Kisah Para Rasul 13

1Waktu itu di tenga-tenga orang-orang percaya di Kota Antiokhia ada nabi-nabi deng guru-guru. Dong tu Barnabas, Simeon yang dong biasa panggil de orang Neger#13:1 Neger pu arti tu ʻhitamʼ, mungkin karna de pu kulit hitam., Lukius orang Kirene, Menahem yang dapa kas besar sama-sama deng Raja Herodes, deng Saulus.

2Satu kali waktu dong ibada sama Tuhan deng puasa, begini Roh Allah bilang sama dorang, “Kas pisa Barnabas deng Saulus untuk Saya, Sa su panggil dong untuk tugas yang Sa su kas siap.” 3Habis dong doa deng puasa lagi, dong taru tangan ke atas dua orang itu, trus utus dong dua pigi.

Saulus deng Barnabas di Siprus

13:4-12

4Jadi, habis Roh Allah suru Barnabas deng Saulus pigi, dong pigi ke plabuhan Seleukia. Dari situ dong pigi layar ke pulou Siprus. 5Begitu dong sampe di Kota Salamis, dong langsung pigi kastau Allah pu kata-kata di tempat ibada orang Yahudi. Yohanes Markus de yang bantu dong dua.

6Dong kliling pulou itu sampe ke Kota Pafos. Disana dong ketemu deng orang Yahudi satu, de pu nama Baryesus. De ni tukang fui-fui orang deng juga pura-pura jadi nabi. 7De ni kawan gubernur pulou itu. Gubernur pu nama Sergius Paulus, de ni pintar skali.

Satu kali gubernur panggil Barnabas deng Saulus karna de mo dengar Allah pu kata-kata. 8Tapi tukang fui-fui itu, yang de pu nama lain Elimas, de bikin cara untuk lawan Barnabas deng Saulus biar Sergius Paulus jang percaya Yesus.

9Tapi Roh Allah kuasai Saulus yang orang panggil juga Paulus, de liat Elimas baik-baik, 10deng bilang,

“Elimas, Iblis pu anak! Ko memang jahat deng tukang tipu-tipu orang. Ko tra suka smua yang benar. Ko tra bisa stop putar balik Tuhan pu ajaran ka? 11Skarang ko liat, Tuhan hukum ko! Ko tra bisa liat apapa lagi brapa hari ini, biar sinar matahari juga.”

Pas waktu itu juga de mata glap deng tra bisa liat apapa sampe de harus raba-raba untuk minta orang bantu de jalan. 12Liat apa yang su jadi itu, gubernur de percaya karna de heran skali deng ajaran tentang Tuhan Yesus.

Paulus ke Antiokhia, di Pisidia

13:13-49

13Paulus dong kas tinggal Pafos trus dong pigi layar ke Kota Perga di Propinsi Pamfilia. Di kota itu Yohanes Markus kas tinggal Paulus dong baru de balik ke Yerusalem. 14Dari Perga dong lanjut pigi sampe di Kota Antiokhia yang di daera Pisidia.#13:14 Kota Antiokhia yang di daera Pisidia ini lain dari Antiokhia yang di pasal 11, itu di Siria. Antiokhia ini kira-kira 200 kilometer dari Perga, dong jalan kaki. Waktu orang Yahudi pu hari ibada, dong pigi duduk di dong pu tempat ibada. 15Slesai dong baca kitab hukum Musa deng kitab yang nabi-nabi tulis, kepala-kepala tempat ibada suru orang pigi tanya Paulus dorang, “Sodara-sodara, kalo ada pesan untuk kas naseat jemaat disini, mari bilang sama kitong!”

