Kisah Para Rasul 15

Sidang di Yerusalem

15:1-21

1Satu kali begini, ada orang-orang yang datang dari Yudea ke Antiokhia trus mulai kas ajar sodara-sodara disitu, “Kalo kam tra sunat ikut hukum Musa, kam tra bisa slamat.” 2Tapi Paulus deng Barnabas lawan kras deng tolak apa yang dong bilang. Jadi jemaat disitu utus Paulus, Barnabas, deng orang lain pigi ke utusan-utusan deng tua-tua jemaat di Kota Yerusalem, baru bicara tentang masala itu. 3Trus jemaat disitu dong antar de kluar baik-baik dari kota itu. Dong pigi lewat daera Fenisia deng daera Samaria. Trus di daera-daera itu dong crita kalo orang-orang yang bukan Yahudi dong su percaya sama Yesus. Dengar crita itu sodara-sodara disitu dong pu hati snang skali.

4Begitu dong sampe di Kota Yerusalem, orang-orang percaya disitu trima dong baik-baik, juga utusan-utusan deng tua-tua jemaat, trus dong crita smua yang Allah su bikin lewat dorang. 5Tapi ada orang-orang dari klompok Farisi yang su percaya, de bediri deng bilang, “Orang-orang yang bukan Yahudi musti dapa sunat deng harus skali ikut hukum Musa.”

6Jadi, Yesus pu utusan-utusan deng tua-tua jemaat dong kumpul untuk bicara tentang itu. 7Stela lama skali dong duduk adu mulut tentang itu, Petrus de bediri deng bicara sama dong smua,

“Sodara-sodara smua! Kam su tau to? Waktu dulu Allah su pili sa untuk kastau Brita Baik#15:7 Allah su pili sa untuk kastau Brita Baik ‒ Petrus crita ini stela spulu taun su jadi, crita ada di pasal 10:1-43. sama orang-orang yang bukan Yahudi supaya dong dengar deng percaya. 8Allah tau hati manusia, Allah juga yang su kas tunjuk kalo Allah trima orang-orang yang bukan Yahudi. Karna Allah su kasi Roh Allah sama dong sperti yang De su kasi sama tong juga.#2:4; 10:44 9Allah tra kas beda-beda tong deng dorang, De kas bersi dong pu hati karna dong percaya. 10Kalo begitu, knapa kam mo mlawan Allah deng kasi beban yang brat sama orang-orang yang ikut Yesus, yang mana mo tong pu nene moyang deng tong sendiri tra bisa pikul itu? 11Tong tra bole bikin begitu. Tong percaya kalo Allah kas slamat tong deng cara kas tunjuk De pu baik sama tong lewat Tuhan Yesus, begitu juga De kas slamat dorang.”

12Jadi orang-orang yang kumpul disitu dong diam smua. Trus Barnabas deng Paulus dong lanjut crita smua itu deng tanda heran yang Allah bikin lewat dong di tenga orang-orang yang bukan Yahudi.

13Stela Barnabas deng Paulus slesai bicara, Yakobus de bilang,

“Sodara-sodara smua! Coba kam dengar saya. 14Simon Petrus de baru bilang sama tong tentang bagemana Allah De sayang sama orang-orang yang bukan Yahudi. Trus Allah pili dari dong sapa-sapa yang nanti jadi Allah pu orang-orang. 15Itu sama deng yang nabi-nabi tulis kalo Tuhan bilang begini,

16 ‘Habis itu Sa kembali

mo angkat dari Daud pu turunan satu orang untuk jadi raja lagi.

Itu macam deng ruma yang su hancur,

Sa kas baik ruma yang rusak sampe bagus lagi.

17 Supaya smua orang bukan Yahudi datang cari Saya,

smua orang yang Sa panggil jadi Sa pu orang-orang.

Begitu Tuhan pu kata-kata yang bikin smua ini, # Amos 9:11-12

18deng kastau dari dulu.’

19Karna itu mnurut saya, tong tra bole bikin sulit orang-orang yang bukan Yahudi yang mo percaya sama Allah. 20Tapi tong harus tulis surat sama dong deng kas naseat dorang, supaya dong kas jau diri dari makanan yang su kasi sama patung-patung. Trus jang makan daging binatang yang orang cekik sampe mati. Jang makan dara deng jang bikin barang kurang ajar.#Imamat 17:10-14; 18:6-23 21Karna hukum Musa su kastau dari dulu di tiap kota-kota, trus sampe skarang hukum Musa dong slalu baca stiap hari ibada di orang Yahudi pu tempat ibada.”

