dia di gunung Sinai. De su trima Allah pu ajaran tentang bagemana tong bisa hidup trus deng Allah. De yang trima ajaran itu untuk tong pu nene moyang sampe deng tong skarang ini.

39Tapi tong pu nene moyang tra mo dengar dia, mala dong tolak dia trus dalam dong pu hati mo kembali ke Mesir. 40Dong bilang sama Harun#7:40 Harun ni de Musa pu kaka. Tuhan pake dia sama Musa untuk bawa orang Israel kluar tana Mesir (Keluaran 3—14). Nanti Harun yang jadi Pemimpin Imam yang pertama (Keluaran 28—29). begini, ‘Musa de su bawa tong kluar dari tana Mesir, trus skarang tong tra tau apa yang ada jadi deng dia. Karna itu, bikin untuk tong patung-patung dulu, yang tong bisa semba. Biar dong pimpin deng tunjuk tong jalan.’#Keluaran 32:1 41Waktu itu dong su bikin patung satu. Patung itu macam anak sapi. Habis itu dong kas korban binatang, trus bikin pesta untuk dong semba patung yang dong su bikin deng dong pu tangan sendiri. 42Waktu bikin begitu, Allah bale blakang dari dorang. De kas biar dong semba matahari, bulan deng bintang.#7:42 matahari, bulan deng bintang ‒ Bahasa Yunani: tentara langit. Ini maksud matahari, bulan, deng bintang yang suku lain waktu itu biasa semba. Smua jadi sperti yang nabi-nabi su bilang dalam dong pu kitab. Nabi Amos tulis kalo Allah bilang,

‘Heee, orang-orang Israel.

Kam ada di tempat sepi yang kring 40 taun,

tapi kam tra perna kas korban binatang untuk Saya.

43 Mala kam bawa dewa Molokh # 7:43 Molokh itu planet Venus yang orang Kanaan deng orang Fenisia dong semba, dong liat dewa itu atas smua langit deng matahari. Dong potong dong pu anak sendiri untuk Molokh (Liat Imamat 20:1-5 ). pu tenda kecil juga sama-sama deng patung bintang dari kam pu dewa Refan.#7:43 Refan itu planet Saturnus yang orang Mesir dong semba. Refan itu nama Yunani untuk dewa itu, di kitab Amos de pake nama Yahudi untuk dewa yang sama, itu Kewan.

Kam sendiri yang bikin patung-patung trus semba itu.

Karna itu, Sa nanti buang kam lebi jau dari Kota Babel sana.’ ” # Amos 5:25-27

44Stefanus bilang,

“Eh sodara! Waktu tong pu nene moyang ada di tempat sepi yang kring, dong bawa tenda sembayang yang jadi bukti kalo Allah ada deng dorang.#7:44 tenda sembayang yang jadi bukti kalo Allah ada deng dorang ‒ Bahasa Yunani: tenda saksi. Allah tulis spulu printa di dua batu trus kasi ke Musa untuk orang Israel harus ikut. Batu yang ada tulis spulu printa tu dong panggil ʻsaksiʼ trus dong simpan di kotak kusus di dalam tenda itu. Dong panggil itu ʻtenda saksiʼ karna dong simpan batu ʻsaksiʼ di dalam. Batu deng tenda itu satu tanda janji antara Allah deng orang Israel. Musa bikin tenda itu ikut conto yang Allah su kas liat ke dia.#Keluaran 25:8-40 45Trus tenda itu yang tong pu nene moyang dong trima. Trus dong bawa sama-sama dong waktu Yosua pimpin dong untuk rebut tana ini. Waktu itu Allah usir bangsa lain dari depan tong pu nene moyang. Tenda itu masi ada sampe Raja Daud pu jaman.