16Paulus de bediri, kas kode deng tangan ke orang-orang supaya tenang, baru de bicara,

“Sodara-sodara orang Israel deng orang bukan Yahudi yang pu hidup takut Allah, kam dengar ini! 17Allah yang tong orang Israel semba, su pili tong pu moyang-moyang trus bikin dong tamba banyak deng kuat waktu dong tinggal di tana Mesir jadi orang asing. Karna Allah begitu kuat, De bawa dong kluar dari Mesir. 18Slama 40 taun, De sabar deng dong pu klakuan waktu dong ada di tempat sepi yang kring. 19Tuju bangsa di negri Kanaan Allah kas binasa. Trus De bagi-bagi daera Kanaan itu untuk orang-orang Israel, sampe daera Kanaan jadi dong pu warisan tana.#Ulangan 7:1; Yosua 14:2 20Smua itu jadi slama 450 taun.#13:20 450 taun ini tentang 400 taun yang dong tinggal di Mesir, trus 40 taun dong jalan kliling di tempat sepi yang kring, sama spulu taun lagi stela dong masuk trus kas kala smua bangsa di Kanaan deng bagi-bagi tana yang jadi dong pu milik.

Stela bagi-bagi tana Kanaan itu, Allah kasi dong hakim-hakim sampe di jaman Nabi Samuel.#Hakim-hakim 2:16; 1 Samuel 3:20 21Habis itu orang-orang Israel minta Nabi Samuel untuk pili satu orang jadi dong pu raja. Allah pili Saul, bapa Kish pu anak dari suku Benyamin. Saul de jadi raja untuk orang Israel slama 40 taun.#1 Samuel 8:5; 10:17-21 22Habis itu Allah kas turun Raja Saul, trus angkat Daud ganti Raja Saul. Tentang Daud Allah bilang, ‘Sa su liat kalo Daud, bapa Isai pu anak ni, de yang bikin snang Sa pu hati deng bikin smua yang Sa mau.’#1 Samuel 13:14; Mazmur 89:21

23Trus nanti dari Daud pu anana cucu tu Allah angkat satu Orang untuk kas slamat orang Israel. Smua itu jadi sperti yang Allah De janji. Orang itu Yesus. 24Seblum De mulai De pu playanan, Yohanes tukang baptis su bilang sama smua orang Israel dorang, supaya tobat dari dong pu dosa deng kasi dong pu diri untuk dapa baptis. 25Waktu mo slesai de pu kerja, Yohanes bilang ulang-ulang sama orang-orang, ‘Kam pikir sa sapa? Sa bukan Dia. Memang De mo datang stela saya, untuk mo buka De pu tali spatu saja sa tra pantas.’ ”

26Trus Paulus bilang,

“Sodara-sodara dari Abraham pu anana cucu, deng smua orang bukan Yahudi yang pu hidup takut Allah! Brita Baik tentang Yesus yang bisa kas slamat orang su sampe di kitong. 27Tapi orang Yahudi yang tinggal di Yerusalem deng pemimpin-pemimpin yang tra sadar kalo Yesus datang untuk kas slamat dorang. Biar stiap hari ibada dong ada dengar dari nabi-nabi pu kitab yang dong baca, dong tra mngerti itu. Sampe dong kas hukum mati sama Yesus. Tapi deng cara itu, apa yang nabi-nabi su bilang tu itu jadi. 28Biar dong tra dapat Yesus pu sala untuk jadi alasan untuk bunu Dia, dong ke Pilatus trus minta deng paksa untuk de bunu Yesus.

29Jadi, dong bikin Yesus sperti yang nabi-nabi su tulis. Dong bunu Yesus trus orang satu kas turun De dari kayu salib trus taru De dalam goa kubur. 30Tapi Allah kas hidup De lagi dari tenga-tenga orang mati. 31Trus ulang-ulang kali Yesus kas tunjuk diri ke orang-orang yang datang sama-sama deng Dia, dari Galilea ke Yerusalem. Dong itu yang skarang jadi saksi-saksi untuk Dia ke bangsa Israel.

32Jadi, skarang ini tong kastau Brita Baik ini sama kam, tentang janji yang dulu-dulu Allah su bilang sama tong pu nene moyang. 33Janji itu suda yang Allah buat untuk dong pu turunan, itu untuk tong. De buat janji itu deng cara kas hidup Yesus kembali sperti yang tatulis dalam Mazmur pasal dua, Allah su bilang tentang Yesus begini,

‘Ko ini, Sa pu anak!

Hari ini Sa su jadi Ko pu Bapa.’ # Mazmur 2:7

34Allah su kas hidup De lagi dari tenga-tenga orang mati trus De trakan mati lagi. Tentang smua ini Allah bilang begini,

‘Dari dulu Sa su janji mo kasi berkat sama Daud.