Surat untuk orang percaya yang bukan Yahudi

15:22-34

22Habis itu, utusan-utusan, tua-tua jemaat, deng smua orang-orang percaya tu dong spakat untuk pili dari tenga dorang, satu dua orang yang mo dapa utus ke Antiokhia sama-sama deng Paulus deng Barnabas. Jadi dong pili Silas deng Yudas yang biasa dong panggil juga Barsabas. Dong dua ini pemimpin di tenga-tenga sodara yang sama-sama percaya itu. 23Dong tulis trus kirim surat satu sama dorang. Surat itu de pu isi begini,

“Salam dari utusan-utusan deng tua-tua jemaat, kam pu sodara-sodara. Untuk orang-orang percaya yang bukan Yahudi di Kota Antiokhia, daera Siria, deng Propinsi Kilikia.

24Tong su dengar kalo ada orang-orang dari sini, yang su pigi kas ajar kam tentang hal-hal yang bikin kam gelisa deng bingung. Padahal tong tra suru dong bikin itu. 25Itu jadi tong su spakat deng satu hati pili trus utus satu dua orang untuk pigi ke kam. Dong sama-sama deng Barnabas deng Paulus yang tong sayang, 26yang su hampir mo mati karna kastau orang tentang tong pu Tuhan Yesus Kristus. 27Jadi tong utus Yudas deng Silas untuk pigi ke sodara-sodara kam. Dong juga nanti kastau pesan yang tong tulis ini sama kam.

28Karna Roh Allah kastau ini trus tong juga stuju kalo kam jang dapa kasi beban yang brat skali dari apa yang penting saja sperti: 29Kam tra bole daging yang su kasi untuk jadi persembahan ke patung-patung, tra bole makan daging binatang yang dong cekik sampe mati, jang makan dara, deng jang bikin barang kurang ajar. Kalo kam kas jau diri dari hal-hal itu, kam su bikin yang baik. Begitu saja deng salam!”

30Jadi dong dapa utus, dong pigi ke Antiokhia. Sampe di kota itu, dong minta smua anggota jemaat itu kumpul trus kasi surat itu sama dong smua. 31Waktu anggota jemaat dong baca surat itu, dong snang skali deng surat yang de pu isi kas hibur dong pu hati.

32Karna Yudas deng Silas dong dua juga nabi, dong lama bicara-bicara untuk kas naseat sodara-sodara itu deng kas kuat dong pu hati. 33Stela Yudas deng Silas tinggal brapa minggu disitu, deng hati tenang sodara-sodara di Antiokhia kas lepas dong kembali sama orang-orang yang su utus dong ke situ. [34Tapi Silas de tetap tinggal disitu.]#15:34 Tapi Silas de tetap tinggal disitu ‒ Bagian yang ada dalam kurung ini trada di teks-teks bahasa Yunani yang paling lama tapi ada di brapa teks Yunani stela yang paling lama itu.

Paulus deng Barnabas pisa

15:35-41

35Paulus deng Barnabas tinggal lebi lama di Antiokhia. Dong kas ajar deng kastau Tuhan pu Brita Baik sama-sama deng banyak orang lain. 36Tapi stela brapa lama, Paulus bilang ke Barnabas begini, “Mari tong kembali pigi ke tong pu sodara-sodara yang percaya Yesus di smua kota-kota yang tong su kastau Tuhan pu kata-kata, supaya tong bisa tau dong pu kabar.” 37Barnabas de mo bawa Yohanes yang biasa dong sebut Markus.#15:37 Barnabas de mo bawa Yohanes yang biasa dong sebut Markus ‒ Mnurut pasal 13:13, Yohanes Markus su kembali ke Yerusalem. Dari ayat itu de blum perna muncul lagi, tapi ayat ini sperti kastau kalo de ada di Antiokhia waktu Paulus deng Barnabas ada disitu. 38Tapi Paulus de tra stuju kalo bawa orang yang su kas tinggal dong di Pamfilia, yang tra mo ikut kerja sama-sama deng dorang. 39Itu yang bikin sampe Paulus baku mara deng Barnabas sampe dong dua baku pisa, trus Barnabas de sama-sama deng Markus dong pigi naik kapal ke Siprus. 40Paulus de pili Silas untuk ikut deng dia, stela sodara-sodara di Antiokhia doa supaya Tuhan kas tunjuk De pu baik sama dorang. 41Paulus dong kliling Siria deng Kilikia, disana dong kas kuat orang-orang percaya disitu supaya tetap percaya.

Currently Selected:

Kisah Para Rasul 15: MPapua

Highlight

Copy

Compare