46Daud de bikin Allah pu hati snang. De minta sama Allah supaya de bisa kas bediri ruma untuk Allah, supaya Yakub pu anana cucu smua bisa semba Allah disitu. 47Tapi de pu anak Salomo yang bangun ruma untuk Allah. 48Tapi Allah Yang Paling Tinggi tra tinggal di dalam ruma-ruma yang dapa bangun deng tangan manusia,#7:48 ruma-ruma yang dapa bangun deng tangan manusia ‒ Disini Stefanus maksud untuk kas renda Ruma Allah trus bilang kalo itu sala untuk lebi kas tunjuk hormat sama tempat itu. sperti yang nabi satu su tulis, 49Tuhan bilang,

‘Surga itu sama sperti Sa pu kursi raja.

Baru dunia ini kecil macam Sa pu tempat taru kaki.

Kam mo bangun ruma yang bagemana lagi untuk Saya?

Trus, nanti Sa tinggal di tempat yang mana?

50 Kam tra tau kalo Sa sendiri yang bikin ini smua ka?’ ” # Yesaya 66:1-2

51Trus Stefanus bilang,

“Kam orang-orang yang kapla batu! Kam pu hati deng tlinga su tutup tra bisa dengar Allah pu kata-kata, kam slalu mlawan Roh Allah sama sperti kam pu nene moyang. 52Nabi-nabi sapa yang kam pu nene moyang dong tra siksa? Mala dong bunu nabi-nabi dulu yang kastau tentang Orang Benar#7:52 Orang Benar ‒ Ini satu nama yang dong pake untuk Raja Yang Allah Pili. yang mo datang, trus skarang kam su kasi deng bunu Dia. 53Allah pu malaikat-malaikat su kastau tentang Tuhan pu hukum yang Musa su tulis untuk kam, tapi kam tra ikut itu.”

Orang-orang lempar Stefanus deng batu

7:54—8:1a

54Begitu anggota-anggota Sidang Agama dengar itu, dong mara deng sakit hati skali sama dia. 55Tapi Roh Allah yang kuasai Stefanus, trus de angkat muka ke langit. Begini, de liat Allah pu cahaya yang luar biasa trus Yesus ada bediri di Allah pu sebla kanan, tempat yang paling tinggi. 56Stefanus bilang, “Sodara smua! Sa liat surga ada tabuka trus Anak Manusia yang Allah utus ada bediri di Allah pu sebla kanan.”

57Dengar begitu, anggota-anggota Sidang Agama tutup dong pu tlinga trus batariak kras-kras sama-sama lari srang dia. 58Dong tangkap seret de kluar kota, orang-orang yang su jadi saksi kas sala Stefanus buang dong pu pakean dekat laki-laki muda satu yang pu nama Saulus biar de jaga, trus dong lempar Stefanus deng batu.#7:58 dong lempar Stefanus deng batu ‒ Waktu Stefanus bilang de liat Anak Manusia yang Allah utus bediri di Allah pu sebla kanan, de maksud kalo Yesus itu Allah. Pemimpin agama Yahudi deng orang lain su tau kalo nama ʻAnak Manusiaʼ Yesus biasa pake untuk maksud Dia sendiri, deng arti kalo Dia Raja Yang Allah Pili. Orang dari Sidang Agama ini dong tra percaya itu, jadi dong bilang Stefanus su hina Allah deng bilang begitu. Dari dong pu hukum, orang yang hina Allah harus dapa hukum mati, lempar deng batu (Imamat 24:16). Dong mara skali jadi dong tra pake cara resmi untuk kas hukum dia.

59Waktu dong ada lempar Stefanus deng batu, Stefanus berdoa sama Tuhan de bilang begini, “Tuhan Yesus, ambil suda sa pu nyawa!” 60Trus de tanam lutut ke tana batariak deng suara kras, “Tuhan, kas ampun orang-orang yang su bikin sa sala.” Habis bilang itu, de mati.

Currently Selected:

Kisah Para Rasul 7: MPapua

Highlight

Copy

Compare