Sa pu janji itu suci, deng tetap Sa bikin.

Trus nanti Sa bikin itu sama kam.’ # Yesaya 55:3

35Karna itu De juga bilang di Mazmur lain,

‘Tuhan tra kas biar De pu Orang Suci pu badan busuk dalam kubur.’ # Mazmur 16:10

36Daud bilang begitu, de tra bicara tentang de pu diri sendiri. Karna, stela de bikin ikut apa yang Allah mau waktu de pu jaman, de mati trus dong kubur de di sebla de pu moyang-moyang trus de pu mayat busuk dalam kubur.#1 Raja-raja 2:10 37Tapi Yesus yang Allah kas hidup De lagi, itu Yesus pu mayat yang tra busuk.

38-39Jadi sodara dong harus percaya: Karna Yesus mati di kayu salib, tong pu dosa-dosa dapa kas ampun. Ini pesan yang tong kastau sama kam. Sapa saja yang percaya Yesus, de su benar depan Allah. Karna tong tra bisa benar depan Allah kalo tong hanya ikut hukum Musa. 40Itu jadi kam musti ingat itu baik-baik! Supaya kam jang kena yang nabi-nabi bilang,

41 ʻIngat itu baik-baik!

Kam yang suka bicara ejek Sa pu ajaran,

kam nanti heran trus mati.

Karna Sa nanti bikin satu barang luar biasa di kam pu jaman,

satu barang yang nanti kam tra percaya itu,

biar ada yang kas jlas sama kam.’ ” # Habakuk 1:5

42Begitu Paulus habis bicara, Paulus deng Barnabas mo kas tinggal tempat ibada itu begini, orang-orang disitu minta dong kembali di hari ibada minggu depan untuk kastau lebi lagi tentang itu smua. 43Stela slesai ibada, banyak orang Yahudi deng yang bukan Yahudi tapi su ikut agama Yahudi, dong ikut Paulus deng Barnabas. Jadi dong dua kas naseat supaya dong mo trus hidup dalam Allah pu baik yang De su kas tunjuk sama dorang.

44Minggu brikut pas hari ibada, hampir smua orang dalam kota itu datang dengar Tuhan pu kata-kata. 45Waktu orang Yahudi pu pemimpin dong liat orang banyak itu, dong iri. Jadi waktu Paulus ada bicara, dong mlawan apa yang Paulus bilang trus dong juga bicara hina Paulus.

46Tapi deng brani Paulus deng Barnabas bilang,

“Memang tong harus kastau Allah pu kata-kata ini duluan sama kam orang-orang Yahudi. Tapi karna kam tra mo percaya itu, jadi kam sendiri su kas tunjuk kalo kam itu tra pantas hidup deng Allah sampe trada akir. Karna itu tong mo bale blakang dari kam, trus pigi kastau Allah pu kata-kata itu sama orang-orang bukan Yahudi. 47Karna Tuhan su printa tong begini,

‘Sa su pili kam untuk jadi trang

untuk orang-orang bukan Yahudi,

biar smua orang sampe ujung bumi bisa tau kalo Sa mo kas slamat dorang.’ ” # Yesaya 49:6

48Dengar itu orang-orang bukan Yahudi dong smua rasa snang skali, trus dong puji Tuhan pu kata-kata, trus smua orang di kota itu yang Tuhan su pili untuk hidup sampe trada akir, dong jadi percaya. 49Trus Tuhan pu kata-kata sebar ke smua daera itu.

Pigi ke Ikonium, Listra deng Derbe

13:50-52

50Orang-orang Yahudi dong tusuk-tusuk mulut sama dong pu orang-orang besar deng prempuan-prempuan kaya yang hidup ikut Allah. Dong bikin sampe Paulus deng Barnabas dapa siksa trus dong usir dong dua dari daera itu. 51Jadi, dong dua kas bersi debu dari dong pu kaki supaya jadi tanda ke orang-orang itu trus pigi ke Ikonium. 52Orang-orang yang ikut Yesus yang ada di Kota Antiokhia dong pu hati snang skali, trus Roh Allah kuasai dorang.

Currently Selected:

Kisah Para Rasul 13: MPapua

Highlight

Copy

Compare