Kisah Para Rasul 11

Petrus kastau alasan de baptis orang-orang yang bukan Yahudi

11:1-18

1Yesus pu utusan-utusan deng sodara-sodara yang percaya di Yudea, dong dengar kalo orang-orang yang bukan Yahudi juga su trima Allah pu kata-kata.

2Jadi, waktu Petrus dong sampe di Yerusalem, orang-orang Yahudi kas sala dia. 3Dong bilang, “Knapa ko pigi ke orang-orang yang bukan Yahudi pu ruma, tamba lagi ko duduk makan deng dorang!”

4Jadi Petrus de crita dong smua yang su jadi dari pertama. De bilang,

5“Satu kali, sa ada doa di Kota Yope. Begini sa liat sperti mimpi: Satu barang de pu bentuk sperti kain yang lebar, de pu empat sudut tagantung ke atas, yang dapa kas turun dari langit sampe di sa pu depan. 6Sa liat di dalam kain lebar itu ada smua macam binatang kaki empat, ada yang liar, ada yang mrayap, ada burung-burung juga. 7Trus, sa dengar ada suara yang bilang sama saya, ‘Petrus ko bangun! Ko potong deng ko makan itu!’ 8Tapi sa jawab, ‘Tuhan, tra bisa! Sa tra bisa, karna macam begitu yang pamali deng tra bersi tra perna masuk dalam sa pu mulut.’ 9Begitu tapi yang kedua kali suara dari surga bicara sama saya, ‘Apa yang Allah bilang itu bersi, jang ko anggap itu pamali.’

10Smua itu jadi sampe tiga kali baru smua itu taangkat kembali ke langit. 11Kaget begini, su ada tiga orang yang bediri depan ruma yang sa ada tinggal, dong dari Kaisarea dapa suru datang ke saya. 12Trus Roh Allah bilang ke saya, ‘Jang pili-pili orang, pigi saja sama-sama dorang!’ Trus enam sodara ini dari Yope dong ikut saya. Tong masuk dalam orang itu pu ruma, 13baru de crita sama kitong, bagemana de liat satu malaikat bediri di dalam de pu ruma trus bilang sama dia, ‘Suru orang pigi ke Kota Yope, jemput Simon yang dong biasa panggil Petrus. 14De nanti kastau pesan sama kam, yang nanti kas slamat ko deng ko pu kluarga smua.’ ”

15Petrus lanjut crita de bilang,

“Waktu sa mulai bicara, Roh Allah turun ke dong sama sperti waktu itu turun ke tong smua. 16Trus sa ingat yang Tuhan bilang, ‘Yohanes de baptis deng air, tapi nanti kam dapa baptis deng Roh Allah.’ 17Jadi itu betul. Allah su kasi De pu Roh sama orang yang bukan Yahudi. Itu sama deng Allah su kasi De pu Roh sama tong waktu tong su percaya Tuhan Yesus Kristus. Jadi, bagemana sa bisa larang Allah?”

18Waktu orang-orang Yahudi dengar Petrus bilang begitu, dong su tra bisa bilang apapa lagi. Trus dong puji kas tinggi Allah deng bilang, “Jadi skarang untuk orang-orang yang bukan Yahudi, Allah buka jalan juga supaya dong kas tinggal dong pu dosa-dosa, untuk dong bisa hidup deng Allah.”

Barnabas deng Saulus pigi ke Antiokhia

11:19-30

19Waktu dong bunu Stefanus, banyak sodara-sodara dong yang ikut Yesus dapa siksa sampe dong smua tapisa ke banyak tempat. Sampe ke Fenisia, Siprus deng Antiokhia, dong cuma kastau Allah pu kata-kata tentang Yesus sama orang Yahudi saja. 20Tapi dari dong ada orang-orang Siprus deng Kirene yang sampe di Antiokhia, dong kastau Brita Baik tentang Tuhan Yesus untuk orang yang bukan Yahudi juga. 21Tuhan pu kuasa ada sama-sama dorang, sampe banyak orang yang percaya deng ikut Tuhan.

22Orang-orang percaya di Yerusalem dong dengar kalo banyak orang yang bukan Yahudi su percaya Yesus. Jadi dong suru Barnabas pi ke Antiokhia 23-24karna Barnabas de pu hati baik trus Roh Allah kuasai dia, trus de betul-betul percaya Yesus. Waktu Barnabas sampe di Antiokhia, trus de liat memang Allah su kas tunjuk De pu baik, de snang skali. Trus de kas naseat supaya dong tetap percaya sama Tuhan deng betul-betul ikut Tuhan Yesus pu mau. Trus tamba banyak orang-orang mo ikut Tuhan.

25Trus Barnabas pigi ke Kota Tarsus cari Saulus. 26Habis ketemu Saulus, dong dua ke Antiokhia. Dong tinggal deng orang-orang percaya disitu sampe satu taun, dong juga kas ajar banyak orang. Di Antiokhia tu pertama kali orang-orang ikut Yesus dong sebut orang Kristen.

27Pas waktu itu nabi-nabi dari Yerusalem datang ke Antiokhia. 28Satu orang dari dong yang nama Agabus#11:28 Agabus ‒ De muncul lagi di 21:10. bediri trus deng kuasa dari Roh Allah de kastau kalo di sluru dunia nanti jadi klaparan yang besar. Trus memang itu jadi di jaman Raja Besar Klaudius. 29Jadi orang-orang yang ikut Yesus spakat untuk kumpul uang dari yang dong mampu kasi saja, trus kirim ke sodara-sodara yang tinggal di Yudea. 30Dong bikin sperti itu, trus dong kirim ke tua-tua jemaat di Yudea lewat Barnabas deng Saulus.

Currently Selected:

Kisah Para Rasul 11: MPapua

Highlight

Copy

Compare